1, 2. Nawẹ nuhe Yẹwhehodọtọ 11:6 dọ tindo kanṣiṣa hẹ azọ́n wẹndagbe lilá tọn lọ gbọn?

TO OTÒ delẹ mẹ, gbẹtọ lẹ nọ kẹalọyi wẹndagbe lọ po homẹhunhun po. E nọ didọ nuhe yé to nukundo lọ pẹẹ niyẹn! To otò devo lẹ mẹ, mẹlẹ ma nọ do ojlo hia sọmọ to Jiwheyẹwhe mẹ kavi to Biblu mẹ. Nawẹ gbẹtọ lẹ nọ yinuwa do to paa mẹ to lẹdo towe mẹ? Depope he whẹho lọ yin, Jehovah nọ donukun dọ mí ni zindonukọn to yẹwhehodidọ lọ mẹ kakajẹ whenue ewọ na dọ e pé.

² To ojlẹ dide Jehovah tọn mẹ, azọ́n yẹwhehodidọ tọn lọ na wá vivọnu bọ “opodo lọ na wá.” (Mat. 24:14, 36) Kakajẹ whenẹnu, nawẹ mí sọgan setonuna tudohomẹnamẹ lọ he dọ ‘a dike alọ towe gbọjẹ blo’ * gbọn?—Hia Yẹwhehodọtọ 11:6.

3. Etẹ ji wẹ mí na dọhodo to hosọ ehe mẹ?

³ Hosọ he jẹnukọn dọhodo onú ẹnẹ delẹ ji he mí dona wà nado sọgan lẹzun “whèhutọ gbẹtọ lẹ tọn” kọdetọn dagbenọ lẹ. (Mat. 4:19) Hosọ ehe na dọhodo aliho atọ̀n delẹ ji he mẹ mí sọgan hẹn gbemima mítọn nado dọyẹwheho lọ lodo te mahopọnna ninọmẹ depope he mí pannukọn. Mí na plọn nuhewutu e yin nujọnu (1) ma nado yin ayihafẹsẹna, (2) nado nọ fahomẹ, podọ (3) nado hẹn yise he dolido de go.

4. Naegbọn mí dona ze ayiha do azọ́n he Jehovah dena mí lọ ji?

⁴ Jesu dọ dọdai nujijọ gọna ninọmẹ delẹ tọn he na dohiagona azán godo tọn lẹ, bo sọgan fẹayihasẹna hodotọ etọn lẹ  sọn azọ́n yẹwhehodidọ tọn lọ ji. E dotuhomẹna devi etọn lẹ nado nọ “gbọṣi nukle.” (Mat. 24:42) To egbehe, mí nọ pehẹ ayihafẹsẹnamẹnu dopolọ lẹ he zọ́n bọ mẹhe nọgbẹ̀ to azán Noa tọn gbè lẹ ma payi avase he e lá go. (Mat. 24:37-39; 2 Pita 2:5) Enẹwutu, ojlo mítọn wẹ nado ze ayiha do azọ́n he Jehovah dena mí lọ ji.

5. Nawẹ Owalọ lẹ 1:6-8 basi zẹẹmẹ obá he mẹ azọ́n yẹwhehodidọ tọn lọ na gbloada jẹ tọn gbọn?

⁵ To egbehe, mí dona na ayidonugo sọwhiwhe tọn azọ́n yẹwhehodidọ Ahọluduta lọ tọn. Jesu dọ dọdai dọ azọ́n ehe na gbloada jẹ obá daho mẹ bo na zindonukọn na ojlẹ susu to okú etọn godo. (Joh. 14:12) To okú Jesu tọn godo, delẹ to devi etọn lẹ mẹ lẹkọyi azọ́n whèhuhu tọn kọ̀n. To fọnsọnku Jesu tọn godo, e gọalọna devi etọn delẹ nado wle whèvi susu to azọ́njiawu-liho. E yí dotẹnmẹ hundote enẹ zan nado zinnudeji na yé dọ azọ́ndenamẹ yetọn nado yin whèhutọ gbẹtọ lẹ tọn yin nujọnu hugan nuwiwa devo depope. (Joh. 21:15-17) Ojlẹ vude whẹpo Jesu do lẹkọyi olọn mẹ, e dọna devi etọn lẹ dọ azọ́n kunnudide tọn he emi bẹjẹeji lọ na gbloada zẹ̀ dogbó aigba Islaeli tọn lẹ tọn go. (Hia Owalọ lẹ 1:6-8.) To owhe susu lẹ godo, Jesu wá do numimọ de hia apọsteli Johanu gando nuhe na jọ “to azán Oklunọ tọn gbè” * lẹ go. To nususu he Johanu mọ lẹ mẹ, e mọ nujijọ he hẹn awujimẹ ehe: To anademẹ angẹli de tọn glọ, “wẹndagbe madopodo” de to yinyin lilá na “akọta lẹpo, hẹnnu lẹpo, ogbè lẹpo podọ gbẹtọ lẹpo.” (Osọ. 1:10; 14:6) E họnwun dọ ojlo Jehovah tọn na mí to egbehe wẹ yindọ mí ni to mahẹ tindo to azọ́n kunnudide tọn pligidi ehe mẹ kakajẹ whenue e na wá vivọnu.

6. Nawẹ mí sọgan ze ayiha do azọ́n yẹwhehodidọ tọn lọ ji gbọn?

⁶ Ayiha mítọn sọgan gbọṣi azọ́n yẹwhehodidọ  tọn lọ ji eyin mí nọ lẹnnupọndo nususu he Jehovah to wiwà nado gọalọna mí lẹ ji. Di apajlẹ, e nọ wleawuna núdùdù gbigbọmẹ tọn susugege lẹ na mí, taidi owe zinjẹgbonu lẹ gọna dehe nọ yin yiyizan to azọ́nwanu lẹtliki tọn ji lẹ, hoyidokanji lẹ, video lẹ po nuhe nọ yin zizedo Televiziọn mítọn ji to Intẹnẹt ji lẹ po. Pọ́n bo: To nọtẹn Intẹnẹt tọn mítọn ji, nudọnamẹ lẹ tin-to-aimẹ to ogbè 1 000 linlán mẹ! (Mat. 24:45-47) To aihọn he klan to tonudidọ, sinsẹ̀n po akuẹzinzan-liho po de mẹ, pọninọ nujọnu tọn tin to devizọnwatọ Jiwheyẹwhe tọn livi ṣinatọ̀n linlán lẹ ṣẹnṣẹn lẹdo aihọn pé. Di apajlẹ, to vendredi 19 avril 2019, Kunnudetọ he tin lẹdo aihọn pé lẹ hodo tito dogbapọnna wefọ egbesọegbesọ tọn de tọn to pọmẹ. To gbenẹgbe whèjai, gbẹtọ 20 919 041 wẹ pli nado basi hùnwhẹ Oflin okú Jesu tọn. Eyin mí lẹnnupọndo lẹblanulọkẹyi he mí tindo nado yí nukun do mọ azọ́njiawu azán mítọn gbè tọn ehe, bosọ to mahẹ tindo to e mẹ ji, mí nọ yin whinwhàn nado ze ayiha do azọ́n Ahọluduta lọ tọn ji.

7. Nawẹ apajlẹ Jesu tọn nọ gọalọna mí ma nado yin ayihafẹsẹna gbọn?

⁷ Nudevo he mí sọgan wà na ayiha mítọn nido gbọṣi azọ́n yẹwhehodidọ tọn lọ ji wẹ nado nọ hodo apajlẹ Jesu tọn. E ma dike nudepope ni fẹayihasẹna ẹn nado dekunnu gando nugbo lọ go. (Joh. 18:37) E ma yin yẹdoklọ whenue Satani ze “ahọluduta aihọn tọn lẹpo po gigo yetọn po” donukọnna ẹn, mọ e ma joawunanu whenue gbẹtọ lẹ jlo na yí i do dó ahọlu. (Mat. 4:8, 9; Joh. 6:15) E ma jo ede na ojlo adọkunnu lẹ tọn; mọdopolọ homẹkẹn sinsinyẹn ma gbàhundona ẹn. (Luku 9:58; Joh. 8:59) To whenue mí pehẹ whlepọn yise tọn lẹ, mí sọgan ze ayiha mítọn do fidopo eyin mí flin ayinamẹ apọsteli Paulu tọn. E dotuhomẹna Klistiani lẹ nado hodo apajlẹ Jesu tọn, na ‘onú nikaa ṣikọna yé bọ yé na jogbe’!—Heb. 12:3.

8. Etẹwẹ homẹfa zẹẹmẹdo, podọ naegbọn mí do hudo etọn titengbe todin?

⁸ Homẹfa yin nugopipe lọ nado nọ yí sọwhiwhe do nọte kakajẹ whenue ninọmẹ de diọ. Vlavo mí to nukundo vivọnu ninọmẹ ylankan de tọn, kavi hẹndi nuhe mí to tepọn na ojlẹ dindẹn de tọn wẹo, mí dona nọ fahomẹ. Yẹwhegán Habakuku jlo vẹkuvẹku dọ ninọmẹ ylankan he tin to Juda lẹ ni wá vivọnu. (Hab. 1:2) Devi Jesu tọn lẹ donukun dọ Ahọluduta lọ na “sọawuhia to afọdopolọji” bo na whlẹn yé sọn kọgbidinamẹ Lomu tọn si. (Luku 19:11) Mí to jejeji nado mọ azán he gbè Ahọluduta Jiwheyẹwhe tọn na de kanyinylan lẹpo sẹ̀ bọ aihọn yọyọ he mẹ dodowiwa te de na bẹjẹeji. (2 Pita 3:13) Ṣigba, mí dona fahomẹ bo nọtepọn ojlẹ dide Jehovah tọn. Lẹnnupọndo aliho delẹ he mẹ Jehovah nọ plọn mí nado fahomẹ te ji.

9. Apajlẹ tẹlẹ wẹ do homẹfa Jehovah tọn hia?

⁹ Jehovah ze apajlẹ pipé homẹfa tọn dai na mí. E na ojlẹ he pé Noa nado gbá aki lọ, podọ nado wadevizọn taidi “yẹwhehodọtọ dodo tọn” de. (2 Pita 2:5; 1 Pita 3:20) Jehovah dotoai dile Ablaham to kanbiọ lẹ kanse e mapote gando nudide Etọn nado và mẹylankan he nọ nọ̀ tòdaho Sodọmi po Gomọla po tọn mẹ lẹ sudo go. (Jen. 18:20-33) Na owhe kanweko susu lẹ, Jehovah fahomẹ taun hẹ akọta Islaeli tọn he ma yin nugbonọ lọ. (Nẹh. 9:30, 31) To egbehe, mí nọ mọ kunnudenu homẹfa Jehovah tọn, dile e to whenu jodo na mẹhe e dọ̀n wá ede dè lẹpo nado “wá lẹnvọjọ kọ̀n.” (2 Pita 3:9; Joh. 6:44; 1 Tim. 2:3, 4) Apajlẹ Jehovah tọn na mí whẹwhinwhẹ́n dagbe lẹ nado wleawuna homẹfa, dile mí zindonukọn nado to yẹwhehodọ bosọ to mẹplọn. E sọ  plọn mí homẹfa gbọn nuyijlẹdonugo de he tin to Ohó etọn mẹ gblamẹ.

10. Sọgbe hẹ Jakọbu 5:7, 8, etẹwẹ jẹna ayidego to apajlẹ glesi lọ tọn mẹ?

¹⁰ Hia Jakọbu 5:7, 8. Apajlẹ glesi he do jinukun lẹ tọn lọ plọn mí nado nọ fahomẹ. Nugbo wẹ dọ jinukun delẹ nọ yawu whẹ́n. Ṣigba, susu nuhe yin dido lẹ tọn titengbe dehe nọ de sinsẹ́n tọ́n lẹ, nọ yí whenu whẹpo do nọ whẹ́n. To Islaeli, nuhe yin dido sọgan yí nudi osun ṣidopo whẹpo do whẹ́n. Glesi lọ nọ do jinukun etọn lẹ to afò-whenu to jikun tintan lẹ godo tlolo, bo nọ wá gbẹ̀n yé to jikun godo tọn he nọ ja to amakikọ-whenu godo. (Malku 4:28) Nuyọnẹnnu wẹ e na yin nado hodo apajlẹ homẹfa tọn glesi lọ tọn. Ṣigba, e sọgan nọma bọawu.

11. Nawẹ homẹfa na gọalọna mí to lizọnyizọn lọ mẹ gbọn?

¹¹ Gbẹtọvi mapenọ lẹ nọ saba jlo na mọ kọdetọn azọ́n yetọn lẹ tọn to afọdopolọji. Etomọṣo, eyin mí jlo dọ jipa mítọn ni de sinsẹ́n tọ́n, mí dona nọ na ẹn ayidonugo whẹwhẹ, enẹ wẹ nado jlo aigba lọ, donú, nọ họ̀n ogbé ylankan lẹ sẹ̀ bosọ nọ húsinna ẹn. Mọdopolọ, azọ́n gbẹtọ lẹ hinhẹn zun devi tọn nọ biọ dọ yè ni to vivẹnudo zọnmii. E nọ biọ whenu nado họ̀nadọna nuvẹun po ojlo matindo po sọn ahun mẹhe mí to nuplọn lẹ tọn mẹ. Homẹfa na gọalọna mí ma nado gbọjọ whenue mí pehẹ nuhahun lẹ. Eyin mẹdelẹ tlẹ do ojlo hia, mí gbẹ́ dona nọ fahomẹ. Mí ma sọgan hẹn Biblu plọntọ de gánnugánnu nado wleawuna yise. To ojlẹ delẹ mẹ, devi Jesu tọn lẹ lọsu ma yawu mọnukunnujẹ zẹẹmẹ nuhe e plọn yé lẹ tọn mẹ. (Joh. 14:9) Mì gbọ mí ni nọ flindọ mí sọgan do bosọ húsinna, amọ́ Jiwheyẹwhe wẹ nọ hẹn ẹn whẹ́n.—1 Kọl. 3:6.

12. Nawẹ mí sọgan do homẹfa hia gbọn to whenue mí to kunnudena hẹnnumẹ mayisenọ lẹ?

¹² Dopo to adà he mẹ e sọgan vẹawuna mí nado fahomẹ te lẹ mẹ wẹ whenue mí to  kunnudena hẹnnumẹ mayisenọ lẹ. Nunọwhinnusẹ́n he tin to Yẹwhehodọtọ 3:1, 7 mẹ sọgan gọalọna mí. E dọmọ: “Ojlẹ de [tin] nado nabọẹ podọ ojlẹ de nado dọho.” Walọyizan mítọn sọgan dekunnu matin hodidọ, ṣogan mí nọ tin to aṣeji to whepoponu nado yí dotẹnmẹ hundote lẹ zan nado dọho gando nugbo lọ go. (1 Pita 3:1, 2) Mí nọ fahomẹ hẹ mẹlẹpo—ehe bẹ hagbẹ whẹndo tọn mítọn lẹ hẹn—dile mí to yẹwhehodọ bo to mẹplọn po zohunhun po.

13, 14. Apajlẹ mẹhe do homẹfa hia tọn tẹlẹ wẹ mí sọgan hodo?

¹³ Apajlẹ omẹ nugbonọ he go Biblu donù lẹ gọna egbezangbe tọn lẹ tọn sọgan plọn mí homẹfa. Habakuku jlo vẹkuvẹku dọ kanyinylan ni wá opodo, amọ́ e dọ po jide po dọmọ: “Yẹn na gbọṣi ote to hihọ́tẹn ṣie.” (Hab. 2:1) Apọsteli Paulu dohia dọ ojlo vẹkuvẹku emitọn wẹ nado “dotana” lizọnyizọn emitọn. Ṣogan, e zindonukọn nado yí homẹfa do ‘dekunnu wẹndagbe lọ tọn mlẹnmlẹn.’—Owalọ 20:24.

¹⁴ Lẹnnupọndo apajlẹ asu po asi po de tọn ji, he yí gbedewema Giliadi tọn bo yin azọ́ndena hlan otò he mẹ Kunnudetọ vude poun tin te, yèdọ fie suhugan gbẹtọ lẹ tọn ma yin Klistiani te. To finẹ, mẹsusu ma nọ jlo na plọn Biblu. To vogbingbọn mẹ, mẹhe po yé po yì Giliadi bo to sinsẹ̀n to otò devo mẹ lẹ nọ do linlin ojlofọndotenamẹ tọn yetọn lẹ hlan asu po asi po ehe gando plọnmẹ Biblu yetọn susu he to nukọnyi lẹ go. Mahopọnna dọ aigba-denamẹ asu po asi po lọ tọn ma nọ de sinsẹ́n tọ́n sọmọ, yé yí homẹfa do hẹn lizọnyizọn yetọn di. Whenue yé ko dọyẹwheho to aigba-denamẹ enẹ ji na owhe ṣinatọ̀n godo, homẹ yetọn wá hùn nado mọdọ dopo to nuplọntọ yetọn lẹ mẹ yí baptẹm. Etẹwẹ apajlẹ hohowhenu tọn po egbezangbe tọn ehelẹ po tindo to kọndopọ mẹ? Nugbonọ enẹlẹ ma gbọjọ kavi dike alọ yetọn ni gbọjẹ, podọ Jehovah suahọ yé na homẹfa yetọn. Mì gbọ mí ni “nọ hodo apajlẹ mẹhe gbọn yise po sọwhiwhe po dali dugu opagbe lọ lẹ tọn lẹ” tọn.—Heb. 6:10-12.

15. Etẹwẹ yin dopo to aliho he mẹ yise nọ hẹn gbemima mítọn nado dọyẹwheho lodo te lẹ mẹ?

¹⁵ Mí tindo yise to owẹ̀n he mí nọ lá lọ mẹ, enẹwutu, mí nọ to jejeji nado má ẹ hẹ mẹsusu dile e yọnbasi do. Mí nọ dejido opagbe he tin to Ohó Jiwheyẹwhe tọn mẹ lẹ go. (Salm. 119:42; Isa. 40:8) Mí ko mọ hẹndi dọdai Biblu tọn lẹ tọn to azán mítọn gbè. Mí ko sọ mọdọ gbẹzan mẹlẹ tọn nọ pọnte to whenue yé jẹ ayinamẹ Biblu tọn lẹ yí do yizan mẹ ji. Kunnudenu ehelẹ nọ vọ́ huhlọnna nujikudo mítọn dọ wẹndagbe Ahọluduta lọ tọn yin owẹ̀n de he mẹlẹpo dona sè.

16. Sọgbe hẹ Salmu lẹ 46:1-3, nawẹ yise to Jehovah po Jesu po mẹ nọ hẹn gbemima mítọn nado dọyẹwheho lodo gbọn?

¹⁶ Mí sọ tindo yise to Jehovah mẹ, yèdọ Asisa owẹ̀n he mí nọ lá lọ tọn, podọ to Jesu mẹ, yèdọ mẹhe ewọ zedo ofìn ji taidi Ahọlu Ahọluduta lọ tọn. (Joh. 14:1) Mahopọnna ninọmẹ depope he mí pehẹ, Jehovah na yin fibẹtado po huhlọn mítọn po to whepoponu. (Hia Salmu lẹ 46:1-3.) Humọ, mí deji dọ Jesu to anadena azọ́n yẹwhehodidọ tọn lọ sọn olọn mẹ, gbọn huhlọn po aṣẹpipa he Jehovah ko na ẹn po yiyizan dali.—Mat. 28:18-20.

17. Na apajlẹ de he do nuhewutu mí dona zindonukọn nado to yẹwhehodọ hia.

¹⁷ Yise nọ hẹn jidide mítọn sinyẹn deji dọ Jehovah na dona vivẹnudido mítọn lẹ, whedelẹnu to aliho he mẹ mí ma donukun te lẹ mẹ. (Yẹwh. 11:6) Di apajlẹ, gbẹtọ fọtọ́n susu  lẹ wẹ nọ gbọn tafo kavi kẹkẹvi he ji owe mítọn lẹ nọ yin titẹdo lẹ nukọn egbesọegbesọ. Be aliho kunnudide tọn ehe nọ tindo kọdetọn dagbe ya? Gbau! Lizọnyizọn Ahọluduta Tọn Mítọn novembre 2014 tọn dọho jọja he to wehọmẹ alavọ tọn de tọn he jlo na kanwe gando Kunnudetọ Jehovah tọn lẹ go. E ma penugo bo mọ Plitẹnhọ Ahọluduta tọn de, amọ́ e mọ tafo he ji owe mítọn lẹ yin titẹdo de to wehọmẹ lọ, podọ e sọ mọ nudọnamẹ lẹ gando nuhe e jlo na kàn lọ go. To nukọn mẹ, e yí baptẹm bo to sinsẹ̀n to alọnu taidi gbehosọnalitọ whepoponu tọn. Numimọ mọnkọ lẹ nọ whàn mí nado zindonukọn to yẹwhehodidọ mẹ, na yé nọ dohia dọ gbẹtọ gbẹ́ pò bo dona sè wẹndagbe Ahọluduta lọ tọn.

18. Naegbọn mí do kudeji dọ azọ́n wẹndagbe Ahọluduta lọ tọn na yin wiwadotana dile Jehovah jlo do?

¹⁸ Mí sọgan kudeji dọ azọ́n yẹwhehodidọ lọ tọn na wá tadona kọ̀n to ojlẹ sisọ mẹ. Lẹnnupọndo nuhe jọ to azán Noa tọn gbè ji. Jehovah dohia dọ emi yin Gànmẹjinọtọ dagbe hugan lọ. Nudi owhe 120 jẹnukọn, Jehovah ko de ojlẹ he mẹ Singigọ lọ na bẹjẹeji te. Owhe susu lẹ to enẹgodo, Jehovah deazọ́nna Noa nado gbá aki lọ. Na nudi owhe 40 kavi 50 jẹnukọnna Singigọ lọ, Noa zindonukọn to azọ́n sinsinyẹn wiwà mẹ. Mahopọnna dọ gbẹtọ lẹ ma do ojlo hia, e zindonukọn nado to owẹ̀n avase tọn lọ lá kakajẹ whenue Jehovah dọ dọ ojlẹ sọ̀ nado bẹ kanlin lẹ do aki lọ mẹ. Enẹgodo, to ojlẹ sisọ mẹ, “Jehovah sú ohọ̀n lọ.”—Jen. 6:3; 7:1, 2, 16.

19. Etẹwẹ mí sọgan donukun eyin mí ma dike alọ mítọn gbọjẹ?

¹⁹ To madẹnmẹ, Jehovah na hẹn vivọnu wá na azọ́n yẹwhehodidọ Ahọluduta lọ tọn; e na “sú ohọ̀n” do titonu Satani tọn bọ aihọn yọyọ dodowiwa tọn de na bẹjẹeji. Kakajẹ whenẹnu, mì gbọ mí ni hodo apajlẹ Noa, Habakuku po mẹdevo he ma dike bọ alọ yetọn gbọjẹ lẹ po tọn. Mì gbọ mí ni ma yin ayihafẹsẹna blo, mí ni nọ fahomẹ bosọ hẹn yise dolido de go to Jehovah po opagbe etọn lẹ po mẹ.