“Ayiha Klisti Tọn” Yinyọnẹn
“Ayiha Klisti Tọn” Yinyọnẹn
“Mẹnu wẹ yọ́n ayiha [Jehovah, NW] tọn, bọ e na do nọ plọn ẹn? Ṣigba míwlẹ tindo ayiha Klisti tọn.”—1 KỌLINTINU LẸ 2:16.
1, 2. To Ohó etọn mẹ, Jehovah mọ dọ e sọgbe nado do etẹ hia gando Jesu go?
ETẸWẸ Jesu taidi? Sinmẹ tẹwẹ odà etọn? agbasa etọn? nukun etọn lẹ tindo? Nawẹ e dite sọ? Nawẹ e pẹnzin sọ? To owhe kanweko susu lẹ gblamẹ, aliho he mẹ yẹdenanutọ lẹ nọ do Jesu hia te lẹ gbọnvo bosọ zẹ̀pá. Mẹdelẹ ko basi dohia etọn taidi huhlọnnọ po zohunhunnọ po, to whenuena mẹdevo lẹ ko do e hia taidi madogánnọ bosọ gblekàn.
2 Ṣigba, Biblu ma zinnudo awusọhia Jesu tọn ji gba. Kakatimọ, Jehovah mọ dọ e sọgbe nado de nude heyin nujọnu taun hia: yèdọ gbẹtọ wunmẹ he Jesu yin. E ma yin dọ kandai Wẹndagbe tọn lẹ na linlin nuhe Jesu dọ bosọ wà lẹ tọn kẹdẹ wẹ gba ṣigba sọ de numọtolanmẹ sisosiso po aliho nulinlẹnpọn tọn po he tin to godona ohó etọn lẹ po nuyiwa etọn lẹ po hia. Kandai gbọdo ẹnẹ ehelẹ gọalọna mí nado mọnukunnujẹ nuhe apọsteli Paulu to alọdlẹndo taidi “ayiha Klisti tọn” mẹ. (1 Kọlintinu lẹ 2:16) Onú titengbe wẹ e yin dọ mí ni jẹakọ hẹ linlẹn, numọtolanmẹ, po gbẹtọ-yinyin Jesu tọn lẹ po. Etẹwutu? E whè gbau na whẹwhinwhẹ́n awe wutu.
3. Nukunnumọjẹnumẹ tẹwẹ akọjijẹhẹ ayiha Klisti tọn mítọn sọgan na mí?
3 Tintan, ayiha Klisti tọn nọ hẹn mí nado mọnukunnujẹ ayiha Jehovah Jiwheyẹwhe tọn mẹ. Jesu jẹakọ hẹ Otọ́ etọn pẹkipẹki sọmọ bọ e sọgan dọmọ: “Mẹde ma sọ yọ́n mẹhe Ovi yin, adavo Otọ́; podọ mẹhe Otọ́ yin, adavo Ovi, podọ mẹhe jlo e, e yí i hia hlan.” (Luku 10:22) E taidi dọ Jesu to didọ dọ, ‘Eyin hiẹ jlo nado yọ́n nuhe Jehovah taidi, ani pọ́n emi’ nkọtọn. (Johanu 14:9) Gbọnmọ dali, to whenuena mí plọn nuhe Wẹndagbe lẹ dehia gando aliho he mẹ Jesu nọ lẹnnupọn bosọ nọ tindo numọtolanmẹ do go, to alọ devo mẹ, mí to pinplọn lehe Jehovah nọ lẹnnupọn bosọ nọ tindo numọtolanmẹ do. Oyọnẹn mọnkọtọn nọ gọalọna mí nado dọnsẹpọ Jiwheyẹwhe mítọn pẹkipẹki.—Jakobu 4:8.
4. Eyin mí na yinuwa taidi Klisti nugbonugbo, etẹwẹ mí dona plọn jẹnukọn, podọ etẹwutu?
4 Awetọ, ayiha Klisti tọn yinyọnẹn mítọn nọ gọalọna mí nado “nọ gbọn afọ etọn ji.” (1 Pita) Jesu hihodo ma yin whẹho vivọ́ hogbe etọn lẹ dọ po nuyiwa etọn lẹ hihodo po tọn de poun gba. To whenuena e yindọ hodidọ po nuyiwa lẹ po nọ yin nuyiwadeji gbọn linlẹn po numọtolanmẹ lẹ po dali. Klisti hihodo nọ biọ dọ mí ni wleawuna “walọ apọ̀nmẹ tọn, NW” dopolọ he e tindo. (Filippinu lẹ 2:5) To hogbe devo lẹ mẹ, eyin mí jlo nado yinuwa taidi Klisti nugbonugbo, jẹnukọn whẹ́ mí dona plọn nado lẹnnupọn bosọ tindo numọtolanmẹ taidi ewọ, enẹ wẹ yin, jẹ obá godo tọn nugopipe mítọn tọn mẹ taidi gbẹtọvi mapenọ lẹ. To whelọnu lo, mì gbọ mí ni mọnukunnujẹ ayiha Klisti tọn mẹ po alọgọ Wẹndagbe kàntọ lẹ tọn po. Tintan mí na dọhodo whẹho lẹ ji he nọ yinuwado aliho he mẹ Jesu nọ lẹnnupọn bosọ nọ tindo numọtolanmẹ te ji.
Tintan Jẹnukọnna Gbẹtọ-Yinyin Etọn
5, 6. (a) Gbẹdido mítọn lẹ sọgan tindo nuyiwadomẹji tẹ do mí ji? (b) Gbẹdido tẹwẹ Visunnu plọnji Jiwheyẹwhe tọn tindo to olọn lẹ mẹ whẹpo do wá aigba ji, podọ nuyiwadomẹji tẹwẹ ehe tindo do e ji?
5 Mẹhe mí nọ dogbẹ́ hẹ pẹkipẹki lẹ sọgan tindo nuyiwadomẹji de do mí ji, nọ yinuwado nulẹnpọn lẹ, numọtolanmẹ lẹ, po walọyizan mítọn lẹ po ji to aliho dagbe kavi ylankan mẹ. a (Howhinwhẹn lẹ 13:20) Gbadopọnna gbẹdido he Jesu tindo to olọn lẹ mẹ whẹpo do wá aigba ji. Wẹndagbe Johanu tọn dọ̀n ayidonugo wá tintin jẹnukọnna gbẹtọ-yinyin Jesu tọn ji taidi “Ohó lọ,” kavi Hoyidọtọ, Jiwheyẹwhe tọn. Johanu dọmọ: “To whẹwhẹwhenu wẹ Ohó lọ ko tin, Ohó lọ ko tin po Jiwheyẹwhe po, [Ohó lọ yin yẹwhe de, NW]. Ewọ lọ wẹ ko tin to whẹwhẹwhenu po Jiwheyẹwhe po.” (Johanu 1:1, 2) To whenuena e yindọ Jehovah ma tindo bẹjẹeji, tintin Ohó lọ tọn hẹ Jiwheyẹwhe sọn “whẹwhẹwhenu” dona dlẹnalọdo bẹjẹeji azọ́n nudida Jiwheyẹwhe tọn lẹ. (Psalm 90:2) Jesu wẹ “plọnji to yé he yè dá lẹpo mẹ.” Enẹwutu, ewọ ko tin whẹpo nudida gbigbọnọ devo lẹ po wẹkẹ yinukundomọ lọ po do yin didá.—Kọlọsinu lẹ 1:15; Osọhia 3:14.
6 Sọgbe hẹ sọha-yí-nanu lẹnunnuyọnẹn tọn delẹ, wẹkẹ yinukundomọ lọ ko tin e whè gbau na owhe liva 12. Eyin sọha-yí-nanu enẹlẹ to aliho de mẹ yin nugbo, be Visunnu plọnji Jiwheyẹwhe tọn duvivi gbẹdohẹmẹ tọn hẹ Otọ́ etọn na owhe madosọha lẹ whẹpo Adam wá yin didá. (Yijlẹdo Mika 5:2 go) Numọtolanmẹ po kanṣiṣa pẹkipẹki de po gbọnmọ dali wleawu to yé omẹ awe lẹ ṣẹnṣẹn. Dile nuyọnẹn yin alọdlẹndo taidi gbẹtọ, Visunnu plọnji ehe to tintin jẹnukọnna gbẹtọ-yinyin etọn mẹ yin tenọna taidi mẹhe to didọmọ: “Yẹn sọ yin homẹhun [Jehovah tọn] egbesọegbesọ, yẹn to ayajẹ whepoponu to nukọn etọn.” (Howhinwhẹn lẹ 8:30) Na jide tọn owhe madosọha lẹ yiyizan to gbẹdido pẹkipẹki mẹ hẹ Asisa owanyi tọn tindo nuyiwadomẹji sinsinyẹn de do Visunnu Jiwheyẹwhe tọn ji! (1 Johanu 4:8) Visunnu ehe wá yọ́n bosọ do linlẹn, numọtolanmẹ, po aliho Otọ́ etọn tọn lẹ po hia dile mẹdevo depope ma sọgan do.—Matiu 11:27.
Gbẹzan Aigba Ji Tọn po Nuyiwadomẹji lẹ Po
7. Etẹwẹ yin dopo to whẹwhinwhẹ́n lọ lẹ mẹ he wutu e yin dandannu na Visunnu plọnji Jiwheyẹwhe tọn nado wá aigba ji?
7 Visunnu Jiwheyẹwhe tọn tindo onú susu lẹ nado plọn, na lẹndai Jehovah tọn wẹ nado hẹn Visunnu etọn pegan nado yin Yẹwhenọ Daho awuvẹmẹtọ de, he penugo nado ‘vẹawu madogán mítọn lẹ.’ (Heblu lẹ 4:15) Nado jẹ nubiọtomẹsi lẹ kọ̀n na azọngban ehe yin dopo to whẹwhinwhẹ́n he wutu Visunnu lọ wá aigba ji taidi gbẹtọ de lẹ mẹ. Tofi, taidi dawe he tindo agbasalan po ohùn po de, Jesu yin hunhundonuvo na ninọmẹ lẹ po nuyiwadomẹji lẹ po he ewọ ko nọ mọ sọn olọn mẹ to jlẹ he wayi mẹ. Todin ewọ penugo nado tindo numimọ numọtolanmẹ po awuvẹmẹ gbẹtọ tọn lẹ po tlọlọ. To whedelẹnu e nọ tindo numọtolanmẹ nuṣikọ, nugbla, po huvẹ po tọn. (Matiu 4:2; Johanu 4:6, 7) Humọ, e doakọnna awusinyẹnnamẹnu po yajiji wunmẹ lẹpo po. Gbọnmọ dali e “plọn tonusise” bo lẹzun mẹhe pegan mlẹnmlẹn na azọngban etọn taidi Yẹwhenọ Daho.—Heblu lẹ 5:8-10.
8. Etẹwẹ mí yọnẹn gando gbẹzan fliflimẹ Jesu tọn to aigba ji go?
8 Etẹwẹ dogbọn numimọ Jesu tọn lẹ dali to bẹjẹeji gbẹzan aigba ji tọn etọn whenu? Kandai ovivu-yinyin tọn etọn whè-gli taun. Na nugbo tọn, Matiu po Luku po kẹdẹ wẹ basi zẹẹmẹ nujijọ he gando jiji etọn go lẹ tọn. Wẹndagbe kàntọ lẹ yọnẹn dọ Jesu ko nọgbẹ̀ to olọn mẹ whẹpo do wá aigba ji. Tintin jẹnukọnna gbẹtọ-yinyin tọn enẹ, basi zẹẹmẹ dawe wunmẹ he e lẹzun tọn hugan nudevo depope. Etomọṣo, Jesu yin gbẹtọ mlẹnmlẹn. Dile etlẹ yin mẹpipe, e gbẹsọ dona whẹ́n sọn oviyẹyẹ-yinyin mẹ gbọn ovivu-yinyin gblamẹ po jọja winyanwinyan po jẹ mẹhowhe mẹ, e to nuplọn to ojlẹ ehe lẹpo mẹ. (Luku 2:51, 52) Biblu de onú delẹ hia gando bẹjẹeji gbẹzan Jesu tọn go ehe matin ayihaawe yinuwado e ji.
9. (a) Dohia tẹwẹ tin to finẹ dọ Jesu yin jiji do whẹndo wamọnọ tọn de mẹ? (b) To ninọmẹ wunmẹ tẹlẹ mẹ wẹ e yọnbasi dọ Jesu na ko whẹ́n te?
9 Kunnudenu lẹ dohia dọ, Jesu yin jiji do whẹndo wamọnọ de mẹ. Ehe yin didohia gbọn avọnunina he Josẹfu po Malia po hẹnwa tẹmpli mẹ to nudi azán 40 to jiji etọn godo dali. Kakati nado hẹn agbò winyanwinyan de wá taidi avọnunina mimẹ̀ de po awhannẹvu kavi apoe de po wá taidi avọnunina ylando tọn, yé hẹn “apoe awe, kavi awhannẹvu awe” wá. (Luku 2:24) Sọgbe hẹ Osẹ́n Mose tọn, avọnunina ehe yin awuwledainanu de na wamọnọ lẹ. (Levitiku 12:6-8) To madẹnmẹ, whẹndo madodenọ ehe jideji. Josẹfu po Malia po tindo e whè gbau ovi ṣidopo devo lẹ gbọn jọwamọ-liho to whenuena yé ko gbọn azọ́njiawu dali ji Jesu godo. (Matiu 13:55, 56) Enẹwutu Jesu whẹ́n to whẹndo daho de mẹ, vlavo to ninọmẹ he yìdo lẹ mẹ.
10. Etẹwẹ dohia dọ Malia po Josẹfu po yin budisi Jiwheyẹwhe tọ́ lẹ?
10 Jesu yin pinpọ́n e go whẹ́n gbọn mẹjitọ budisi-Jiwheyẹwhe tọ́ he penukundo e go lẹ dali, Onọ̀ etọn, Malia, yin yọnnu he diyin de. Flin dọ to whenuena e yin nudọdo, angẹli Gabliẹli dọmọ: “Oyínjla, hiẹ he mọ nukundagbe daho, Oklunọ tin to dè we.” (Luku 1:28) Josẹfu lọsu yin mẹdezejotọ de. To owhe dopodopo mẹ e nọ gbọn nugbonọ-yinyin dali basi gbejizọnlin kilomẹtlu 150 yì Jelusalẹm na Juwayi. Malia sọ yi ga, dile etlẹ yindọ sunnu lẹ kẹdẹ si wẹ yè biọ te nado wàmọ. (Eksọdusi 23:17; Luku 2:41) To nujijọ mọnkọtọn dopo whenu, Josẹfu po Malia po, to mẹdíndín pọ́n vẹkuvẹku de godo, mọ Jesu owhe-12-mẹvi to tẹmpli mẹ to mẹplọntọ lẹ ṣẹnṣẹn. Jesu dọhlan mẹjitọ he to nuhà etọn lẹ dọmọ: “Mì ma yọnẹn dọ yẹn ma sọgan nọ ma tin to [ohọ̀] Otọ́ ṣie tọn [mẹ] “ ya? (Luku 2:49) “Otọ́”—hogbe enẹ dona ko tindo yọn-na-yizan zohunhun tọn po dehe bọawu po hlan jọja Jesu. Na onú dopo, e họnwun dọ ewọ dona ko yin didọna dọ Jehovah wẹ yin Otọ́ nujọnu tọn etọn. To yidogọmẹ, Josẹfu dona ko yin otọ́ mẹgopọntọ dagbe de na Jesu. Na jide tọn Jehovah ma na ko dè dawe fifiẹtọ kavi kanylantọ de nado penukundo Visunnu vivẹ́ Etọn go whẹ́n gba!
11. Alọnuzọn tẹwẹ Jesu plọn, podọ to ojlẹ Biblu tọn lẹ mẹ, etẹwẹ azọ́n ehe wiwà bẹhẹn?
11 To owhe he e yizan to Nazalẹti lẹ whenu, Jesu plọn atinpipa, vlavo sọn otọ́ mẹgopọntọ tọn etọn dè, yèdọ Josẹfu, Jesu yọ́n azọ́n lọ sọmọ bọ ewọ lọsu yin yiylọ dọ “atinpatọ.” (Malku 6:3) To ojlẹ Biblu tọn lẹ mẹ, atinpatọ lẹ nọ yin yíyído azọ́nmẹ to owhé lẹ gbigbá mẹ, owhlẹ-zọ́nwiwa (he mẹ tafo lẹ, oján lẹ po te), gọna anawanu ogle tọn lẹ bibasi. To Dialogue with Trypho etọn mẹ, Justin Martyr, he nọgbẹ̀ to owhe kanweko awetọ W.M. tọn mẹ, wlan gando Jesu go dọmọ: “E tindo walọyizan nado to azọ́nwa taidi atinpatọ de to whenuena e tin po sunnu lẹ po, bo nọ basi glepọnu lẹ po zẹ̀gẹ̀ lẹ po.” Azọ́n mọnkọtọn ma bọawu gba, na e yọnbasi dọ atinpatọ hohowhenu tọn ma nọ họ̀ owhlẹ etọn lẹ gba. E yọnbasi taun dọ, e ni yì bo de atin de, bo sán ẹn liai, bosọ hẹn owhlẹ lọ wá whégbè. Enẹwutu Jesu sọgan ko yọ́n avùnnukundiọsọmẹnu lẹ gando nukunpipedo nuhudo gbẹ̀mẹ tọn, nuyiwahẹ ahisinọ lẹ, po nukunpipedo whédo de go to akuẹzinzan-liho po go.
12. Etẹwẹ dohia dọ Josẹfu kù jẹnukọnna Jesu, podọ etẹwẹ ehe na ko zẹẹmẹdo na Jesu?
12 Taidi visunnu mẹho hugan lọ, vlavo Jesu sọgan ko gọalọ nado penukundo whẹndo lọ go, na titengbe tọn to whenuena e taidi dọ Josẹfu kú jẹnukọnna Jesu. b Zion’s Watch Tower 1er janvier 1900 tọn, dọmọ: “Hodidọ aṣa tọn dohia dọ Josẹfu kú to whenuena Jesu gbẹ́ pò to jọja yin, podọ ewọ jẹ azọ́n atinpipa tọn wà ji bosọ lẹzun nukunpedomẹgotọ whẹndo lọ tọn, Ehe mọ godonọnamẹ delẹ yí to kunnudenu Owe-wiwe tọn mẹ fie Jesu lọsu yin yiylọdọ atinpatọ de, bọ onọ̀ etọn po nọvisunnu etọn lẹ po yin nùdego, ṣigba bọ Josẹfu mayin nùdego gba. (Malku 6:3) . . . To whelọnu lo, onú he yọnbasi taun de wẹ eyin, dọ ojlẹ dindẹn owhe fọtọ̀nnukunatọ̀n tọn heyin gbẹzan Oklunọ mítọn tọn, yèdọ sọn ojlẹ nujijọ [heyin kinkàndai to Luku 2:41-49 mẹ] lọ tọn whenu jẹ ojlẹ baptẹm etọn tọn mẹ, yin yiyizan na azọngban paa gbẹ̀mẹ tọn lẹ.” Malia po ovi etọn lẹ po, gọna Jesu, vlavo na ko yọ́n awufiẹsa he nọ dekọtọn to whenuena asu yiwanna po otọ́ po de kú tọn.
13. To whenuena Jesu jẹ lizọnyizọn etọn ji, naegbọn e do yin po oyọnẹn, nukunnumọjẹnumẹ, gọna numọtolanmẹ sisosiso po he gbẹtọ devo depope ma sọgan ko tindo?
13 E họnwun dọ, Jesu mayin jiji do gbẹzan awuvivo tọn de mẹ gba. Kakatimọ, e tindo numimọ gbẹzan gbẹtọ paa lẹ tọn tlọlọ. Enẹgodo, to owhe 29 W.M. mẹ, ojlẹ lọ wá na Jesu nado hẹn azọ́ndenamẹ sọn olọn mẹ wá he to tenọpọn ẹn di. To vivọnu owhe enẹ tọn, e yin bibaptizi to osìn mẹ bo yin jiji taidi Visunnu gbigbọmẹ tọn Jiwheyẹwhe tọn. ‘Olọn lẹ yin hunhundonuvo hlan ẹn,’ he dohia hezeheze dọ ewọ sọgan flin gbẹzan tintin jẹnukọnna gbẹtọ-yinyin tọn etọn to olọn mẹ, gọna linlẹn po numọtolanmẹ lẹ po he e tindo wayi. (Luku 3:21, 22) Enẹwutu to whenuena Jesu bẹ lizọnyizọn etọn jẹeji, e yin po oyọnẹn po, wuntuntun, po numọtolanmẹ sisosiso po he gbẹtọvi devo depope ma sọgan tindo. Po whẹwhinwhẹ́n dagbe po wẹ, Wẹndagbe kàntọ lọ lẹ de suhugan nukinkan yetọn lẹ tọn dovo na nujijọ he gando lizọnyizọn Jesu tọn lẹ go. Dile etlẹ yinmọ, yé ma sọgan basi kandai nulẹpo he e dọ bosọ wà lẹ tọn gba. (Johanu 21:25) Ṣigba nuhe yé yin gbigbọdo nado kandai lẹ gọalọna mí nado mọnukunnujẹ ayiha dawe klo hugan he nọgbẹ̀ pọ́n tọn mẹ.
Nuhe Jesu Yin Taidi Gbẹtọ De
14. Nawẹ Wẹndagbe lẹ do Jesu hia taidi dawe de he tindo awuvẹmẹ zohunhun tọn po numọtolanmẹ sisosiso po gbọn?
14 Gbẹtọ-yinyin Jesu tọn he sọawuhia sọn Wẹndagbe lẹ mẹ wẹ enẹ heyin dawe he tindo awuvẹmẹ zohunhun tọn po numọtolanmẹ sisosiso lẹ tọn po. E do nuyiwa awuvẹmẹ tọn he gbloada lẹ hia: yèdọ wàlẹblanu na pòtọnọ de (Malku 1:40, 41); blawu do mẹhe ma yigbe dagbe lẹ ji (Luku 19:41 42); homẹgble dodowiwa tọn sọta akuẹdiọtọ nukunkẹnnọ lẹ (Johanu 2:13-17). Taidi dawe awuvẹmẹtọ de, Jesu sọgan yin whinwhàn nado viavi, podọ e ma whlá numọtolanmẹ etọn lẹ gba. To whenuena họntọn vivẹ́ etọn Lazalọsi ko kú, mimọ Malia, yèdọ nọviyọnnu Lazalọsi tọn, to avivi whàn Jesu sisosiso sọmọ bọ ewọ lọsu viavi, yèdọ viavi gbangba to nukun mẹdevo lẹ tọn mẹ.—Johanu 11:32-36.
15. Nawẹ numọtolanmẹ awuvẹmẹ Jesu tọn lẹ sọawuhia to aliho he mẹ e nọ pọ́n bosọ nọ yinuwahẹ mẹdevo lẹ te mẹ gbọn?
15 Numọtolanmẹ awuvẹmẹ Jesu tọn lẹ họnwun na taun tọn to aliho he mẹ e nọ pọ́n bosọ nọ yinuwahẹ mẹdevo lẹ te. E nọ hùndonuvo hlan wamọnọ lẹ po mẹhe yin kọgbidina lẹ po, bo gọalọna yé nado ‘mọ kọfanamẹ na alindọn yetọn lẹ.’ (Matiu 11:4, 5, 28-30) Alọnu etọn ma ján hugan nado penukundo nuhudo mẹhe yin nukunbiana lẹ tọn go gba, etlẹ yin yọnnu he to ohùn-di de he dọalọ tewu etọn go kavi nubiọdutọ nukuntọ́nnọ de he ma na yin hinhẹn donu-abọẹ gba. (Matiu 9:20-22; Malku 10:46-52) Jesu nọ pọ́n dagbe he tin to mẹdevo lẹ mẹ bosọ nọ na pipà yé; ṣogan, e sọ nọ wọhẹmẹ to whenuena nuhudo etọn tin. (Matiu 16:23; Johanu 1:47; 8:44) To ojlẹ de he mẹ yọnnu lẹ nọ duvivi jlọjẹ vude poun tọn te, Jesu yinuwahẹ yé to yẹyi po sisi he to jlẹkaji de po mẹ. (Johanu 4:9, 27) E yin nukunnumọjẹemẹ dọ, pipli yọnnu lẹ tọn yílizọn na ẹn sọn ojlo mẹ wá sọn nutindo yetọn titi mẹ.—Luku 8:3.
16. Etẹwẹ dohia dọ Jesu tindo pọndohlan jlẹkaji tọn gando ogbẹ̀ po nutindo agbasa tọn lẹ po go?
16 Jesu tindo pọndohlan jlẹkaji ogbẹ̀ tọn. Nutindo agbasa tọn lẹ ma yin nujọnu tintan na ẹn gba. To agbasaliho, e taidi dọ, onú vude wẹ e tindo. E dọ dọ emi ‘ma tindo fihe e mi na yí ota emitọn dai te’ gba. (Matiu 8:20) To ojlẹ dopolọ mẹ, Jesu yidogọna ayajẹ mẹdevo lẹ tọn. To whenuena e yì hùnwhẹ alọwle tọn de tẹnmẹ—yèdọ nuwiwa he na taun tọn yin hiadogona gbọn húnhiho, ohanjiji, po aglinjijẹ po dali—e họnwun dọ e ma tin to finẹ nado de awuvivi nuwiwa lọ tọn pò gba. Na nugbo tọn, Jesu wà azọ́njiawu etọn tintan to finẹ. To whenuena ovẹn vọ̀, e diọ osìn zun ovẹn dagbe, yèdọ núnùnù de he nọ ‘hẹn ahun gbẹtọ tọn jaya.’ (Psalm 104:15; Johanu 2:1-11) Gbọnmọ dali hùnwhẹ lọ na zindonukọn, podọ matin ayihaawe asi yọyọ lọ po asisunọ lọ po mayin winyan do gba. Jlẹkaji-ninọ etọn yin didohia yinukọn dogọ to enẹ mẹ dọ nuwiwa susu wẹ yin nùdego to whenuena Jesu wazọ́n sinsinyẹn bosọ dẹ̀n to lizọnyizọn etọn mẹ.—Johanu 4:34.
17. Naegbọn e ma do yin nupaṣamẹ dọ Jesu yin Ogán Mẹplọntọ de, podọ etẹwẹ nuplọnmẹ etọn lẹ dohia?
17 Jesu yin Ogán Mẹplọntọ de. Susu to nuplọnmẹ etọn lẹ mẹ nọ do nuhe nọ jọ to gbẹzan egbesọegbesọ tọn lẹ mẹ hia, ehe ewọ ko jẹakọ hẹ ganji. (Matiu 13:33; Luku 15:8) Aliho mẹpinplọn tọn etọn matin awetọ—yèdọ họnwun, bọawu, bosọ yọn-na-yizan. Nuhe yin nujọnu hugan lọ wẹ nuhe e nọ plọnmẹ. Nuplọnmẹ etọn lẹ nọ do ojlo ahundoponọ etọn nado hẹn todoaitọ etọn lẹ jẹakọ hẹ linlẹn, numọtolanmẹ, po aliho Jehovah tọn lẹ po hia.—Johanu 17:6-8.
18, 19. (a) Po hogbe yẹdenanu tọn he họnwun tẹlẹ po wẹ Jesu basi zẹẹmẹ Otọ́ etọn tọn? (b) Etẹwẹ na yin dogbapọnna to hosọ he bọdego mẹ?
18 To oló lẹ yiyizan gbọzangbọzan mẹ, Jesu nọ do Otọ́ etọn hia to hogbe he họnwun hezeheze lẹ mẹ he ma sọgan yin jiwọn e go po awubibọ po. Onú dopo wẹ e yin nado dọho to aliho paa mẹ gando lẹblanu Jiwheyẹwhe tọn go. Onú devo pete wẹ e yin nado yí Jehovah jlẹdo otọ́ jonamẹtọ de go he yin whinwhàn sisosiso sọmọ to visunnu etọn mimọ lẹkọ jà to aganu mẹ bọ e ‘dowezun bo plalọ okọ̀ etọn bosọ donùnùgo na ẹn.’ (Luku 15:11-24) To gbigbẹ́ aṣa hẹngogo tọn to ehe mẹ nukọntọ sinsẹ̀n tọn lẹ nọ yí nukunpẹvi do pọ́n gbẹtọ paa lẹ dai mẹ, Jesu basi zẹẹmẹ dọ Otọ́ emitọn yin Jiwheyẹwhe he yọ́n dọnsẹpọ de he kẹalọyi ovẹvivẹ takuẹ ṣinyantọ whiwhẹnọ de tọn kakati ni yin odẹ̀ nsọle-yinyin Falesi goyitọ de tọn. (Luku 18:9-14) Jesu do Jehovah hia taidi Jiwheyẹwhe mẹtọnhopọntọ de he nọ yọnẹn whenuena oblẹnọ pẹvi de jai do aigba. Jesu vọ́-jidena devi etọn lẹ dọ, “mì dibu blo, mìwlẹ doale hú oblẹnọ susu.” (Matiu 10:29, 31) E yin nukunnumọjẹemẹ dọ, avò nọ vò gbẹtọ lẹ gando ‘aliho he mẹ Jesu nọ plọnmẹ te’ go podọ yé nọ wá e dè. (Matiu 7:28, 29) Etẹ nkọ, yèdọ to nuwiwa dopo whenu “agundaho” de tin to e dè na azán atọ̀n, yèdọ tlẹ to yìyì matin núdùdù!—Malku 8:1, 2.
19 Mí sọgan dopẹ́ dọ Jehovah ko do ayiha Klisti tọn hia to Ohó etọn mẹ! Nalete, nawẹ mí sọgan wleawuna bosọ do ayiha Klisti tọn hia to nuwiwa mítọn lẹ mẹ hẹ mẹdevo lẹ gbọn? Ehe na yin hodọdeji to hosọ he bọdego mẹ.
[Nudọnamẹ Odò Tọn]
a Dọ nudida gbigbọnọ lẹ sọgan yin nuyiwadeji gbọn gbẹdohẹmẹtọ yetọn lẹ dali yin didohia to Osọhia 12:3, 4 mẹ. To finẹ Satani yin didohia taidi “dlagọni” he penugo nado yí nuyiwadomẹji etọn zan nado hẹn “sunwhlẹvu” devo lẹ, kavi visunnu gbigbọmẹ tọn lẹ, nado kọnawudopọ hẹ ẹ to aliho atẹṣiṣi tọn de mẹ.—Yijlẹdo Job 38:7 go.
b Ojlẹ godo tọn he mẹ yè donu Josẹfu go tlọlọ wẹ whenuena Jesu owhe-12-mẹvi yin mimọ to tẹmpli mẹ. Alọdlẹndonu depope matin dọ Josẹfu tin to hùnwhẹ alọwle tọn lọ tẹnmẹ to Kana, to ojlẹ he mẹ Jesu jẹ lizọnyizọn etọn ji gba. (Johanu 2:1-3) To owhe 33 W.M., Jesu he yin whiwhedo-nugo lọ deazọ́nna apọsteli Johanu he e yiwanna lọ nado penukundo Malia go. Vlavo nude he Jesu ma na ko wà wẹ enẹ yin eyin Josẹfu gbẹ́ pò to ogbẹ̀ wẹ.—Johanu 19:26, 27.
Be Hiẹ Flin Ya?
• Naegbọn e yin onú titengbe dọ mí ni jẹakọ hẹ “ayiha Klisti tọn”?
• Gbẹdido tẹwẹ Jesu tindo to tintin jẹnukọnna gbẹtọ-yinyin etọn mẹ?
• To gbẹzan aigba ji tọn etọn whenu, ninọmẹ po nuyiwadomẹji tẹlẹ po wẹ Jesu tindo numimọ etọn tlọlọ?
• Etẹwẹ Wẹndagbe lẹ dehia gando gbẹtọ-yinyin Jesu tọn go?
[Kanbiọ Oplọn Tọn Lẹ]
[Yẹdide to weda 10]
Jesu whẹ́n to whẹndo daho de mẹ, vlavo to ninọmẹ ohẹ́n tọn lẹ mẹ
[Yẹdide to weda 12]
Avò vó mẹplọntọ lẹ gando nukunnumọjẹnumẹ po gblọndo Jesu owhe-12-mẹvi tọn lẹ po go