HOSỌ OPLỌN TỌN 39
OHÀN 125 “Ayajẹnọ Wẹ Lẹblanunọ Lẹ!”
Nọ Duvivi Ayajẹ Daho He Nunamẹ Nọ Hẹnwa Tọn
“Ayajẹ sù to nunamẹ mẹ hú to mimọyi mẹ.”—OWALỌ 20:35.
NUHE E BẸHẸN
To hosọ ehe mẹ, mí na gbadopọnna aliho voovo he mẹ mí gán hẹn ayajẹ he nunamẹ nọ hẹnwa go te, gọna lehe mí tlẹ gán hẹn ayajẹ enẹ jideji do.
1, 2. Na mí yin didá po nugopipe lọ po nado mọ ayajẹ susu to nunamẹ mẹ hú to mimọyi mẹ wutu, nawẹ enẹ nọ wà dagbe na mí gbọn?
WHENUE Jehovah dá gbẹtọvi lẹ, e basi yé po nugopipe lọ po nado mọ ayajẹ susu to nunamẹ mẹ hú to mimọyi mẹ. (Owalọ 20:35) Be ehe zẹẹmẹdo dọ nunina de mimọyi ma nọ hẹn ayajẹ depope wá na mí wẹ ya? Lala. Mí yọnẹn sọn numimọ mẹ dọ eyin yè nanú mí, enẹ nọ wà dagbe na mí. Amọ́, mí tlẹ sọ nọ do ayajẹ hugan eyin míwlẹ wẹ nanúmẹ. Podọ na nugbo tọn, dagbe mítọn wutu wẹ Jehovah do dá mí to aliho ehe mẹ. Etẹwutu?
2 Na Jehovah dá mí to aliho ehe mẹ wutu, mí tindo dotẹnmẹ lọ nado yidogọna ayajẹ mítọn. Mí gán hẹn ayajẹ mítọn jideji, eyin mí nọ dín dotẹnmẹ devo lẹ dogọ nado nanúmẹ. Be aliho he mẹ mí yin didá te ehe ma jiawu ya?—Salm. 139:14.
3. Naegbọn Jehovah gán yin yiylọdọ “Jiwheyẹwhe ayajẹnọ lọ”?
3 Owe-wiwe lẹ hẹn mí deji dọ nunamẹ nọ hẹn ayajẹ wá, abajọ Biblu ylọ Jehovah dọ “Jiwheyẹwhe ayajẹnọ lọ.” (1 Tim. 1:11) Ewọ wẹ Nunamẹtọ tintan podọ daho hugan lọ. Gbọn ewọ dali wẹ “mí tindo ogbẹ̀ bo nọ yì bosọ tin” dile apọsteli Paulu dọ do. (Owalọ 17:28) Na nugbo tọn, Jehovah dè wẹ “nunina dagbe lẹpo gọna nunina pipé lẹpo” nọ wá sọn.—Jak. 1:17.
4. Etẹwẹ na gọalọna mí nado duvivi ayajẹ tọn dogọ?
4 Vlavo mímẹpo wẹ na jlo nado do numimọ ayajẹ he nunamẹ nọ hẹnwa tọn dogọ. Mí gán wàmọ eyin mí nọ hodo apajlẹ alọtútlú tọn Jehovah tọn. (Efe. 5:1) Dile mí to dogbapọnna ehe, mì gbọ mí ni na ayidonugo nuhe mí gán wà eyin mí mọdọ mẹlẹ ma nọ yọ́n pinpẹn alọtútlú mítọn tọn. Nuflinmẹ ehelẹ na gọalọna mí nado hẹn ayajẹ he nunamẹ nọ hẹnwa go, bo tlẹ sọ hẹn ayajẹ enẹ jideji.
NỌ HODO APAJLẸ ALỌTÚTLÚ TỌN JEHOVAH TỌN
5. Onú agbasa tọn tẹlẹ wẹ Jehovah nọ na mí?
5 Etẹwẹ yin aliho delẹ he mẹ Jehovah nọ do alọtútlú hia te? Lẹnnupọndo apajlẹ kleun delẹ ji. Jehovah nọ na mí nutindo agbasa tọn lẹ. Mí gán nọma nọ zan gbẹzan fẹẹmẹninọ tọn to whelẹponu, amọ́ po alọgọ Jehovah tọn po, suhugan mítọn lẹ wẹ nọ mọ nuhe sin hudo mí do. Di apajlẹ, e nọ hẹn ẹn yọnbasi na mí nado tindo núdùdù, avọ̀ po adọtẹn po. (Salm. 4:8; Mat. 6:31-33; 1 Tim. 6:6-8) Be Jehovah nọ wleawuna nuhudo agbasa tọn mítọn lẹ na e dona wàmọ poun wutu wẹ ya? Paali! Naegbọn Jehovah do nọ wà ehe na mí?
6. Etẹwẹ mí plọn sọn Matiu 6:25, 26 mẹ?
6 Do glido, Jehovah nọ penukundo nuhudo agbasa tọn mítọn lẹ go, na e yiwanna mí wutu. Lẹnnupọndo hogbe Jesu tọn he to Matiu 6:25, 26 mẹ lẹ ji. (Hia.) Jesu yí apajlẹ nudida lẹ tọn zan. Whenue Jesu to hodọ gando ohẹ̀ lẹ go, e dọmọ: “Yé ma nọ do jinukun kavi gbẹ̀n kavi bẹpli do agbànhọ lẹ mẹ.” Amọ́ doayi nuhe e dọ bọdego go, e dọmọ: “Ṣogan Otọ́ mìtọn olọn tọn nọ na núdùdù yé.” Enẹgodo Jesu kanse dọmọ: “Be mìwlẹ ma họakuẹ hú yé?” Etẹwẹ yin nuagokun lọ? To nukun Jehovah tọn mẹ, sinsẹ̀n-basitọ etọn lẹ họakuẹ tlala hú kanlin lẹ. Eyin Jehovah nọ penukundo nuhudo kanlin lẹ tọn go, mí gán kudeji dọ e na wà nudopolọ na mílọsu! Kẹdẹdile otọ́ gbẹtọvi he yin mẹtọnhopọntọ de nọ wà do, Jehovah nọ penukundo whẹndo etọn go na e yiwanna ẹn wutu.—Salm. 145:16; Mat. 6:32.
7. Etẹwẹ yin aliho dopo he mẹ mí gán hodo apajlẹ alọtútlú tọn Jehovah tọn te? (Sọ pọ́n yẹdide lọ.)
7 Taidi Jehovah, owanyi gán whàn mílọsu nado nanú mẹdevo lẹ. Di apajlẹ, be a yọ́n yisenọ hatọ de he do hudo núdùdù kavi avọ̀ tọn ya? Jehovah gán yí we zan nado na nude mẹlọ bo sudo nuhudo enẹ tọn. Omẹ Jehovah tọn lẹ yin yinyọnẹn na taun tọn nado nọ do alọtútlú hia whenue nugbajẹmẹji lẹ jọ. Di dohia to COVID-19 whenu, mẹmẹsunnu lẹ má núdùdù, avọ̀ po nudevo lẹ po hẹ mẹhe to nuhudo mẹ lẹ. Mẹsusu devo lẹ sọ yí alọtútlú do basi nunina akuẹ tọn do azọ́n lẹdo aihọn pé tọn lọ tamẹ. Ehe gọalọ nado nọgodona alọgọ kọgbọ tọn lẹ lẹdo aihọn pé. Yé hẹn hogbe Heblu lẹ 13:16 tọn lẹ do ayiha mẹ, ehe dọmọ: “Mì wọnji nado nọ wà dagbe podọ nado nọ má nuhe mì tindo lẹ hẹ mẹdevo lẹ blo, na avọ́sinsan mọnkọtọn lẹ go wẹ homẹ Jiwheyẹwhe tọn nọ hùn do taun.”
Mímẹpo gán hodo apajlẹ alọtútlú tọn Jehovah tọn (Pọ́n hukan 7tọ)
8. Aliho tẹlẹ mẹ wẹ huhlọn Jehovah tọn nọ wà dagbe na mí te? (Filipinu lẹ 2:13)
8 Jehovah nọ na mí huhlọn. Homẹ Jehovah tọn nọ hùn nado má huhlọn madodogbó etọn hẹ sinsẹ̀n-basitọ nugbonọ etọn lẹ. (Hia Filipinu lẹ 2:13.) Be a ko hodẹ̀ pọ́n nado mọ huhlọn nado nọavùnte sọta mẹtẹnpọn de kavi nado doakọnna whlepọn sinsinyẹn de ya? A gán ko sọ hodẹ̀ nado mọ huhlọn he pé yí poun nado wà nulẹ to azán de ji. To whenue odẹ̀ he a hò nado mọ huhlọn yí lọ ko mọ gblọndo, a gán kọngbedopọ hẹ apọsteli Paulu, mẹhe dọmọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.”—Flp. 4:13.
9. Nawẹ mí gán hodo apajlẹ lehe Jehovah nọ yí alọtútlú do yí huhlọn etọn zan do tọn gbọn? (Sọ pọ́n yẹdide lọ.)
9 Dile etlẹ yindọ mí yin gbẹtọvi mapenọ lẹ, mí gán hodo apajlẹ lehe Jehovah nọ yí alọtútlú do yí huhlọn etọn zan do tọn. Mí ma gán na huhlọn kavi hlọnhlọn mẹdevo lẹ to aliho tlọlọ tọn mẹ. Amọ́, mí gán yí huhlọn mítọn zan do ota yetọn mẹ. Di apajlẹ, mí gán yilizọn kavi wà whégbèzọ́n lẹ na Klistiani mẹhomẹ kavi madogánnọ de. Eyin ninọmẹ mítọn hẹn ẹn yọnbasi, mí gán ze míde jo nado hẹn Plitẹnhọ Ahọluduta tọn do wiweji podọ do ninọmẹ dagbe mẹ. Huhlọn mítọn yiyizan to aliho mọnkọ lẹ mẹ nọ wà dagbe na sinsẹ̀n-basitọ Jehovah tọn hatọ mítọn lẹ.
Mí gán nọ yí huhlọn mítọn zan do ota mẹdevo lẹ tọn mẹ (Pọ́n hukan 9tọ)
10. Nawẹ mí gán yí huhlọn hogbe lẹ tọn zan nado wà dagbe na mẹdevo lẹ gbọn?
10 Sọ flin ga dọ, hogbe lẹ nọ tindo huhlọn. Be a gán lẹnnupọndo mẹde ji he e na wà dagbe na eyin yè pà ẹ po ahundopo po ya? Be a yọ́n mẹde he do hudo homẹmimiọn tọn ya? Depope he whẹho lọ yin, naegbọn a ma na ze afọdide tintan nado dọnsẹpọ omẹ mọnkọ? A gán dla mẹlọ pọ́n, ylọ ẹ to alokan ji kavi vlavo do kalti, wekanhlanmẹ Intẹnẹt ji tọn kavi wekanhlanmẹ alokan ji tọn de hlan ẹn. Ma nọ hanú glanglan gando nuhe a na dọ go blo. Hogbe kleun delẹ he wá sọn ahun mẹ gán yin nuhe yisenọ hatọ towe do hudo etọn pẹẹ nado hẹn nugbonọ-yinyin etọn go to azán de ji kavi nado gbọ fìn in gando ninọmẹ etọn go.—Howh. 12:25; Efe. 4:29.
11. Nawẹ Jehovah nọ yí nuyọnẹn etọn zan gbọn?
11 Jehovah nọ namẹ nuyọnẹn. Devi Jakọbu wlan dọmọ: “Eyin depope to mì mẹ gbọagba nuyọnẹn tọn, gbọ e ni nọ to bibiọ Jiwheyẹwhe zọnmii, na ewọ nọ yí alọtútlú do na mẹlẹpo matin nuṣiwa ṣinṣinyan.” (Jak. 1:5; Odò.) Dile hogbe ehelẹ dohia do, Jehovah ma nọ whlá nuyọnẹn etọn. E nọ yí alọtútlú do má ẹn hẹ mẹdevo lẹ. Sọ doayi e go ga dọ eyin Jehovah namẹ nuyọnẹn, e nọ wàmọ “matin whẹgbledomẹ” kavi “matin nuṣiwa ṣinṣinyan.” E ma nọ hẹn mí tindo numọtolanmẹ lọ gbede dọ mí ṣinuwa na mí kẹalọyi dọ mí do hudo anademẹ etọn tọn wutu. Na nugbo tọn, ewọ nọ dotuhomẹna mí nado dín nuyọnẹn enẹ.—Howh. 2:1-6.
12. Dotẹnmẹ tẹlẹ wẹ nọ hundote na mí nado má nuyọnẹn mítọn hẹ mẹdevo lẹ?
12 Bọ mílẹ lo? Be mí gán hodo apajlẹ Jehovah tọn bo nọ má nuyọnẹn mítọn hẹ mẹlẹ ya? (Salm. 32:8) Omẹ Jehovah tọn lẹ do dotẹnmẹ hundote susu lẹ nado má nuhe yé plọn lẹ. Di apajlẹ, mí nọ saba plọnazọ́n mẹyọyọ lẹ to lizọnyizọn lọ mẹ. Mẹho agun tọn lẹ nọ yí homẹfa do gọalọna devizọnwatọ lẹ po mẹmẹsunnu lẹ po nado plọn lehe yé na penukundo azọ́ndenamẹ yetọn lẹ go do to agun mẹ. Podọ mẹhe do numimọ to họ̀gbigbá po nulẹ hinhẹn do ninọmẹ dagbe mẹ po mẹ lẹ nọ gọalọ nado plọnazọ́n mẹhe ma ko do numimọ sọmọ lẹ nado nọ wazọ́n to nọtẹn yẹwhehọluduta tọn lẹ.
13. Whenue mí to azọ́nplọn mẹdevo lẹ, nawẹ mí gán hodo apajlẹ aliho he mẹ Jehovah nọ má nuyọnẹn etọn hẹ mẹdevo lẹ te tọn gbọn?
13 Mẹhe nọ plọnazọ́n mẹdevo lẹ na wà dagbe nado hodo apajlẹ aliho he mẹ Jehovah nọ má nuyọnẹn etọn hẹ mẹlẹ te tọn. Flindọ Jehovah nọ yí alọtútlú do namẹ nuyọnẹn. Mọdopolọ, mí nọ desọn ojlo mẹ bo nọ má nuyọnẹn po numimọ mítọn po hẹ nuplọntọ lẹ. Mí ma nọ hẹn nuhe mí yọnẹn delẹ na míde, na mí to budi dọ nuplọntọ lọ gán wá yí otẹn mítọn wutu gba. Podọ, mí ma nọ dọ dọ: ‘Mẹdepope ma plọnazọ́n mi! Ewọ lọsu ni kàn ayiha de na ede.’ Pọndohlan mọnkọ ma tindo otẹn etọn to omẹ Jehovah tọn lẹ ṣẹnṣẹn. Kakatimọ, e ma yin oyọnẹn mítọn kẹdẹ wẹ mí nọ yí ayajẹ do má hẹ mẹhe mí to azọ́nplọn lẹ gba, “ṣigba mídetiti” ga. (1 Tẹs. 2:8) Todido mítọn wẹ yindọ yelọsu “to godo mẹ, na pegan mlẹnmlẹn nado plọn mẹdevo lẹ.” (2 Tim. 2:1, 2) Eyin mímẹpo nọ yí alọtútlú do má nuyọnẹn mítọn, míwlẹ po mẹdevo lẹ po na yọnnuin bosọ do ayajẹ dogọ.
EYIN E TAIDI DỌ MẸDEVO LẸ MA YỌ́N PINPẸN ALỌTÚTLÚ MÍTỌN TỌN
14. Nawẹ suhugan mẹlẹ tọn nọ yinuwa gbọn eyin mí do alọtútlú hia yé?
14 Eyin mí do alọtútlú hia mẹdevo lẹ, titengbe mẹmẹsunnu po mẹmẹyọnnu mítọn lẹ po, yé nọ saba dohia dọ yé yọ́n pinpẹn etọn. Yé gán kanwe bo dọnudo mí kavi do pinpẹn-nutọn-yinyọnẹn yetọn hia to aliho devo mẹ. (Kol. 3:15) Pinpẹn-nutọn-yinyọnẹn he yé dohia mí to aliho mọnkọ lẹ mẹ nọ yidogọna ayajẹ mítọn.
15. Etẹwẹ mí dona nọ flin eyin mẹdelẹ ma do pinpẹn-nutọn-yinyọnẹn hia?
15 Amọ́ nado dọ hójọhó, mẹdelẹ sọgan nọma nọ do pinpẹn nutọn hia to whelẹponu. To whedelẹnu mí gán yí whenu, huhlọn kavi nutindo mítọn lẹ zan do ota mẹde tọn mẹ, amọ́ bo wá kanse míde eyin dagbe he mí wà lọ tlẹ dọ nude na ẹn. Eyin enẹ jọ, nawẹ mí gán gbẹ́ hẹn ayajẹ mítọn go bo dapana homẹgble gbọn? Flin hogbe wefọ he ji hosọ mítọn sinai do tọn lẹ to Owalọ lẹ 20:35 mẹ. Ayajẹ he nunamẹ nọ hẹnwa ma nọ sinai do aliho he mẹ mẹhe mí nanú lọ yinuwa te ji. Mí gán de nado tindo ayajẹ he nunamẹ nọ hẹnwa eyin etlẹ taidi dọ mẹdevo lẹ ma yọ́n pinpẹn nuhe mí wà tọn. Gbọnna? Lẹnnupọndo aliho delẹ ji.
16. Etẹ ji wẹ mí dona nọ ze ayiha do whenue mí to nunamẹ?
16 Ze ayiha do apajlẹ Jehovah tọn hihodo ji. Ewọ nọ na nudagbe gbẹtọ lẹ vlavo yé yọ́n pinpẹn etọn kavi lala. (Mat. 5:43-48) Jehovah dopà dọ eyin mílọsu nọ nanúmẹ “matin todido nado mọ nudepope yí lẹkọ; . . . ale [mítọn] na yin daho.” (Luku 6:35) Hogbe lọ “nudepope” gán bẹ hodidọ pinpẹn-nutọn-yinyọnẹn tọn hẹn. Eyin mẹlẹ do pinpẹn nutọn hia mí kavi lala, Jehovah na nọ suahọ mí to whepoponu na nudagbe he mí wà nado gọalọna mẹdevo lẹ, podọ na mí yin “nunamẹtọ homẹhunnọ” wutu.—Howh. 19:17; 2 Kọl. 9:7.
17. Nawẹ mí gán hẹn pọndohlan dagbe go gbọn? (Luku 14:12-14)
17 Nunọwhinnusẹ́n họakuẹ he to Luku 14:12-14 mẹ na gọalọna mí nado nọ hẹn pọndohlan dagbe go whenue mí to nunamẹ. (Hia.) Nude ma ylan to e mẹ nado nọ do johẹmẹ kavi alọtútlú hia mẹhe gán wá wà nudopolọ na mí to nukọn mẹ lẹ. Amọ́, etẹwẹ lo eyin mí doayi e go dọ mí nọ nanúmẹ na mí donukun dọ mí na mọ nude yí to godo mẹ wutu? Mí na wà dagbe nado dovivẹnu bo yí ayinamẹ Jesu tọn do yizan mẹ. Mí gán hẹjó mẹde he mí yọnẹn dọ e ma tindo nugopipe nado wà nudopolọ na mí. To whenẹnu, mí na do ayajẹ na mí to apajlẹ Jehovah tọn hodo wutu. Pọndohlan enẹ dopolọ nasọ gọalọna mí nado hẹn ayajẹ mítọn go whenue mẹdevo lẹ ma do pinpẹn-nutọn-yinyọnẹn hia.
18. Etẹwẹ gán gọalọna mí ma nado nọ vẹnudo mẹdevo lẹ?
18 Dapana ayihaawe tintindo gando mẹwhinwhàn mẹdevo lẹ tọn go. (1 Kọl. 13:7) Eyin mẹdevo lẹ ma do pinpẹn nutọn hia, mí gán kanse míde dọ: ‘Be mayọndagbenọ wẹ yé yin nugbonugbo ya kavi yé wọnji nado do pinpẹn-nutọn-yinyọnẹn hia poun wẹ?’ Vlavo whẹwhinwhẹ́n devo lẹ wutu wẹ yé ma yinuwa dile mí na ko donukun do. Mẹdelẹ gán yọ́n pinpẹn nuhe mí wà tọn taun amọ́ bọ e vẹawuna yé nado dọ ẹ tọ́n. Winyan gán nọ hù yé dọ yewlẹ wẹ yè dona gọalọna todin, titengbe eyin yewlẹ wẹ nọ gọalọna mẹdevo lẹ to dai. Depope he ninọmẹ lọ yin, owanyi Klistiani tọn na whàn mí ma nado nọ vẹnudo yisenọ hatọ mítọn lẹ bosọ to ayajẹ he nunamẹ nọ hẹnwa mọyi zọnmii.—Efe. 4:2.
19, 20. Naegbọn homẹfa do yin nujọnu to whenue mí nanú mẹdevo lẹ? (Sọ pọ́n yẹdide lọ.)
19 Nọ fahomẹ. Na nuhe dù alọtútlú didohia, ahọlu nuyọnẹntọ lọ Sọlomọni wlan dọmọ: “Dlan akla towe do osin nukunmẹ, na hiẹ na gọ̀ ẹ mọyi to azán susu godo.” (Yẹwh. 11:1) Kẹdẹdile hogbe ehelẹ dohia do, mẹdelẹ gán wá yọ́n pinpẹn alọtútlú mítọn tọn to ojlẹ dindẹn godo, enẹ wẹ “to azán susu godo.” Lẹnnupọndo apajlẹ de ji he zinnudo nugbo enẹ ji.
20 Owhe susu die wayi, asi nugopọntọ lẹdo tọn de tọn do wekanhlanmẹ ahundopo tọn de hlan mẹmẹyọnnu he ṣẹṣẹ yí baptẹm de bo na ẹn tuli nado hẹn nugbonọ-yinyin etọn go. To nudi owhe ṣinatọ̀n godo, mẹmẹyọnnu he yè kanwehlan lọ dọmọ: “N’mọdọ n’dona kanwe bo dọ lehe a gọalọna mi do to owhe lẹ gblamẹ na we eyin hiẹ lọsu ma tlẹ yọnẹn.” E yidogọ dọmọ: “[Wekanhlanmẹ towe] namẹ tuli taun, podọ wefọ he go a donù lọ yinuwado ahun ṣie ji bọ n’ma wọn pọ́n gbede.” a To whenue mẹmẹyọnnu lọ basi zẹẹmẹ avùnnukundiọsọmẹnu he e pehẹ delẹ tọn godo, e dọmọ: “To whedelẹnu, n’nọ jlo na jogbe, tọ́n sọn nugbo lọ mẹ, deta sọn azọngban lẹ mẹ, jo nulẹpo do poun. Amọ́ wefọ he a kàn lọ nọ gọwá ayiha ṣie mẹ bọ . . . n’nọ zindonukọn.” E yidogọ dọmọ: “To owhe ṣinatọ̀n enẹ lẹpo gblamẹ, nude ma ko yinuwado ji e sọmọ.” Yí nukun homẹ tọn do pọ́n lehe homẹ asi nugopọntọ lẹdo tọn lọ tọn na ko hùn do sọ whenue e mọ wekanhlanmẹ ehe “to azán susu godo”! Mílọsu gán mọ hogbe pinpẹn-nutọn-yinyọnẹn tọn lẹ yí ojlẹ susu to whenue mí ko wà dagbe na mẹde to aliho delẹ mẹ godo.
Mí gán mọ hogbe pinpẹn-nutọn-yinyọnẹn tọn lẹ yí ojlẹ susu to whenue mí ko wà dagbe na mẹde godo (Pọ́n hukan 20tọ) b
21. Naegbọn a do magbe nado to apajlẹ alọtútlú tọn Jehovah tọn hodo zọnmii?
21 Dile mí ko dọ do, Jehovah dá mí po nugopipe vonọtaun de po. Dile etlẹ yindọ e nọ vivi na mí eyin yè nanú mí, ayajẹ he mí nọ mọyi tlẹ sọ nọ sù hugan whenue mí nanú mẹdevo lẹ. E nọ wà dagbe na mí whenue mí penugo nado gọalọna yisenọ hatọ mítọn lẹ. Podọ, homẹ mítọn nọ hùn eyin yé do pinpẹn-nutọn-yinyọnẹn hia. Amọ́ vlavo mẹhe mí nanú lọ dohia dọ emi yọ́n pinpẹn etọn kavi lala, homẹ mítọn gán hùn dọ mí wà nuhe sọgbe lọ. Ma wọn gbede blo dọ “Jehovah penugo nado na we susu hugan” nudepope he a namẹ. (2 Otàn. 25:9) Nado dọ hójọhó, mí ma gán nanúmẹ sọ Jehovah! Podọ, nudepope ma gán hẹn ayajẹ wá na mí hugan dọ Jehovah lọsu ni suahọ mí. Enẹwutu, mì gbọ mí ni magbe nado to apajlẹ alọtútlú tọn Otọ́ olọn mẹ tọn mítọn tọn hodo zọnmii.
OHÀN 17 “Yẹn Jlo”
a Wefọ he yin didohlan mẹmẹyọnnu lọ wẹ 2 Johanu 8 he dọmọ: “Mì payi mìde go, na mì nikaa hẹn sinsẹ́n azọ́n he mí ko wà lẹ tọn bu, ṣigba na mì nido sọgan mọ ale gigọ́ yí.”
b ZẸẸMẸ YẸDIDE TỌN: To nujijọ he yin vivọ́ basi ehe mẹ, asi nugopọntọ lẹdo tọn de tọn yí alọtútlú do to tulinamẹ. To owhe lẹ godo, e mọ wekanhlanmẹ pinpẹn-nutọn-yinyọnẹn tọn de yí.
