HOSỌ OPLỌN TỌN 35
Nọ Yọ́n Pinpẹn Mẹhomẹ Nugbonọ Mítọn lẹ Tọn
“Jẹgbakun whanpẹ tọn de wẹ owhà yin.”—HOWH. 16:31.
OHÀN 138 Whanpẹ Ota-Owhànọ lẹ Tọn
BLADOPỌ *
1, 2. (a) Sọgbe hẹ Howhinwhẹn lẹ 16:31, nukun tẹwẹ mí dona nọ yí do pọ́n mẹhomẹ nugbonọ lẹ? (b) Kanbiọ tẹlẹ wẹ mí na dín gblọndo na to hosọ ehe mẹ?
DIAMỌNDI he go yè ma ko wazọ́n do lẹ ma nọ sẹ́, mọ yé masọ nọ dọnmẹ. Enẹwutu, eyin mẹde mọ diamọndi lẹ to ninọmẹ jọwamọ tọn yetọn mẹ, e sọgan nọma yọnẹn dọ adọkunnu lẹ mọ wẹ emi te bo tlẹ gán dovọ́na yé.
2 To linlẹn de mẹ, mẹhomẹ nugbonọ mítọn lẹ taidi diamọndi enẹlẹ nkọ; na yé họakuẹ taun wutu. Ohó Jiwheyẹwhe tọn yí owhà mẹhomẹ enẹlẹ tọn jlẹdo jẹgbakun de go. (Hia Howhinwhẹn lẹ 16:31; 20:29) Amọ́, e bọawu taun dọ mí ni yí nukunpẹvi do pọ́n adọkunnu ehelẹ. Ale he jọja he nọ yọ́n pinpẹn mẹhomẹ lẹ tọn gán mọyi lẹ sọ hugan dehe adọkunnu jọnun lẹ nọ hẹnwa. To hosọ ehe mẹ, mí na mọ gblọndo na kanbiọ atọ̀n delẹ: Naegbọn Jehovah nọ pọ́n mẹhomẹ nugbonọ lẹ hlan taidi adọkunnu lẹ? Otẹn tẹ mẹ wẹ yé tin te to titobasinanu Jehovah tọn mẹ? Etẹwẹ mí gán wà nado mọaleyi to gigọ́ mẹ sọn apajlẹ yetọn mẹ?
NUHEWUTU JEHOVAH NỌ PỌ́N MẸHOMẸ NUGBONỌ LẸ HLAN TAIDI ADỌKUNNU LẸ
Mẹhomẹ nugbonọ lẹ nọ họakuẹ to nukun Jehovah Jiwheyẹwhe po omẹ etọn lẹ po tọn mẹ (Pọ́n hukan 3tọ)
3. Sọgbe hẹ Salmu lẹ 92:12-15, naegbọn mẹhomẹ nugbonọ lẹ do họakuẹ na Jehovah?
3 Mẹhomẹ nugbonọ lẹ họakuẹ to nukun Jehovah Jiwheyẹwhe tọn mẹ. Ewọ yọ́n mẹhe yé yin to homẹ nugbonugbo, bosọ yọ́n pinpẹn jẹhẹnu dagbedagbe yetọn lẹ tọn. Homẹ etọn nọ hùn eyin mẹhomẹ lẹ má nuyọnẹn he yé bẹpli dile yé to sinsẹ̀nzọn wà po nugbonọ-yinyin po to gbẹzan yetọn mẹ lẹ hẹ jọja lẹ. (Jobu 12:12; Howh. 1:1-4) Jehovah sọ nọ yọ́n pinpẹn akọndonanu yetọn tọn. (Mal. 3:16) Nugbo wẹ dọ yé pehẹ nuhahun susu to gbẹzan yetọn mẹ; amọ́ yise yetọn to Jehovah mẹ ma depò pọ́n gbede. Todido yetọn na sọgodo sọ họnwun dogọ yijlẹdo whenue yé ṣẹṣẹ mọ nugbo go. Podọ, Jehovah yiwanna yé, na yé zindonukọn nado to oyín etọn lá mahopọnna dọ ‘yé tlẹ ko poyọnho.’—Hia Salmu lẹ 92:12-15.
4. Etẹlẹ wẹ gán miọnhomẹna mẹmẹsunnu po mẹmẹyọnnu mẹhomẹ mítọn lẹ po?
4 Eyin owhe to owhe ji jẹ na mì, mì deji dọ Jehovah ma nọ wọn nuhe mì ko wà wayi lẹ. (Heb. 6:10) Mì ko nọgodona azọ́n yẹwhehodidọ tọn lọ po zohunhun po, bọ ehe nọ hẹn homẹ Otọ́ olọn mẹ tọn mítọn tọn hùn. Mì ko doakọnna whlepọn lẹ, etlẹ yin dehe kàn dẹpẹ biọ lẹ, bosọ tẹdo nujinọtedo dodo tọn Biblu tọn lẹ go, podọ mì ko hẹn azọngban pinpẹn lẹ di, bo ko sọ plọnazọ́n mẹdevo lẹ. Mì ko wà nuhe go mì pé lẹpo nado to zọnlinzin afọsu-afọsi hẹ titobasinanu Jehovah tọn. Mì ko nọgodona mẹhe to sinsẹ̀nzọn whenu-gigọ́ tọn mẹ lẹ bo ko sọ na yé tuli. Jehovah Jiwheyẹwhe yiwanna mì taun, na mì yin nugbonọ wutu. E ko dopà dọ ‘emi ma na gbẹ́ nugbonọ emitọn lẹ dai’! (Salm. 37:28) E na mì jide dọmọ: “Kaka oda mìtọn nado lẹzun owhà, yẹn na to mì hẹn zọnmii.” (Isa. 46:4) Enẹwutu, mì ma wá tadona kọ̀n dọ emi masọ họakuẹ na titobasinanu Jehovah tọn, na owhe mìtọn ko sẹyì wutu blo. Na nugbo tọn, mì họakuẹ taun!
MẸHOMẸ LẸ HỌAKUẸ NA TITOBASINANU JEHOVAH TỌN
5. Etẹwẹ mẹhomẹ lẹ dona nọ hẹn do ayiha mẹ?
5 Aliho susu lẹ mẹ wẹ mẹhomẹ lẹ gán yọ́n-na-yizan te to titobasinanu Jehovah tọn mẹ. Dile etlẹ yindọ yé gán nọma sọ do huhlọn di dai tọn ba, numimọ susu lẹ wẹ yé ko bẹpli to owhe lẹ gblamẹ. Jehovah gán zindonukọn nado to yé yizan to aliho voovo lẹ mẹ, dile apajlẹ hohowhenu tọn po egbezangbe tọn he bọdego ehelẹ po dohia do.
6, 7. Na apajlẹ mẹhomẹ he go Biblu donù delẹ tọn, he yin didona na yé wà sinsẹ̀nzọn po nugbonọ-yinyin po wutu.
6 Biblu bẹ apajlẹ dagbe nugbonọ susu tọn hẹn, he gbẹ́ sẹ̀n Jehovah po zohunhun po to mẹhowhe yetọn lẹ mẹ. Di apajlẹ, Mose ko do nudi owhe 80 whenue e lẹzun yẹwhegán Jehovah tọn, podọ afọzedaitọ akọta Islaeli tọn. Yẹwhegán Daniẹli gbẹ́ yin hoyidọtọ Jehovah tọn whenue e ko tindo nudi owhe 90 linlán. Podọ, apọsteli Johanu lọsu gán ko tindo owhe 90 linlán whenue e yin gbigbọdo nado kàn owe Osọhia tọn.
7 Mẹhomẹ nugbonọ susu devo lẹ ma yin yinyọnẹn sọmọ, podọ e bọawu dọ mẹlẹ ni ma doayi yé go blo. Etomọṣo, Jehovah doayi yé go bosọ suahọ yé na nugbonọ-yinyin yetọn wutu. Di apajlẹ, Simeoni, yèdọ dawe “dodonọ [de he] nọ dibusi Jiwheyẹwhe” ma yin nùdego sọmọ to Biblu mẹ, amọ́ Jehovah doayi e go bo na ẹn lẹblanulọkẹyi lọ nado mọ viyẹyẹ lọ Jesu, podọ nado dọ dọdai gando ovi lọ po onọ̀ etọn po go. (Luku 2:22, 25-35) Sọ lẹnnupọndo yẹwhegán yọnnu, yèdọ asuṣiọsi lọ Hanna ji. Dile ewọ tlẹ ko do owhe 84, e “ma nọ gọ̀n tẹmpli mẹ gbede.” Na e nọ yì nọtẹn sinsẹ̀n-bibasi tọn lọ to gbesisọ mẹ wutu, e yin ahọsuna susugege whenue ewọ lọsu mọ viyẹyẹ lọ Jesu to gbèdopo. Yé omẹ awe lẹpo, yèdọ Simeoni po Hanna po wẹ họakuẹ to nukun Jehovah tọn mẹ.—Luku 2:36-38.
Mẹmẹyọnnu Didur he ko do owhe 80 linlán todin, gbẹ́ to sinsẹ̀nzọn wà po nugbonọ-yinyin po (Pọ́n hukan 8tọ)
8, 9. Nawẹ asuṣiọsi lẹ gbẹ́ nọ gọalọ to titobasinanu lọ mẹ gbọn?
8 To egbehe, mẹhomẹ nugbonọ susu wẹ yin apajlẹ dagbe na jọja lẹ. Lẹnnupọndo apajlẹ Mẹmẹyọnnu Loïs Didur tọn ji. Owhe 21 poun wẹ e do whenue e lẹzun gbehosọnalitọ titengbe to Canada. Enẹgodo, ewọ po asu etọn John po sẹ̀n to azọ́n lẹdo tọn mẹ na owhe susu. To nukọn mẹ, yé sẹ̀n to Bẹtẹli Canada tọn na owhe 20 linlán. Whenue Loïs do owhe 58, uwọ po John po yin azọ́ndena do Ukraine. Etẹwẹ yé na wà? Be yé na mọdọ emi ko pò gbau nado sẹ̀n to otò devo mẹ wẹ ya? Yé kẹalọyi azọ́ndenamẹ lọ, podọ John yin pipà taidi hagbẹ Wedegbẹ́ Alahọ tọn to otò lọ mẹ. To whenue John kú to owhe ṣinawe godo, Loïs basi dide nado gbọṣi azọ́ndenamẹ etọn mẹ. Todin he e ko do owhe 81, Loïs gbẹ́ to sinsẹ̀n taidi hagbẹ whẹndo Bẹtẹli Ukraine tọn zohunhunnọ de he mẹlẹ yiwanna taun.
9 Mẹsusu lẹ gán nọma nọ doayi asuṣiọsi lẹ taidi Loïs go dile e nọ yin do whenue asu yetọn gbẹ́ togbẹ̀; amọ́, e ma yin na yé yin asuṣiọsi wẹ zọ́n bọ yé masọ họakuẹ ba. Jehovah nọ yọ́n pinpẹn mẹmẹyọnnu susu he nọgodona asu yetọn lẹ na owhe susu, bosọ zindonukọn nado to tenọgli yetọn go hẹn kakajẹ din lẹ tọn taun. (1 Tim. 5:3) Humọ, yé nọ na tuli jọja lẹ taun.
10. Apajlẹ dagbe tẹwẹ Tony zedai?
10 Mẹhomẹ nugbonọ susu he nọ nọ̀ owhé nukunpedomẹgo tọn lẹ gbè lẹ lọsu họakuẹ ga. Di apajlẹ, mẹmẹsunnu Tony nọ nọ̀ owhé mọnkọtọn de gbè todin. E yí baptẹm to Pennsylvanie, États-Unis to août 1942 whenue e do owhe 20. E ma dẹn bọ e pannukọn whẹho kadaninọ tọn, podọ ehe zọ́n bọ e sẹ̀ngàn na owhe awe daa. Ewọ po asi etọn Hilda po plọn ovi awe whẹ́n to nugbo lọ mẹ. To owhe lẹ gblamẹ, Tony sẹ̀n to agun atọ̀n mẹ taidi azinponọ (he nọ yin yiylọ todin dọ anadenanutọ to pipli mẹho lẹ tọn mẹ), podọ taidi nugopọntọ plidopọ lẹdo tọn de tọn. E deanana opli lẹ po plọnmẹ Biblu susu po to gànpa de mẹ. Todin he Tony do owhe 98, e ma hònúpla. E gbẹ́ zindonukọn nado to nuhe go e pé lẹpo wà nado sẹ̀n Jehovah bosọ nọ wazọ́n pẹkipẹki hẹ agun etọn!
11. Nawẹ mí gán nọ doyẹyigona mẹhomẹ he nọ nọ̀ yedeṣo kavi nọ nọpọ́ hẹ hẹnnumẹ mayisenọ lẹ gbọn?
11 Nawẹ mí gán nọ doyẹyigona mẹhomẹ he nọ nọ̀ yedeṣo kavi nọ nọpọ́ hẹ hẹnnumẹ mayisenọ lẹ gbọn? Jẹ obá he mẹ e yọnbasi jẹ, mẹho lẹ gán gọalọna yé nado nọ do mahẹ to tito agun lọ tọn lẹ mẹ. Mí gán nọ do ojlo nujọnu tọn hia bo yì dla mẹhomẹ enẹlẹ pọ́n kavi nọ basi oylọna yé na hodọdopọ video ji tọn de. E na yọ́n dọ mí ni nọ na ayidonugo vonọtaun mẹhomẹ he nọ nọ̀ yedeṣo kavi nọ nọpọ́ hẹ hẹnnumẹ mayisenọ lẹ. Eyin mí ma to aṣeji, mí gán dovọ́na mẹhomẹ ehelẹ. E gán nọ vẹawuna delẹ to yé mẹ nado dọho gando yede go, kavi yé gán nọ lẹndọ e ma sọgbe nado wàmọ. Amọ́, mí na mọ ale daho yí eyin mí nọ kàn kanbiọ lẹ sè yé bosọ nọ dotoai dile yé to hodọ gando ayajẹ he yé duvivi etọn to titobasinanu Jehovah tọn mẹ lẹ go.
12. Mẹmẹsunnu po mẹmẹyọnnu tẹlẹ po wẹ mí gán mọ to agun mítọn mẹ?
12 E gán paṣa mí nado mọdọ mẹhomẹ nugbonọ he yin apajlẹ ayidego tọn lẹ tin to agun mílọsu tọn mẹ. Mẹmẹyọnnu de he nọ yin Harriette sẹ̀n Jehovah po nugbonọ-yinyin po na owhe susu lẹ to agun etọn mẹ to New Jersey, États-Unis. Enẹgodo, e sẹtẹn nado yì nọpọ́ hẹ viyọnnu etọn. Mẹmẹsunnu he to agun yọyọ lọ mẹ lẹ tẹnpọn nado jẹakọ hẹ ẹ dogọ, podọ yé doayi e go dọ e yin apajlẹ yise tọn ayidego tọn de. Nado na yé tuli, e pìntàn nuhe nọ jọ to lizọnyizọn lọ mẹ tlolo he e mọ nugbo to owhe 1920 lẹ gblamẹ tọn na yé. To ojlẹ lọ mẹ, e nọ hẹn nùmẹklọnu etọn whedepopenu he e jei kunnudegbe, na e gán yin wiwle wutu. To 1933, whla awe wẹ e sẹ̀ngàn na osẹ dopo. To ojlẹ enẹlẹ mẹ, asu etọn he ma yin Kunnudetọ bo ka nọ nọgodona ẹn wẹ nọ penukundo ovi yetọn atọ̀n lẹ go. Matin ayihaawe, e jẹ dọ mẹhomẹ nugbonọ he taidi Harriette lẹ ni nọ họakuẹ to nukun mítọn mẹ!
13. Etẹwẹ mí plọn gando nukun he Jehovah nọ yí do pọ́n mẹhomẹ lẹ to titobasinanu etọn mẹ go?
13 Mẹmẹsunnu po mẹmẹyọnnu mẹhomẹ mítọn lẹ po họakuẹ na Jehovah po titobasinanu etọn po. Yé ko mọ lehe Jehovah dona titobasinanu etọn po yelọsu po do to aliho voovo lẹ mẹ. Yé ko plọn nuhọakuẹ susu sọn nuṣiwa yetọn lẹ mẹ. Mì nọ pọ́n yé hlan taidi “asisa nuyọnẹn tọn,” bo nọ plọnnu sọn numimọ yetọn mẹ. (Howh. 18:4) Eyin mì nọ yí whenu nado jẹakọ hẹ yé, yise mìtọn na lodo bọ mì nasọ plọn nususu lẹ!
NỌ MỌALEYI TO GIGỌ́ MẸ SỌN APAJLẸ MẸHOMẸ LẸ TỌN MẸ
Kẹdẹdile Eliṣa mọaleyi sọn gbẹdido hẹ Elija mẹ do, mẹmẹsunnu po mẹmẹyọnnu lẹ po sọgan mọaleyi sọn numimọ mẹhe ko sẹ̀n Jehovah na owhe susu lẹ tọn mẹ (Pọ́n hukan 14, 15tọ)
14. Etẹwẹ Deutelonomi 32:7 na tuli jọja lẹ nado nọ wà?
14 Nọ ze afọdide tintan lọ nado dọho hẹ mẹhomẹ lẹ. (Hia Deutelonomi 32:7.) Vlavo yé masọ nọ mọnú ganji ba, bọ zọnlin yetọn masọ yá sọmọ, bọ hodidọ nọ vẹawuna yé, amọ́ yé gbẹ́ yin jọja to ahun mẹ, podọ yé ko wleawuna “oyín dagbe” de to Jehovah dè. (Yẹwh. 7:1) Mì nọ flin nuhewutu yé do họakuẹ to nukun Jehovah tọn mẹ. Mì zindonukọn nado nọ do gbégbò hia yé. Mì nọ yinuwa taidi Eliṣa. E tẹkudeji nado nọpọ́ hẹ Elija kakajẹ azán godo tọn he yé yizan dopọ gbè. Whla atọ̀n wẹ Eliṣa dọna ẹn dọmọ: “Yẹn ma na jo we do.”—2 Ahọ. 2:2, 4, 6.
15. Kanbiọ tẹlẹ wẹ mí gán nọ kanse mẹhomẹ lẹ?
15 Mì nọ do ojlo nujọnu tọn hia mẹhomẹ lẹ bo nọ yí homẹdagbe do kanhose yé. (Howh. 1:5; 20:5; 1 Tim. 5:1, 2) Mì nọ kàn kanbiọ delẹ sè taidi: “Whenue mì gbẹ́ yin jọja, etẹwẹ hẹn mì kudeji dọ mì ko mọ nugbo lọ?” “Nawẹ numimọ mìtọn lẹ dọ̀n mì sẹpọ Jehovah dogọ gbọn?” “Etẹwẹ mì mọdọ e yin aṣli lọ nado to ayajẹnọ yin zọnmii to sinsẹ̀nzọn Jehovah tọn mẹ?” (1 Tim. 6:6-8) Enẹgodo, mì nọ dotoai dile yé to otàn yetọn pìn.
16. Nawẹ hodọdopọ gán hẹn ale wá na jọja po mẹhomẹ po gbọn?
16 Whenue jọja po mẹhomẹ de po to hodọdopọ, yé omẹ awe lẹ wẹ nọ mọaleyi. (Lom. 1:12) Mìwu jọja lẹ na hẹn pinpẹn nutọn mìtọn jideji gando aliho he mẹ Jehovah nọ penukundo devizọnwatọ nugbonọ etọn lẹ go te go, podọ mẹhomẹ lọ na mọdọ mì kán oda do ota na emi. Homẹ etọn na hùn nado dọ lehe Jehovah ko dona ẹn do na mì.
17. Naegbọn mí gán dọ dọ mẹhomẹ nugbonọ lẹ nọ to whanpẹ yọ́n dogọ dile owhe lẹ to yìyì?
17 Whanpẹ agbasa tọn nọ saba depò dile yè to mẹho yin, amọ́ mẹhe yin nugbonọ na Jehovah lẹ nọ fọ́n bo nọ to whanpẹ yọ́n dogọ to nukun etọn mẹ dile owhe lẹ to yìyì. (1 Tẹs. 1:2, 3) Naegbọn enẹ do yin nugbo? Na dile owhe lẹ to yìyì, yé ko na dotẹnmẹ gbigbọ Jiwheyẹwhe tọn nado yinuwado yé ji bosọ hẹn yé pọnte. Dile mí to vivẹnudo nado yọ́n mẹhomẹ vivẹ́ mítọn lẹ dogọ, nọ doyẹyigona yé bosọ nọ plọnnu sọn yé dè sọ, mọ wẹ mí na nọ mọ yé di adọkunnu mayọnjlẹ lẹ dogọ do niyẹn!
18. Etẹwẹ mí na gbadopọnna to hosọ he bọdego mẹ?
18 Eyin jọja lẹ nọ yí nukun nujọnu tọn do pọ́n mẹhomẹ lẹ, bọ mẹhomẹ lẹ nọ wà nudopolọ na jọja lẹ, agun lọ nọ lodo dogọ. To hosọ he bọdego mẹ, mí na dọhodo lehe mẹhomẹ lẹ gán dohia dọ jọja he to agun lọ mẹ lẹ họakuẹ na yé do ji.
OHÀN 144 Ze Nukun Towe Do Ale lọ Ji!
^ par. 5 Mẹhomẹ nugbonọ lẹ sọgan yin yiyijlẹdo adọkunnu lẹ go. Hosọ ehe na na mí tuli nado hẹn pinpẹn nutọn he mí do na yé jideji, bo nasọ dọhodo lehe mí gán mọaleyi to gigọ́ mẹ sọn nuyọnẹn po numimọ yetọn po mẹ do ji. Humọ, e na hẹn mẹhomẹ lẹ deji dọ otẹn nujọnu tọn de mẹ wẹ yé te to titobasinanu Jiwheyẹwhe tọn mẹ.
