HOSỌ OPLỌN TỌN 40
“Basi Hihọ́na Nuhe Yin Zizedo Alọmẹ Na We Lọ”
“Timoti E, basi hihọ́na nuhe yin zizedo alọmẹ na we lọ.”—1 TIM. 6:20.
OHÀN 29 Mí Ni Nọgbẹ̀ Sọgbe hẹ Oyín Mítọn
BLADOPỌ *
1, 2. Sọgbe hẹ 1 Timoti 6:20, etẹlẹ wẹ yin zizedo alọmẹ na Timoti?
MÍ NỌ saba zọ́n nuhọakuẹ mítọn lẹ hẹn mẹdevo lẹ. Di apajlẹ, mí sọgan do akuẹ mítọn gbé do akuẹsẹdotẹn de. Eyin mí wàmọ, mí nọ donukun dọ akuẹ mítọn na yin hihọ́-basina bo ma na bu kavi yin finfin. Enẹwutu, mí yọ́n nuhe e zẹẹmẹdo nado ze nuhọakuẹ mítọn do alọ mẹdevo tọn mẹ.
2 Hia 1 Timoti 6:20. Apọsteli Paulu flinnu Timoti dọ ewọ mọ nuhọakuẹ de yí, enẹ wẹ oyọnẹn he pegan lọ he e tindo gando lẹndai Jiwheyẹwhe tọn na gbẹtọvi lẹ go. Podọ, Timoti sọ tindo lẹblanulọkẹyi lọ nado “nọ dọyẹwheho ohó lọ tọn” bosọ “nọ wà azọ́n wẹndagbe-jlatọ tọn.” (2 Tim. 4:2, 5) Paulu dotuhomẹna Timoti nado basi hihọ́na nuhe yin zizedo alọmẹ na ẹn. Taidi Timoti, onú họakuẹ lẹ ko yin zizedo alọmẹ na mílọsu ga. Etẹlẹ wẹ? Podọ, naegbọn mí dona basi hihọ́na adọkunnu he Jehovah zedo alọmẹ na mí lọ?
NUGBO HỌAKUẸ LẸ YIN ZIZEDO ALỌMẸ NA MÍ
3, 4. Etẹwẹ yin whẹwhinwhẹ́n delẹ he wutu nugbo Biblu tọn lẹ do họakuẹ?
3 Jehovah ko gbọn homẹdagbe dali na mí oyọnẹn he pegan nugbo họakuẹ he to Ohó etọn Biblu mẹ lẹ tọn. Nugbo ehelẹ họakuẹ, na yé nọ plọn mí lehe mí sọgan tindo haṣinṣan dagbe hẹ Jehovah do, bosọ nọ basi zẹẹmẹ nuhe nọ hẹn ayajẹ nujọnu tọn wá to gbẹ̀mẹ lẹ tọn. Eyin mí kẹalọyi nugbo enẹlẹ bosọ nọgbẹ̀ sọgbe hẹ yé, mí nọ jẹ mẹdekannu sọn nuplọnmẹ lalo po aṣa mawé lẹ po si.—1 Kọl. 6:9-11.
4 Whẹwhinwhẹ́n devo he wutu nugbo he tin to Ohó Jiwheyẹwhe tọn mẹ lẹ do họakuẹ wẹ yindọ, whiwhẹnọ he tindo ‘ninọmẹ ahun mẹ tọn he jẹ’ lẹ kẹdẹ wẹ Jehovah nọ de yé hia. (Owalọ 13:48) Omẹ mọnkọtọn lẹ nọ kẹalọyi asisa he Jehovah nọ yizan nado plọnmẹ nugbo enẹlẹ to egbehe. (Mat. 11:25; 24:45) Mí ma sọgan mọnukunnujẹ nugbo enẹlẹ mẹ na míde, podọ nudevo de masọ tin to fide he họakuẹ sọ yé.—Howh. 3:13, 15.
5. Nudevo tẹwẹ Jehovah zedo alọmẹ na mí?
5 Jehovah ko sọ na mí lẹblanulọkẹyi lọ nado nọ plọn mẹdevo lẹ nugbo lọ gando ede po lẹndai etọn lẹ po go. (Mat. 24:14) Owẹ̀n he mí nọ lá lọ họakuẹ taun, na e nọ gọalọna gbẹtọ lẹ nado wá lẹzun apadewhe whẹndo Jehovah tọn, bosọ nọ hùn dotẹnmẹ dote na yé nado mọ ogbẹ̀ madopodo. (1 Tim. 4:16) Vlavo mahẹ he mí nọ tindo to lizọnyizọn lọ mẹ sù kavi whè wẹo, azọ́n titengbe hugan he to yìyì to ojlẹ mítọn mẹ lọ wẹ mí to godonọna. (1 Tim. 2:3, 4) Gbégbò nankọ die nado yin azọ́nwatọ hatọ Jiwheyẹwhe tọn lẹ!—1 Kọl. 3:9.
HẸN NUHE YIN ZIZEDO ALỌMẸ NA WE LỌ GO GLIGLI!
Timoti tẹdo nugbo lọ go gligli to whenue mẹdevo lẹ basi dide nado jo nugbo lọ do (Pọ́n hukan 6tọ)
6. Etẹwẹ jọ do mẹdelẹ go na yé ma to aṣeji wutu?
6 Klistiani he nọgbẹ̀ to ojlẹ Timoti tọn mẹ delẹ ma yọ́n pinpẹn lẹblanulọkẹyi he yé tindo nado yin azọ́nwatọ hatọ Jiwheyẹwhe tọn lẹ tọn. Na Dema yiwanna titonu whenẹnu tọn wutu, e gbẹkọ lẹblanulọkẹyi etọn nado wadevizọn hẹ Paulu go. (2 Tim. 4:10) Figelu po Hẹmogini po jo lizọnyizọn yetọn do, na e taidi dọ yé dibu dọ yé na jiya homẹkẹn he Paulu pehẹ tọn nkọ. (2 Tim. 1:15) Himeneu, Alẹkzandle po Filetu po lẹzun atẹṣitọ bo jo nugbo lọ do. (1 Tim. 1:19, 20; 2 Tim. 2:16-18) E taidi dọ omẹ ehe lẹpo wẹ ko lodo to gbigbọ-liho to ojlẹ de mẹ wayi, amọ́ pọndohlan yetọn gando nuhe họakuẹ nugbonugbo go wá diọ.
7. Wlẹnwin tẹlẹ wẹ Satani nọ yizan sọta mí?
7 Nawẹ Satani nọ tẹnpọn nado sisẹ́ mí nado gbẹkọ adọkunnu he Jehovah zedo alọmẹ na mí lẹ go gbọn? Doayi wlẹnwin etọn delẹ go. E nọ yí ayidedai gọna linlinnamẹnu lẹ, enẹ wẹ televiziọn, sinima, Intẹnẹt po owe lẹ po zan nado ze nujinọtedo, pọndohlan po walọyizan delẹ po donukọnna mí, ehe e lẹndọ yé sọgan sisẹ́ mí nado jo nugbo lọ do. E nọ tẹnpọn nado dobuna mí na mí nido doalọtena yẹwhehodidọ gbọn kọgbidinamẹ hagbẹ lẹ tọn po nukundiọsọmẹ po yiyizan dali. Podọ e nọ doyẹklọ mí, na mí nido na tó ohó atẹṣitọ lẹ tọn “he yè nọ yí lalo do ylọdọ ‘oyọnẹn’” lẹ, bo gbọnmọ dali jo nugbo lọ do.—1 Tim. 6:20, 21.
8. Etẹwẹ a plọn sọn apajlẹ mẹmẹsunnu Daniel tọn mẹ?
8 Eyin mí ma to aṣeji, vudevude mí sọgan jo nugbo lọ do. Lẹnnupọndo apajlẹ Daniel * tọn ji he yiwanna aihundida video ji tọn lẹ. E dọmọ: “N’jẹ aihun video ji tọn lẹ dà ji whenue n’do nudi owhe ao. To bẹjẹeji, n’nọ dà aihun he ma bẹ owù hẹn sọmọ lẹ. Ṣigba, pẹẹde pẹẹde, n’wá jẹ dehe bẹ danuwiwa po afinyọnnuwiwa po hẹn lẹ dà ji.” To godo mẹ, e nọ dà aihun video ji tọn na nudi gànhiho 15 to gbèdopo. Daniel dọmọ: “N’yọnẹn to dee mẹ dọ aihun wunmẹ he n’nọ dà lọ po gànhiho nẹmu he n’nọ yizan to e kọ̀n po to nuyiwa do haṣinṣan ṣie hẹ Jehovah ji. Amọ́, ahun ṣie ko tliji sọmọ bọ n’nọ lẹndọ nunọwhinnusẹ́n Biblu tọn lẹ ma jẹagọdo aihun he n’nọ dà.” Eyin mí ma payi, ayidedai lẹ sọgan zọ́n bọ mí na jo nugbo lọ do po awubibọ po. Eyin enẹ jọ, mí sọgan hẹn onú vivẹ́ he Jehovah ko zedo alọmẹ na mí lẹ bu.
LEHE MÍ SỌGAN HẸN NUGBO LỌ GO GLIGLI DO
9. Sọgbe hẹ 1 Timoti 1:18, 19, mẹnu go wẹ Paulu yí Timoti jlẹdo?
9 Hia 1 Timoti 1:18, 19. Paulu yí Timoti jlẹdo awhànfuntọ de go bo dotuhomẹna ẹn nado “zindonukọn to awhàn dagbe lọ fùnfùn mẹ.” Awhàn ehe ma yin agbasa mẹ tọn, ṣigba gbigbọmẹ tọn wẹ. Aliho tẹlẹ mẹ wẹ Klistiani lẹ taidi awhànfuntọ he to awhàngbenu lẹ te? Jẹhẹnu tẹlẹ wẹ mí dona wleawuna taidi awhànfuntọ Klisti tọn lẹ? Mì gbọ mí ni pọ́n onú atọ́n delẹ he mí sọgan plọn sọn nuyijlẹdonugo Paulu tọn mẹ. Nuplọnmẹ ehelẹ sọgan gọalọna mí nado hẹn nugbo lọ go gligli.
10. Etẹwẹ mẹdezejo na Jiwheyẹwhe zẹẹmẹdo, podọ naegbọn mí dona wleawuna ẹn?
10 Wleawuna mẹdezejo na Jiwheyẹwhe. Awhànfuntọ dagbe de nọ yin nugbonọ. E na hoavùn sinsinyẹn nado basi hihọ́na mẹhe e yiwanna de kavi nude he họakuẹ to nukun etọn mẹ. Paulu na tuli Timoti nado wleawuna mẹdezejo na Jiwheyẹwhe, enẹ wẹ nado tindo haṣinṣan pẹkipẹki de hẹ Jiwheyẹwhe. (1 Tim. 4:7) Lehe owanyi po mẹdezejo mítọn na Jiwheyẹwhe po siso sọ, mọ wẹ ojlo mítọn nado hẹn nugbo lọ go gligli na sinyẹn deji do niyẹn.—1 Tim. 4:8-10; 6:6.
Eyin agbọ́ ko pé mí taun to vivọnu azọ́nzán de tọn, e sọgan biọ dọ mí ni domẹplọnlọ míde go nado yì opli. Amọ́, mí nọ mọ dona yí eyin mí wàmọ! (Pọ́n hukan 11tọ)
11. Naegbọn mí do hudo mẹplọnlọ-dido-mẹdetiti go tọn?
11 Wleawuna mẹplọnlọ-dido-mẹdetiti go. Awhànfuntọ de dona nọ plọnazọ́n ede eyin ewọ jlo na to gbesisọ mẹ to whepoponu nado funawhàn. Timoti lodo to gbigbọ-liho gligli, na ewọ hodo ayinamẹ gbọdo Paulu tọn nado họ̀nna ojlo ylankan lẹ, bo doafọna jẹhẹnu Jiwheyẹwhe tọn nkọ lẹ bosọ nọ dogbẹ́ hẹ yisenọ hatọ etọn lẹ wutu. (2 Tim. 2:22) Enẹ nọ biọ mẹplọnlọ-dido-mẹdetiti go. Mí do hudo jẹhẹnu enẹ tọn nado duto ojlo agbasalan tọn mítọn lẹ ji. (Lom. 7:21-25) Humọ, mí sọ do hudo etọn nado to vivẹnudo zọnmii nado de gbẹtọ-yinyin hoho lọ sọn ogo bo ze yọyọ lọ do. (Efe. 4:22, 24) Podọ eyin agbọ́ pé mí taun to vivọnu azọ́nzán de tọn, e sọgan biọ dọ mí ni domẹplọnlọ míde go nado yì opli.—Heb. 10:24, 25.
12. Nawẹ mí sọgan hẹn aliho he mẹ mí nọ yí Biblu zan te lẹ pọnte gbọn?
12 Awhànfuntọ de dona nọ plọn lehe e na yí awhànfunnu etọn lẹ zan do whẹwhẹ. Ewọ dona wàmọ nado bikan to awhànfunfun mẹ. To aliho dopolọ mẹ, mílọsu dona bikan to Ohó Jiwheyẹwhe tọn yiyizan mẹ. (2 Tim. 2:15) Mí sọgan plọn aliho azọ́nyinyọnẹn tọn delẹ to opli mítọn lẹ ji. Ṣigba, eyin mí na penugo nado hẹn mẹdevo lẹ kudeji dọ nugbo Biblu tọn họakuẹ taun, mí dona nọ hodo tito Biblu pinplọn tọn gbesisọ tọn de. Mí dona nọ yí Ohó Jiwheyẹwhe tọn zan nado hẹn yise mítọn lodo. Ehe nọ bẹ nususu hẹn hú Biblu hihia poun. E nọ biọ dọ mí ni lẹnayihamẹpọn do nuhe mí hia ji bo nọ basi dodinnanu to owe mítọn lẹ mẹ nado sọgan mọnukunnujẹ Owe-wiwe lẹ mẹ ganji bosọ nọ yí yé do yizan mẹ. (1 Tim. 4:13-15) To whenẹnu, mí na penugo nado yí Ohó Jiwheyẹwhe tọn do plọnnu mẹdevo lẹ. Ehe lọsu nọ bẹ nususu hẹn hú wefọ Biblu tọn de hihia poun. Ojlo mítọn wẹ nado gọalọna todoaitọ mítọn lẹ nado mọnukunnujẹ wefọ lọ po lehe e gando yé go do po mẹ. Eyin mí nọ tẹdo aṣa oplọn mẹdetiti tọn gbesisọ tọn de go, mí sọgan penugo dogọ nado nọ yí Ohó gbọdo Jiwheyẹwhe tọn do plọnnu mẹdevo lẹ to aliho dagbe mẹ.—2 Tim. 3:16, 17.
13. Sọgbe hẹ Heblu lẹ 5:14, naegbọn mí dona nọ yí wuntuntun zan?
13 Nọ yí wuntuntun zan. Awhànfuntọ de dona nọ penugo nado mọ owù hlan nukọn bosọ dapana ẹn. Mílọsu dona plọn nado nọ doayi ninọmẹ he sọgan gbleawuna mí lẹ go bosọ yinuwa nado dapana owù lọ. (Howh. 22:3; hia Heblu lẹ 5:14.) Di apajlẹ, mí dona nọ yí nuyọnẹn do de aihundida po ayidedai mítọn lẹ po. Tito televiziọn ji tọn lẹ po sinima lẹ po nọ saba bẹ walọyizan mawé hẹn. Walọyizan mọnkọ nọ vẹna Jiwheyẹwhe, podọ e na dekọtọn do awugble mẹ janwẹ. Enẹwutu, mí nọ dapana ayidedai mọnkọ lẹ he gán dekanpona owanyi mítọn na Jiwheyẹwhe vudevude.—Efe. 5:5, 6.
14. Nawẹ wuntuntun yiyizan gọalọna Daniel gbọn?
14 Daniel he go mí donù wayi wá jẹ ayidego ji dọ aihundida video ji tọn he bẹ danuwiwa po afinyọnnuwiwa po hẹn lẹ to nuhahun hẹnwa na emi. E basi dodinnanu to Watchtower Library mẹ nado mọ hosọ he na gọalọna ẹn nado duto nuhahun etọn ji lẹ. Etẹwẹ yin kọdetọn lọ? E doalọtena aihun video ji tọn he ma sọgbe lẹ didà. Podọ, e súnsún yinkọ etọn sọn mẹhe ze yinkọ dai to Intẹnẹt ji nado nọ dà aihun enẹlẹ mẹ, bosọ sánkanna gbẹdido hẹ aihundatọ devo lẹ. Daniel dọmọ: “Kakati nado nọ gbọṣi aihundida video ji tọn lẹ kọ̀n, n’jẹ tintọ́n biọ mẹmẹ ji nado nọ yí whenu zan na nudevo lẹ kavi hẹ họntọn lẹ to agun lọ mẹ.” Todin, Daniel to sinsẹ̀n taidi gbehosọnalitọ podọ mẹho agun tọn de.
15. Naegbọn otàn lalo lẹ do yin owùnu?
15 Taidi Timoti, mí sọ dona yọ́n owù he tin to nudọnamẹ lalo he atẹṣitọ lẹ nọ hẹn gbayipe lẹ mẹ. (1 Tim. 4:1, 7; 2 Tim. 2:16) Di apajlẹ, yé sọgan tẹnpọn nado hẹn otàn lalo lẹ gbayipe gando mẹmẹsunnu mítọn lẹ go, kavi fọ́n ayihaawe dote gando titobasinanu Jehovah tọn go. Nudọnamẹ agọ̀ mọnkọ lẹ sọgan dekanpona yise mítọn. Mí ma dona dike nujijla oklọ tọn enẹlẹ ni doyẹklọ mí. Etẹwutu? Na otàn mọnkọ lẹ nọ yin hinhẹn gbayipe “gbọn mẹhe ko gblezọn to ayiha mẹ bo ko gbọagba nugbo lọ tọn lẹ dali.” Yanwle yetọn wẹ nado fọ́n “nudindọn po whẹwhinwhẹ́n dindin po” dote. (1 Tim. 6:4, 5) Yé jlo dọ mí ni yí ohó mẹhẹngble tọn yetọn lẹ sè bo jẹ ayihaawe sinsinyẹn tindo ji gando mẹmẹsunnu mítọn lẹ go.
16. Ayihafẹsẹnamẹnu tẹlẹ wẹ mí dona dapana?
16 Dapana ayihafẹsẹnamẹnu lẹ. “Taidi awhànfuntọ Klisti Jesu tọn dagbe de,” Timoti dona dike ayiha etọn ni gbọṣi lizọnyizọn lọ ji kakati nado yin ayihafẹsẹna gbọn yanwle aihọn tọn lẹ kavi agbasanu lẹ tọn dali. (2 Tim. 2:3, 4) Taidi Timoti, mí ma dona dike ojlo agbasanu susu bibẹpli tọn ni fẹayihasẹna mí. “Huhlọn mẹkiklọ adọkunnu lẹ tọn” sọgan dekanpona owanyi he mí tindo na Jehovah, gọna pinpẹn-nutọn-yinyọnẹn mítọn na Ohó Jiwheyẹwhe tọn po ojlo he mí tindo nado nọ lá ẹ na mẹdevo lẹ po. (Mat. 13:22) Mí dona nọ hẹn gbẹzan mítọn bọawu bo nọ yí whenu po huhlọn mítọn po zan nado “zindonukọn nado to Ahọluduta lọ . . . dín whẹ́.”—Mat. 6:22-25, 33.
17, 18. Etẹwẹ mí sọgan wà nado dapana nuhe gán bẹpla gbigbọnọ-yinyin mítọn lẹ?
17 Wleawudai nado yawu yinuwa. Awhànfuntọ de dona basi tito lehe e na yinuwa do tọn jẹnukọn. Eyin mí na basi hihọ́na nuhe Jehovah zedo alọmẹ na mí, mí dona yawu yinuwa whenue mí mọ owù hlan. Etẹwẹ sọgan gọalọna mí nado yinuwa madọngbàn? Mí dona basi tito jẹnukọn gando lehe mí na yinuwa do go eyin mí pannukọn owù de.
18 Di apajlẹ, whẹpo mọto-kùntọ de nido súnhún, e nọ hẹn ẹn diun jẹnukọn dọ nuhe nọ do ohún te lọ ‘frein’ to azọ́nwa ganji. Etẹwutu? Na e nido sọgan yawu zín in to whenue nudepope tọ́n jẹ nukọn etọn to ajiji mẹ. To aliho dopolọ mẹ, mí sọgan nọ lẹnnupọn jẹnukọn do “nuhe mí na zín,” enẹ wẹ nuhe mí na wà ji, eyin to ajiji mẹ nukun mítọn wá yì jẹ nuyiwa fẹnnuwiwa tọn, danuwiwa tọn, kavi nudọnamẹ atẹṣitọ lẹ tọn ji to whenue mí to Intẹnẹt yizan, to sinima pọ́n kavi to tito televiziọn ji tọn de hodo. Eyin mí ko wleawudaina nuhe sọgan jọ, mí na penugo nado yawu yinuwa bo basi hihọ́na míde to gbigbọ-liho, bosọ gbọṣi wiweji to nukun Jehovah tọn mẹ.—Salm. 101:3; 1 Tim. 4:12.
19. Dona tẹlẹ sin vivi wẹ mí na dù eyin mí nọ basi hihọ́na adọkunnu he Jehovah zedo alọmẹ na mí lẹ?
19 Mí dona basi hihọ́na adọkunnu he Jehovah ko zedo alọmẹ na mí lẹ, enẹ wẹ nugbo họakuẹ he to Biblu mẹ lẹ gọna lẹblanulọkẹyi he mí tindo nado nọ plọn yé mẹdevo lẹ. Eyin mí nọ wàmọ, mí na tindo ayihadawhẹnamẹnu wiwe de, gbẹzan mítọn na do zẹẹmẹ nujọnu tọn, podọ mí na mọ ayajẹ he alọgigọna mẹdevo lẹ nado wá yọ́n Jehovah nọ hẹnwa. Po alọgọ Jehovah tọn po, mí na penugo nado basi hihọ́na nuhe yin zizedo alọmẹ na mí lẹ.—1 Tim. 6:12, 19.
OHÀN 127 Omẹ Nankọ He E Jẹ Dọ Yẹn Ni Yin
