HOSỌ OPLỌN TỌN 44
OHÀN 33 Ze Agbàn Pinpẹn Towe Dlan Jehovah Ji
Lehe Mí Gán Pehẹ Mawadodo Do
“A dike oylan gbawhàn towe blo, ṣigba nọ yí dagbe do gbawhàn oylan tọn.”—LOM. 12:21.
NUHE E BẸHẸN
Aliho he mẹ mí gán pehẹ mawadodo te bo ma na hẹn ninọmẹ lẹ vantan.
1, 2. Nawẹ mawadodo gán yinuwado mímẹpo ji to aliho de kavi devo mẹ gbọn?
JESU na apajlẹ asuṣiọsi de tọn he zindonukọn nado to whẹdida dodo biọ whẹdatọ de. Ayihaawe ma tin dọ susu to devi Jesu tọn lẹ mẹ na ko mọ yede to apajlẹ ehe mẹ, na gbẹtọ paa lẹ to whenẹnu nọ saba jiya whẹdida mawadodo tọn wutu. (Luku 18:1-5) Apajlẹ enẹ sọ do zẹẹmẹ na mílọsu to egbehe, na mímẹpo wẹ nọ pehẹ mawadodo to whedelẹnu wutu.
2 To aihọn lọ mẹ to egbehe, nuvẹun, zẹ́nmasọ po kọgbidinamẹ po gbayipe, enẹwutu e ma nọ paṣa mí eyin yè yinuwa hẹ mí to aliho mawadodo tọn mẹ. (Yẹwh. 5:8) Amọ́, mí ma nọ saba donukun dọ mẹmẹsunnu kavi mẹmẹyọnnu de ni dawhẹna mí to aliho agọ̀ mẹ; etomọṣo, enẹ gán jọ. Na nugbo tọn, mẹmẹsunnu po mẹmẹyọnnu mítọn lẹ po ma yin kẹntọ nugbo lọ tọn. Mapenọ wẹ yé yin poun. Mí gán plọn nususu sọn lehe Jesu yinuwa do sọta mawadodo he wá sọn nukundiọsọmẹtọ kanylantọ lẹ dè mẹ. Eyin mí gán nọ fahomẹ hẹ nukundiọsọmẹtọ mítọn he nọ yinuwa hẹ mí to aliho mawadodo tọn mẹ lẹ, nẹmunẹmu wẹ mí ma na fahomẹ hẹ yisenọ hatọ mítọn lẹ! Nawẹ e nọ ṣí na Jehovah eyin mẹhe to gbonu agun lọ tọn lẹ kavi mẹhe to agun lọ mẹ lẹ yinuwa hẹ mí to aliho mawadodo tọn mẹ? Be e nọ duahunmẹna ẹn ya?
3. Be e nọ duahunmẹna Jehovah eyin mí to oyà mawadodo tọn ji ya, podọ etẹwutu?
3 Lehe mẹlẹ nọ yinuwa hẹ mí do nọ duahunmẹna Jehovah taun. “Jehovah yiwanna whẹdida dodo.” (Salm. 37:28) Jesu hẹn mí deji dọ Jehovah na “hẹn ẹn diun dọ whẹdida dodo yin bibasi . . . po awuyiya po” to ojlẹ sisọ mẹ. (Luku 18:7, 8) Podọ to madẹnmẹ, e na de awugble he mí jiya etọn lẹpo sẹ̀ bo na sukúndona mawadodo wunmẹ lẹpo.—Salm. 72:1, 2.
4. Alọgọ tẹwẹ Jehovah nọ na mí to egbehe?
4 Dile mí to tepọn ojlẹ lọ he mẹ dodowiwa na gbayipe te, Jehovah nọ gọalọna mí nado pehẹ mawadodo. (2 Pita 3:13) E nọ plọn mí nado nọ yinuwa po nuyọnẹn po to whenue mẹlẹ yinuwa hẹ mí to aliho he ma sọgbe mẹ. Gbọn Visunnu etọn gblamẹ, Jehovah do apajlẹ pipé aliho he mẹ mí gán pehẹ mawadodo te tọn hia mí. Podọ, e na mí ayinamẹ dagbe lẹ he mí gán hodo whenue yè yí mawadodo do yinuwa hẹ mí.
NỌ AṢEJI GANDO LEHE A NỌ YINUWA SỌTA MAWADODO DO GO
5. Naegbọn mí dona to aṣeji gando aliho he mẹ mí nọ yinuwa sọta mawadodo te go?
5 Mawadodo gán hẹn mí jẹflumẹ bo gbleawuna mí sinsinyẹn. (Yẹwh. 7:7) Devizọnwatọ nugbonọ lẹ taidi Jobu po Habakuku po do numọtolanmẹ dopolọ. (Jobu 6:2, 3; Hab. 1:1-3) Dile etlẹ yindọ jọwamọnu wẹ numọtolanmẹ ehelẹ yin, mí dona to aṣeji gando lehe mí nọ yinuwa do go, na mí nikaa yinuwa po nulú po.
6. Etẹwẹ apajlẹ Absalọmi tọn plọn mí? (Sọ pọ́n yẹdide lọ.)
6 Mí gán jlo na didẹ whẹho lẹ na míde whenue mẹlẹ yinuwa hẹ mí to aliho mawadodo tọn mẹ. Amọ́, nuyiwa to aliho mọnkọ mẹ gán hẹn ninọmẹ lọ vantan. Lẹnnupọndo apajlẹ Absalọmi he yin visunnu Ahọlu Davidi tọn ji. E vẹna ẹn taun whenue nọviyọnnu etọn Tamali yin zinzanhẹ gánnugánnu gbọn nọvisunnu daa yetọn Amnọni dali. Sọgbe hẹ Osẹ́n Mose tọn, Amnọni jẹna okú na nuhe e wà. (Lev. 20:17) Dile etlẹ yindọ yè gán mọnukunnujẹ homẹgble Absalọmi tọn mẹ, e ma tindo aṣẹ lọ nado didẹ whẹho lẹ na ede.—2 Sam. 13:20-23, 28, 29.
Absalọmi joawuna homẹgble whenue yè yinuwa hẹ nọviyọnnu etọn Tamali po mawadodo po (Pọ́n hukan 6tọ)
7. Nawẹ mawadodo dotukla salmu-kantọ de na ojlẹ de gbọn?
7 Eyin e taidi dọ mẹhe nọ yinuwa po mawadodo po lẹ ma nọ jiya nuyiwa yetọn tọn, mí gán kanse míde eyin e gbẹ́ doale nado nọ wà nuhe sọgbe. Lẹnnupọndo apajlẹ salmu-kantọ de tọn ji he doayi e go dọ mẹylankan lẹ nọ tafu dodonọ lẹ, ganṣo e nọ taidi dọ onú yọ́n na yé. E dọmọ: “Mẹylankan lẹ niyẹn, he onú nọ bọawuna to whepoponu.” (Salm. 73:12) E sọ jẹflumẹ na mawadodo he e nọ mọ lẹ sọmọ bọ e dibla hẹn jidide etọn to ale he Jehovah sinsẹ̀n nọ hẹnwa lẹ mẹ bu; e dọmọ: “Whenue n’tẹnpọn nado mọnukunnujẹemẹ, e vẹawuna mi taun.” (Salm. 73:14, 16) Na nugbo tọn, e yigbe dọ: “Na yẹn tọn, afọ ṣie ko dibla fẹ́; afọ ṣie lẹ ko dibla dídí.” (Salm. 73:2) Onú mọnkọ de jọ do mẹmẹsunnu de he mí na ylọdọ Alberto go.
8. Nawẹ nuyiwa mawadodo tọn de yinuwado mẹmẹsunnu de ji gbọn?
8 Yè sawhẹ agọ̀ dokọna Alberto dọ e fìn akuẹ agun tọn. Ehe zọ́n bọ e hẹn lẹblanulọkẹyi etọn lẹ gọna sisi he mẹsusu he sèhó gando whẹho lọ go to agun lọ mẹ lẹ tindo na ẹn bu. E dọ dọ: “E vẹna mi, adi do mi bọ n’sọ jẹflumẹ taun.” E na dotẹnmẹ numọtolanmẹ awufiẹsa tọn etọn nado yinuwado gbigbọnọ-yinyin etọn ji, podọ e tlẹ gbọjọ na owhe atọ́n. Numimọ ehe do nuhe gán jọ hia eyin mí duadi na nuyiwa mawadodo tọn de wutu.
NỌ HODO APAJLẸ LEHE JESU PEHẸ MAWADODO DO TỌN
9. Nuyiwa mawadodo tọn tẹlẹ wẹ Jesu pehẹ? (Sọ pọ́n yẹdide lọ.)
9 Jesu ze apajlẹ pipé dai na mí gando lehe mí gán pehẹ mawadodo do go. Lẹnnupọndo nuyiwa mawadodo tọn he e pehẹ sọn whẹndo etọn po mẹdevo lẹ po dè ji. Hagbẹ whẹndo tọn etọn mayisenọ lẹ dọ dọ e hùnalẹ̀, nukọntọ sinsẹ̀n tọn lẹ sawhẹdokọna ẹn dọ e nọ kọnawudopọ hẹ aovi lẹ, podọ awhànfuntọ Lomunu lẹ ṣàn ẹn kò, hò e bo wá hù i to godo mẹ. (Malku 3:21, 22; 14:55; 15:16-20, 35-37) Amọ́, Jesu doakọnna mawadodo ehe lẹpo bo ma tlẹ yiahọsu gbede. Etẹwẹ mí gán plọn sọn apajlẹ etọn mẹ?
Jesu ze apajlẹ pipé de dai gando aliho he mẹ mí gán duto mawadodo ji te go (Pọ́n hukan 9, 10tọ)
10. Nawẹ Jesu pehẹ nuyiwa mawadodo tọn gbọn? (1 Pita 2:21-23)
10 Hia 1 Pita 2:21-23. a Jesu ze apajlẹ pipé dai na mí nado hodo whenue mí pehẹ nuyiwa mawadodo tọn. E yọ́n whenue e na gbọṣi abọẹ podọ whenue e na dọho. (Mat. 26:62-64) E ma gblọnho gando onú agọ̀ he yin didọ dego lẹpo go. (Mat. 11:19) Eyin e biọ dọ ni dọho, e ma nọ zùn homẹkẹndomẹtọ etọn lẹ kavi sìn-adán na yé. Jesu nọ dava ede na e “ze ede do alọmẹ na Mẹlọ he nọ yí dodo do dawhẹ.” Jesu yọnẹn dọ pọndohlan Jehovah tọn gando whẹho lẹ go wẹ yin nujọnu hugan. E deji dọ Jehovah na didẹ nuyiwa mawadodo tọn lẹ to ojlẹ sisọ mẹ.
11. Etẹwẹ yin delẹ to aliho he mẹ mí gán nọ payi nuhe mí nọ dọ lẹ go te? (Sọ pọ́n yẹdide lọ lẹ.)
11 Mí gán hodo apajlẹ Jesu tọn bo nọ payi nuhe mí nọ dọ lẹ go, whenue yè yinuwa hẹ mí po mawadodo po. Nuyiwa mawadodo tọn delẹ ma nọ sinyẹn, bọ mí gán nọ yí nukunpẹvi do pọ́n yé poun. Kavi mí gán gbọṣi abọẹ nado dapana nuhe gán hẹn ninọmẹ lọ vantan de didọ. (Yẹwh. 3:7; Jak. 1:19, 20) To ojlẹ devo lẹ mẹ, e gán biọ dọ mí ni dọho tọ́n eyin mí doayi nuyiwahẹmẹ mawadodo tọn de go kavi whenue mí dona yiavùnlọna nugbo lọ. (Owalọ 6:1, 2) Eyin e biọ dọ mí ni dọho, mí dona dovivẹnu nado yí ogbè dẹẹdẹ po sisi po do wàmọ.—1 Pita 3:15. b
Eyin mí pehẹ mawadodo, mí gán hodo apajlẹ Jesu tọn bo nọ yí sọwhiwhe do de whenue mí na dọho po lehe mí na wàmọ do po (Pọ́n hukan 11, 12tọ)
12. Nawẹ mí nọ ze míde do alọmẹ na “Mẹlọ he nọ yí dodo do dawhẹ” gbọn?
12 Mí gán sọ hodo apajlẹ Jesu tọn eyin mí nọ ze míde do alọmẹ na “Mẹlọ he nọ yí dodo do dawhẹ.” Whenue mẹdevo lẹ ṣì whẹdana mí kavi yinuwa hẹ mí to aliho agọ̀ mẹ, mí nọ deji dọ Jehovah yọ́n nuhe jọ lọ. Jidide mọnkọ gán gọalọna mí nado doakọnna nuyiwahẹmẹ mawadodo tọn lẹ, na mí yọnẹn dọ Jehovah na didẹ whẹho lẹ to godo mẹ. Eyin mí nọ jo whẹho lẹ do alọ Jehovah tọn mẹ, mí ma na natẹn homẹgble kavi mẹhẹndohomẹ to ahun mítọn mẹ. Numọtolanmẹ mọnkọ lẹ gán zọ́n bọ mí ma na dava míde, bo hẹn ayajẹ mítọn bu bosọ hẹn haṣinṣan mítọn hẹ Jehovah gble.—Salm. 37:8.
13. Etẹwẹ sọgan gọalọna mí nado nọ to akọndona nuyiwa mawadodo tọn lẹ zọnmii?
13 Nado dọ hójọhó, mí ma gán penugo bo hodo apajlẹ Jesu tọn to pipé mẹ pọ́n gbede. To whedelẹnu, mí gán nọ wà kavi dọ nudelẹ he na wá vẹna mí. (Jak. 3:2) Podọ nuyiwa mawadodo tọn delẹ gán gbẹ́ nọ hẹn awufiẹsa wá na mí to numọtolanmẹ-liho podọ to agbasa-liho bọ e gán vẹawuna mí nado doakọnna. Eyin enẹ jọ do gowe, deji dọ Jehovah yọ́n nuhe mẹ jugbọn a te. Podọ Jesu he sọ jiya mawadodo tọn ga sọgan vẹawu we. (Heb. 4:15, 16) Gbọnvona dọ Jehovah hẹn apajlẹ pipé Jesu tọn tin-to-aimẹ na mí, e na mí ayinamẹ yọ́n-na-yizan lẹ he na gọalọna mí nado pehẹ mawadodo. Mì gbọ mí ni lẹnnupọndo wefọ awe ji sọn owe Lomunu lẹ tọn mẹ he gán gọalọna mí.
“MÌ NATẸN HOMẸGBLE”
14. Etẹwẹ e zẹẹmẹdo nado “natẹn homẹgble”? (Lomunu lẹ 12:19)
14 Hia Lomunu lẹ 12:19. Whenue apọsteli Paulu dotuhomẹna Klistiani lẹ nado “natẹn homẹgble,” homẹgble mẹnu tọn hodọ wẹ e te? Sọgbe hẹ lẹdo hodidọ lọ tọn, homẹgble Jehovah tọn wẹ. Mí nọ natẹn homẹgble Jehovah tọn eyin mí na ẹn dotẹnmẹ nado hẹn whẹdida dodo etọn ṣẹ to ojlẹ he yọ́n na ẹn mẹ podọ do lehe ewọ jlo do. To whenue mẹmẹsunnu de he nọ yin John ko yin nuyiwa hẹ po mawadodo po godo, e dọmọ: “N’dona duto ayilinlẹn lọ nado jla nulẹ do na dee ji. Lomunu lẹ 12:19 gọalọna mi nado nọ nọtepọn Jehovah.”
15. Naegbọn e do pọnte hugan dọ mí ni dike Jehovah ni penukundo whẹho lẹ go?
15 Mí nọ mọaleyi, eyin mí nọ nọtepọn Jehovah nado jla ninọmẹ de do. Gbọnmọ dali, mí nọ vò sọn nuhahun po flumẹjijẹ he tintẹnpọn nado didẹ ninọmẹ lọ na míde nọ hẹnwa lẹ po mẹ. Jehovah jlo na gọalọna mí. Nuhe dọ e te wẹ yindọ, ‘Jo nuyiwa mawadodo tọn lọ do alọmẹ na mi; n’na penukundo whẹho lọ go.’ Eyin mí kẹalọyi opagbe Jehovah tọn lọ dọ “yẹn na suahọ etọn,” mí gán johodo bo deji dọ ewọ na penukundo whẹho lọ go to aliho dagbe hugan lọ mẹ. Nuhe gọalọna John he go mí donù wayi niyẹn. E dọmọ, “Eyin n’gán nọtepọn Jehovah poun, ewọ na penukundego to aliho he yọ́n hugan mẹ.”
“NỌ YÍ DAGBE DO GBAWHÀN OYLAN TỌN”
16, 17. Nawẹ odẹ̀ sọgan gọalọna mí nado “yí dagbe do gbawhàn oylan tọn” gbọn? (Lomunu lẹ 12:21)
16 Hia Lomunu lẹ 12:21. Paulu sọ dotuhomẹna Klistiani lẹ nado “nọ yí dagbe do gbawhàn oylan tọn.” To Yẹwhehodidọ Osó ji tọn Jesu tọn mẹ, e dọmọ: “Mì zindonukọn nado nọ yiwanna kẹntọ mìtọn lẹ bo nọ hodẹ̀ na mẹhe to homẹkẹndo mì lẹ.” (Mat. 5:44) Nuhe ewọ lọsu wà pẹẹ niyẹn. Mí gán ko lẹnnupọndo awufiẹsa he Jesu doakọnna lẹ ji to whenue awhànfuntọ Lomunu lẹ whè e do pòtin go. Amọ́, mí ma gán mọnukunnujẹ awufiẹsa, mẹdèpo po mawadodo he e doakọnna lẹ po mẹ to gigọ́ mẹ.
17 Jesu ma dike nuyiwa mawadodo tọn he e jiya etọn lẹ ni duto e ji. Kakati nado hodẹ̀do awhànfuntọ enẹlẹ, e hodẹ̀ dọmọ: “Otọ́, jona yé, na yé ma yọ́n nuhe wà yé te.” (Luku 23:34) Eyin mí nọ hodẹ̀ do mẹhe yinuwa hẹ mí to aliho agọ̀ mẹ lẹ tamẹ, ehe gán dekanpona mẹhẹndohomẹ po homẹgble mítọn po bo tlẹ gán diọ nukun he mí nọ yí do pọ́n mẹhe ṣinuwa do mí lẹ.
18. Nawẹ odẹ̀ gọalọna Alberto po John po nado duto nuyiwa mawadodo tọn lẹ ji gbọn?
18 Odẹ̀ gọalọna mẹmẹsunnu awe he go mí donù to hosọ ehe mẹ lẹ nado duto mawadodo he yé pehẹ lẹ ji. Alberto dọmọ: “N’hodẹ̀ na mẹmẹsunnu he yí mawadodo do yinuwa hẹ mi lọ lẹ. Whlasusu wẹ n’biọ dọ Jehovah ni gọalọna mi nado dogodo mawadodo ehe.” E vivi na mí dọ Alberto gọjẹ Jehovah sẹ̀n ji po nugbonọ-yinyin po whladopo dogọ. John dọmọ: “Whlasusu wẹ n’hodẹ̀ na mẹmẹsunnu he gbleawuna mi lọ. Odẹ̀ mọnkọ lẹ gọalọna mi nado tindo pọndohlan dagbe gando ewọ go bo masọ dawhẹna ẹn. Odẹ̀ enẹlẹ sọ na mi jijọho ahun mẹ tọn.”
19. Etẹwẹ mí dona to wiwà kakajẹ whenue titonu ehe na wá vivọnu? (1 Pita 3:8, 9)
19 Mí ma gán dọ nuyiwahẹmẹ mawadodo tọn he mí na pehẹ lẹ whẹpo titonu ehe nido wá vivọnu. Mahopọnna nudepope he gán jọ, mì dike mí gọ̀n alọgọ Jehovah tọn biọ to odẹ̀ mẹ gbede blo. Humọ, mì gbọ mí ni hodo apajlẹ lehe Jesu yinuwa do tọn whenue e pehẹ mawadodo bo zindonukọn nado to nunọwhinnusẹ́n Biblu tọn lẹ yí do yizan mẹ. Eyin mí wàmọ, mí gán kudeji dọ Jehovah na dona mí.—Hia 1 Pita 3:8, 9.
OHÀN 38 E Na Hẹn We Lodo
a To weta 2 po 3tọ po wekanhlanmẹ tintan apọsteli Pita tọn mẹ, e basi zẹẹmẹ ninọmẹ delẹ tọn, he mẹ Klistiani owhe kanweko tintan whenu tọn susu pehẹ nuyiwahẹmẹ agọ̀ sọn alọ ogán hùnylantọ lẹ kavi asu mayisenọ lẹ tọn mẹ.—1 Pita 2:18-20; 3:1-6, 8, 9.
b Pọ́n video lọ Lehe Owanyi Nọ Planmẹ Jẹ Jijọho Nujọnu Tọn Kọ̀n Do to jw.org ji.
