Hagbẹ Yọyọ Hagbẹ Anademẹtọ Tọn Lẹ

TO Samedi 2 octobre 1999, Opli Whemẹwhemẹ Watch Tower Bible and Tract Society of Pennsylvania tọn yin tadona po nulila he paṣamẹ de po. Gbẹtọ 10 594 he wá kavi yin ṣiṣakadopọ gbọn alokan dali lẹ yin ayajẹnọ nado sè dọ hagbẹ yọyọ ẹnẹ ko yin yiyidogọ Hagbẹ Anademẹtọ Kunnudetọ Jehovah tọn lẹ tọn. Hagbẹ yọyọ lọ lẹ, he yemẹpo yin Klistiani yiamisisadode lẹ, wẹ Samuel F. Herd; M. stephen Lett; Guy H. Pierce; po David H. Splane po.

• Samuel Herd jẹ gbehosọnalitọ basi ji to 1958, podọ sọn 1965 jẹ 1997, ewọ tin to azọ́n lẹdo po agbegbe tọn po mẹ. Enẹgodo, ewọ po asi etọn, Gloria po, ko yin apadewhe whẹndo Bẹtẹli États-Unis tọn, to fie Mẹmẹsunnu Herd ko to azọ́nwa te to Azọ́nwatẹn Sinsẹ̀nzọn tọn mẹ. E sọ to sinsẹ̀nzọnwa taidi alọgọtọ de na Wedegbẹ́ Sinsẹ̀nzọn tọn.

• Stephen Lett jẹ gbehosọnalitọ basi ji to décembre 1966, podọ sọn 1967 jẹ 1971, e wà sinsẹ̀nzọn to Bẹtẹli États-Unis tọn. To octobre 1971, e wlealọ hẹ asi etọn, Susan, bosọ biọ sinsẹ̀nzọn gbehosọnalitọ titengbe tọn mẹ. Sọn 1979 jẹ 1998, e wà sinsẹ̀nzọn taidi nugopọntọ lẹdo tọn de. Sọn avril 1998 gbọ́n, ewọ po Susan po ko yin apadewhe whẹndo Bẹtẹli États-Unis tọn. To finẹ e ko wazọ́n to Azọ́nwatẹn Sinsẹ̀nzọn tọn mẹ bosọ yin alọgọtọ de na Wedegbẹ́ Mẹpinplọn tọn.

• Guy Pierce ko penukundo whẹndo de go podọ to enẹgodo to pọmẹ hẹ asi etọn jẹ gbehosọnalitọ basi ji to avril 1982. E wà sinsẹ̀nzọn taidi nugopọntọ lẹdo tọn de sọn 1986 jẹ 1997, to whenuena ewọ po asi etọn, Penny po, lẹzun apadewhe whẹndo Bẹtẹli Brooklyn tọn. Mẹmẹsunnu Pierce ko to sinsẹ̀nzọnwa taidi alọgọtọ de na Wedegbẹ́ Nukunpedomẹgo tọn.

• David Splane jẹ gbehosọnalitọ basi ji to septembre 1963. Taidi mẹhe mọ gbedewema yí sọn klasi 42tọ Giliadi tọn de, e wà sinsẹ̀nzọn taidi mẹdehlan de to Sénégal, Aflika, enẹgodo na owhe 19 to azọ́n lẹdo tọn mẹ to Canada. Ewọ po asi etọn, Linda po, ko tin to Bẹtẹli to États-Unis sọn 1990 gbọ́n, fie Mẹmẹsunnu Splane ko wazọ́n to azọ́nwatẹn Sinsẹ̀nzọn tọn po Wekinkan tọn po mẹ te. E ko yin alọgọtọ de na Wedegbẹ́ Wekinkan tọn, sọn 1998 gbọ́n.

To yidogọmẹ na hagbẹ yọyọ ẹnẹ lọ lẹ, Hagbẹ Anademẹtọ lọ todin bẹ C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, po D. Sydlik po hẹn. Odẹ̀ mẹlẹpo tọn wẹ e yin dọ Jehovah na to didona bosọ to huhlọn na Hagbẹ Anademẹtọ lọ, heyin hinhẹn sù deji todin zọnmii, dile e to nukọnzindo nado to nukunpedo nuwiwa omẹ Jiwheyẹwhe tọn lẹ tọn go lẹdo aihọn pé bosọ to nukunpedo dagbenu gbigbọmẹ tọn yetọn lẹ go.