To Whenuena ‘Jẹhọn Tin Agọ̀ Hlan Mí’

To zẹẹmẹ bibasi do numimọ nujọnu-gbẹzan tọn lẹ ji heyin devi Jesu tọn lẹ tọn dile yé to tuklajẹ nado dasá Ohù Galili tọn to tọjihun de mẹ, Wẹndagbe kantọ Malku dọ dọ yé to “tuklajẹ to húnkùnkùn mẹ, na jẹhọn tin agọ̀ hlan yé.” Dile e gbẹ́ tin to otọ̀-tó, Jesu mọ tuklajijẹ yetọn podọ gbọn azọ́njiawu dali zinzọnlin to ohù ji nado yì yé dè. To whenuena “e sọ hẹ́ aga biọ vàtlẹ lọ mẹ yì yé dè; jẹhọn sọ gbò.”—Malku 6:48-51.

Biblu kantọ dopolọ na linlin dọ to nuwiwa he jẹnukọn de mẹ, “jẹhọn daho de sọ fọ́n.” To enẹ mẹ, Jesu “wọhẹ jẹhọn . . . , jẹhọn lọ sọ dọalọ te, mimiọn daho de sọ tin finẹ.”—Malku 4:37-39.

Dile etlẹ yindọ míwlẹ to egbehe ma tindo lẹblanulọkẹyi nado mọ nujijọ azọ́njiawu tọn mọnkọtọn lẹ do sọ, mí sọgan plọnnu susu sọn yé mẹ. Taidi gbẹtọvi mapenọ he to gbẹnọ to ojlẹ owù tọn lẹ mẹ, mí ma vò sọn jẹhọn yajiji tọn lẹ mẹ gba. (2 Timoti 3:1-5) Na nugbo tọn, to ojlẹ delẹ mẹ mí sọgan tindo numọtolanmẹ dọ ayimajai he tin to kọndopọmẹ hẹ whlepọn mẹdetiti tọn lẹ nọ jẹ obá oyujẹhọn tọn mẹ. Ṣigba pọngbọ tin-to-aimẹ! Jesu dlẹnkanna oylọ basinamẹ lọ dọmọ: “Mì wá dee, mì he to tuklajẹ, bọ yè doagban pinpẹn na lẹ, yẹn nasọ na gbọjẹ mì.”—Matiu 11:28.

To whenuena e sọawuhia dọ ‘jẹhọn tin agọ̀ hlan mí,’ mí sọgan tindo numimọ “mimiọn daho” ahun mẹ tọn. Gbọnna? Gbọn jidide do opagbe magbọvọ Jehovah Jiwheyẹwhe tọn lẹ go dali.—Yijlẹdo Isaia 55:9-11 go; Filippinu lẹ 4:5-7.