HOSỌ OPLỌN TỌN 39
Whenue Mẹyiwanna de Jo Jehovah Do
“Whlasusu wẹ yé . . . hẹn homẹgble e sinsinyẹn.”—SALM. 78:40.
OHÀN 102 “Gọalọna Mẹhe Yin Madogánnọ Lẹ”
BLADOPỌ *
1. Nawẹ e nọ ṣí na mẹdelẹ eyin mẹyiwanna yetọn de yin didesẹ sọn agun mẹ?
BE MẸYIWANNA towe de ko yin didesẹ sọn agun mẹ wẹ ya? Enẹ gán hẹn we jẹflumẹ taun! Mẹmẹyọnnu de he nọ yin Hilda dọmọ: “Whenue asu ṣie he yin nugbonọ kú to owhe 41 alọwle mítọn tọn godo, n’lẹndọ n’ma gán sọ tindo numimọ de he na ylan humọ to gbẹ̀mẹ. * Amọ́ whenue visunnu ṣie jo agun lọ, asi ẹ po ovi etọn lẹ po do, ninọmẹ ehe sọ vẹawuna mi hugan.”
Jehovah nọ mọnukunnujẹ lehe e gán gbleawuna mí do sọ mẹ, whenue mẹyiwanna mítọn de jo ewọ do (Pọ́n hukan 2, 3tọ) *
2, 3. Sọgbe hẹ Salmu lẹ 78:40, 41, nawẹ e nọ ṣí na Jehovah whenue devizọnwatọ etọn lẹ jo e do?
2 Lẹnnupọndo lehe e na ko vẹna Jehovah do ji whenue angẹli he to whẹndo etọn mẹ delẹ jo ewọ do! (Juda 6) Podọ, yí nukun homẹ tọn do pọ́n lehe e na ko gbleawuna ẹn do sọ whenue e to mimọ bọ omẹ etọn Islaelivi lẹ ṣiatẹ sọta ẹ pludopludo. (Hia Salmu lẹ 78:40, 41.) A gán kudeji dọ e nọ vẹna Otọ́ owanyinọ olọn mẹ tọn mítọn lọsu whenue mẹyiwanna towe de jo ewọ do. E nọ mọnukunnujẹ awufiẹsa he a to pipehẹ mẹ. E na gbọn awuvẹmẹ dali na we tuli po godonọnamẹ he a do hudo etọn po.
3 To hosọ ehe mẹ, mí na dọhodo nuhe mí gán wà nado mọ alọgọ Jehovah tọn whenue mẹyiwanna mítọn de doalọtena Jehovah sinsẹ̀n ji. Mí nasọ gbadopọnna lehe mí gán gọalọna mẹdevo he to pipehẹ nuhahun ehe to agun lọ mẹ lẹ do. Amọ́ jẹnukọn whẹ́, mì gbọ mí ni dọhodo aliho nulẹnpọn tọn he mí dona dapana de ji.
MA NỌ DOWHẸ DEWE BLO
4. Nawẹ e nọ ṣí na mẹjitọ susu eyin visunnu kavi viyọnnu yetọn de jo Jehovah do?
4 Whenue visunnu kavi viyọnnu vivẹ́ de jo Jehovah do, mẹjitọ lẹ nọ saba kanse yede nuhe yé sọgan ko wà dogọ nado gọalọna jọja yetọn nado gbọṣi nugbo lọ mẹ. Whenue visunnu mẹmẹsunnu de he nọ yin Luke tọn yin didesẹ sọn agun mẹ godo, e yigbe dọmọ: “N’dowhẹ dee. N’nọ kudlọ ylankan lẹ gando ninọmẹ lọ go. Whedelẹnu, n’nọ viavi bọ ahun nọ vẹ́ mi.” Elizabeth, mẹmẹyọnnu de he pehẹ ninọmẹ mọnkọ dọ po awubla po dọmọ: “Taidi onọ̀ de, etẹwẹ n’wà yindo? N’mọdọ n’dona ko gboawupo nado zín nugbo lọ do ahun visunnu ṣie tọn mẹ.”
5. Owhẹ̀ mẹnu tọn wẹ eyin mẹde jo Jehovah do?
5 Mí dona nọ flindọ Jehovah ko na dopodopo mítọn mẹdekannujẹ nudide bibasi tọn. Ehe dohia dọ mí gán de vlavo nado setonuna ẹn kavi lala. Jọja delẹ he yin pinplọn whẹ́n to ninọmẹ he ma bọawu paali lẹ mẹ wá de nado sẹ̀n Jehovah bosọ do kọdetọn dagbe to sinsẹ̀nzọn yetọn mẹ. Mẹdevo lẹ he mẹjitọ yetọn lẹ wà nuhe go yé pé lẹpo nado plọn yé whẹ́n sọgbe hẹ nunọwhinnusẹ́n Biblu tọn lẹ wá jo nugbo lọ do whenue yé whẹ́n. Yigodo yinukọn, dopodopo mítọn wẹ dona basi nudide eyin mí na sẹ̀n Jehovah. (Jọṣ. 24:15) Enẹwutu, mẹjitọ he to awubla mẹ lẹ emi, mì nọavùnte sọta ayilinlẹn lọ nado nọ dowhẹ mìde na nugbajẹmẹji ehe!
6. Nawẹ e gán ṣí na jọja de eyin mẹjitọ etọn de jo Jiwheyẹwhe do?
6 To whedelẹnu, mẹjitọ de gán jo nugbo do bo tlẹ sọ jo whẹndo etọn do ga. (Salm. 27:10) Ehe gán vẹawuna ovi he nọ pọ́n mẹjitọ yetọn hlan taidi apajlẹ he yé gán hodo lẹ. Esther he baba etọn yin didesẹ sọn agun mẹ dọmọ: “N’nọ saba viavi na n’wá doayi e go dọ e ma yin nugbo lọ kẹdẹ mẹ wẹ e danbú sọn. Uwọ lọsu wẹ basi dide nado jo Jehovah do petepete. N’yiwanna baba ṣie, enẹwutu whenue e yin didesẹ sọn agun mẹ, n’nọ to nuhà mapote gando dagbemẹninọ etọn go. N’tlẹ nọ jọsi to whedelẹnu.”
7. Numọtolanmẹ tẹwẹ Jehovah nọ do gando jọja he mẹjitọ etọn yin didesẹ sọn agun mẹ de go?
7 Jọja lẹ emi, eyin mẹjitọ mìtọn de ko yin didesẹ sọn agun mẹ, onú mìtọn nọ biọlanmẹna mí taun! Mì jaale bo deji dọ Jehovah lọsu nọ mọnukunnujẹ awufiẹsa mìtọn mẹ ganji. E yiwanna mì bosọ yọ́n pinpẹn nugbonọ-yinyin mìtọn tọn, podọ nudopolọ wẹ e yin na mílọsu he yin mẹmẹsunnu po mẹmẹyọnnu mìtọn lẹ po. Mì sọ flin ga dọ e ma yin owhẹ̀ mìtọn eyin mẹjitọ mìtọn de basi nudide mọnkọ lẹ. Dile mí ko dọ do wayi, Jehovah na gbẹtọvi dopodopo mẹdekannujẹ nado basi nudide. Podọ, mẹhe ko klan yede do wiwe na Jehovah bosọ yí baptẹm lẹ dopodopo wẹ dona ‘hẹn azọngban yedetiti tọn.’—Gal. 6:5, Odò.
8. Etẹwẹ hagbẹ whẹndo de tọn lẹ gán wà dile yé to tenọpọn mẹyiwanna yetọn de nado lẹkọwa Jehovah dè? (Sọ pọ́n apotin lọ “ Lẹkọwa Jehovah Dè.”)
8 Eyin mẹyiwanna towe de jo Jehovah do, jọwamọnu wẹ e yin nado tindo todido lọ dọ to gbèdopo, e na lẹkọwa Ewọ dè. Amọ́, etẹwẹ a gán to wiwà todin whẹ́? A gán to nuhe go a pé lẹpo wà nado penukundo dewe go to gbigbọ-liho. Gbọnmọ dali, a na ze apajlẹ dagbe de dai na hagbẹ whẹndo lọ tọn he pò lẹ, etlẹ yin na mẹdesẹ sọn agun mẹ lọ lọsu. A nasọ mọ huhlọn he a do hudo etọn nado doakọnna awufiẹsa towe lẹ. Mì gbọ mí ni dọhodo afọdide dagbe delẹ he a sọgan ze ji.
NUHE A GÁN WÀ NADO LODO TO GBIGBỌ-LIHO
9. Aliho tẹlẹ mẹ wẹ Jehovah gán na we huhlọn te? (Sọ pọ́n apotin lọ “ Wefọ Delẹ He Na Miọnhomẹna We Eyin Mẹyiwanna Towe de Jo Jehovah Do.”)
9 Nọ hẹn aṣa gbigbọmẹ tọn dagbe lẹ go. Nujọnu taun wẹ e yin dọ a ni zindonukọn nado to dewe po hagbẹ whẹndo lọ tọn he pò lẹ po hẹn lodo. Nawẹ a gán wàmọ gbọn? A na mọ huhlọn yí sọn Jehovah dè eyin a zindonukọn nado nọ hia Ohó Jiwheyẹwhe tọn, nọ lẹnayihamẹpọn deji bosọ nọ yì opli agun tọn lẹ. Joanna he otọ́ etọn po nọviyọnnu etọn po jo nugbo do dọmọ: “N’nọ tindo jijọho ahun mẹ tọn eyin n’hianu gando mẹhe go Biblu donù delẹ go taidi Abigaili, Ẹsteli, Jobu, Josẹfu po Jesu po. Apajlẹ yetọn nọ zọ́n bọ linlẹn dagbe lẹ nọ gọ́ ahun po ayiha ṣie po mẹ bosọ nọ de awufiẹsa ṣie pò. N’ko sọ mọdọ ohàn sunmẹsunmẹ tọn mítọn lẹ nọ namẹ tuli taun.”
10. Nawẹ Salmu lẹ 32:6-8 do lehe mí gán duto numọtolanmẹ flumẹjijẹ tọn lẹ ji do hia gbọn?
10 Nọ dọ nuhe to ahun ji na we lẹ na Jehovah. Whenue a to pipehẹ numọtolanmẹ awubla tọn lẹ, ma doalọtena dẹ̀hiho hlan ẹn blo. Nọ vẹ̀ Jiwheyẹwhe owanyinọ mítọn dọ ni gọalọna we nado nọ pọ́n ninọmẹ lọ hlan dile ewọ nọ wà do, podọ nado ‘na we wuntuntun bo plọn we aliho he hiẹ dona gbọn.’ (Hia Salmu lẹ 32:6-8.) Na nugbo tọn, e gán vẹawuna we taun nado dọ numọtolanmẹ towe lẹpo na Jehovah. Amọ́, Jehovah mọnukunnujẹ awufiẹsa ahun towe mẹ tọn mẹ to gigọ́ mẹ. E yiwanna we sisosiso bosọ nọ na we tuli nado dọ nuhe to ahun ji na we lẹpo na ẹn.—Eks. 34:6; Salm. 62:7, 8.
11. Sọgbe hẹ Heblu lẹ 12:11, naegbọn mí dona dejido mẹplọnlọ owanyinọ Jehovah tọn go? (Sọ pọ́n apotin lọ “ Tito Mẹdesẹ sọn Agun mẹ Tọn—Dohia Owanyi Jehovah Tọn.”)
11 Kọngbedopọ hẹ nudide mẹho lẹ tọn. Jehovah wẹ ze tito mẹdesẹ sọn agun mẹ tọn dai. Mẹplọnlọ owanyinọ etọn nọ yin na dagbe hugan mẹlẹpo tọn, etlẹ yin na ylanwatọ lọ tọn. (Hia Heblu lẹ 12:11.) Mẹhe nọ mọhodọdo aliho he mẹ mẹho agun tọn lẹ penukundo whẹho whẹdida tọn de go te lẹ ma nọ saba dọ nudepope he na dohia dọ ylanwatọ lọ ṣinuwa. Do glido, mí ma do nudọnamẹ lẹpo. Enẹwutu, nuyọnẹnnu wẹ e yin nado deji dọ mẹho he penukundo whẹho lọ go lẹ wà nuhe go yé pé lẹpo nado hodo nunọwhinnusẹ́n Biblu tọn lẹ podọ nado dawhẹ sọgbe hẹ aliho “Jehovah” tọn.—2 Otàn. 19:6.
12. Ale tẹlẹ wẹ mẹdelẹ ko mọyi na yé nọgodona tito mẹplọnlọ-didomẹgo tọn he Jehovah zedai?
12 Eyin a nọgodona nudide he mẹho lẹ basi nado de mẹyiwanna towe de sẹ̀ sọn agun mẹ, ehe gán gọalọna ẹn taun nado lẹkọwa Jehovah dè. Elizabeth he go mí donù wayi dọmọ: “E vẹawuna mí taun nado sánkanna haṣinṣan mítọn hẹ visunnu mítọn. Amọ́ to whenue e lẹkọwa Jehovah dè, e yigbe dọ nudide dagbe wẹ mẹho lẹ basi bo do de emi sẹ̀ sọn agun mẹ. To nukọn mẹ, e dohia dọ emi yọ́n pinpẹn nuhe emi plọn sọn e mẹ lẹ tọn.” Elizabeth sọ dọ dọ: “N’yọ́n pinpẹn mẹplọnlọ Jehovah tọn taun.” Asu etọn Mark yidogọ dọ: “To nukọn mẹ, whlasusu wẹ visunnu mítọn dọna mi dọ dopo to nuhe zọ́n bọ emi jlo na lẹkọ lẹ mẹ wẹ yindọ, mí wà nuhe mí dona wà lọ pẹẹ. Homẹ ṣie hùn taun dọ Jehovah gọalọna mí nado setonu.”
13. Etẹwẹ gán gọalọna we nado pehẹ numọtolanmẹ awufiẹsa tọn lẹ?
13 Nọ dọ numọtolanmẹ towe lẹ na họntọn he gán mọnukunnujẹ gowe lẹ. Nọ dogbẹ́ hẹ Klistiani he whèwhín bo gán gọalọna we nado hẹn pọndohlan dagbe go lẹ. (Howh. 12:25; 17:17) Joanna he go mí donù wayi dọ dọ: “To ahun ṣie mẹ, n’mọ dee to ṣokẹdẹ. Amọ́, hodidọ na họntọn dejidego lẹ gọalọna mi nado pehẹ ninọmẹ lọ.” Todin etẹwẹ lo, eyin e taidi dọ hodidọ mẹdelẹ tọn to agun lọ mẹ sọ nọ zínzín apà na we?
14. Naegbọn mí dona “nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii”?
14 Nọ fahomẹ hẹ mẹmẹsunnu po mẹmẹyọnnu towe lẹ po. Na nugbo tọn, mẹlẹpo ma gán nọ yinuwa hẹ mí to aliho he sọgbe mẹ to whelẹponu. (Jak. 3:2) Mímẹpo wẹ yin mapenọ, enẹwutu ni ma paṣa we blo eyin e nọ vẹawuna mẹdelẹ taun nado yọ́n nuhe yé na dọ kavi eyin yé tlẹ nọ dọ nudelẹ to mayọnẹn mẹ he nọ hẹn awufiẹsa wá na we. Nọ flin ayinamẹ apọsteli Paulu tọn he dọmọ: “Mì nọ to linsinyẹn hẹ ode awetọ bo nọ to jijona ode awetọ sọn ojlo mẹ wá zọnmii eyin mẹde tlẹ tindo whẹwhinwhẹ́n nado wọ́ po mẹdevo po.” (Kol. 3:13) Mẹmẹyọnnu de he hẹnnumẹ etọn de yin didesẹ sọn agun mẹ dọmọ: “Jehovah ko gọalọna mi nado jona mẹmẹsunnu he jlo na na mi tuli, amọ́ bo ka gbleawuna mi to mayọnẹn mẹ lẹ.” Etẹwẹ agun lọ gán wà nado gọalọna hagbẹ whẹndo lọ tọn nugbonọ he pò lẹ?
AGUN LỌ SỌGAN GỌALỌ
15. Etẹwẹ gán gọalọna hagbẹ whẹndo tọn he mẹyiwanna yetọn de yin didesẹ sọn agun mẹ to agọe lẹ?
15 Mì nọ jọmẹ hẹ hagbẹ whẹndo lọ tọn he yin nugbonọ lẹ bosọ nọ do họntọn yé. Mẹmẹyọnnu de he nọ yin Miriam yigbe dọ emi nọ hanú nado yì opli lẹ whenue nọvisunnu emitọn yin didesẹ sọn agun mẹ godo. E dọmọ: “N’nọ hanú gando nuhe mẹlẹ na dọ go. Amọ́, họntọn dagbedagbe lẹ to finẹ he nọ sè vivẹ́ hẹ mi, podọ yé ma nọ dọho agọ̀ gando nọvisunnu ṣie he yin didesẹ sọn agun mẹ lọ go. Po alọgọ yetọn po, n’ma mọ dee to ṣokẹdẹ to whenue n’to awufiẹsa mẹ.” Mẹmẹyọnnu devo flin dọmọ: “Whenue visunnu mítọn yin didesẹ sọn agun mẹ, họntọn vivẹ́ lẹ wá miọnhomẹna mí. Delẹ to yé mẹ yigbe dọ yé ma yọ́n nuhe yé na dọ. Yé viavi hẹ mi kavi kanwehlan mi. Nuhe yé wà gọalọna mi taun!”
16. Nawẹ agun lọ gán to godonọna mẹhe hẹnnumẹ yetọn lẹ yin didesẹ sọn agun mẹ lẹ zọnmii gbọn?
16 Mì zindonukọn nado nọ nọgodona hagbẹ whẹndo lọ tọn he yin nugbonọ lẹ. Hugan gbede pọ́n, yé do hudo owanyi po tulinamẹ mìtọn po tọn. (Heb. 10:24, 25) To whedelẹnu, hagbẹ whẹndo tọn mẹhe yin didesẹ sọn agun mẹ lẹ tọn nọ mọdọ emi lọsu ko yin kinklandovo na agun lọ. Mì dike e ṣí mọ na yé blo! Na nugbo tọn, jọja he mẹjitọ yetọn ko jo nugbo lọ do lẹ do hudo pipà po tulinamẹ po tọn. Maria he asu etọn yin didesẹ sọn agun mẹ bosọ jo whẹndo lọ do dọmọ: “Họntọn ṣie delẹ nọ wá whé ṣie gbè bo nọ danú bosọ nọ plọnnu hẹ mí. Yé nọ sè vivẹ́ hẹ mi bosọ nọ viavi hẹ mi. Yé nọ yiavùnlọna mi to whenue mẹlẹ to onú agọ̀ lẹ dọ gando go e. Nado dọ hójọhó, yé na mi tuli taun!”—Lom. 12:13, 15.
Agun lọ gán nọgodona hagbẹ whẹndo lọ tọn nugbonọ lẹ po owanyi po (Pọ́n hukan 17tọ) *
17. Nawẹ mẹho lẹ gán nọ do awuvẹmẹ hia mẹhe to awubla mẹ lẹ gbọn?
17 Mẹho agun tọn lẹ emi, mì nọ yí dotẹnmẹ hundote lẹpo zan nado hẹn hagbẹ whẹndo lọ tọn he yin nugbonọ lẹ lodo. Mì tindo lẹblanulọkẹyi vonọtaun lọ nado miọnhomẹna sinsẹ̀n-basitọ hatọ he mẹyiwanna yetọn lẹ ko jo Jehovah do lẹ. (1 Tẹs. 5:14) Mì nọ ze afọdide tintan lọ nado na yé tuli jẹnukọnna opli lẹ podọ to opli lẹ godo. Mì nọ dla yé pọ́n bosọ nọ hodẹ̀ hẹ yé. Mì nọ wazọ́n hẹ yé to lizọnyizọn lọ mẹ, kavi to whedelẹnu, mì nọ ylọ yé wá sinsẹ̀n-bibasi whẹndo tọn mìtọn tẹnmẹ. Lẹngbọhọtọ gbigbọmẹ tọn lẹ dona nọ do awuvẹmẹ po owanyi po hia lẹngbọ Jehovah tọn he to awubla mẹ lẹ bosọ nọ na yé ayidonugo he jẹ.—1 Tẹs. 2:7, 8.
HẸN TODIDO GO BOSỌ NỌ DEJIDO JEHOVAH GO
18. Sọgbe hẹ 2 Pita 3:9, etẹwẹ Jiwheyẹwhe jlo na mẹhe ṣinuwa lẹ?
18 Jehovah “ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (Hia 2 Pita 3:9.) Eyin mẹde tlẹ waylando sinsinyẹn de, ogbẹ̀ etọn gbẹ́ họakuẹ to nukun Jiwheyẹwhe tọn mẹ. Lẹnnupọndo ahọ́ daho he Jehovah sú na ogbẹ̀ ylandonọ lẹ tọn ji, enẹ wẹ avọ́sinsan ofligọ Visunnu vivẹ́ etọn tọn. Jehovah nọ gbọn awuvẹmẹ dali wà nuhe go e pé lẹpo nado gọalọna omẹ enẹlẹ nado lẹkọwa ewọ dè. Todido etọn wẹ yindọ yé na basi dide nado lẹkọ dile mí gán mọ do to apajlẹ he Jesu na gando visunnu he danbú lọ go mẹ. (Luku 15:11-32) Susu mẹhe jo nugbo lọ do lẹ tọn wẹ ko lẹkọwa Otọ́ olọn mẹ tọn owanyinọ yetọn dè. Podọ, agun lọ dokuavọna yé po zohunhun po. Homẹ Elizabeth he go mí donù wayi tọn hùn whenue visunnu etọn yin gigọyí. Whenue e flin nuhe ko jọ wayi lẹ, e dọmọ: “N’yọ́n pinpẹn mẹhe na mí tuli ma nado hẹn todido bu lẹ tọn taun.”
19. Naegbọn mí gán zindonukọn nado to jide do Jehovah go?
19 Mí gán nọ dejido Jehovah go to whelẹponu. E ma nọ na mí anademẹ de gbede he na hẹn awugble wá na mí. Otọ́ alọtlútọ podọ awuvẹmẹtọ de wẹ ewọ, bosọ tindo owanyi sisosiso na mẹhe yiwanna ẹn bosọ nọ sẹ̀n ẹn lẹpo. Kudeji dọ Jehovah ma na gbẹ́ we dai to ojlẹ awufiẹsa tọn towe lẹ mẹ. (Heb. 13:5, 6) Mark he go mí donù wayi dọmọ: “Jehovah ma jo mí do paali. E ma dẹn do mí gbede whenue mí to jujugbọn nuhahun lẹ mẹ.” Jehovah na to “huhlọn he hú jọwamọ tọn” na we zọnmii. (2 Kọl. 4:7) Mọwẹ, a gán gbẹ́ yin nugbonọ bosọ hẹn todido go, etlẹ yin to whenue mẹyiwanna de jo Jehovah do.
OHÀN 44 Odẹ̀ Agbátọnọ Tọn
^ par. 5 Lehe e nọ blawu do sọ eyin mẹyiwanna mẹtọn de jo Jehovah do! Hosọ ehe dọhodo lehe e nọ ṣí na Jiwheyẹwhe mítọn eyin onú mọnkọ jọ ji. E gbadopọnna nudagbe delẹ he hagbẹ whẹndo lọ tọn nugbonọ he pò lẹ gán wà nado doakọnna awufiẹsa lọ bo gbẹ́ lodo to gbigbọ-liho. Hosọ ehe nasọ dọhodo lehe mẹhe to agun lọ mẹ lẹpo gán miọnhomẹna hagbẹ whẹndo lọ tọn lẹ bosọ nọgodona yé do ji.
^ par. 1 Yinkọ he tin to hosọ ehe mẹ delẹ ko yin didiọ.
