HOSỌ OPLỌN TỌN 37
OHÀN 118 “Do Yise Yise Ji Na Mí”
Wekanhlanmẹ de He Gán Gọalọna Mí Nado Doakọnnanu po Nugbonọ-yinyin po Kakajẹ Opodo
“Mí . . . hẹn jidide he mí tindo to bẹjẹeji lọ go gligli kakajẹ opodo.”—HEB. 3:14.
NUHE E BẸHẸN
Hosọ ehe bẹ nuplọnmẹ yọ́n-na-yizan delẹ hẹn sọn wekanhlanmẹ he yin didohlan Heblu lẹ mẹ he na gọalọna mí nado yí nugbonọ-yinyin do doakọnnanu kakajẹ opodo titonu ehe tọn.
1, 2. (a) Nawẹ ninọmẹ nulẹ tọn te to Jude to whenue apọsteli Paulu kanwehlan Heblu lẹ? (b) Nawẹ wekanhlanmẹ gbọdo ehe wá do gànmẹ gbọn?
TO OWHE he bọdo okú Jesu tọn go lẹ mẹ, Klistiani Heblu he nọ nọ̀ Jelusalẹm po Jude po lẹ jugbọn ojlẹ awusinyẹn tọn lẹ mẹ. Tlolo he agun Klistiani tọn yin didoai, homẹkẹn sinsinyẹn fọ́n sọta ẹ. (Owalọ 8:1) To nudi owhe 20 to enẹgodo, hodotọ Klisti tọn lẹ pehẹ nuhahun akuẹ tọn sinsinyẹn lẹ, podọ e yọnbasi dọ huvẹ he tọ́n to aigba lọ ji wayi wẹ zọ́n. (Owalọ 11:27-30) Amọ́ to nudi owhe 61 W.M., Klistiani lẹ duvivi ojlẹ jijọho tọn de tọn jẹ obá de mẹ yijlẹdo nuhe to nukọn ja go. To ojlẹ enẹ mẹ, yé mọ wekanhlanmẹ gbọdo de sọn apọsteli Paulu dè, yèdọ wekanhlanmẹ de he wá do gànmẹ taun.
2 Wekanhlanmẹ he yin didohlan Heblu lẹ wá do gànmẹ na jijọho he Klistiani lọ lẹ to vivi etọn dù ma na dẹn-to-aimẹ. Paulu na ayinamẹ yọ́n-na-yizan he na gọalọna Klistiani ehelẹ nado doakọnna nukunbibia he yé na pehẹ to madẹnmẹ. Vasudo titonu Ju lẹ tọn he Jesu dọ dọdai etọn lọ to dindọnsẹpọ. (Luku 21:20) Na nugbo tọn, Paulu po Klistiani he to Jude lẹ po ma yọ́n ojlẹ tangan he mẹ vasudo lọ na wá. Etomọṣo, Klistiani ehelẹ gán yí ojlẹ he pò lọ zan nado wleawudaina yede gbọn awuwiwlena jẹhẹnu delẹ taidi yise po akọndonanu po dali.—Heb. 10:25; 12:1, 2.
3. Naegbọn Klistiani lẹ to egbehe dona tindo ojlo vonọtaun to owe Heblu lẹ tọn mẹ?
3 To madẹnmẹ, mí na pehẹ nukunbibia he sinyẹn taun hú dehe Klistiani Heblu lẹ pehẹ. (Mat. 24:21; Osọ. 16:14, 16) Enẹwutu, mì gbọ mí ni gbadopọnna ayinamẹ yọ́n-na-yizan delẹ he Jehovah na Klistiani ehelẹ ehe gán hẹn ale wá na mílọsu.
“DOVIVẸNU BO LẸZUN MẸHE WHÈWHÍN”
4. Avùnnukundiọsọmẹnu tẹlẹ wẹ Klistiani Ju lẹ pehẹ? (Sọ pọ́n yẹdide lọ.)
4 Klistiani Ju lẹ pehẹ avùnnukundiọsọmẹnu daho de. To ojlẹ de mẹ wayi, Ju lẹ yin mẹdide Jehovah tọn lẹ. Jelusalẹm wẹ Ahọlu he yin afọzedaitọ Jiwheyẹwhe tọn lẹ nọ dugán te, podọ tẹmpli lọ yin ahọnkan sinsẹ̀n-bibasi wiwe-ṣeke tọn. Juvi nugbonọ lẹpo nọ yìn Osẹ́n Mose tọn dile nukọntọ sinsẹ̀n tọn yetọn lẹ nọ basi zẹẹmẹ etọn do. Nuplọnmẹ ehelẹ nọ yinuwado aṣa núdùdù tọn yetọn, pọndohlan yetọn gando adàgbigbo go podọ etlẹ yin do aliho he mẹ yé nọ yinuwa hẹ Kosi lẹ te ji. Amọ́ to okú Jesu tọn godo, Jehovah masọ nọ kẹalọyi avọ́sinsan Ju lẹ tọn ba. Avùnnukundiọsọmẹnu de wẹ ehe yin na Ju he lẹzun Klistiani lẹ, yèdọ mẹhe ko tindo aṣa lọ nado nọ yìn Osẹ́n lọ lẹ. (Heb. 10:1, 4, 10) E ma bọawu etlẹ yin na Klistiani he whèwhín delẹ taidi apọsteli Pita nado diọada sọgbe hẹ delẹ to diọdo ehelẹ mẹ. (Owalọ 10:9-14; Gal. 2:11-14) Na nuyise yọyọ Klistiani ehelẹ tọn wutu, nukọntọ sinsẹ̀n tọn Ju lẹ jẹ ogbé yetọn yàn ji.
Klistiani lẹ dona tẹdo nugbo lọ go gligli, bo gbẹ́ hoyijlẹdohogo lalo he wá sọn sinsẹ̀nnọ Ju nukundiọsọmẹtọ lẹ dè lẹ dai (Pọ́n hukan 4, 5tọ)
5. Etẹwẹ Klistiani lẹ dona to aṣeji sọta?
5 Klistiani Heblu lẹ pehẹ nukundiọsọmẹ sọn pipli voovo awe dè. Tintan, nukọntọ sinsẹ̀n tọn Ju lẹ yinuwa hẹ yé taidi atẹṣitọ lẹ. Humọ, mẹdelẹ he sọalọakọ́n dọ emi yin Klistiani tẹkudeji dọ hodotọ Klisti tọn lẹ dona zindonukọn nado nọ hodo adà Osẹ́n Mose tọn voovo lẹ, vlavo nado dapana homẹkẹn. (Gal. 6:12) Etẹwẹ na gọalọna Klistiani nugbo lẹ nado tẹdo nugbo lọ go?
6. Etẹwẹ Paulu na tuli yisenọ hatọ etọn lẹ nado wà? (Heblu lẹ 5:14–6:1)
6 To wekanhlanmẹ Paulu tọn hlan Heblu lẹ mẹ, e na tuli yisenọ hatọ etọn lẹ nado nọ dindona Ohó Jiwheyẹwhe tọn sisosiso. (Hia Heblu lẹ 5:14–6:1.) Paulu yí Owe-wiwe Heblu tọn lẹ zan nado yihojlẹdohogo hẹ mẹmẹsunnu etọn lẹ do lehe aliho sinsẹ̀n-bibasi tọn Klistiani lẹ tọn yiaga hú Ju lẹ tọn do ji. a Paulu yọnẹn dọ oyọnẹn nugbo lọ tọn tintindo dogọ gọna nukunnumimọjẹ e mẹ sisosiso na zọ́n bọ Klistiani enẹlẹ na penugo bo doayi hoyijlẹdohogo agọ̀ lẹ go bosọ gbẹ́ yé dai, ehe na zọ́n bọ yé ma na danbú.
7. Nuhahun tẹlẹ wẹ mí nọ pehẹ to egbehe?
7 Taidi Klistiani Heblu lẹ, mí nọ pehẹ gbẹtọ he nọ hẹn nudọnamẹ po hoyijlẹdohogo he jẹagọdo nujinọtedo dodo tọn Jehovah tọn lẹ po gbayipe lẹ. Nukundiọsọmẹtọ lẹ nọ saba mọhodọdo nuyise sinai do Biblu ji mítọn lẹ go na nuhe dù walọyizan dagbe, bo nọ dọ dọ mí yin hẹngogonọ podọ kanylantọ. Nuyiwa po pọndohlan aihọn lọ tọn po fọ́n bo to dindẹn do pọndohlan pipé Jiwheyẹwhe tọn gando whẹho lẹ go dogọ. (Howh. 17:15) Enẹwutu, mí dona hẹn nugopipe mítọn nado nọ doayi linlẹn he nukundiọsọmẹtọ lẹ nọ yizan nado hẹn mí gbọjọ kavi tlẹ hẹn mí buali lẹ go pọnte dogọ bosọ gbẹ́ yé dai.—Heb. 13:9.
8. Nawẹ mí gán yinukọn bo whèwhín to gbigbọ-liho gbọn?
8 Mí na wà dagbe nado hẹn ayinamẹ he Paulu na Klistiani Heblu lẹ do ayiha mẹ, enẹ wẹ nado dovivẹnu bo lẹzun mẹhe whèwhín to gbigbọ-liho. Enẹ nọ biọ dọ yè ni tindo oyọnẹn he siso gando nugbo lọ go bosọ kẹalọyi aliho nulẹnpọn tọn Jehovah tọn. Afọdide ehe nọ zindonukọn etlẹ yin to klandowiwe po baptẹm po godo. Mahopọnna lehe e ko dẹn sọ bọ mí to nugbo lọ mẹ, mímẹpo wẹ dona nọ hia Ohó Jiwheyẹwhe tọn bosọ nọ plọn ẹn to gbesisọ mẹ. (Salm. 1:2) Aṣa dagbe oplọn mẹdetiti tọn na gọalọna mí nado hẹn jẹhẹnu he ji Paulu zinnudo to wekanhlanmẹ etọn hlan Heblu lẹ mẹ lodo, enẹ wẹ yise.—Heb. 11:1, 6.
‘TINDO YISE HE NỌ HẸN MÍ DOGBẸ̀’
9. Naegbọn e do yin dandan dọ Klistiani Heblu lẹ ni tindo yise he lodo?
9 Klistiani Heblu lẹ na do hudo yise he lodo de tọn nado lùn nukunbibia he ja Jude ji to madẹnmẹ lọ tọ́n. (Heb. 10:37-39) Jesu ko na avase hodotọ etọn lẹ dọ whenue yé mọdọ awhànpa lẹ lẹdo Jelusalẹm pé, yé dona họnyi osó lẹ ji. Ayinamẹ etọn gando Klistiani lẹpo go, vlavo yé nọ nọ̀ tòdaho enẹ mẹ kavi lẹdo Jude tọn mẹ. (Luku 21:20-24) To ojlẹ lọ mẹ, eyin awhànpa lẹ tọ́nawhàn gbẹtọ lẹ, yé nọ saba dín fibẹtado to tòdaho he adó lẹdo de mẹ taidi Jelusalẹm. E gán ko taidi nuhe ma sọgbe hẹ lẹnpọn dagbe nado họnyi osó lẹ ji podọ mọwiwà nasọ biọ yise he lodo.
10. Etẹwẹ yise he lodo na whàn Klistiani lẹ nado wà? (Heblu lẹ 13:17)
10 Klistiani Heblu lẹ sọ dona dejido mẹhe Jesu to yiyizan nado deanananu to agun lọ mẹ lẹ go. Mẹhe to anadenanu lẹ gán ko nọ na anademẹ tangan lẹ nado gọalọna mẹlẹpo to agun lọ mẹ nado hodo anademẹ Jesu tọn to ojlẹ sisọ mẹ, podọ to aliho he to kannukannu de mẹ. (Hia Heblu lẹ 13:17.) Hogbe Glẹkigbe tọn he yin yiyizan to Heblu lẹ 13:17 mẹ, na “mì nọ setonuna” nọ zẹẹmẹdo dọ mẹde yin linlẹndiọna nado setonu, na e dejido mẹhe to anademẹ na lọ go wutu. Enẹ nọ bẹ nususu hẹn hugan tonusisena mẹlọ poun, na e tindo aṣẹ nado na anademẹ wutu. Enẹwutu, Klistiani Heblu lẹ dona hẹn jidide yetọn to mẹhe to anadenanu lẹ mẹ lodo whẹpo nukunbibia lọ nido wá. Eyin Klistiani lẹ nọ yí tonusise do hodo anademẹ mẹhe to anadenanu lẹ tọn to ojlẹ jijọho tọn lẹ mẹ, e na bọawuna yé taun nado wàmọ to ojlẹ awusinyẹn tọn lẹ mẹ.
11. Naegbọn e do yin dandan to egbehe dọ Klistiani lẹ ni tindo yise he lodo?
11 To egbehe, mí do hudo yise tọn dile e yindo na mẹhe mọ wekanhlanmẹ Paulu tọn yí jẹnukọn lẹ. Mí to gbẹnọ to ojlẹ he mẹ suhugan gbẹtọ lẹ tọn nọ gbẹ́ avase Biblu tọn gando vivọnu titonu ehe tọn go dai, bo tlẹ nọ ṣàn ẹn kò te. (2 Pita 3:3, 4) Humọ, mahopọnna dọ Biblu na nudọnamẹ delẹ gando lehe nukunbibia daho lọ na gbajẹgbonu do go, nususu wẹ tin he mí ma yọnẹn. Mí dona tindo yise he lodo dọ vivọnu titonu ehe tọn na wá to ojlẹ sisọ mẹ, podọ Jehovah na penukundo mí go.—Hab. 2:3.
12. Etẹwẹ na gọalọna mí nado lùn nukunbibia daho lọ tọ́n?
12 Mí dona sọ hẹn yise mítọn lodo to asisa he Jehovah nọ yizan to egbehe nado deanana mí mẹ, enẹ wẹ “afanumẹ nugbonọ podọ nuyọnẹntọ lọ.” (Mat. 24:45) Whenue nukunbibia daho lọ na gbajẹgbonu, mí gán mọ anademẹ gbẹwhlẹngán tọn tangan delẹ yí kẹdẹdile Klistiani Heblu lẹ gán ko mọyi do whenue Lomunu lẹ wá. Din wẹ ojlẹ lọ nado hẹn jidide mítọn lodo gligli to anademẹ he mí nọ mọyi sọn mẹhe to anadenanu to titobasinanu Jehovah tọn mẹ lẹ dè mẹ. Mí ma gán donukun dọ mí na hodo anademẹ yetọn po jidide po to nukunbibia daho lọ whenu eyin e nọ vẹawuna mí nado wàmọ todin.
13. Naegbọn ayinamẹ he to Heblu lẹ 13:5 mẹ do sọgbe?
13 Dile Klistiani Heblu lẹ to tepọn ohia lọ nado họ̀n, yé sọ dona zan gbẹzan jlẹkaji tọn, bo dapana “wanyina akuẹ.” (Hia Heblu lẹ 13:5.) Delẹ to yé mẹ ko jugbọn ojlẹ núdùdù whèdomẹ po ohẹ́n po tọn lẹ mẹ. (Heb. 10:32-34) Dile etlẹ yindọ yé ko wleawufo to ojlẹ de mẹ wayi nado doakọnna awusinyẹnnamẹnu lẹ na wẹndagbe lọ tọn wutu, delẹ to yé mẹ gán ko jẹ mimọ ji dọ adọkunnu lẹ yin dandan na hihọ́ yetọn. Amọ́, akuẹ ma gán basi hihọ́na yé sọta vasudo he to unklẹn lọ. (Jak. 5:3) Na nugbo tọn, e yọnbasi dọ ni vẹawu taun na mẹdepope he tindo adọkunnu lẹ nado họ̀n bo jo owhé po nutindo yetọn lẹ po do.
14. Nawẹ yise he lodo gán yinuwado nudide he mí nọ basi todin gando nutindo agbasa tọn lẹ go ji gbọn?
14 Mí na yin whinwhàn nado gbẹ́ owanyi na adọkunnu lẹ dai eyin mí tindo yise he lodo dọ vivọnu titonu ehe tọn ko dọnsẹpọ pete. Na nugbo tọn, gbẹtọ lẹ na “ze fataka yetọn dlan tòhomẹ-liho lẹ ji,” na yé na wá doayi e go dọ “fataka kavi sika yetọn lẹ ma na whlẹn yé to azán homẹgble tọn Jehovah tọn gbè.” (Ezek. 7:19) Kakati nado ze ayiha do lehe mí na bẹ akuẹ susu pli do ji, mí dona basi nudide he na gọalọna mí nado zan gbẹzan he bọawu amọ́ bo ka to jlẹkaji. Enẹ nọ biọ dọ mí ni nọavùnte sọta mẹtẹnpọn lọ nado duahọ he ma yin dandan tọn kavi yí whenu susu do to nukunpedo nutindo agbasa tọn mítọn lẹ go. Mí nasọ to aṣeji ma nado yiwanna nutindo agbasa tọn he mí ko tindo lẹ zẹjlẹgo. (Mat. 6:19, 24) Nutindo agbasa tọn po whẹho devo lẹ po gán whlé yise mítọn pọ́n dile mí to tenọpọn vivọnu titonu ehe tọn.
“MÌ TINDO NUHUDO AKỌNDONANU TỌN”
15. Naegbọn Klistiani Heblu lẹ na taun tọn do dó nuhudo akọndonanu tọn?
15 Klistiani Heblu lẹ dona doakọnna whlepọn yise tọn lẹ dile ninọmẹ lẹ na to yinylan deji to Jude. (Heb. 10:36) Dile etlẹ yindọ Klistiani Heblu delẹ ko pehẹ homẹkẹn sinsinyẹn, susu yetọn wẹ kẹalọyi sinsẹ̀n Klistiani tọn to ojlẹ he mẹ jijọho tin jẹ obá de mẹ te. Paulu dohia dọ dile etlẹ yindọ yé ko doakọnna whlepọn yise tọn lẹ, yé ma ko jiya dile Jesu wà do, enẹ wẹ kakajẹ okú. (Heb. 12:4) Amọ́ dile sinsẹ̀n Klistiani tọn to gbigbayipe, homẹgble po zohunhun agọ̀ nukundiọsọmẹtọ Ju lẹ tọn po fọ́n bo to sinsinyẹn deji. Owhe kleun delẹ jẹnukọn, whenue mẹlẹ mọ Paulu to Jelusalẹm, gbẹtọgun de fọ́n zingidi dote. Ju 40 linlán wẹ “yí yedelẹ do dẹ̀hodo glọ, dọ yé ma na dù kavi nù kakajẹ whenue yé na hù Paulu.” (Owalọ 22:22; 23:12-14) Mahopọnna ninọmẹ wangbẹna sinsẹ̀n tọn po zohunhun agọ̀ po tọn enẹ, Klistiani enẹlẹ gbẹ́ dona nọ pli nado basi sinsẹ̀n, lá wẹndagbe lọ bosọ hẹn yise yetọn lodo.
16. Nawẹ owe Heblu lẹ tọn gán gọalọna mí nado tindo pọndohlan he sọgbe gando homẹkẹn go gbọn? (Heblu lẹ 12:7)
16 Etẹwẹ na gọalọna Klistiani Heblu lẹ nado doakọnna nukundiọsọmẹ he yé pannukọn? Paulu yọnẹn dọ yé dona tindo pọndohlan he sọgbe gando whlepọn yetọn lẹ go. Enẹwutu, e basi zẹẹmẹ na yé dọ Jiwheyẹwhe gán jotẹnna whlepọn yise tọn lẹ taidi apadewhe azọ́nplọnmẹ Klistiani de tọn. (Hia Heblu lẹ 12:7.) Azọ́nplọnmẹ mọnkọ gán gọalọnamẹ nado wleawuna jẹhẹnu titengbe Klistiani tọn lẹ bosọ hẹn yé pọnte dogọ. Eyin Klistiani Heblu enẹlẹ ze ayiha do kọdetọn dagbe whlepọn lọ lẹ tọn ji, e na bọawuna yé dogọ nado doakọnnanu.—Heb. 12:11.
17. Etẹwẹ Paulu plọn gando akọndidona homẹkẹn go?
17 Paulu dotuhomẹna Klistiani Heblu lẹ nado yí gbemima sinsinyẹn do doakọnna whlepọn lẹ. E tin to otẹn dagbe mẹ nado kanwehlan yé gando whẹho ehe go. Na e ko nọ dohomẹkẹn Klistiani lẹ to ojlẹ de mẹ wayi wutu, e yọ́n adán he to gbigbò yé. E sọ yọ́n lehe yè nọ doakọnna homẹkẹn do. To popolẹpo mẹ, ewọ lọsu ko pehẹ nukundiọsọmẹ voovo lẹ to whenue e lẹzun Klistiani de godo. (2 Kọl. 11:23-25) Enẹwutu, Paulu gán dọho po nujikudo po gando nuhe e nọ biọ nado doakọnnanu go. E flinnu Klistiani enẹlẹ dọ whenue yé to akọndona whlepọn lẹ, yé dona nọ ganjẹ Jehovah go e ma yin do yedelẹ go. Paulu gán yí adọgbigbo do dọmọ: “Jehovah wẹ alọgọtọ ṣie; yẹn ma na dibu.”—Heb. 13:6.
18. Etẹ yinyọnẹn gando nuhe to nukọn ja lẹ go wẹ gán gọalọna mí nado doakọnna homẹkẹn?
18 To alọnu din, mẹmẹsunnu mítọn delẹ to akọndona homẹkẹn. Mí gán yí nugbonọ-yinyin do nọgodona yé gbọn odẹ̀ mítọn lẹ gblamẹ, podọ to whedelẹnu to aliho he yọ́n-na-yizan lẹ mẹ. (Heb. 10:33) Amọ́ Biblu dọ to aliho he họnwun mẹ dọmọ, “mẹhe to jijlo nado nọgbẹ̀ po mẹdezejo na Jiwheyẹwhe po to kọndopọ mẹ hẹ Klisti Jesu lẹpo na yin homẹkẹndo ga.” (2 Tim. 3:12) Enẹwutu, mímẹpo wẹ dona wleawudaina nuhe to nukọn ja lẹ. Mì gbọ mí ni zindonukọn nado nọ ganjẹ Jehovah go mlẹnmlẹn, bo deji dọ ewọ na gọalọna mí nado doakọnna whlepọn depope he mí gán pannukọn. To ojlẹ sisọ mẹ, ewọ na hẹn kọgbọ wá na sinsẹ̀n-basitọ nugbonọ etọn lẹpo.—2 Tẹs. 1:7, 8.
19. Afọdide yọ́n-na-yizan tẹlẹ zize wẹ gán gọalọna mí nado wleawudaina nukunbibia daho lọ? (Sọ pọ́n yẹdide lọ.)
19 Matin ayihaawe, wekanhlanmẹ Paulu tọn hlan Heblu lẹ gọalọna Klistiani owhe kanweko tintan whenu tọn lẹ nado wleawudaina nukunbibia he yé na wá pannukọn. Paulu dotuhomẹna mẹmẹsunnu etọn lẹ nado tindo oyọnẹn he siso gọna nukunnumọjẹnumẹ Owe-wiwe lẹ tọn. Mọwiwà na gọalọna yé nado doayi nuplọnmẹ he na bẹpla yise yetọn lẹ go bosọ gbẹ́ yé dai. E dotuhomẹna yé nado hẹn yise yetọn lodo na yé nido nọ yí jejejininọ do hodo anademẹ Jesu po mẹhe to anadenanu to agun mẹ lẹ po tọn. E sọ gọalọna Klistiani lẹ nado hẹn akọndonanu yetọn lodo, bo nọ tindo pọndohlan he sọgbe gando whlepọn lẹ go bosọ nọ pọ́n yé hlan taidi dotẹnmẹ de nado mọ azọ́nplọnmẹ Otọ́ owanyinọ yetọn tọn yí. Mì gbọ mílọsu ni yí ayinamẹ gbọdo ehe do yizan mẹ. Gbọnmọ dali, mí na penugo nado yí nugbonọ-yinyin do doakọnnanu kakajẹ opodo.—Heb. 3:14.
Klistiani nugbonọ lẹ mọ dona yí na akọndonanu yetọn wutu. Whenue yé ko họ̀n sọn Jude godo, yé zindonukọn nado nọ pli dopọ. Etẹwẹ mí gán plọn sọn ehe mẹ? (Pọ́n hukan 19tọ)
OHÀN 126 Mì Nọ Nukle, Mì Lodo, Mì Yin Huhlọnnọ
a To weta tintan lọ kẹdẹ mẹ, Paulu donù e whè gbau wefọ Owe-wiwe Heblu tọn lẹ tọn ṣinawe go nado dohia dọ aliho sinsẹ̀n-bibasi tọn Klistiani lẹ tọn yiaga hugan aliho he mẹ Ju lẹ nọ basi sinsẹ̀n te.—Heb. 1:5-13.
