Wefọ he hẹnmẹ lẹnnupọn enẹ dọmọ: “Eyin hiẹ mọ bọ wamọnọ yin kọgbidina to aliho depope mẹ bọ yè tùnafọ whẹdida dodo po dodowiwa po ji to ayimatẹn towe mẹ, e ni ma paṣa we blo. Na mẹhe sọ yiaga hú ahọluzọnwatọ nukundeji enẹ to pinpọn ẹn, podọ mẹdevo lẹ sọ yiaga hú yemẹpo.”—Yẹwh. 5:8.

To pọndohlan gbẹtọvi tọn mẹ, e taidi dọ wefọ ehe to zẹẹmẹ basi do ninọmẹ gandutọ gbẹtọvi tọn lẹ ji poun. Ṣigba, gbọnvona enẹ, e sọ bẹ nugbo de hẹn gando Jehovah go, ehe dona miọnhomẹna mí bo vọ́ jide na mí.

Yẹwhehodọtọ 5:8 to alọdlẹndo aṣẹpatọ he nọ gbidikọna hẹntọnọ lẹ bo nọ tẹ̀ yé whẹdida dodo lẹ. Gandutọ de dona nọ flindọ mẹhe tin to otẹn he yiaga hú i mẹ kavi tindo aṣẹpipa hugan ẹn de sọgan to pinpọn ẹn. Na nugbo tọn, mẹdevo lẹ sọgan tin he tlẹ sọ tindo aṣẹpipa hú yewlẹ. Amọ́, e blawu dọ to gandudu gbẹtọvi lẹ tọn mẹ, aṣẹpatọ ehe lẹpo wẹ sọgan dùpa, podọ gbẹtọvi paa lẹ nọ jiya mẹhodu tọn to adà lẹpo mẹ.

Etomọṣo, mahopọnna lehe ninọmẹ lọ lẹ sọgan ylan sọ, homẹmiọnnamẹnu wẹ e yin nado yọnẹn dọ Jehovah to pinpọn mẹhe tlẹ yin “ahọluzọnwatọ nukundeji” to gandudu gbẹtọvi tọn mẹ lẹ. Mí sọgan lẹhlan Jiwheyẹwhe bosọ ze agbàn pinpẹn mítọn lẹpo dlan ewọ ji. (Salm. 55:22; Flp. 4:6, 7) Mí yọnẹn dọ “nukun Jehovah tọn nọ to yìyì pé gbọn aigba lẹpo ji nado do huhlọn etọn hia do mẹhe nọ yí ahun pipé de do sẹ̀n ẹn lẹ tamẹ.”—2 Otàn. 16:9.

Enẹwutu, Yẹwhehodọtọ 5:8 flin mí lehe nulẹ nọ yì do to gandudu gbẹtọvi lẹ tọn mẹ nugbonugbo; enẹ wẹ yindọ mẹde nọ tin to otẹn aṣẹpipa tọn he yiaga hugan mẹdevo tọn mẹ janwẹ. Humọ, wefọ lọ sọgan gọalọna mí nado lẹnnupọndo nugbo lọ ji dọ Jehovah wẹ mẹhe yiaga hugan, yèdọ Aṣẹpatọ Daho Hugan lọ. Ewọ to gandu todin gbọn Visunnu etọn Jesu Klisti he yin Ahọlu Ahọluduta lọ tọn gblamẹ. Ganhunupotọ lọ he nudepope ma whlá do nọ dawhẹ dodo po jlọjlọ po, podọ nudopolọ wẹ Visunnu etọn lọsu nọ wà.