1, 2. Naegbọn mí dona tindo ojlo to kandai he gando Samsọni go mẹ?

 ETẸWẸ nọ wá ayiha mẹ na we eyin a sè yinkọ lọ Samsọni? Ayihaawe matin dọ dawe he tindo huhlọn ayidego tọn de ji wẹ ayiha towe nọ yì. Nugbo taun wẹ enẹ. Amọ́, Samsọni basi nudide ylankan de he dekọtọn do awufiẹsa susu mẹ na ẹn. Etomọṣo, Jehovah ze ayidonugo do nuhe Samsọni wà nado yin nugbonọ na ẹn lẹpo ji, enẹ wẹ dehe E dike bọ yé yin kinkan do Biblu mẹ na ale mítọn lẹ.

² Jehovah yí Samsọni zan nado wà onú jiawu lẹ nado gọalọna mẹdide Etọn lẹ, enẹ wẹ Islaelivi lẹ. Owhe kanweko susu lẹ to okú Samsọni tọn godo, Jehovah gbọdo apọsteli Paulu nado slẹ yinkọ Samsọni tọn to pọmẹ hẹ yinkọ sunnu he do yise ayidego tọn hia lẹ tọn. (Heb. 11:32-34) Apajlẹ Samsọni tọn gán na mí tuli. E dejido Jehovah go, etlẹ yin to ninọmẹ he vẹawu taun lẹ mẹ. Mì gbọ mí ni gbadopọnna lehe mí gán mọ tuli po nuplọnmẹ yọ́n-na-yizan devo lẹ po yí sọn apajlẹ etọn mẹ do.

3. Azọ́ndenamẹ tẹwẹ Samsọni mọyi?

³ Whenue Samsọni yin jiji, Filistinu lẹ wẹ to gandu do akọta Islaeli tọn ji, bo nọ gbidikọna yé. (Whẹ. 13:1) Islaelivi lẹ jiya to alọ yetọn mẹ taun, na aliho kanyinylan tọn he mẹ yé dugán te wutu. Jehovah de Samsọni nado “nọ nukọn nado  whlẹn Islaeli sọn alọ Filistinu lẹ tọn mẹ.” (Whẹ. 13:5) Azọ́ndenamẹ he kàn dẹpẹ biọ nankọ die! Nado hẹn azọ́ndenamẹ sinsinyẹn ehe di, Samsọni dona ganjẹ Jehovah go.

4. Nawẹ Jehovah gọalọna Samsọni nado tún ede dote sọn alọ Filistinu lẹ tọn mẹ gbọn? (Whẹdatọ lẹ 15:14-16)

⁴ Lẹnnupọndo apajlẹ dopo ji he do lehe Samsọni dejido Jehovah gọna godonọnamẹ etọn go do hia. To gbèdopo, awhànpa Filistinu lẹ tọn de wá nado wle Samsọni to Lehi, vlavo to lẹdo Juda tọn mẹ. Sunnu Juda tọn lẹ dibu taun, enẹwutu yé basi dide nado ze Samsọni do alọmẹ na kẹntọ lẹ. Omẹ Samsọni tọn titi lẹ yí okàn yọyọ awe do blá ẹ gbanun-gbanun bo ze e do alọ Filistinu lẹ tọn mẹ. (Whẹ. 15:9-13) Amọ́, “gbigbọ Jehovah tọn na . . . huhlọn” Samsọni bọ okàn lọ lẹ ṣùn sọn alọ na ẹn. Enẹgodo, e “mọ aglànkáhú kẹtẹkẹtẹ asu” de tọn, bosọ yí i do hù sunnu Filistinu lẹ tọn 1 000!—Hia Whẹdatọ lẹ 15:14-16.

5. Etẹwẹ aglànkáhú kẹtẹkẹtẹ de tọn he Samsọni yizan dehia gando jidide etọn to Jehovah mẹ go?

⁵ Naegbọn Samsọni do yí aglànkáhú kẹtẹkẹtẹ de tọn zan? Na nugbo tọn, e ma yin adánwanu de he mẹlẹ nọ zan to paa mẹ! Matin ayihaawe, Samsọni yọnẹn dọ Jehovah wẹ na zọ́n bọ emi na do kọdetọn dagbe, e ma yin adánwanu he emi yizan. Mọwẹ, dawe nugbonọ ehe yí nuhe e mọ zan nado wà ojlo Jehovah tọn dotana. E họnwun dọ na Samsọni ganjẹ Jehovah go wutu, e gbawhàn sunnu enẹ lẹpo tọn.

6. Whenue mí to azọ́ndenamẹ yẹwhehọluduta tọn mítọn lẹ hẹndi, etẹwẹ mí gán plọn sọn Samsọni dè?

⁶ Jehovah gán na huhlọn mílọsu nado hẹn azọ́ndenamẹ mítọn lẹ di, eyin yé tlẹ taidi nuhe húagbọ́mẹ. Jiwheyẹwhe gán wàmọ to aliho he gán jiawu na mí de mẹ. Deji dọ Jehovah he na huhlọn Samsọni na gọalọna we nado wà ojlo Etọn dile e na dẹnsọ bọ a na nọ ganjẹ alọgọ Etọn go.—Howh. 16:3.

7. Apajlẹ tẹwẹ dohia dọ nujọnu wẹ e yin nado nọ lẹhlan Jehovah nado mọ anademẹ etọn lẹ?

⁷ Mẹmẹsunnu po mẹmẹyọnnu po susu he nọ do mahẹ to tito họ̀gbigbá yẹwhehọluduta tọn mẹ lẹ ko dejido Jehovah go. To dai, mẹmẹsunnu lẹ wẹ nọ saba basi yẹdide suhugan Plitẹnhọ Ahọluduta tọn yọyọ lẹ po ohọ̀ devo  lẹ po tọn bosọ nọ gbá yé. Amọ́ to godo mẹ, hudo he to tintin to titobasinanu Jehovah tọn mẹ lẹ zọ́n bọ diọdo dona yin bibasi. Mẹmẹsunnu azọ́ngbannọ lẹ dín anademẹ Jehovah tọn bo tẹ́n aliho yọyọ devo lẹ pọ́n, taidi nado họ̀ ohọ̀ lẹ bosọ vọ́ yé jlado. Robert he wazọ́n hẹ tito họ̀gbigbá tọn mítọn susu to owhe agọe tọn lẹ mẹ lẹdo aihọn pé dọ dọ: “To tintan whenu, e ma bọawuna mẹdelẹ nado kẹalọyi aliho nuyiwa tọn yọyọ ehe.” E yidogọ dọmọ: “E gbọnvo taun na nuhe mí ko nọ wà na owhe susu. Amọ́, mẹmẹsunnu lẹ yigbe nado diọada, podọ e họnwun dọ Jehovah to didona diọdo ehelẹ.” Apajlẹ dopo poun wẹ ehe yin gando lehe Jehovah to anadena omẹ etọn lẹ nado wà ojlo etọn do go. Sọn ojlẹ de mẹ jẹ devo mẹ, mímẹpo na wà dagbe nado nọ kanse míde dọ, ‘Be n’nọ dín anademẹ Jehovah tọn bo nọ wleawufo nado to adàdiọ to sinsẹ̀nzọn ṣie hlan ewọ mẹ ya?’

8. To gbèdopo he nùgbla hù Samsọni sinsinyẹn, etẹwẹ e wà?

⁸ A gán ko hianu gando nujijọ devo lẹ go he whenu Samsọni wà onú jiawu lẹ te. Ewọ kẹdẹ hù kinnikinni de, podọ to godo mẹ e hù sunnu 30 to tòdaho Filistinu lẹ tọn de mẹ he nọ yin Aṣikelọni. (Whẹ. 14:5, 6, 19) Samsọni yọnẹn dọ emi ma gán ko wà onú ehelẹ gbede eyin alọgọ Jehovah tọn dẹ́n. Ehe họnwun to nujijọ de whenu he nugbla to hùhù i sinsinyẹn, to whenue e ko hù Filistinu 1 000 godo. Etẹwẹ e wà? Kakati nado ganjẹ ede go nado mọ osin he e na nù, e dawhá ylọ Jehovah na alọgọ.—Whẹ. 15:18.

9. Nawẹ Jehovah na gblọndo na ovẹvivẹ Samsọni tọn na alọgọ gbọn? (Whẹdatọ lẹ 15:19)

⁹ Jehovah na gblọndo awhágbe Samsọni tọn na alọgọ bo wleawu asisa osin tọn de tọn to azọ́njiawu-liho. To whenue Samsọni ko nù sọn asisa osin tọn lọ mẹ godo, “e gọ̀ huhlọn mọyi bo gọwá ede mẹ.” (Hia Whẹdatọ lẹ 15:19.) E taidi dọ asisa osin tọn yọyọ ehe gbẹ́ nọ aimẹ na owhe lẹ, kakajẹ whenue Yẹwhegán Samuẹli yin gbigbọdo nado kàn owe Whẹdatọ lẹ tọn. Islaelivi he mọ osin he to sisà ehe lẹ gán ko flindọ eyin sinsẹ̀n-basitọ nugbonọ Jehovah tọn lẹ nọ ganjẹ ewọ go, e na gọalọna yé to ojlẹ nuhudo tọn lẹ mẹ.

10. Etẹwẹ e nọ biọ nado dín alọgọ Jehovah tọn? (Sọ pọ́n yẹdide lọ.)

¹⁰ Mílọsu dona nọ lẹhlan Jehovah na alọgọ mahopọnna nunina, nugopipe kavi nuwadotana mítọn lẹ to sinsẹ̀nzọn etọn mẹ. Mí dona gbọn whiwhẹ dali kẹalọyi nugbo lọ dọ mí na do kọdetọn dagbe nujọnu tọn kiki eyin mí nọ ganjẹ Jehovah go. Kẹdẹdile Samsọni mọ huhlọn yí whenue e nù osin he Jehovah wleawu etọn do, mílọsu na mọ huhlọn yí to gbigbọ-liho, eyin mí nọ mọaleyi sọn nuhe Jehovah wleawu etọn na mí lẹpo mẹ.—Mat. 11:28.

11. Nawẹ mí gán nọ mọaleyi to gigọ́ mẹ sọn alọgọ Jehovah tọn mẹ gbọn? Na apajlẹ.

¹¹ Lẹnnupọndo apajlẹ Aleksey tọn ji, yèdọ dopo to mẹmẹsunnu mítọn Russie tọn he to akọndona homẹkẹn sinsinyẹn lẹ mẹ. Etẹwẹ gọalọna ẹn nado nọte gligli to ninọmẹ he sinyẹn taun lẹ mẹ? Ewọ po asi etọn po ko ze aṣa dagbe gbigbọmẹ tọn de dai. E dọmọ: “N’nọ tẹnpọn nado tẹdo aṣa gbigbọmẹ tọn ṣie go, enẹ wẹ nado nọ basi oplọn mẹdetiti tọn bosọ nọ hia Biblu egbesọegbesọ. To afọnnu lẹpo, yẹn po asi e po nọ dọhodo wefọ azán lọ tọn ji, bo nọ hodẹ̀ hlan Jehovah dopọ.” Etẹwẹ ehe plọn mí? Kakati nado nọ dejido míde go, mí dona nọ ganjẹ Jehovah go. Gbọnna? Mí gán wàmọ eyin mí nọ doalọ to nuhe gán hẹn yise mítọn lodo lẹ mẹ to gbesisọ mẹ, taidi oplọn mẹdetiti tọn gọna nuwiwa yẹwhehọluduta  tọn devo lẹ. Taidi kọdetọn de, Jehovah na dona vivẹnu he mí nọ do nado sẹ̀n ẹn lẹ susugege. E na huhlọn Samsọni, podọ matin ayihaawe, e gán na huhlọn mílọsu.

12. Nudide ylankan tẹwẹ Samsọni basi, podọ nawẹ ehe gán ko gbọnvona numimọ he e tindo to tintan whenu lẹ gbọn?

¹² Na Samsọni yin mapenọ di mílọsu wutu, e basi nudide ylankan lẹ to whedelẹnu. Na taun tọn, e basi nudide de he hẹn nugbajẹmẹji sinsinyẹn lẹ wá. To whenue Samsọni ko sẹ̀n taidi whẹdatọ na ojlẹ de godo, e “jẹ wanyina yọnnu de ji he nọ nọ̀ Agbàdo Solẹki tọn mẹ bo nọ yin Dẹlila.” (Whẹ. 16:4) Haṣinṣan Samsọni tọn hẹ Dẹlila gbọnvona dehe e ko wleawuna jẹnukọn lẹ. To ojlẹ de mẹ wayi, Samsọni ko biọ họntọn mẹ hẹ yọnnu Filistinu de, amọ́ “Jehovah wẹ to anadena” kọndopọ ehe, yèdọ mẹhe to “dotẹnmẹ hundote de dín . . . nado tọ́nawhàn Filistinu lẹ.” To nukọn mẹ, Samsọni gbọṣi owhé yọnnu galọtọ de tọn gbè to tòdaho Filistinu lẹ tọn de mẹ he nọ yin Gaza. To ninọmẹ enẹ mẹ, Jiwheyẹwhe na huhlọn Samsọni nado bẹ họngbo tòdaho lọ tọn lẹ sọyi, ehe zọ́n bọ tòdaho lọ masọ dohuhlọn ba. (Whẹ. 14:1-4; 16:1-3) Amọ́, e yọnbasi dọ Islaelivi de wẹ Dẹlila yin, enẹwutu haṣinṣan Samsọni tọn hẹ ewọ ma yin dotẹnmẹ de nado tọ́nawhàn Filistinu lẹ.

13. Nawẹ Dẹlila doyẹklọ Samsọni nado biọ ninọmẹ ylankan de mẹ gbọn?

¹³ Dẹlila kẹalọyi akuẹ he yinukunkẹ de sọn Filistinu lẹ si nado dùpa do Samsọni ji. Be Samsọni dejido Dẹlila go sọmọ, kavi owanyi he e tindo na ẹn tọ́nnukunna ẹn sọmọ bọ e ma wle nuhe Dẹlila jlo na wà wẹ ya? Depope he whẹho lọ yin, Dẹlila gbidikọna Samsọni whlasusu nado dọ asisa huhlọn etọn tọn na ẹn, podọ to godo mẹ,  ewọ joawuna obiọ etọn lẹ. E blawu dọ nuṣiwa Samsọni tọn zọ́n bọ e ba huhlọn etọn gọna nukundagbe Jehovah tọn pò na ojlẹ de.—Whẹ. 16:16-20.

14. Etẹwẹ yin kọdetọn lọ lẹ whenue Samsọni dejido Dẹlila go?

¹⁴ Samsọni jiya nugbajẹmẹji vẹadi lẹ tọn, na e dejido Dẹlila go kakati ni yin do Jehovah go wutu. Filistinu lẹ wle Samsọni bo tọ́nnukunna ẹn. E yin súsú do gànmẹ to Gaza, yèdọ to mẹhe e ko dowinyan wayi lẹ ṣẹnṣẹn, podọ e lẹzun likun-litọ tata de poun. Enẹgodo, Filistinu lẹ plan ẹn wá hùnwhẹ yetọn de tẹnmẹ bo dowinyan ẹn. Yé basi avọ́sinsan susu lẹ na yẹwhe lalo yetọn he nọ yin Dagọni taidi dọ ewọ wẹ ze Samsọni do alọ yetọn mẹ nkọ. Yé de Samsọni sọn gànpamẹ wá hùnwhẹ lọ tẹnmẹ, na e nido “do nukiko” na yé, na yé nido ṣàn ẹn kò.—Whẹ. 16:21-25.

15. Nawẹ Samsọni dohia gbọn dọ emi ganjẹ Jehovah go whladopo dogọ? (Whẹdatọ lẹ 16:28-30) (Pọ́n yẹdide he to wepa ji.)

¹⁵ Onú sinsinyẹn wẹ Samsọni ṣìwa, amọ́ e ma jogbe. E dín dotẹnmẹ hundote devo nado hẹn azọ́ndenamẹ he Jiwheyẹwhe de na ẹn sọta Filistinu lẹ di. (Hia Whẹdatọ lẹ 16:28-30.) Samsọni vẹ̀ Jehovah dọmọ: “Dike yẹn ni yiahọsu to Filistinu lẹ go.” Jiwheyẹwhe nugbo lọ dotoaina ovẹvivẹ Samsọni tọn bo vọ́ huhlọn jiawu etọn na ẹn whladopo dogọ. Ehe zọ́n bọ Samsọni hù Filistinu susu to nujijọ ehe whenu hugan lehe e ko wà do wayi lẹpo.

16. Etẹwẹ mí gán plọn sọn nuṣiwa Samsọni tọn mẹ?

¹⁶ Dile etlẹ yindọ Samsọni jiya kọdetọn vẹadi nuṣiwa etọn lẹ tọn, e ma doalọtena vivẹnudido nado wà ojlo Jehovah tọn. Eyin mí tlẹ ṣinuwa bo do hudo wọhẹmẹ tọn kavi hẹn azọngban de bu, mí ma dona jogbe. Nọ flindọ agbọ́ mítọn ma nọ pé Jehovah. (Salm. 103:8-10) Mahopọnna nuṣiwa mítọn lẹ, mí gán gbẹ́ yọ́n-na-yizan na Jehovah dile e yin do na Samsọni.

17, 18. Nawẹ apajlẹ Michael tọn na we tuli gbọn? (Sọ pọ́n yẹdide lọ.)

¹⁷ Lẹnnupọndo apajlẹ mẹmẹsunnu jọja de he nọ yin Michael tọn ji. E hẹn alọnu etọn ján to nuwiwa yẹwhehọluduta tọn lẹ mẹ bo sẹ̀n taidi devizọnwatọ lizọnyizọnwiwa tọn podọ gbehosọnalitọ whepoponu tọn. Amọ́, e blawu dọ e jai jẹ nuṣiwa de mẹ, ehe zọ́n bọ e hẹn lẹblanulọkẹyi etọn lẹ bu to agun mẹ. E dọmọ: “Kakajẹ ojlẹ enẹ mẹ, nulẹpo to yìyì na mi ganji to sinsẹ̀nzọn ṣie na Jehovah mẹ. Amọ́  to ajiji mẹ, e taidi na mi dọ n’gbà ota do adó go wẹ nkọ. E ma wá ayiha mẹ na mi pọ́n dọ Jehovah na gbẹ́ mi dai, amọ́ na nugbo tọn, n’nọ kanse dee eyin n’na gbẹ́ tindo haṣinṣan dopolọ po e po kavi eyin n’nasọ wá penugo nado sẹ̀n ẹn to agun mẹ to gigọ́ mẹ dile n’ko wà do wayi.”

¹⁸ E jẹna ayidego dọ Michael ma jogbe. E yidogọ dọmọ: “N’na ayidonugo haṣinṣan ṣie hẹ Jehovah vivọjlado bo nọ dọ nuhe to ahun ji na mi lẹ na ẹn to odẹ̀ mẹ, bo nọ plọn Biblu bosọ nọ lẹnayihamẹpọn.” To nukọn mẹ, Michael gọ̀ lẹblanulọkẹyi etọn lẹ mọyi to agun mẹ. E to sinsẹ̀n todin taidi mẹho agun tọn podọ taidi gbehosọnalitọ whepoponu tọn. E dọmọ: “Godonọnamẹ po tuli he n’mọyi lẹ po, titengbe sọn mẹho agun tọn lẹ dè, gọalọna mi nado mọdọ Jehovah gbẹ́ yiwanna mi. N’gán vọ́ sẹ̀n to agun mẹ whladopo dogọ po ayihadawhẹnamẹnu wiwe de po. Nujijọ ehe plọn mi dọ Jehovah na jona mẹdepope he lẹnvọjọ nugbonugbo.” Mí gán kudeji dọ Jehovah na yí mí zan bosọ dona mílọsu eyin mí tlẹ ṣinuwa, dile e na dẹnsọ bọ mí nọ wà nuhe go mí pé lẹpo nado basi vọjlado lẹ bo zindonukọn nado nọ ganjẹ ewọ go.—Salm. 86:5; Howh. 28:13.

19. Nawẹ apajlẹ Samsọni tọn na we huhlọn gbọn?

¹⁹ To hosọ ehe mẹ, mí gbadopọnna nujijọ ojlofọndotenamẹ tọn delẹ to gbẹzan Samsọni tọn mẹ. E ma yin mẹpipe; etomọṣo, e ma jogbe to vivẹnudido etọn nado sẹ̀n Jehovah mẹ, etlẹ yin whenue e ṣinuwa to whẹho Dẹlila tọn mẹ godo. Podọ agbọ́ etọn ma pé Jehovah. Jiwheyẹwhe sọ yí Samsọni zan whladopo dogọ to aliho jiawu de mẹ. Jehovah gbẹ́ pọ́n ẹn hlan taidi dawe he tindo yise ayidego tọn de, bo dike bọ yinkọ etọn yin sislẹ do kandai nugbonọ he yin nùdego to Heblu lẹ weta 11​tọ tọn mẹ lọ mẹ. Lehe e na tulimẹ do sọ nado yọnẹn dọ mí nọ sẹ̀n Otọ́ owanyinọ olọn mẹ tọn mọnkọ, he nọ jlo vẹkuvẹku nado na mí huhlọn titengbe whenue huhlọn vọ̀ do mí! Enẹwutu taidi Samsọni, mì gbọ mí ni nọ vẹ̀ Jehovah dọmọ: “Flin mi, yẹn vẹ̀ we, na huhlọn mi.”—Whẹ. 16:28.