Gbẹtọvi lẹ—Be Kanlin He Nọ Lẹnnupọn Poun lẹ Wẹ Yé Yin Ya?

“Be vogbingbọn de tin to nuhe mí yise gando bẹjẹeji ogbẹ̀ tọn go mẹ ya?”

Viyọnnu owhe-16-mẹvi de to Brésil fọ́n kanbiọ ehe dote to homẹbibiọ azọ́ndenamẹ etọn do hosọ lọ “Gbẹtọvi Lẹ—Be Kanlin He Nọ Lẹnnupọn Poun lẹ Wẹ Yé Yin Ya?” ji. Ewọ yin oylọ basina gbọn mẹplọntọ etọn dali nado dọho na klasi lọ do kanbiọ enẹ ji, to whenuena mẹplọntọ lọ ko yí vọkan dopo zinjẹgbonu Réveillez-vous! 22 juin 1998 tọn do hosọ enẹ ji godo.

Kunnudetọ jọja lọ zinnudo lehe nuplọnmẹ nulẹ tin yededenu tọn he yin zize sinai do nugopipe jọwamọ nudida tọn nado luntọ́n ji ko hẹn nugbajẹmẹji sinsinyẹn wá do. Di apajlẹ, mẹsusu wẹ tindo numọtolanmẹ lọ dọ nuplọnmẹ nulẹ tin yededenu tọn ko hẹn mẹdelẹ nado nọ pọ́n awhàn hlan taidi apadewhe tuklajijẹ tẹgbẹ̀ jọwamọ tọn de na lunluntọ́n poun, bo nọ gọalọ nado wleawuna Fascisme po Nazisme po.

Wehọmẹvi lọ dohia dọ vogbingbọn daho de tin to gbẹtọvi lẹ po kanlin lẹ po ṣẹnṣẹn. E dọmọ: “Gbẹtọvi lẹ kẹdẹ wẹ sọgan wleawuna gbigbọnọ-yinyin. Gbẹtọvi lẹ kẹdẹ wẹ nọ tẹnpọn nado mọdona zẹẹmẹ po lẹndai ogbẹ̀ tọn po. Gbẹtọvi lẹ kẹdẹ wẹ nọ yin tuklado dogbọn okú dali, nọ yin ahunmẹduna gando bẹjẹeji yetọn go, bo nọ jlo nado nọgbẹ̀ kakadoi. Lehe e yin nujọnu sọ dọ mí ni yí whenu zan nado dindona onú vude dogọ gando bẹjẹeji mítọn go.”

Mẹplọntọ lọ pà nuzedonukọnnamẹ dagbe lọ. E dọ dọ kọdetọn dagbe etọn yọnbasi na nugbo lọ dọ Kunnudetọ jọja aflanmẹ ehe yiwanna wehihia wutu. Viyọnnu lọ yin yinyọnẹn to wehọmẹ taidi hihiatọ zohunhunnọ owe sinai-do-Biblu ji mọnkọtọn lẹ tọn taidi Réveillez-vous! po Atọ̀họ̀-Nuhihọ́ Lọ Tọn po.

Kunnudetọ Jehovah tọn lẹ nọ yin ahunmẹduna vẹkuvẹku gando nuyiwadomẹji he nuplọnmẹ nulẹ tin yededenu tọn to tintindo do ahun po ayiha jọja lẹ tọn po ji go. Na whẹwhinwhẹ́n ehe tọn wutu, agun he viyọnnu ehe nọ kọnawudopọ hẹ lọ na tuli Kunnudetọ jọja lẹ nado na vọkan linlinnamẹwe Réveillez-vous! 22 juin 1998 tọn dopodopo mẹplọntọ po wehọmẹvigbẹ yetọn lẹ po. Linlinnamẹwe 230 delẹ wẹ yin mimá to wehọmẹ voovo lẹ mẹ to todaho lọ mẹ. Anademẹtọ Azọ́nwatẹn Lẹnunnuyọnẹn tọn to wehọmẹ dopo basi akuẹdida na linlinnamẹwe Réveillez-vous! tọn.

Mọwẹ, vogbingbọn de tin to nuhe mí yise gando bẹjẹeji ogbẹ̀ tọn go mẹ! Jọja ehe po họntọn etọn lẹ po ko dohia dọ nuyise to Mẹdatọ lọ mẹ ko do vogbingbọn nujọnu tọn de hia to gbẹzan yetọn lẹ mẹ.