Lilatọ Ahọluduta Tọn lẹ Na Linlin

Alọgigọna Gbẹtọ Wunmẹ Lẹpo to Pays-Bas

ABLAHAM yin dawe he tindo yise he ma yọ́n mọ de. “Whenuena yè ylọ ẹ,” Ablaham setonuna ogbè Jiwheyẹwhe tọn bosọ “tọ́n yì, e ma yọ́n fie e jei” gba, wẹ apọsteli Paulu dọ. To whenuena e ko sẹtẹn na whẹndo etọn blebu godo, Ablaham “wáwáṣi to aigba opagbe tọn lọ ji” na pipòtọ owhe kanweko gbẹzan etọn tọn.—Heblu lẹ 11:8, 9.

Mọdopolọ to egbehe, susu to Kunnudetọ Jehovah tọn lẹ mẹ ko kẹalọyi avùnnukundiọsọmẹ tẹnsisẹ yì otò devo mẹ tọn nado sọgan wadevizọn to fie nuhudo sù te. Mẹdevo lẹ ko plọn ogbè voovo lẹ na yé nido sọgan dekunnu na jonọ he wá sáwhé do otò yetọn mẹ lẹ. Dile apajlẹ he bọdego lẹ dohia do, gbigbọ dagbe ehe ko hùn ‘ohọ̀n daho he planmẹ jẹ nuwiwa kọ̀n de’ dote to Pays-Bas, fie nudi livi dopo to tomẹnu livi 15 lẹ mẹ wẹ tọ́nsọn aigba devo lẹ ji te.—1 Kọlintinu lẹ 16:9.

◻ Bahram, avùn Karaté tọn plọnmẹtọ dai tọn de, wá sọn otò de mẹ to Ṣẹnṣẹn Whèzẹtẹn tọn. E kẹalọyi vọkan Biblu tọn dopo gọna owe Watch Tower tọn delẹ. To osun dopo gblamẹ, Bahram yọnẹn dọ emi ko mọ nugbo. Oplọn de yin bibẹjẹeji hẹ ewọ po asi etọn po, ṣigba nuhahun de tin—Biblu plọnmẹtọ yetọn ma nọ dó ogbè yetọn gba. Yé nọ dọhodopọ po agbasa-yido-basi-dohia po, yèdọ hodidọ “alọ lẹ po afọ lẹ po tọn,” dile yé flin do. To madẹnmẹ, Bahram po asi etọn po penugo nado dín agun de mọ fie ogbè yetọn titi nọ yin dido te, podọ to enẹgodo yé basi nukọnyiyi po awuyiya po. Bahram ko yin Kunnudetọ he yí baptẹm de todin.

◻ Gbehosọnalitọ asu po asi po Pays-Bas-nu de dọnsẹpọ dawe Indonésie-nu de he tin to ote to nusatẹn de nukọn. Ewọ yin pipaṣa po homẹhunhun po to whenuena asu po asi po lọ dọho na ẹn to ogbè etọn titi mẹ. Tito lẹ yin bibasi nado dla ẹ pọ́n to owhé etọn gbè. E yin yinyọnẹn dọ e ko nọ̀ Russie hugan owhe 20, podọ to ojlẹ enẹ mẹ e lẹzun doto he nọ penukundo azọ̀n po dagbemẹ-ninọ yọnnu lẹ tọn po go. E sọalọakọ́n nado yin mẹhe ma yise dọ Jiwheyẹwhe tin de, ṣigba e yigbe dọ ojlẹ dopodopo he mẹ emi ji ovi-yẹyẹ de namẹ, e nọ paṣa emi, “Lehe agbasa gbẹtọ tọn yọnwhanpẹ do sọ! Azọ́njiawu nankọtọn die!” E yigbe nado plọn Biblu podọ to madẹnmẹ wá yise dọ Mẹdatọ de tin he nọ hò gbẹtọvi lẹ tọn pọ́n. (1 Pita 5:6, 7) E ko yin mẹmẹsunnu he yí baptẹm de todin bosọ to sinsẹ̀nzọnwa hẹ agun Indonésie tọn to Amsterdam.

◻ To Rotterdam, heyin dopo to bato-glintẹn he klo hugan to aihọn mẹ lẹ mẹ, pipli gbehosọnalitọ lẹ tọn de ko lẹzun azọ́nyọnẹntọ to yẹwhehodidọ mẹ hlan pipli ogbè voovo lẹ tọn he nọ wá glinhun egbesọegbesọ lẹ. Taidi kọdetọn nuwiwa zohunhunnọ pipli yẹwhehodọtọ ehelẹ tọn, bato-kuntọ susu lẹ, he mẹ anadenanutọ dopo, ponọgán tọji tọn dopo, po hihọ́-basinamẹtọ dai tọn de po tin te, ko kẹalọyi nugbo. Todin yé lọsu lẹ to alọgọ nado hẹn wẹndagbe Ahọluduta Jiwheyẹwhe tọn gbayipe lẹdo aihọn pé.—Matiu 24:14.

Dile e te do to adà devo aihọn lọ tọn lẹ mẹ, Kunnudetọ Jehovah tọn lẹ to Pays-Bas magbe nado yí adà yetọn basi to wẹndagbe madopodo lọ lilá mẹ hlan akọta, akọ̀, ogbè, po gbẹtọ lẹpo po.—Osọhia 14:6.