Pọ́n lehe Biblu na gblọndo kanbiọ ehelẹ tọn do.

Owalọ lẹ 24:15 dọna mí dọ “fọnsọnku dodonọ lẹ po mawadodonọ lẹ po tọn de” na tin. Dodonọ lẹ wẹ mẹhe setonuna Jiwheyẹwhe jẹnukọnna okú yetọn lẹ, enẹwutu wẹ yinkọ yetọn do yin kinkan do owe ogbẹ̀ tọn lọ mẹ. (Mal. 3:16) Mawadodonọ lẹ bẹ mẹhe ma tindo dotẹnmẹ he pé nado plọnnu gando Jehovah go jenukọnna okú yetọn lẹ hẹn, enẹwutu yinkọ yetọn ma yin kinkan do owe ogbẹ̀ tọn lọ mẹ.

Johanu 5:28, 29 to hodọ gando pipli gbẹtọvi tọn awe he yin nùdego to Owalọ lẹ 24:15 mẹ lẹ dopolọ go. Jesu dọ dọ “mẹhe wà dagbe lẹ” na tọnjẹgbonu “na fọnsọnku ogbẹ̀ tọn bọ mẹhe wà nuylankan lẹ na fọnsọnku whẹdida tọn.” Dodonọ lẹ wà onú dagbe lẹ jẹnukọnna okú yetọn. Yé na tọnjẹgbonu na fọnsọnku ogbẹ̀ tọn, na yinkọ yetọn lẹ gbẹ́ to owe ogbẹ̀ tọn lọ mẹ wutu. Amọ́, mawadodonọ lẹ wà nuylankan whẹpo do kú. Yé na tọnjẹgbonu na fọnsọnku whẹdida tọn. Yinkọ yetọn lẹ ma ko yin kinkan do owe ogbẹ̀ tọn lọ mẹ, podọ yé na jugbọn ojlẹ whẹdida kavi mẹgbigbejepọn tọn de mẹ. To ojlẹ enẹ mẹ, yé na tindo dotẹnmẹ lọ nado plọnnu gando Jehovah go, podọ na yinkọ yetọn lẹ nido yin kinkan do owe ogbẹ̀ tọn lọ mẹ.

Osọhia 20:12, 13 basi zẹẹmẹ dọ mẹhe fọnsọnku lẹpo ma na setonuna “nuhe yin kinkan do owe-hihá lọ lẹ mẹ lẹ,” enẹ wẹ osẹ́n yọyọ he Jiwheyẹwhe na na mí to aihọn yọyọ lọ mẹ lẹ. Mẹhe ma setonu lẹ na yin vivasudo.—Isa. 65:20.

Daniẹli 12:2 dọ dọdai dọ delẹ to mẹhe to amlọndọ to okú mẹ lẹ mẹ na fọnsọnku “na ogbẹ̀ madopodo bọ mẹdevo lẹ na vlẹko podọ na wangbẹna madopodo.” Wefọ ehe to hodọ gando nuhe na yin whẹdida godo tọn mẹhe na yin finfọnsọnku lẹ tọn go, enẹ wẹ “ogbẹ̀ madopodo” kavi “wangbẹna madopodo.” Enẹwutu, to vivọnu owhe fọtọ́n lọ tọn, mẹdelẹ na mọ ogbẹ̀ madopodo yí, bọ mẹdevo lẹ na yin vivasudo kakadoi.—Osọ. 20:15; 21:3, 4.

Lẹnnupọndo apajlẹ de ji. Ninọmẹ pipli voovo awe he yin finfọnsọnku lẹ tọn gán yin yiyijlẹdo mẹhe jlo na yì nọ tògodo lẹ tọn go. Dodonọ lẹ gán yin yiyijlẹdo mẹhe mọ wema tògodo-ninọ tọn yí, ehe zọ́n bọ yé na yin alọkẹyi bosọ tindo mẹdekannujẹ jẹ obá de mẹ lẹ go. To vogbingbọn mẹ, mawadodonọ lẹ gán yin yiyijlẹdo jonọ he gán mọ wema tògodo-ninọ tọn he nọ yin nina jonọ lẹ na ojlẹ de yí lẹ go. Jonọ mọnkọ lẹ dona do yede hia taidi mẹhe jẹ whẹpo do yin alọkẹyi nado zindonukọn bo nọ otò yọyọ lọ mẹ. Mọdopolọ, mawadodonọ he yin finfọnsọnku lẹ dona setonuna osẹ́n Jehovah tọn lẹ bosọ do yede hia di dodonọ nado sọgan nọ Paladisi mẹ kakadoi. Podọ mahopọnna wema tògodo-ninọ tọn he jonọ lọ lẹ mọyi to tintan whenu nado biọ otò de mẹ, mẹdelẹ sọgan wá mọ wema tòvi-yinyin tọn yí to godo mẹ bọ mẹdevo lẹ gán yin yinyan sọn otò lọ mẹ. Kọdetọn lọ na sinai do nuyiwa yetọn po walọ he yé zan to otò yọyọ lọ mẹ po ji. Mọdopolọ, kọdetọn godo tọn mẹhe na yin finfọnsọnku lẹpo tọn na sinai do nugbonọ-yinyin po walọyizan yetọn to aihọn yọyọ lọ mẹ po ji.

Jehovah yin Jiwheyẹwhe lẹblanunọ he nọ dawhẹ dodo. (Deut. 32:4; Salm. 33:5) Ewọ na do owanyi hia bo na fọ́n dodonọ lẹ po mawadodonọ lẹ po sọnku. Podọ to ojlẹ dopolọ mẹ, e na hẹn nujinọtedo he yiaga walọ dagbe tọn etọn lẹ go. Mẹhe wá yiwanna ẹn bo nọ nọgbẹ̀ sọgbe hẹ nujinọtedo etọn lẹ kẹdẹ wẹ na tindo dotẹnmẹ hundote lọ nado nọgbẹ̀ to aihọn yọyọ lọ mẹ.