Jehovah Ma Na Dọngbàn gba
Jehovah Ma Na Dọngbàn gba
“Yin [numimọ lọ tlẹ dọngbàn], nọtepọn ẹn; na e ma na nọma wá wutu, e ma na gọ̀n gba.”—HABBAKUK 2:3.
1. Gbemima tẹwẹ ko yin didohia gbọn omẹ Jehovah tọn lẹ dali, podọ etẹwẹ ehe ko whàn yé nado wà?
“YẸN na nọte to hihọ́tẹn ṣie ji.” Enẹwẹ yin gbemima Habbakuk yẹwhegán Jiwheyẹwhe tọn tọn. (Habbakuk 2:1) Omẹ Jehovah tọn lẹ to owhe kanweko 20tọ́ ehe mẹ ko do gbemima enẹ dopolọ hia. Enẹwutu, yé ko yí zohunhun do yigbe na oylọ ehe heyin didọ jẹgbonu to plidopọ ayidego tọn de ji to septembre 1922 dọmọ: “Ehe wẹ azán azán lẹpo tọn. Doayi e go, Ahọlu lọ to gandu! Mìwlẹ wẹ lilatọ etọn lẹ. Enẹwutu mì lá, mì lá, mì lá Ahọlu lọ po ahọluduta etọn po.”
2. To whenuena yé yin hinhẹn gọ̀ do nuwiwa zohunhun tọn mẹ to Wẹkẹ-Whàn I godo, etẹwẹ Klistiani yiamisisadode lẹ sọgan lá?
2 To Wẹkẹ-Whàn I godo, Jehovah hẹn pipòtọ mẹyiamisisadode lẹ tọn gọ̀ do ninọmẹ nuwiwa zohunhun tọn de mẹ. Taidi Habbakuk, dopodopo yetọn sọgan lá to whenẹnu dọmọ: “[Yẹn na] ze dee do figángán lọ ji, bo na pọ́n gbonu nado mọ nuhe ewọ na dọ gbọn yẹn dali.” Hogbe Heblu tọn lẹ na “pọ́n gbonu” po “hihọ́” po yin dọvọdọ basina to dọdai susu lẹ mẹ.
“E Ma Na Gọ̀n Gba”
3. Naegbọn mí dona to alihọ́?
3 Dile Kunnudetọ Jehovah tọn lẹ to avase Jiwheyẹwhe tọn lá to egbehe, yé dona tin to aṣeji hugan gbede pọ́n nado setonuna hogbe tadona tọn dọdai daho Jesu tọn lẹ dọmọ: “Enẹwutu mì ni to alihọ́; na mì ma yọ́n whenuena owhénọ lọ na wá, eyin tenu wẹ, kavi to zánhomẹ, kavi koklolise, kavi to afọnnu, [dọ to] gigọ̀ ajiji e nikaa mọ mì to amlọndọ. Onú he yẹn dọ hlan mì, yẹn dọ hlan omẹ popo, Mì to alihọ́.” (Malku 13:35-37) Taidi Habbakuk, podọ to kọndopọmẹ hẹ hogbe Jesu tọn lẹ, mí dona to alihọ́!
4. Nawẹ ninọmẹ mítọn yin nudopolọ hẹ dehe yin Habbakuk tọn to nudi 628 J.W.M. gbọn?
4 Habbakuk sọgan ko dotana owe etọn kinkàn to nudi owhe 628 J.W.M., yèdọ whẹpo Babilọni tlẹ do lẹzun huhlọn aihọn tọn he to aṣẹpa. Na owhe susu lẹ whẹdida Jehovah tọn do Jelusalẹm atẹṣitọ ji ko yin lilá jẹgbonu. Ṣogan, nudepope matin he do whenue whẹdida enẹ na yin hinhẹnṣẹ hia gba. Mẹnu wẹ na ko yise dọ owhe 21 poun wẹ e pò podọ dọ Babilọni na yin whẹdida-hẹnṣẹtọ Jehovah tọn? Mọdopolọ to egbehe, mí ma yọ́n ‘azán po ganmẹ’ he ko yin dide na vivọnu titonu ehe tọn po gba, ṣigba Jesu ko na avase mí jẹnukọn dọmọ: “Mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja.”—Matiu 24:36, 44.
5. Etẹwẹ yin tulinamẹnu na taun tọn gando hogbe Jiwheyẹwhe tọn heyin kinkàndai to Habbakuk 2:2, 3 mẹ lẹ go?
5 Na whẹwhinwhẹ́n dagbe wutu, Jehovah na azọ́ndenamẹ mẹwhantọ ehe Habbakuk dọmọ: “Wlan numimọ lẹ, bosọ hẹn ẹn diun to tafo lẹ ji, na ewọ he hia [daga sọn e mẹ nido wàmọ po dẹ́didi po,” NW]. Na numimọ lọ gbẹsọ tin na ojlẹ dide lọ, podọ e to unklẹn hlan opodo lọ dali, bo ma na dolalo, yin etlẹ dọngbàn, [to nukundo e]; na e ma na nọma wá wutu, e ma na gọ̀n gba.” (Habbakuk 2:2, 3) To egbehe, kanyinylan po danuwiwa po to yinylan deji lẹdo aihọn pé, bo to didohia dọ mí tin to bẹbẹnu “azán daho bosọ dobu [Jehovah] tọn.” (Joẹli 2:31) Na nugbo tọn, tulinamẹnu taun wẹ hogbe mẹhẹndeji Jehovah lọsu titi tọn lẹ yin dọmọ: “E ma na gọ̀n gba”!
6. Nawẹ mí sọgan lùn azán whẹdida hinhẹnṣẹ tọn he ja lọ tọ́n gbọn?
6 To whelọnu lo, nawẹ mí sọgan lùn azán whẹdida hinhẹnṣẹ tọn he ja enẹ tọ́n gbọn? Jehovah gblọn gbọn vogbingbọn de didohia to dodonọ lẹ po mawadodonọ lẹ po ṣẹnṣẹn dali dọmọ: “Doayi e go, yè hẹn alindọn etọn zedaga, e matin titengbe to ewọ mẹ gba: ṣigba nugbonọ na nọgbẹ̀ to nugbowa etọn mẹ.” (Habbakuk 2:4) Togán po gbẹtọ goyitọ heyin nukunkẹnnọ lẹ po ko hẹn kandai whenuho egbezangbe tọn lẹ flu po ohùn homẹvọnọ livi susu lẹ tọn po, titengbe to wẹkẹ whàn awe lẹ mẹ podọ to hùnsọndai akọ̀ tọn lẹ mẹ. To vogbingbọn mẹ, devizọnwatọ yiamisisadode wanyina-jijọho tọ́ Jiwheyẹwhe tọn lẹ ko doakọnnanu to nugbonọ-yinyin mẹ. Yewlẹ wẹ yin “akọta dodonọ he to nugbo go pọ́n.” Akọta ehe, to pọmẹ hẹ gbẹdohẹmẹtọ etọn, heyin “lẹngbọ devo” lẹ, nọ hodo tudohomẹnamẹ lọ dọmọ: “Mì dotudo OKLUNỌ go kakadoi: na OKLUNỌ JEHOVAH mẹ wẹ [Osé, NW] madopodo te.”—Isaia 26:2-4; Johanu 10:16.
7. To kọndopọmẹ hẹ yizan Habbakuk 2:4 Paulu tọn, etẹwẹ mí dona wà?
7 To wekinkan hlan Klistiani Heblu tọn lẹ mẹ, apọsteli Paulu yihodọ sọn Habbakuk 2:4 mẹ to whenuena e to didọna omẹ Jehovah tọn lẹ dọmọ: “Na mì ma sọgan nọ ma tindo [akọndona, NW], dọ, ehe godo mìwlẹ wà ojlo Jiwheyẹwhe tọn vọ̀, mì nido mọ opagbe yí. Na ojlẹ vude dogọ, ewọ he ja na wá, e ma to na dẹn. Omẹ dodonọ [ṣie lẹ] na nọgbẹ̀ gbọn yise dali; ṣigba eyin mẹdepope joagọyigodo, ayiha ṣie ma na tindo homẹhun do e go gba.” (Heblu lẹ 10:36-38) E mayin ojlẹ lọ die nado dekànpo kavi nado yin wiwle gbọn yanwle agbasanu bibẹpli tọn, aliho gbẹdudu-zẹjlẹgo aihọn Satani tọn dali gba. Etẹwẹ mí dona to wiwà kaka “ojlẹ vude dogọ” lọ na juwayi? Taidi Paulu, mí mẹhe yin akọta wiwe Jehovah tọn lẹ dona ‘whlẹndo nuhe tin to nukọn lẹ, bo to whinwhlẹndo hlan yanwle’ ogbẹ̀ madopodo tọn kọ̀n. (Filippinu lẹ 3:13, 14) Podọ taidi Jesu, mí dona ‘to akọndonanu na ayajẹ he yè ze do nukọn mítọn wutu.’—Heblu lẹ 12:2.
8. Mẹnu wẹ yin ‘dawe’ Habbakuk 2:5 mẹ tọn lọ, podọ naegbọn ewọ ma na tindo kọdetọn dagbe depope?
8 To vogbingbọn mẹ na devizọnwatọ Jehovah tọn lẹ, Habbakuk 2:5 basi zẹẹmẹ ‘dawe glegbenu de’ tọn he gboawupo nado jẹ yanwle etọn kọ̀n, dile etlẹ yindọ ewọ “hẹn ojlo etọn klo di [ṣeol]” do sọ. Mẹnu wẹ dawe ehe lọ yin he “ma sọgan yin pekọnọ”? Na yinyin adọ̀nọ taidi Babilọni ojlẹ Habbakuk mẹ tọn, ‘dawe’ adà susunọ ehe, he bẹ huhlọn tonudidọ tọn lẹ—vlavo Fasciste, Nazi, Communiste, kavi etlẹ yin dehe ylọ ede dọ démocratique lọsu hẹn—nọ fùnawhàn lẹ nado sọgan hẹn aigba etọn lẹ gblodeji. E sọ hẹn Ṣeol gọ́ ga, yèdọ yọdo, po alindọn homẹvọnọ lẹ tọn po. Ṣigba ‘dawe’ gigẹdẹ adà susunọ heyin aihọn Satani tọn ehe, heyin dududeji gbọn nujọnu-yinyin edetiti tọn dali lọ, gboawupo to tintẹnpọn nado ‘bẹ akọta lẹpo pli bosọ bẹ gbẹtọ lẹpo pli dopọ do ede dè’ mẹ. Jehovah Jiwheyẹwhe kẹdẹ wẹ sọgan kọ̀n gbẹtọvi lẹpo dopọ, podọ e na basi wadotana ehe tọn gbọn Ahọluduta Mẹssia tọn gblamẹ.—Matiu 6:9, 10.
Tintan to Dindọ̀n Atọ́n Ayidego Tọn lẹ Mẹ
9, 10. (a) Etẹwẹ Jehovah zindonukọn nado lá gbọn Habbakuk gblamẹ? (b) Gando alè mawadodo tọn go, etẹwẹ yin ninọmẹ lọ to egbehe?
9 Gbọn yẹwhegán etọn Habbakuk gblamẹ, Jehovah zindonukọn nado lá dindọ̀n debọdo-dego atọ́n lẹ, yèdọ whẹdida lẹ he dona yin hinhẹnṣẹ to awuwiwlena aigba lọ nado yin ninọ e mẹ gbọn sinsẹ̀n-basitọ nugbonọ Jiwheyẹwhe tọn lẹ dali. Ahunjijlọnọ mọnkọtọn lẹ ‘ze ogbè daga to oló de’ he Jehovah zedonukọnnamẹ mẹ. Mí hia to Habbakuk 2:6 mẹ dọmọ: “Dindọ̀n hlan ewọ he hẹn enẹ he mayin etọn sudeji! Dẹnsọ na? Podọ he yí [ahọ́] lẹ do doagbanna ede!”
10 Tofi nùzindonuji lọ yin do alè mawadodo tọn ji. To aihọn he lẹdo mí pé mẹ, adọkunnọ lẹ to adọkunnọ yin deji, podọ wamọnọ lẹ to ohẹnjẹ klókló. Amasin adínọ-jọ́watọ lẹ po mẹhodutọ lẹ po to adọkun daho lẹ bẹpli, to whenuena huvẹ to gbẹtọ paa susu lẹ hù. Madoẹnẹ sọha mẹhe tin to aihọn mẹ lẹ tọn nọ nọgbẹ̀ to ohẹ́n klókló mẹ. Ninọmẹ gbẹninọ tọn lẹ blawu to otò susu mẹ. Mẹhe nọ jlo vẹkuvẹku dọ dodowiwa ni tin to aigba ji lẹ nọ dawhá dọmọ: “Dẹnsọ na” na ylanwiwa ehelẹ ko to susudeji! Ṣogan, opodo ko sẹpọ! Na nugbo tọn, numimọ lọ “ma na gọ̀n gba.”
11. Etẹwẹ Habbakuk dọ gando ohùn gbẹtọ tọn sinsọndai go, podọ naegbọn mí sọgan dọ dọ hùnhọ́dudu daho tin to aigba ji to egbehe?
11 Yẹwhegán lọ dọ na mẹylankan lọ dọmọ: “Na hiẹ ko gble akọta susu wutu, pipòtọ gbẹtọ lẹ tọn na sọ gble we; na ohùn gbẹtọ lẹ tọn tọn wutu, podọ na [danuwiwa, NW] yè wà hlan aigba lọ, hlan todaho lọ podọ hlan yé he nọ nọ̀ e mẹ lẹpo.” (Habbakuk 2:8) Hùnhọ́dudu nankọtọn die mí nọ mọ to aigba lọ ji to egbehe! Jesu dọ họnwun dọmọ: “Mẹhe ze ohi lẹpo wẹ na dọ̀n po ohi po.” (Matiu 26:52) Etomọṣo, to owhe kanweko 20tọ́ ehe kẹdẹ mẹ, akọta po pipli hẹnnu hùnhọ́dutọ tọn lẹ po ko yin azọngbannọ na gbẹtọ he hugan livi donu kanweko lẹ hùhù. Dindọ̀n hlan mẹhe to mahẹ tindo to hùnsọndai ehelẹ mẹ lẹ!
Dindọ̀n Awetọ
12. Etẹwẹ yin dindọ̀n awetọ heyin kinkàndai gbọn Habbakuk dali, podọ nawẹ mí sọgan yin nujikudonọ do dọ adọkun mawadodo tọn lẹ na yin ovọ́?
12 Dindọ̀n awetọ, heyin kinkàndai to Habbakuk 2:9-11 mẹ, jẹ “ewọ he tindo alè ylanylan de na owhé etọn [ji], na ewọ nido ze adọ́ etọn do fiyiaga ji, dọ ewọ nido yin whinwhlẹn sọn alọ oylan tọn mẹ!” Alè mawadodo tọn na yin ovọ́, dile psalm-kàntọ lọ hẹn họnwun do dọmọ: “A hanu whenuena mẹde wàdọkun blo, whenuena gigo owhé etọn gbè tọn to susudeji; na whenuena e kú, e ma nude na bẹ́ yì: gigo etọn ma na jẹte hodo e.” (Psalm 49:16, 17) To whelọnu lo, nuhe jẹ na ayidego de wẹ ayinamẹ nuyọnẹn Paulu tọn dọmọ: “Naṣẹ mẹhe yin adọkunnọ to aihọn he mẹ lẹ, dọ yé yigo blo, dọ yé sọ dotudo adọkun he ma nọte go blo, adavo do Jiwheyẹwhe ogbẹ̀nọ go, mẹhe na onú popo mí susugege nado dugbẹ yetọn.”—1 Timoti 6:17.
13. Naegbọn mí dona to avase Jiwheyẹwhe tọn lá zọnmii?
13 Lehe e yin nujọnu do sọ dọ owẹ̀n whẹdida Jiwheyẹwhe tọn lẹ ni yin lilá jẹgbonu to egbehe! To whenuena Falesi lẹ jẹagọdo agundaho lẹ na yiylọ Jesu dọ “Ahọlu he ja to oyín [Jehovah, NW] tọn mẹ,” e dọmọ: “Yẹn dọ na mì, dọ, Eyin ehelẹ na nabọẹ, zannu lẹ na dawhá jẹgbonu.” (Luku 19:38, 40) Mọdopolọ, eyin omẹ Jiwheyẹwhe tọn lẹ gboawupo to egbehe nado hùngona ylanwiwa he tin to aihọn ehe mẹ lẹ, ‘zannu na dawhá sọn adó lọ mẹ.’ (Habbakuk 2:11) Enẹwutu mì gbọ mí ni to nukọnzindo po adọgbigbo po nado to avase Jiwheyẹwhe tọn lá!
Dindọ̀n Atọ̀ntọ po Whẹho Hùnhọ́dudu Tọn Po
14. Hùnhọ́dudu tẹwẹ sinsẹ̀n aihọn tọn lẹ ko yin azọngbannọ na?
14 Dindọ̀n atọ̀ntọ heyin lilá gbọn Habbakuk dali sọ vọ́ hodọ do whẹho hùnhọ́dudu tọn ji. Habbakuk 2:12 dọmọ: “Dindọ̀n hlan ewọ he yí ohùn do dó atọ̀họ̀ de, bosọ hẹn todaho de lodo gbọn [mawadodo] dali!” To titonu ehe mẹ, mawadodo po hùnsọndai po nọ saba zọnpọ hẹ yedelẹ. E yin ayidego dọ, sinsẹ̀n aihọn tọn lẹ ko yin azọngbannọ na hùnsọndai he ylan hugan to whenuho mẹ lẹ. Mí na donù Awhàn sinsẹ̀n tọn lẹ go poun, ehe ze mẹhe ylọ yede dọ Klistiani lẹ nado sọta Malenu lẹ; Dodinnanu Okà tọn Katoliki tọn to Espagne po Amérique Latine po; Awhàn Owhe Gbàn Europe tọn to Plọtẹstant lẹ po Katoliki lẹ po ṣẹnṣẹn; podọ dehe ylan hugan to popolẹpo yetọn mẹ, yèdọ wẹkẹ whàn awe owhe kanweko mítọn tọn lẹ, he awe lẹ bẹjẹeji to agblò Mẹylọhodotọklisti tọn mẹ.
15. (a) To godonọnamẹ po gbekọndopọ ṣọṣi tọn po glọ, etẹwẹ akọta lẹ to wiwà zọnmii? (b) Be Plidopọ Akọta lẹ tọn sọgan hẹnalọdotena awhàngbaja biblá na aihọn ehe wẹ ya?
15 Dopo to adà he ylan hugan to wẹkẹ-whàn awetọ mẹ wẹ Nuvasudo Pligidi Nazi tọn, ehe gbidi ogbẹ̀ Juvi livi susu lẹ po homẹvọnọ devo lẹ tọn po to Europe. To agọe din janwẹ gandudu Katoliki Lomu tọn to France yigbe dọ e gboawupo nado jẹagọdo dido fọtọ́n donu kanweko homẹvọnọ lẹ tọn hlan osla okú Nazi tọn lẹ mẹ. Etomọṣo, akọta lẹ to nukọnzindo to awuwiwle mẹ nado sọ̀n ohùn dai, po godonọnamẹ kavi gbeyiyi ṣọṣi tọn po. To hodidọ gando Ṣọṣi Orthodoxe Russie tọn go mẹ, linlinwe Time tọn (vọkan akọjọpli tọn de) dọ to agọe dọmọ: “Ṣọṣi heyin hinhẹngọwa ogbẹ̀ lọ lọsu to nuyiwadomẹji sinsinyẹn de tindo do lẹdo he yè ma ko lẹnnupọndeji pọ́n gbede ji: yèdọ tito awhànfunfun Russie tọn. . . . Didona agahun-awhàn tọn lẹ po osla awhànfuntọ lẹ tọn po ko dibla lẹzun nuyiwa aṣa tọn. To novembre, to Opá Yẹwhenọ lẹ tọn he tin to Danilovsky to Moscou mẹ, yèdọ aisintẹn Tọgbo Russie-nu lẹ tọn, ṣọṣi lọ tlẹ yì jẹ obá kinklan awhànfunnu sẹdotẹn Russie tọn do wiwe mẹ.” Be Plidopọ Akọta lẹ tọn sọgan doalọtena gbaja-vivọ-blána aihọn ehe po awhànfunnu ylankan aovi tọn lẹ po ya? Paali! Sọgbe hẹ linlinwe The Guardian Londres, Angleterre tọn, mẹde he mọ Nunina Jijọho Nobel tọn yí de dọmọ: “Nuhe to ayimajai hẹnwa na nugbo tọn wẹ yindọ hagbẹ nukundeji atọ́n Pipli Hihọ́-Basinamẹtọ Plidopọ Akọta lẹ tọn tọn wẹ yin awhànfunnu-sàtọ nukundeji atọ́n aihọn tọn lẹ.”
16. Etẹwẹ Jehovah na wà na akọta awhàndàdaitọ lẹ?
16 Be Jehovah na hẹn whẹdida ṣẹ̀ do akọta awhàndàdaitọ lẹ ji ya? Habbakuk 2:13 dọmọ: “Doayi e go, be e ma tin sọn [Jehovah] awhànpa lẹ tọn dè dọ gbẹtọ lẹ ni jẹtukla na miyọ́n, podọ gbẹtọ lẹ ni hẹn agbọ́pé yede na ylanwa?” “[Jehovah] awhànpa lẹ tọn”! Mọwẹ, Jehovah tindo awhànpa olọn mẹ angẹli lẹ tọn, he e na yizan to gbẹtọ po akọta he yiwanna awhàn lẹ po hinhẹn jẹvọ́ mẹ!
17. Obá tẹ mẹ wẹ nuyọnẹn Jehovah tọn na ṣinyọ́n aigba lọ ji jẹ to whenuena whẹdida etọn ko yin hinhẹnṣẹ do pipli akọta danuwatọ lẹ tọn ji godo?
17 Etẹwẹ na bọdo whẹdida hinhẹnṣẹ Jehovah tọn do pipli akọta danuwatọ enẹlẹ ji go? Habbakuk 2:14 wleawuna gblọndo lọ dọmọ: “Na yè na yí oyọnẹn gigo OKLUNỌ tọn tọn do gọ́ aigba lọ, dile osin lẹ ṣinyọ́n ohù do.” Nukundido jiawu nankọ die! To Amagẹdọni, nupojipetọ-yinyin Jehovah tọn na yin whẹsuna kakadoi. (Osọhia 16:16) E na jide mí dọ emi na ‘pagigona otẹn afọ emitọn tọn,’ yèdọ aigba ehe he ji míwlẹ to gbẹnọ te. (Isaia 60:13) Gbẹtọvi lẹpo na yin pinplọn to aliho Jiwheyẹwhe tọn na gbẹninọ mẹ, na oyọnẹn lẹndai gigonọ Jehovah tọn lẹ na ṣinyọ́n aigba ji kẹdẹdile osin ṣinyọ́n ohù ji do.
Dindọ̀n Ẹnẹtọ po Atọ́ntọ Po
18. Etẹwẹ dindọ̀n ẹnẹtọ heyin lilá gbọn Habbakuk gblamẹ yin, podọ nawẹ e nọ yin didohia to ninọmẹ walọyizan aihọn lọ tọn mẹ to egbehe gbọn?
18 Dindọ̀n ẹnẹtọ yin zẹẹmẹ basina to Habbakuk 2:15 mẹ to hogbe ehelẹ mẹ dọmọ: “Dindọ̀n hlan ewọ he na núnùnù kọmẹnu etọn, he kọ̀n homẹwlu towe jẹ enẹ ji, bosọ hẹn ewọ nùmú ga, na hiẹ nido pọ́n omẹ́ yetọn!” Ehe do ninọmẹ wazẹjlẹgo, tasinsinyẹn aihọn egbezangbe tọn hia. Fẹnnuwiwa etọn, he tlẹ nọ yin godonọna gbọn pipli sinsẹ̀nnọ gbeyina onú popo tọ́ lẹ dali, ko yido jẹ obá he ylan hugan lẹ mẹ. Azọ̀nylankan lẹ, taidi SIDA po azọ̀n he gando zanhẹmẹ go devo lẹ po, to gbigbayipe po awuyiya po lẹdo aihọn pe. Kakati nado do “gigo OKLUNỌ tọn” hia, whẹndo ṣejannabinọ egbezangbe tọn to titlọ biọ gbigblezọn mẹ yinukọn dogọ podọ hlan whẹdida hinhẹnṣẹ Jiwheyẹwhe tọn kọ̀n. Na yinyin ‘pekọnọ po winyan po kakati ni yin po gigo po,’ aihọn sẹ́nhẹngbatọ ehe na nù sọn ogo homẹgble Jehovah tọn mẹ to madẹnmẹ, ehe nọtena ojlo etọn dohlan ẹn. ‘Winyan na tin to gigo etọn ji.’—Habbakuk 2:16.
19. Etẹ go wẹ afọdindlẹnna dindọ̀n atọ́ntọ heyin lilá gbọn Habbakuk dali gando, podọ naegbọn hogbe mọnkọtọn lẹ tindo zẹẹmẹ to aihọn egbehe tọn mẹ?
19 Afọdindlẹnna dindọ̀n atọ́ntọ na avase sinsinyẹn sọta sinsẹ̀n-bibasi hlan boṣiọ pipà lẹ. Jehovah hẹn yẹwhegán lọ nado lá hogbe huhlọnnọ ehelẹ dọmọ: “Dindọ̀n hlan ewọ he dọ hlan atin lọ dọ, Fọ́n; hlan zannu unbọpẹn lọ, dọ, Tite! Be ehe na plọnmẹ wẹ? Doayi e go, yè yí sika po fataka po do bú i, podọ gbọfufu de matin to gblagbla etọn mẹ finẹ lala.” (Habbakuk 2:19) Kakajẹ egbehe, Mẹylọhodotọklisti po hùnsẹ̀ntọ lẹ po nọ litai na satin, Malia Wiwe, boṣiọ lẹ, gọna ojlẹmọ gbẹtọ po kanlin tọn devo lẹ po. Depope to ehelẹ mẹ ma sọgan fọ́n tite nado whlẹn sinsẹ̀n-basitọ yetọn lẹ to whenuena Jehovah wá nado hẹn whẹdida ṣẹ̀ gba. Aṣọdonu sika po fataka tọn po yetọn lẹ kupẹ́ taidi nukúkú he ma tindo zẹẹmẹ depope yijlẹdo kiklo-yinyin Jiwheyẹwhe madopodo lọ tọn go, yèdọ Jehovah, po gigo nudida gbẹ̀te etọn lẹ tọn po. Na míwlẹ ni to oyín matin awetọ etọn pà kakadoi!
20. To tito tẹmpli tọn tẹ mẹ wẹ míwlẹ tindo lẹblanulọkẹyi nado to sinsẹ̀nzọnwa te po ayajẹ po?
20 Mọwẹ, Jiwheyẹwhe mítọn, yèdọ Jehovah, jẹ na pipà lẹpo. Po numọtolanmẹ gbégbò sisosiso hlan ẹn tọn po, mì gbọ na mí ni setonuna avase sinsinyẹn enẹ sọta boṣiọ sinsẹ̀n. Ṣigba dotoai! Jehovah gbẹsọ to hodọ dọmọ: “OKLUNỌ tin to tẹmpli wiwe etọn mẹ: yin abọẹnọ to nukọn etọn, mì aigba lẹpo.” (Habbakuk 2:20) Matin ayihaawe yẹwhegán lọ tindo tẹmpli Jelusalẹm tọn to ayiha mẹ. Etomọṣo, míwlẹ tindo lẹblanulọkẹyi lọ to egbehe nado basi sinsẹ̀n to tito tẹmpli gbigbọmẹ tọn, he yiaga hugan de mẹ, to fie Oklunọ mítọn Jesu Klisti yin zize do ofin ji taidi Yẹwhenọ Daho te. Tofi, to akanmaho aigba ji tẹmpli enẹ tọn mẹ, mí nọ pli, wadevizọn, bo nọ hodẹ̀, yèdọ nọ na Jehovah gbégbigbò he oyín gigonọ etọn jẹ na. Podọ ayajẹ nankọtọn die mí tindo to sinsẹ̀n-bibasi ahundopo tọn nina hlan Otọ́ owanyinọ olọn mẹ tọn mítọn mẹ!
Be Hiẹ Flin Ya?
• Nawẹ hiẹ nọ pọ́n hogbe Jehovah tọn lẹ dọmọ: “E ma na gọ̀n gba” hlan gbọn?
• Etẹwẹ yin zẹẹmẹ egbezangbe tọn na dindọ̀n heyin lilá gbọn Habbakuk gblamẹ lẹ?
• Naegbọn mí dona to avase Jehovah tọn lá zọnmii?
• Akanmaho tẹmpli tẹ tọn mẹ wẹ mí tindo lẹblanulọkẹyi nado to sinsẹ̀nzọnwa te?
[Kanbiọ Oplọn Tọn Lẹ]
[Yẹdide to weda 15]
Taidi Habbakuk, devizọnwatọ egbezangbe tọn Jiwheyẹwhe tọn lẹ yọnẹn dọ Jehovah ma na dọngbàn gba
[Yẹdide to weda 16]
Fọto Awhànpa États-Unis tọn
[Yẹdide to weda 18]
Be hiẹ yọ́n pinpẹn lẹblanulọkẹyi sinsẹ̀n-bibasi hlan Jehovah to akanmaho tẹmpli gbigbọmẹ tọn etọn mẹ tọn ya?