Dile mí to awuwle nado plọnnu, mí gán nọ kanse míde dọ, ‘Etẹwẹ n’to nukundo nado plọn?’ Amọ́, mí na wà dagbe nado to aṣeji ma nado dike nukundido mítọn lẹ ni glọnalina mí nado mọ nuhe Jehovah to pinplọn mí lẹ. Nawẹ mí gán nọ na ayidonugo nuhe Jehovah to pinplọn mí lẹ gbọn?

Nọ biọ nuyọnẹn to odẹ̀ mẹ. Biọ Jehovah dọ ni gọalọna we nado doayi nuhe e jlo dọ a ni plọn to alọnu lẹ go. (Jak. 1:5) Ma nọ ganjẹ nukunnumọjẹnumẹ towe hoho kẹdẹ go blo.—Howh. 3:5, 6.

Dike huhlọn Ohó Jiwheyẹwhe tọn ni yinuwado ji we. “Ohó Jiwheyẹwhe tọn tin to ogbẹ̀.” (Heb. 4:12) Aliho voovo mẹ wẹ “Ohó” Jiwheyẹwhe tọn he tin to ogbẹ̀ gán yinuwado mí ji te whedepopenu he mí hia Biblu, ṣigba e na yinmọ kiki eyin mí hùn míde do nùvo nado kẹalọyi nuhe mí gán plọn kavi mọyi sọn e mẹ lẹ.

Nọ yọ́n pinpẹn núdùdù gbigbọmẹ tọn he to tafo Jehovah tọn ji lẹ tọn. Núdùdù gbigbọmẹ tọn he e nọ wleawuna lẹ nọ taidi “hùnwhẹ he gọ́ na núdùdù dojó lẹ.” (Isa. 25:6) Ma nọ ze “núdùdù” he a nọ mọdọ a ma na duvivi yetọn lẹ do apadopo blo. Gbọnvona dọ a na mọaleyi sọn yé mẹ, a nasọ duvivi nuhe Jiwheyẹwhe nọ wleawuna lẹ tọn nugbonugbo!