Agbasa Pẹvi lẹ, Ahun Daho Lẹ

ETẸWẸ e na taidi nado dọho na jonọ lẹ gando Ahọluduta Jiwheyẹwhe tọn go eyin tedidi towe yin mẹtlu 0,8 poun? Laura sọgan dọna we. To owhe 33-mẹvi mẹ, enẹ wẹ yin tedidi etọn, yèdọ mẹtlu 0,8 poun. Ewọ po nọviyọnnu etọn, María po, heyin owhe 24-mẹvi bosọ dite na mẹtlu 0,9, nọ nọ̀ Quito, to Équateur. Mì gbọ yé ni basi zẹẹmẹ aliglọnnamẹnu he yé nọ pannukọn to lizọnyizọn Klistiani tọn mẹ lẹ tọn.

“Nado jẹ aigba-denamẹ yẹwhehodidọ tọn mítọn po opli Klistiani tọn lẹ po ji, mí nọ zinzọnlin na nudi kilomẹtlu daa nado dó ahi-hún de. Sọn fie e nọ dè mí dote do, mí nọ zinzọnlin na kilomẹtlu daa devo nado mọ ahi-hún awetọ. E blawu dọ, avún hunylantọ atọ́n wẹ tin to aliho ehe ji. Avún lẹ nọ dobuna mí taun na yé nọ sọawuhia taidi osọ́ daho lẹ nkọtọn. Nado yàn yé eyin e lẹzun dandan, mí nọ hẹn opò de, ehe mí nọ ze whlá do fide whẹpo do biọ ahi-hún lọ mẹ na mí nido sọgan mọ yé zan to kọlilẹ whenu.

“Nado biọ ahi-hún lọ mẹ nọ yin nuhahun daho de na mí to p̣aa mẹ. Mí nọ hẹ́ ogbó heyin bibẹpli do ohún-glintẹn lọ ji nado sọgan biọ ohún lọ mẹ po awubibọ po. Hunkuntọ delẹ nọ glinhún sẹpọ ogbó lọ, ṣigba devo lẹ ma nọ wàmọ gba. To whẹho enẹ mẹ, mẹhe dite to mí mẹ lọ nọ gọalọna mẹhe whègli lọ nado biọ e mẹ. nado biọ ahi-hún awetọ mẹ nọ biọ dọ mí ni dasá alihogbó he ján taun de—yèdọ vivẹnudido titengbe de po afọ gli mítọn lẹ po. Na kúnwhiwhè mítọn wutu, apò owe tọn he pẹnzin de nọ ze avùnnukundiọsọmẹ dogọ lẹ donukọnnamẹ. Nado sọgan hẹn apò lọ fua, mí nọ yí Biblu pẹvi zan bosọ nọ dè sọha owe he mí nọ hẹn lẹ tọn pò ga.

“Sọn ovuwhenu gbọ́n, mí omẹ awe lẹ ko yin mẹhe nọ kuwinyan taun. Kọmẹnu mítọn lẹ yọnẹn dọ hodidọ hẹ jonọ lẹ ko nọ saba yin nuyiwa winyankuku tọn de na mí. Enẹwutu yé nọ yin pipaṣa bosọ nọ yin nuyiwadeji nado mọ bọ mí to ohọ̀n yetọn lẹ húhú, podọ yé nọ saba dotoaina mí. Ṣigba to fie mí mayin yinyọnẹn te sọmọ lẹ, gbẹtọ lẹ nọ saba mọ poun dọ mí yin gbẹtọ he whèkún poun; enẹwutu, yé ma nọ saba na mí ayidonugo nujọnu tọn he owẹ̀n mítọn jẹna lọ gba. Etomọṣo, na yinyọnẹn dọ Jehovah yiwanna mí nọ na mí adọgbigbo nado to nukọnzindo to azọ́n wẹndagbe-jijlá tọn mẹ. Ayihamẹlinlẹnpọn do Howhinwhẹn lẹ 3:5, 6 ji sọ nọ na tugbigbo mí ga.”

Dile Laura po María po dohia do, linsinsinyẹn mahopọnna aliglọnnamẹnu agbasalan mẹ tọn lẹ sọgan pagigona Jiwheyẹwhe. Apọsteli Paulu hodẹ̀ dọ “owùn . . . to agbasalan mẹ” etọn, vlavo awufiẹsa agbasalan mẹ tọn, ni yin didesẹ sọn ewọ dè. Ṣigba Jiwheyẹwhe dọna ẹn dọmọ: “Ojọmiọn ṣie ko pé we, na madogán mẹ wẹ yè hẹn huhlọn ṣie sọgbe te.” Mọwẹ madogán agbasalan tọn de ma dona yin didesẹ na mí na dandan tọn na mí nido penugo nado sẹ̀n Jiwheyẹwhe gba. Ginganjẹ Jiwheyẹwhe  go mlẹnmlẹn sọgan gọalọna mí nado basi yizan dagbe hugan ninọmẹ mítọn lẹ tọn. Na Paulu pọ́n “owùn . . . to agbasalan mẹ” etọn hlan to aliho ehe mẹ wutu, ewọ sọgan dọmọ: “Na whenuena yẹn yin madogánnọ, whenẹnu wẹ yẹn yin huhlọnnọ.” (2 Kọlintinu lẹ 12:7, 9, 10) To owhe delẹ godo Paulu wlan dọmọ: “Yẹn sọgan wà onú popo gbọn Klisti he to huhlọnna mi mẹ.”—Filippinu lẹ 4:14.

To ojlẹ egbezangbe tọn lẹ mẹ, Jiwheyẹwhe to azọ́n huhlọnnọ de wadotana gbọn sunnu, yọnnu, po ovi he ko klán yedelẹ dovo hlan ẹn to gigọ́mẹ lẹ po gblamẹ. Delẹ to yé mẹ yin mẹhe tindo oblọ agbasa tọn lẹ to aliho delẹ mẹ. Dile etlẹ yindọ yemẹpo wẹ tindo todido na azọ̀nhẹngbọ sọn olọn mẹ wá to Ahọluduta Jiwheyẹwhe tọn glọ, yé ma nọte kakajẹ whenuena Jiwheyẹwhe na de nuhahun yetọn lẹ sẹ whẹpo yé ni jẹ tintẹnpọn nado wà nude to sinsẹ̀nzọn etọn mẹ ji gba.

Be hiẹ to yaji sọn madogán agbasalan mẹ tọn delẹ si wẹ ya? Gboadọ! Gbọn yise towe gblamẹ hiẹ sọgan tin to mẹhe taidi Paulu, Laura, po María po lẹ mẹ. E sọgan yin didọ gando yewlẹ go, dile e yin do to whẹho sunnu po yọnnu po yisenọ ojlẹ hohowhenu tọn lẹ po tọn mẹ do dọmọ: “To madogán mẹ yè hẹn yé zun huhlọnnọ.”—Heblu lẹ 11:23.

[Yẹdide lẹ to weda 8]

María

Laura

[Yẹdide to weda 9]

María to alọgọna Laura nado biọ ahi-hún lọ mẹ

[Yẹdide lẹ to weda 9]

“Avún lẹ nọ dobuna mí taun na yé nọ sọawuhia taidi osọ́ daho lẹ nkọtọn”

Odò: Laura po María po gọna mẹhe plọn Biblu hẹ yé lẹ