1. Whẹdida tẹwẹ na wá aimẹ to madẹnmẹ?

 MÍ TO gbẹnọ to ojlẹ ayidego tọn de mẹ! To madẹnmẹ, Jesu na dawhẹna gbẹtọvi lẹpo. Jesu basi zẹẹmẹ ojlẹ he na planmẹ jẹ whẹdida ehe kọ̀n tọn to whenue e dọ dọdai de na devi etọn lẹ gando “ohia” tintin tofi mayinukundomọ etọn po “vivọnu titonu lọ tọn” po go. (Mat. 24:3) Dọdai ehe tin to weta 24 po 25tọ owe Matiu tọn po mẹ, podọ to kandai he donù nujijọ dopolọ lẹ go mẹ to Malku weta 13​tọ gọna Luku weta 21​tọ mẹ.

 2. Etẹwẹ mí na gbadopọnna, podọ etẹwutu ehe na wà dagbe na mí?

² Jesu yí oló atọ̀n delẹ zan nado na avase yọ́n-na-yizan lẹ. Enẹ wẹ oló lẹngbọ po gbọgbọẹ lẹ po tọn, awhli nuyọnẹntọ po nulunọ lọ lẹ po tọn gọna talẹnti lẹ tọn. Oló lọ lẹ dopodopo gọalọna mí nado mọnukunnujẹemẹ dọ aliho he mẹ mẹde yinuwa te wẹ na magbe lehe e na yin whẹdana do tọn. Dile mí to dogbapọnna oló enẹlẹ, mì gbọ mí ni doayi nuplọnmẹ lọ lẹ gọna lehe mí gán yí yé do yizan mẹ do go. Oló tintan he ji mí na dọhodo wẹ oló lẹngbọ lẹ po gbọgbọẹ lẹ po tọn.

LẸNGBỌ LẸ PO GBỌGBỌẸ LẸ PO

 3. Whetẹnu wẹ Jesu na dawhẹna gbẹtọ lẹ?

³ To oló lẹngbọ lẹ po gbọgbọẹ lẹ po tọn mẹ, Jesu basi zẹẹmẹ owhẹ̀ he na yin didá na mẹhe tindo dotẹnmẹ lọ nado  kẹalọyi wẹndagbe lọ bosọ nọgodona mẹmẹsunnu yiamisisadode etọn lẹ tọn. (Mat. 25:31-46) To “nukunbibia daho” lọ whenu, ewọ na dawhẹ ehe tlolo jẹnukọnna Amagẹdọni. (Mat. 24:21) Kẹdẹdile lẹngbọhọtọ de nọ klan lẹngbọ lẹ dovo na gbọgbọẹ lẹ do, Jesu na klan mẹhe yí nugbonọ-yinyin do nọgodona hodotọ yiamisisadode etọn lẹ dovo na mẹhe ma wàmọ lẹ.

 4. Sọgbe hẹ Isaia 11:3, 4, naegbọn mí gán kudeji dọ Jesu na dawhẹ dodo na gbẹtọ lẹ? (Sọ pọ́n yẹdide.)

⁴ Dọdai Biblu tọn dohia dọ taidi Whẹdatọ dide Jehovah tọn, Jesu na dawhẹ dodo. (Hia Isaia 11:3, 4.) E nọ pọ́n walọyizan, pọndohlan po hodidọ gbẹtọ lẹ tọn po, ehe bẹ aliho he mẹ yé nọ yinuwa hẹ mẹmẹsunnu yiamisisadode etọn lẹ te hẹn. (Mat. 12:36, 37; 25:40) Jesu na yọ́n mẹhe nọ nọgodona mẹmẹsunnu yiamisisadode etọn lẹ po azọ́n yetọn po lẹ. a Aliho titengbe de he mẹ gbẹtọ taidi lẹngbọ lẹ nọ nọgodona mẹmẹsunnu Klisti tọn lẹ te wẹ gbọn alọgigọna yé to azọ́n yẹwhehodidọ tọn lọ mẹ dali. Mẹhe na do godonọnamẹ enẹ hia lẹ na yin whẹdana taidi “dodonọ lẹ” bo na tindo todido lọ nado “nọgbẹ̀ kakadoi” to aigba ji. (Mat. 25:46; Osọ. 7:16, 17) Ahọsumẹ jiawu nankọ die na mẹhe hẹn tenọgli yetọn go lẹ! Eyin yé yin nugbonọ to nukunbibia daho lọ whenu podọ to godo etọn, yinkọ yetọn na gbọṣi “owe ogbẹ̀ tọn lọ mẹ.”—Osọ. 20:15.

 5. Etẹwẹ mí gán plọn sọn oló lẹngbọ lẹ po gbọgbọẹ lẹ po tọn lọ mẹ, podọ mẹnu lẹ wẹ dona do ojlo to e mẹ?

⁵ Do dewe hia taidi nugbonọ. Mẹhe tindo todido aigba ji tọn lẹ go wẹ oló Jesu tọn he dọhodo lẹngbọ lẹ po gbọgbọẹ lẹ po ji gando hugan. Yé nọ do yise yetọn hia eyin yé nọgodona mẹmẹsunnu Klisti tọn lẹ to azọ́n yẹwhehodidọ tọn lọ mẹ, bosọ yí nugbonọ-yinyin do kẹalọyi anademẹ pipli pẹvi mẹmẹsunnu yiamisisadode he Jesu ko de lẹ tọn. (Mat. 24:45) Amọ́, mẹhe tindo todido olọn mẹ tọn lẹ lọsu dona payi owẹ̀n avase tọn he oló Jesu tọn bẹhẹn lọ go. Etẹwutu? Na Jesu nọ doayi walọyizan, pọndohlan po hodidọ yetọn lẹ po go wutu. Yelọsu dona do yede hia di nugbonọ. Na nugbo tọn, Jesu donù oló awe devo lẹ go he bẹ avase tangan lẹ hẹn na mẹyiamisisadode lẹ. Mí sọ mọ oló ehelẹ to Matiu weta 25​tọ mẹ. Todin, mì gbọ mí ni gbadopọnna oló awhli nuyọnẹntọ po nulunọ lọ lẹ po tọn.

AWHLI NUYỌNẸNTỌ PO NULUNỌ LỌ LẸ PO

 6. Nawẹ atọ́n to awhli lọ lẹ mẹ dohia dọ emi yin nuyọnẹntọ gbọn? (Matiu 25:6-10)

⁶ To oló awhli lọ lẹ tọn mẹ, Jesu dọho gando awhli ao he tọ́nyi nado pé asisunọ yọyọ de go. (Mat. 25:1-4) Todido yemẹpo tọn wẹ nado hodo asisunọ yọyọ lọ yì hùnwhẹ alọwle tọn etọn. Jesu ylọ atọ́n to yé mẹ dọ “nuyọnẹntọ,” bo ylọ atọ́n he pò lẹ dọ “nulunọ.” Awhli nuyọnẹntọ lọ lẹ wleawudai bosọ to aṣeji. Yé to gbesisọ mẹ nado nọtepọn asisunọ yọyọ lọ dile e na dẹnsọ, eyin e tlẹ wá to zánhomẹ. Enẹwutu, yé hẹn miyọ́ngbán nado mọnukunnu to zánmẹ. Yé tlẹ sọ hẹn amì do alọji, vlavo eyin e wá jọ bọ asisunọ yọyọ lọ gbọwhenu. Enẹwutu, yé wleawudai na miyọ́ngbán yetọn nikaa ṣí. (Hia Matiu 25:6-10.) Whenue asisunọ yọyọ lọ wá, awhli nuyọnẹntọ lọ lẹ hodo e yì hùnwhẹ alọwle tọn lọ. To aliho dopolọ mẹ, Klistiani yiamisisadode he ko wleawudai, na yé to aṣeji bosọ yin nugbonọ kakajẹ wiwá Klisti tọn whenu wutu lẹ na yin whẹdana taidi mẹhe jẹ nado  kọnawudopọ hẹ Asisunọ Yọyọ lọ, yèdọ Jesu to Ahọluduta olọn tọn etọn mẹ. b (Osọ. 7:1-3) Bọ awhli atọ́n he yin nulunọ lọ lẹ lo?

 7. Etẹwẹ jọ do awhli atọ́n he yin nulunọ lọ lẹ go, podọ etẹwutu?

⁷ To vogbingbọn mẹ na awhli nuyọnẹntọ lọ lẹ, awhli atọ́n he yin nulunọ lọ lẹ ma to gbesisọ mẹ whenue asisunọ lọ wá. Miyọ́ngbán yetọn lẹ ko dibla ṣí, podọ yé ma hẹn amì do alọji. Whenue yé sè dọ asisunọ yọyọ lọ na wá to madẹnmẹ, yé mọdọ emi dona yì jẹ amì. Yé ma ko lẹkọ whenue asisunọ yọyọ lọ wá. To ojlẹ enẹ mẹ, “awhli he ko wleawufo lọ lẹ biọ họmẹ hẹ ẹ yì hùnwhẹ alọwle tọn lọ, ohọ̀n lọ sọ yin súsú.” (Mat. 25:10) To nukọn mẹ, whenue awhli nulunọ lọ lẹ lẹkọwa bo jlo na biọ ohọ̀ lọ mẹ, asisunọ lọ dọna yé dọmọ: “Yẹn ma yọ́n mì.” (Mat. 25:11, 12) Awhli ehelẹ ma ko wleawudai nado nọtepọn asisunọ yọyọ lọ dile e na dẹnsọ. Etẹwẹ yin nuplọnmẹ lọ na mẹyiamisisadode lẹ?

8, 9. Etẹwẹ mẹyiamisisadode lẹ gán plọn sọn oló awhli lọ lẹ tọn mẹ? (Sọ pọ́n yẹdide lọ.)

⁸ Wleawudai bosọ to aṣeji. Jesu ma to dọdai dọ dọ pipli mẹyiamisisadode lẹ tọn na pé awe bọ dopo na wleawudai nado nọte kakajẹ vivọnu titonu ehe tọn bọ awetọ ma na wàmọ gba. Kakatimọ, zẹẹmẹ nuhe na jọ do mẹyiamisisadode lẹ go eyin yé ma wleawudai nado doakọnnanu kakajẹ opodo tọn basi wẹ e te. To ninọmẹ mọnkọ mẹ, yé ma na mọ ahọsumẹ yetọn yí. (Joh. 14:3, 4) Whẹho sinsinyẹn de wẹ ehe yin! Vlavo todido mítọn yin olọn mẹ tọn kavi aigba ji tọn, mímẹpo wẹ dona hẹn avase he oló awhli lọ lẹ tọn bẹhẹn do ayiha mẹ. Dopodopo mítọn dona gbọṣi nukle bo wleawudai bosọ to gbesisọ mẹ nado doakọnnanu kakajẹ opodo.—Mat. 24:13.

⁹ To whenue Jesu ko donù oló awhli lọ lẹ tọn go nado zinnudo nuhewutu e do yin nujọnu nado wleawudai bosọ nọ nukle ji godo, e donù oló talẹnti lẹ tọn go. Oló ehe zinnudo nujọnu-yinyin azọ́n sinsinyẹn wiwà tọn ji.

 TALẸNTI LỌ LẸ

10. Nawẹ afanumẹ awe delẹ do yede hia di nugbonọ gbọn? (Matiu 25:19-23)

¹⁰ To oló talẹnti lẹ tọn lọ mẹ, Jesu dọho gando afanumẹ awe he yin nugbonọ na ogán yetọn gọna afanumẹ de he ma wàmọ go. (Mat. 25:14-18) Afanumẹ awe lọ lẹ do yede hia taidi nugbonọ, na yé wazọ́n sinsinyẹn nado hẹn akuẹ ogán yetọn tọn jideji. Whẹpo e do tọ́nwhẹ̀n yì tògodo, e bẹ talẹnti lẹ do alọ yetọn mẹ, yèdọ akuẹ he yinukunkẹ de. Afanumẹ nugbonọ awe lọ lẹ wazọ́n sinsinyẹn bosọ yí akuẹ lọ lẹ zan po nuyọnẹn po. Etẹwẹ yin kọdetọn lọ? Whenue ogán yetọn lẹkọ, yé ko hẹn akuẹ he e ze na yé jideji whla awe. Ogán lọ pà yé bọ yé biọ “ayajẹ klunọ [yetọn] tọn mẹ.” (Hia Matiu 25:19-23.) Bọ afanumẹ atọ̀ntọ lọ lo? Etẹwẹ e yí akuẹ he ogán etọn ze na ẹn lọ do wà?

11. Etẹwẹ jọ do afanumẹ “adidọnọ” lọ go, podọ etẹwutu?

¹¹ Afanumẹ atọ̀ntọ lọ mọ talẹnti dopo yí, amọ́ ewọ yin “adidọnọ.” Ogán etọn donukun dọ ni yí talẹnti lọ zan po nuyọnẹn po. Kakatimọ, e dì akuẹ lọ do odò mẹ. Whenue ogán lọ lẹkọwa, afanumẹ ehe gọ̀ akuẹ he e ze na ẹn lọ pẹẹ jo. Nuhe afanumẹ lọ wà ma yọ́n. Kakati nado vẹvẹ na awugbopo etọn nado hẹn akuẹ he yè ze na ẹn jideji, afanumẹ lọ gbọn mawadodo dali ylọ ogán lọ dọ “gbẹtọ sinsinyẹn.” Homẹ ogán lọ tọn ma hùn do afanumẹ ehe go. Humọ, talẹnti lọ yin yíyí sọn e si bọ e yin yinyan sọn whédo ogán lọ tọn mẹ.—Mat. 25:24, 26-30.

12. Mẹnu lẹ wẹ afanumẹ awe he yin nugbonọ lọ lẹ nọtena to egbehe?

¹² Afanumẹ awe he yin nugbonọ lọ lẹ nọtena Klistiani yiamisisadode nugbonọ lẹ. Jesu he yin Ogán lọ basi oylọna yé nado “biọ ayajẹ klunọ [yetọn] tọn mẹ.” Yé nọ mọ ahọsumẹ olọn tọn yetọn yí, enẹ wẹ fọnsọnku tintan lọ. (Mat. 25:21, 23; Osọ. 20:5b) To alọ devo mẹ, apajlẹ ylankan afanumẹ adidọnọ lọ tọn bẹ avase de hẹn na mẹyiamisisadode lẹ. Gbọnna?

13, 14. Etẹwẹ mẹyiamisisadode lẹ plọn sọn oló talẹnti lẹ tọn mẹ? (Sọ pọ́n yẹdide lọ.)

¹³ Yin azọ́n sinsinyẹnwatọ. To oló talẹnti lẹ  tọn mẹ dile e yindo to oló awhli lọ lẹ tọn mẹ, Jesu ma to dọdai dọ dọ mẹyiamisisadode lẹ na wá yin adidọnọ. Kakatimọ, zẹẹmẹ nuhe na jọ eyin yé wá hẹn zohunhun yetọn bu tọn basi wẹ e te. Yé na gboawupo nado hẹn ‘oylọ po mẹdide yetọn po họnwun na yede,’ podọ yé ma na yin dotẹnmẹ na nado biọ Ahọluduta olọn tọn mẹ.—2 Pita 1:10.

¹⁴ Oló Jesu tọn gando awhli lọ lẹ po talẹnti lẹ po go hẹn ẹn họnwun dọ Klistiani yiamisisadode lẹpo dona wleawudai bosọ to aṣeji, podọ yé sọ dona nọ wazọ́n sinsinyẹn. Amọ́, be Jesu dọ nudevo de he bẹ avase hẹn na mẹyiamisisadode lẹ ya? Gbau! Nuhe Jesu dọ to Matiu 24:40, 41 mẹ sọ gando whẹdida godo tọn mẹyiamisisadode lẹ tọn go ga.

MẸNU WẸ NA YIN “YÍYÍ”?

15, 16. Nawẹ Matiu 24:40, 41 zinnudeji dọ nujọnu wẹ e yin dọ mẹyiamisisadode lẹ ni nọ nukle gbọn?

¹⁵ Whẹpo Jesu do donù oló atọ̀n lọ lẹ go, e basi zẹẹmẹ owhẹ̀ godo tọn he na yin didá na mẹyiamisisadode lẹ tọn, ehe na do mẹhe yin alọkẹyi hia. E dọho gando sunnu awe he to azọ́nwa to glemẹ gọna yọnnu awe he to azọ́nwa to osé kọ̀n lẹ go. To ninọmẹ dopodopo mẹ, omẹ awe lọ lẹ taidi mẹhe to azọ́n dopolọ wà, amọ́ Jesu dọ dọ mẹdopo na yin “yíyí bọ awetọ na yin jijodai.” (Hia Matiu 24:40, 41.) Enẹgodo, e dotuhomẹna hodotọ etọn lẹ dọmọ: “Enẹwutu, mì gbọṣi nukle, na mì ma yọ́n azán he gbè Oklunọ mìtọn ja.” (Mat. 24:42) Jesu dọ onú mọnkọtọn de to whenue e donù oló awhli lọ lẹ tọn go godo. (Mat. 25:13) Be kanṣiṣa de tin to nuhe e dọ lọ lẹ ṣẹnṣẹn ya? E di mọ. Mẹhe yin yiyiamisisadode nugbonugbo bosọ yin nugbonọ lẹ kẹdẹ wẹ Jesu na ‘yí’ kavi kẹalọyi do Ahọluduta olọn tọn mẹ.—Joh. 14:3.

¹⁶ Nọ nọ̀ nukle. Mẹyiamisisadode depope he ma gbọṣi aṣeji to gbigbọ-liho ma na yin bibẹpli dopọ hẹ ‘mẹdide lẹ.’ (Mat. 24:31) To linlẹn he gbloada mẹ, omẹ Jiwheyẹwhe tọn lẹpo, mahopọnna todido he yé tindo dona nọ pọ́n hogbe Jesu tọn lẹ hlan taidi avase de nado gbọṣi nukle bosọ yin nugbonọ.

17. Naegbọn mí ma dona nọ hanú gando whenue Jehovah de nado yí gbigbọ wiwe etọn do de mẹdelẹ go?

¹⁷ Mí ko wá yọ́n Jehovah ganji, enẹwutu mí nọ dejido whẹdida etọn go. Mí ma nọ hanú eyin Jehovah basi dide nado yiamisisadode nugbonọ delẹ to owhe agọe tọn lẹ mẹ. c Mí nọ flin nuhe Jesu dọ to apajlẹ etọn mẹ gando pakanọ he bẹ azọ́n to gànhiho 11​tọ mẹ to vẹngle mẹ lọ lẹ go. (Mat. 20:1-16) Mẹhe yin oylọ basina nado wazọ́n to vẹngle lọ mẹ to nukọn mẹ to azán lọ ji lẹ yí azọ́nkuẹ dopolọ hẹ mẹhe bẹjẹeji jẹnukọnna yé lẹ. Mọdopolọ, mahopọnna whedepopenu he mẹyiamisisadode lẹ yin dide, yé na mọ ahọsumẹ olọn tọn yí eyin yè dawhẹna yé taidi nugbonọ.

NỌ PAYI AVASE LỌ LẸ GO

18, 19. Nuplọnmẹ po avase tẹlẹ po wẹ mí gbadopọnna?

¹⁸ Etẹwẹ mí ko gbadopọnna? Na mẹhe tindo todido nado nọgbẹ̀ kakadoi to aigba ji lẹ, oló lẹngbọ lẹ po gbọgbọẹ lẹ po tọn zinnudeji dọ nujọnu wẹ e yin nado to nugbonọ yin na Jehovah zọnmii, enẹ wẹ todin podọ to nukunbibia daho he to nukọn ja lọ whenu. To ojlẹ he to nukọn ja enẹ mẹ, Jesu na dawhẹna nugbonọ lẹ taidi mẹhe jẹ nado “nọgbẹ̀ kakadoi.”—Mat. 25:46.

¹⁹ Mí sọ gbadopọnna oló awe delẹ he bẹ avase lẹ hẹn na mẹyiamisisadode lẹ. To oló Jesu tọn he gando awhli nuyọnẹntọ po nulunọ lọ lẹ po go mẹ, atọ́n to yé mẹ yin nuyọnẹntọ. Yé wleawudai bo to aṣeji bosọ to  gbesisọ mẹ nado nọtepọn asisunọ yọyọ lọ dile e na dẹnsọ. Amọ́ awhli nulunọ lọ lẹ ma wleawudai. Enẹwutu, asisunọ yọyọ lọ gbẹ́ nado na yé dotẹnmẹ nado wá hùnwhẹ alọwle tọn etọn tẹnmẹ. Mílọsu dona wleawudai nado nọte mahopọnna lehe e na dẹnsọ, kakajẹ whenue Jesu na hẹn opodo wá na titonu ehe. Humọ, to oló Jesu tọn he gando talẹnti lẹ go lọ mẹ, mí dọhodo afanumẹ nugbonọ awe he yin azọ́n sinsinyẹnwatọ lọ lẹ ji. Yé wazọ́n sinsinyẹn na ogán yetọn bọ homẹ etọn hùn do yé go. Amọ́, afanumẹ adidọnọ lọ yin gbigbẹdai. Etẹwẹ yin nuplọnmẹ lọ? Mí dona nọ hẹn alọnu mítọn ján to sinsẹ̀nzọn Jehovah tọn mẹ kaka opodo lọ nido wá. Gbọngodo, mí dọhodo lehe mẹyiamisisadode lẹ dona gbọṣi nukle do ji, na Jesu nido sọgan ‘yí’ yé bọ yé na mọ ahọsumẹ olọn mẹ tọn yetọn yí. Po jejejininọ daho po, omẹ ehelẹ to nukọnpọnhlan nado yin “bibẹpli dopọ” nado tin po Jesu po to olọn mẹ. To awhàn Amagẹdọni tọn godo, yé na yin asiyọyọ Jesu tọn bo doalọ to alọwle Lẹngbọvu lọ tọn mẹ.—2 Tẹs. 2:1; Osọ. 19:9.

20. Etẹwẹ Jehovah na wà na mẹhe nọ payi avase etọn lẹ go lẹ?

²⁰ Mahopọnna dọ whẹdida lọ to dindọnsẹpọ po awuyiya po, mí ma do whẹwhinwhẹ́n de nado dibu. Eyin mí hẹn nugbonọ-yinyin mítọn go, Otọ́ olọn mẹ tọn owanyinọ mítọn na na mí “huhlọn he hú jọwamọ tọn,” na mí nido ‘sọgan tindo kọdetọn dagbe bo nọte to Visunnu gbẹtọ tọn nukọn.’ (2 Kọl. 4:7; Luku 21:36) Vlavo todido mítọn yin olọn mẹ tọn kavi aigba ji tọn, mí na hẹn homẹ Otọ́ mítọn tọn hùn eyin mí nọ payi avase he to oló Jesu tọn lẹ mẹ lẹ go. Gbọn nukundagbe majẹhẹ Jehovah tọn gblamẹ, oyín mítọn na yin “kinkandai do owe” ogbẹ̀ tọn lọ mẹ.—Dan. 12:1; Osọ. 3:5.