Alọgọ Nado Nọ Plọnnu to Gbesisọ Mẹ
BE E nọ vẹawuna we nado hẹn aṣa Biblu pinplọn mẹdetiti tọn towe go bosọ hẹn ẹn zun awuvivinu wẹ ya? Mímẹpo go wẹ e nọ jọ do to whedelẹnu. Amọ́, lẹnnupọndo nudevo he mí nọ wà to gbesisọ mẹ lẹ ji taidi, awulilẹ̀. Awulilẹ̀ nọ yí whenu bosọ nọ biọ vivẹnudido, amọ́ lehe agbasa mítọn nọ fá do sọ whenue mí lawu! Biblu pinplọn lọsu gán taidi ‘osin ohó lọ tọn yíyí do klọ́’ míde nado mọ kọfanamẹ. (Efe. 5:26) Lẹnnupọndo ayinamẹ delẹ he gán gọalọ ji:
Nọ basi tito. Biblu pinplọn mẹdetiti tọn yin dopo to “nuhe yin nujọnu hugan” he Klistiani de ma dona dovọ́na lẹ mẹ. (Flp. 1:10) Nado penugo bo nọ flin tito towe, naegbọn a ma nado tẹ́ ẹ do fihe a na yawu mọ ẹn te, taidi do apatakó de ji kavi do ohọ̀n zomọ nuhẹnfa towe tọn go? Kavi a gán sọ mọdọ e na yọ́n nado ze nudidọ de do alokan towe ji he na nọ flinnu we ojlẹ vude jẹnukọnna nupinplọn towe.
Nọ diọada sọgbe hẹ nuhudo towe lẹ. Be e nọ bọawuna we nado ze ayiha do fidopo na ojlẹ dindẹn kavi na ojlẹ kleunkleun susu lẹ wẹ ya? Hiẹ lọsu wẹ yọ́n ninọmẹ towe lẹ ganji. Basi tito na adà nupinplọn tọn towe lẹ sọgbe hẹ yé. Eyin e ma jlo we nado plọnnu to whenue ojlẹ lọ sọ̀, naegbọn a ma na basi dide nado plọnnu na nukunwhiwhe ao poun? E pọnte nado plọnnu etlẹ yin na ojlẹ vude hú ma nado plọnnu paali. Podọ, to whenue a bẹjẹeji, apàpà gán sọ́ we nado zindonukọn.—Flp. 2:13.
Nọ de hosọ he ji a na plọnnu do lẹ jẹnukọn. Eyin whenue a jlo na plọnnu wẹ a nọ wá jẹ nulẹnpọn ji do nuhe a na plọn ji, a gán nọma “yí whenu [towe] zan to aliho dagbe hugan mẹ.” (Efe. 5:16) Naegbọn a ma na do basi todohukanji hosọ he ji a jlo na plọnnu do lẹ tọn? Whedepopenu he kanbiọ de wá ayiha mẹ na we, kàn ẹn dai. Podọ to vivọnu adà nupinplọn tọn dopodopo tọn, a gán sọ yí hosọ devo he a to linlẹn nado plọn lẹ dogọ todohukanji towe.
Nọ diọalọ. Eyin a ko tindo tito nupinplọn tọn de, a gán diọ ẹ sọgbe hẹ nuhudo towe, vlavo nado diọ ojlẹ nẹmu he a na yí do plọnnu kavi hosọ he a de lẹ. Nuhe yin nujọnu hugan lọ ma yin—whenue a nọ plọnnu do, lehe a nọ plọnnu dẹnsọ, kavi nuhe a nọ plọn—amọ́ lehe a nọ plọnnu to gbesisọ mẹ do.
Nado dọ hójọhó, nupinplọn to gbesisọ mẹ nọ hẹn ale wá na mí. Mí nọ dọnsẹpọ Jehovah dogọ, mí nọ plọn nado yinuwa po nuyọnẹn po, podọ mí sọ nọ mọ kọfanamẹ yí.—Jọṣ. 1:8.
