1, 2. Etẹlẹ wẹ nọ hẹn devizọnwatọ Jiwheyẹwhe tọn lẹ jaya? (Jakọbu 1:22-25)

 JEHOVAH po Visunnu vivẹ́ etọn po jlo dọ mí ni do ayajẹ. Mẹhe kàn Salmu lẹ 119:2 dọmọ: “Ayajẹnọ wẹ mẹhe nọ payi nuflinmẹ etọn go lẹ, mẹhe nọ yí ahun yetọn lẹpo do dín in lẹ.” Jesu na mí nujikudo dogọ whenue e dọmọ: “Ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”—Luku 11:28.

² Taidi sinsẹ̀n-basitọ Jehovah tọn lẹ, mí yin gbẹtọ ayajẹnọ lẹ. Etẹwutu? Na whẹwhinwhẹ́n susu wutu, amọ́ whẹwhinwhẹ́n dopo he mí ma dona yí nukunpẹvi do pọ́n wẹ Ohó Jiwheyẹwhe tọn hihia egbesọegbesọ po vivẹnudido nado yí nuhe mí hia do yizan mẹ po.—Hia Jakọbu 1:22-25.

3. Nawẹ mí nọ mọaleyi gbọn eyin mí yí nuhe mí hia to Ohó Jiwheyẹwhe tọn mẹ lẹ do yizan mẹ?

³ Aliho susu lẹ mẹ wẹ mí nọ mọaleyi te eyin mí “lẹzun basitọ ohó lọ tọn lẹ.” Dopo wẹ yindọ, afọdide titengbe ehe zize nọ zọ́n bọ mí nọ hẹn homẹ Jehovah tọn hùn. Podọ ehe nọ na mí ayajẹ. (Yẹwh. 12:13) Dile mí to nuhe mí hia to Ohó gbọdo Jiwheyẹwhe tọn mẹ lẹ yí do yizan mẹ, mí nọ hẹn gbẹzan whẹndo tọn mítọn pọnte dogọ bo nọ wleawuna haṣinṣan he lodo de hẹ yisenọ hatọ mítọn lẹ. A gán ko do numimọ ehe tọn to gbẹzan towe mẹ. Humọ, mí nọ dapana susu to nuhahun he mẹhe ma nọ hodo aliho Jehovah tọn lẹ nọ pehẹ lẹ mẹ. Na nugbo tọn, mí kọngbedopọ hẹ Ahọlu Davidi. To whenue e ko donù osẹ́n Jehovah tọn lẹ, gbedide etọn lẹ po whẹdida etọn lẹ po go to ohàn de mẹ godo, e wá tadona kọ̀n dọ: “Ale daho wẹ tin to tonusisena yé mẹ.”—Salm. 19:7-11.

4. Naegbọn e nọ vẹawu nado lẹzun basitọ Ohó Jiwheyẹwhe tọn lẹ?

⁴ Nado dọ hójọhó, e ma nọ bọawuna mí to whelẹponu  nado lẹzun basitọ Ohó Jiwheyẹwhe tọn. Dile etlẹ yindọ alọnu mítọn nọ ján, mí dona nọ de whenu dovo nado nọ hia Biblu bo nọ plọn ẹn nado mọnukunnujẹ nuhe Jehovah jlo dọ mí ni wà mẹ. Enẹwutu, mì gbọ mí ni gbadopọnna ayinamẹ delẹ he gán gọalọna mí nado nọ hia Biblu egbesọegbesọ. Mí nasọ gbadopọnna nuhe na gọalọna mí nado lẹnnupọndo nuhe mí hia lẹ ji, bosọ mọ aliho delẹ he mẹ mí gán yí nuhe mí plọn lẹ do yizan mẹ te to gbẹzan mítọn mẹ.

NỌ DE WHENU DOVO NADO HIA OHÓ JIWHEYẸWHE TỌN

5. Azọngban tẹlẹ wẹ nọ yí whenu mítọn hugan?

⁵ Suhugan omẹ Jehovah tọn lẹ tọn sin alọnu wẹ nọ ján taun. Mí nọ zan whenu susu nado penukundo azọngban voovo he Owe-wiwe lẹ ylọdọ nujọnu lẹ go. Di apajlẹ, susu mítọn wẹ nọ wà agbasazọ́n nado penukundo míde po whẹndo mítọn po go. (1 Tim. 5:8) Klistiani susu wẹ nọ penukundo hẹnnumẹ he to azọ̀njẹ kavi mẹhomẹ lẹ go. Podọ mímẹpo wẹ dona nọ penukundo agbasalilo míde tọn go, ehe nọ biọ whenu. Gbọnvona azọngban ehelẹ, mí tindo azọ́ndenamẹ lẹ to agun mẹ. Dopo to yé mẹ wẹ nado nọ yí zohunhun do dó mahẹ to azọ́n yẹwhehodidọ tọn lọ mẹ. Po azọngban he a tindo lẹpo po, nawẹ a gán nọ mọ whenu nado hia Biblu to gbesisọ mẹ, lẹnayihamẹpọn do nuhe a hia ji bosọ yí i do yizan mẹ gbọn?

6. Nawẹ a gán ze Biblu hihia do otẹn tintan mẹ gbọn? (Sọ pọ́n yẹdide lọ.)

⁶ Biblu hihia yin dopo to “nuhe yin nujọnu hugan” na mí taidi Klistiani lẹ mẹ, enẹwutu mí dona ze e do otẹn tintan mẹ. (Flp. 1:10) Salmu sọha tintan dọ gando mẹhe yin ayajẹnọ lọ go dọmọ: “Osẹ́n Jehovah tọn mẹ wẹ e nọ mọ awuvivi te, bo nọ yí ogbè dẹẹdẹ do to osẹ́n Etọn hia to okle po ozán po.” (Salm. 1:1, 2) Na nugbo tọn, ehe dohia dọ mí dona nọ de whenu dovo nado nọ hia Biblu. Whetẹnu wẹ yin ojlẹ dagbe hugan lọ nado nọ hia Biblu? Gblọndo lọ gán gbọnvo sọn mẹde ji jẹ mẹde ji. Amọ́ doglido, e dona yin ojlẹ de he mẹ a gán nọ wàmọ te whẹwhẹ. Mẹmẹsunnu  de he nọ yin Victor dọmọ: “N’nọ yiwanna Biblu hihia to afọnnu lẹ. Dile etlẹ yindọ ma nọ yiwanna zánfinfọ́n, ayihafẹsẹnamẹnu lẹ ma nọ sù to ojlẹ enẹlẹ mẹ. Apọ̀n ṣie nọ fá, bọ n’gán ze ayiha do fidopo.” Be mọ wẹ e te na hiẹ lọsu ya? Kanse dewe dọ, ‘Whetẹnu wẹ yin ojlẹ dagbe hugan lọ na mi nado nọ hia Biblu?’

NỌ LẸNNUPỌNDO NUHE A HIA JI

7, 8. Etẹwẹ gán glọnalina mí nado mọaleyi to gigọ́ mẹ sọn nuhe mí hia mẹ? Na apajlẹ.

⁷ Amọ́, nugbo lọ wẹ yindọ mí gán nọ hia nususu whẹwhẹ bo gọ̀n ma lẹnayihamẹpọn do yé ji ganji. Be e ko jọ pọ́n bọ a hia nude bọ ojlẹ kleun de to enẹgodo, a masọ flin nukaka de to e mẹ ya? Mímẹpo go wẹ enẹ ko jọ do pọ́n. E blawu dọ ehe gán jọ whenue mí to Biblu hia. Vlavo mí ze yanwle de dai nado nọ hia weta Biblu tọn sọha de egbesọegbesọ. Enẹ jẹna pipà. Mí dona nọ ze yanwle lẹ dai bosọ nọ dovivẹnu nado tẹdo yé go. (1 Kọl. 9:26) Ṣigba bẹjẹeji de wẹ Biblu hihia yin, yèdọ bẹjẹeji dagbe de, amọ́ bẹjẹeji de poun. Mí dona wà nususu humọ, eyin mí jlo na mọaleyi to gigọ́ mẹ sọn Ohó Jiwheyẹwhe tọn hihia mẹ.

⁸ Lẹnnupọndo nuyijlẹdonugo ehe ji: Atin lẹ nọ do hudo osin kavi jikun tọn ma nado kú. Amọ́, eyin jikun ja gbau to ojlẹ kleun de poun gblamẹ, aigba gán gọ́ na osin. Whenue enẹ jọ, e ma na wà dagbe eyin jikun susu sọ ja dogọ. E nọ biọ whenu whẹpo aigba nido nùsin lọ, bọ ehe na gọalọna atin he yin dido lẹ nado whẹ́n. Mọdopolọ, mí ma dona nọ nọ̀ plaplaji do hia Biblu, yèdọ po awuyiya po sọmọ bọ mí ma na penugo nado lẹnayihamẹpọn bo flin nuhe mí hia bosọ yí i do yizan mẹ.—Jak. 1:24.

9. Etẹwẹ mí dona wà eyin mí ko do aṣa lọ nado nọ nọ̀ plaplaji do hia Biblu?

⁹ Be a nọ mọdọ to whedelẹnu, a nọ nọ̀ plaplaji do hia Biblu wẹ ya? Etẹwẹ a dona wà? Nọ yiagbọji. Dovivẹnu nado lẹnnupọndo nuhe hia a te kavi nuhe a ṣẹṣẹ hia ji. Ma nọ mọ ehe di nuhe vẹawu gbau blo. Eyin tudohomẹnamẹ lọ nado lẹnayihamẹpọn nọ taidi nuhe vẹawuna we, vlavo a gán pọ́n ayihamẹlinlẹnpọn  hlan taidi nulinlẹnpọn do nuhe a hia ji poun. A gán basi dide nado dlẹnkanna ojlẹ nupinplọn tọn towe nado mọ whenu na ayihamẹlinlẹnpọn. To alọ devo mẹ, a gán de nado nọ hia wefọ kleun delẹ bo yí ojlẹ he pò zan nado lẹnnupọndo nuhe a hia ji. Victor he yin nùdego wayi dọmọ: “N’nọ hia adà Biblu tọn kleun de, vlavo weta dopo. Na n’nọ hia ẹ to zánfinfọ́n wutu, n’nọ penugo nado lẹnnupọndo nuhe n’hia ji to azán lọ gblamẹ.” Mahopọnna aliho he a yizan, nujọnu wẹ e yin nado yiagbọji do hia Biblu, ehe na zọ́n bọ a na mọ ale susu yí sọn nuhe hia a te mẹ.—Salm. 119:97; pọ́n apotin lọ “ Kanbiọ Delẹ He Ji A Dona Lẹnnupọndo.”

10. Na apajlẹ lehe a gán yí nuhe a to pinplọn lẹ do yizan mẹ do tọn. (1 Tẹsalonikanu lẹ 5:17, 18)

¹⁰ Mahopọnna ojlẹ he mẹ a nọ hia Biblu te gọna whenu he a nọ yí do wàmọ, hẹn ẹn diun dọ a nọ dín aliho lẹ nado yí nuhe a hia lọ do yizan mẹ. Dile a to adà Ohó Jiwheyẹwhe tọn de hia, nọ kanse dewe dọ, ‘Nawẹ n’gán yí nudọnamẹ ehe do yizan mẹ todin kavi to sọgodo he to yakẹ de gbọn?’ Di apajlẹ, mí ni dọ dọ a hia 1 Tẹsalonikanu lẹ 5:17, 18 to Biblu hihia towe whenu. (Hia.) To whenue a ko hia wefọ awe ehelẹ godo, a gán nọte bo lẹnnupọndo whla nẹmu he a nọ hodẹ̀ gọna lehe odẹ̀ towe lẹ nọ siso do ji. Humọ a gán sọ lẹnnupọndo nuhe go a sọgan nọ dopẹ́ gando lẹ ji. Vlavo a magbe dọ a na nọ dopẹna Jehovah na onú tangan atọ̀n delẹ. Eyin nukunwhiwhe kleun de wẹ a tlẹ yí do lẹnnupọn domọ, a na lẹzun sisètọ podọ basitọ Ohó Jiwheyẹwhe tọn jẹ obá de mẹ. Pọ́n lehe a na mọaleyi do eyin a nọ wàmọ to azán lẹpo ji po adà Biblu tọn devo he a hia lẹ po! Mọwẹ, a na whèwhín taidi basitọ Ohó Jiwheyẹwhe tọn de. Bọ etẹwẹ lo eyin e taidi dọ a dona wazọ́n do nususu ji?

NỌ ZE YANWLE HE TO JLẸKAJI LẸ DAI

11. Naegbọn nulẹ gán nọ húagbọ́ we to whedelẹnu? Na apajlẹ de.

¹¹ Whenue a to Biblu hia bo to aliho lẹ dín nado yí anademẹ etọn lẹ do yizan mẹ, e gán nọ wá húagbọ́ we to whedelẹnu. Lẹnnupọndo ehe ji: To gbèdopo, Biblu hihia towe bẹ ayinamẹ delẹ hẹn sọta mẹnukuntahihopọn. (Jak. 2:1-8) A mọdọ a gán hẹn aliho he mẹ a nọ yinuwa hẹ mẹdevo lẹ te pọnte dogọ, enẹwutu a magbe nado basi diọdo delẹ. Enẹ yọ́n taun! Enẹgodo, to wunkẹngbe a hia adà de he zinnudeji dọ nujọnu wẹ e yin nado nọ nọ̀ aṣeji gando nuhe a nọ dọ lẹ go. (Jak. 3:1-12) A mọdọ to ojlẹ delẹ mẹ, emi ko dọ onú agọ̀ delẹ. Enẹwutu a magbe nado nọ dọho dagbe he nọ jlọmẹdote lẹ. To azán he bọdego gbè, a hia avase de he gando họntọn aihọn tọn lilẹzun go. (Jak. 4:4-12) A doayi e go dọ a  dona nọ ṣinyankẹ́nna ayidedai towe lẹ dogọ. To azán ẹnẹtọ gbè, nuhe ji a dona wazọ́n do lọ lẹpo gán húagbọ́ we.

12. Naegbọn a ma dona gbọjọ eyin a mọdọ emi dona basi vọjlado lẹ to whenue a to Biblu hia? (Sọ pọ́n nudọnamẹ odò tọn.)

¹² Eyin e biọ dọ a ni basi diọdo kavi vọjlado delẹ, ma gbọjọ blo. Kunnudenu lọ niyẹn dọ a tindo ninọmẹ ahun mẹ tọn dagbe de. Mẹhe yin whiwhẹnọ bosọ nọ dọ nugbo na ede nọ hia Owe-wiwe lẹ po yanwle lọ po nado mọ nuhe ji e dona wazọ́n do lẹ. a Sọ flin ga dọ nado ze “gbẹtọ-yinyin yọyọ lọ” dogo yin nuyiwa madoalọte de. (Kol. 3:10) Etẹwẹ na gọalọna we nado to basitọ Ohó Jiwheyẹwhe tọn yin zọnmii?

13. Nawẹ a gán ze yanwle he to jlẹkaji delẹ dai gbọn? (Sọ pọ́n yẹdide lọ.)

¹³ Kakati nado tẹnpọn nado yí nuhe a hia lẹpo do yizan mẹ to afọdopolọji, ze yanwle he to jlẹkaji delẹ donukọnna dewe. (Howh. 11:2) A gán tẹ́n ayinamẹ ehe pọ́n: Basi kandai nuhe ji a dona wazọ́n do lẹ tọn, bo de dopo kavi awe he ji a na wazọ́n do jẹnukọn, enẹgodo yí do basi yanwle nado wazọ́n do dehe pò lẹ ji to nukọn mẹ. Fie wẹ a dona bẹsọn?

14. Yanwle tẹlẹ ji wẹ a gán bẹsọn?

¹⁴ A gán basi dide nado bẹjẹeji po yanwle he e na bọawuna we hugan nado jẹ e kọ̀n de po. Kavi a gán de nado wazọ́n do adà he mẹ a mọdọ a dona basi vọjlado te hugan de ji. To whenue a ko doayi yanwle towe go godo, basi dodinnanu to owe mítọn lẹ mẹ, vlavo to Index des publications Watch Tower kavi Anademẹwe Dodinnanu Tọn mẹ. Hodẹ̀ gando yanwle  towe go bo biọ Jehovah dọ ni hẹn we tindo ‘ojlo po huhlọn po nado yinuwa.’ (Flp. 2:13) Enẹgodo, yí nuhe a plọn lẹ do yizan mẹ. Nukọnyiyi he a basi gando yanwle towe tintan lọ go gán zọ́n bọ a na yin whinwhàn dogọ nado wazọ́n do yanwle devo ji. Na nugbo tọn, eyin a yinukọn to adà gbẹzan Klistiani tọn de mẹ kavi hẹn jẹhẹnu Klistiani tọn de pọnte dogọ, e yọnbasi dọ a na mọdọ e bọawu dogọ nado wàmọ to adà devo lẹ mẹ.

MÌ DIKE OHÓ JIWHEYẸWHE TỌN NI ‘TO AZỌ́NWA TO MÌ MẸ’

15. Nawẹ omẹ Jehovah tọn lẹ gbọnvona mẹsusu he nọ hia Biblu lẹ gbọn? (1 Tẹsalonikanu lẹ 2:13)

¹⁵ Mẹdelẹ nọ sọalọakọ́n dọ emi ko hia Biblu whlasusu. Amọ́, be yé yise to Biblu mẹ nugbonugbo ya? Be yé nọ yí nuhe e dọ do yizan mẹ kavi nọ na ẹn dotẹnmẹ nado yinuwado aliho gbẹninọ tọn yetọn ji ya? E blawu dọ gblọndo lọ nọ saba yin lala. Lehe omẹ Jehovah tọn lẹ gbọnvo do sọ! Taidi Klistiani owhe kanweko tintan tọn lẹ, mí nọ kẹalọyi Biblu “kẹdẹdile e te do nugbonugbo, yèdọ taidi ohó Jiwheyẹwhe tọn.” Humọ, mí nọ dovivẹnu nado dohia dọ Ohó Jiwheyẹwhe tọn to azọ́nwa to gbẹzan mítọn mẹ.—Hia 1 Tẹsalonikanu lẹ 2:13.

16. Etẹwẹ gán gọalọna mí nado lẹzun basitọ Ohó lọ tọn lẹ?

¹⁶ E ma nọ bọawu to whelẹponu nado hia Ohó Jiwheyẹwhe tọn bosọ yí i do yizan mẹ. E gán nọ vẹawuna mí nado nọ mọ whenu nado hia ẹ. Kavi mí gán nọ hia ẹ po awuyiya po bo ma nọ lẹnayihamẹpọn do nuhe mí hia ji. Kavi vọjlado he mí dona basi lẹpo gán húagbọ́ mí. Mahopọnna avùnnukundiọsọmẹnu depope he a pehẹ, e na pà we. Po alọgọ Jehovah tọn po, a gán dudeji. Mì gbọ mí ni magbe nado kẹalọyi alọgọ etọn bo lẹzun basitọ Ohó lọ tọn lẹ, e ma yin sisètọ nuwọntọ lẹ. Matin ayihaawe, lehe mí to Ohó Jiwheyẹwhe tọn hia bo nọ yí i do yizan mẹ do sọ, mọ wẹ mí na tindo ayajẹ dogọ do niyẹn.—Jak. 1:25.