Họ̀nhungàn de Na Gbẹzan Whẹndo Kọdetọn Dagbenọ

MÍ TINDO kọndopọ whẹndo tọn he to gbigblezọn deji de,” wẹ yinkọ zedaitọ na otẹn togán tọn États-Unis tọn de dọ to owhe vude lẹ die wayi. Na nugbo tọn, obá he mẹ whẹndo to gbigblezọn jẹ dobunamẹ taun. “Diọdo he gbloada mọnkọtọn lẹ to akuẹzinzan mẹ kavi to kandai azọ́nwhé tọn mẹ to ojlẹ dopolọ gblamẹ na hẹn mí jọsi,” wẹ linlinnamẹwe fortune na linlin dọ.

Whẹndo he nọ tẹnpọn nado hodo nunọwhinnusẹ́n Biblu tọn lẹ lọsu tlẹ nọ saba yin nuyiwadeji sinsinyẹn. To owhe vude lẹ die wayi, otọ́ he tindo ovi aflanmẹ ṣidopo de yin didọna gbọn Klistiani hatọ linlẹn dagbenọ de dali dọmọ: “Hiẹ sọgan donukun dọ ẹnẹ to ovi towe lẹ mẹ na yì aihọn mẹ.” Ṣogan, otọ́ ehe ma yise dọ ehe dona jọ etlẹ yin do dopo tata to ovi etọn lẹ mẹ go gba. E basi zẹẹmẹ nuhewutu wẹ tọn dọmọ.

“Ovi mítọn lẹ mayin míwlẹ tọn na taun tọn gba,” wẹ e dọ. “Yé yin zizedo alọmẹ na asi ṣie po yẹn po gbọn Jehovah Jiwheyẹwhe dali, yèdọ ‘ogú,’ kavi nunina de, sọn ewọ dè. Podọ ewọ dọ dọ eyin mí pọ́n yé go whẹ́n to aliho he sọgbe lọ mẹ, ‘yé ma na tọ́nsọn e ji gba.’ Enẹwutu mí nọ tẹnpọn nado penukundo yé go whepoponu taidi dọ Jehovah tọn wẹ yé yin nkọtọn.”—Psalm 127:3; Howhinwhẹn lẹ 22:6.

Tofi otọ́ lọ do họ̀nhungàn dopo hia na gbẹzan whẹndo kọdetọn dagbe tọn—yèdọ mẹjitọ lẹ dona penukundo ovi yetọn lẹ go taidi dọ yé to nukunpedo nutindo Jiwheyẹwhe tọn go nkọtọn. Dile ehe ma zẹẹmẹdo dọ ovi lẹ to nujijọ lẹpo mẹ na setonuna anademẹ dagbe towe do sọ, hiẹ tindo azọngban lọ nado penukundo ovi he Jiwheyẹwhe ko ze do alọmẹ na we lẹ go.

Azọngban Titengbe De

Hiẹ nọ wleawuna nukunpedomẹgo ehe ganji to pọmẹ hẹ obu po ahunmẹdunamẹ sisosiso po, e mayin to numaylọdọnu kavi vọdonanu liho gba. Hiẹ nọ wà ẹ to yinyọnẹn mẹ dọ hiẹ na dogbè na Jiwheyẹwhe na ogú, kavi nunina etọn, hlan hiẹ. Nuhudo depope matin nado tẹ́n aliho voovo ovi go pinpọn whẹ́n tọn lẹ pọ́n gba. Mẹjitọ lẹ tindo nuhudo anademẹ Jiwheyẹwhe tọn lẹ kẹdẹ dile e yin awuwlena to Ohó etọn, Biblu mẹ do, podọ dona hodo ehelẹ po sọwhiwhe po.

Anademẹ Jehovah Jiwheyẹwhe tọn die dọmọ: “Hiẹ nasọ yí sọwhiwhe do plọn yé ovi towe lẹ, bosọ nọ dọho yetọn whenuena hiẹ sinai to owhé towe gbè, podọ whenuena hiẹ to zọnlinzin to aliho ji, podọ to whenuena hiẹ mlọnai, podọ to whenuena hiẹ fọ́n tite. Podọ hiẹ nasọ sìn yé do alọ towe go na ohia de, yé nasọ tin taidi ozinja lẹ to nukun towe lẹ ṣẹnṣẹn. Hiẹ bo nasọ wlan yé do odòtin ohọ̀n towe tọn lẹ tọn lẹ go, podọ to họngbó towe lẹ go.” Biblu sọ dotuhomẹnamẹ ga dọmọ: “Mì otọ́ lẹ emi . . . mì nọ pọ́n ovi mìtọn lẹ go whẹ́n to mẹplọnlọ po anademẹ apọ̀nmẹ Jehovah tọn po mẹ,” NW .—Deutelonomi 6:7-9; Efesunu lẹ 6:4.

Enẹwutu nukunpipedo ovi lẹ go nọ biọ ayidonugo egbesọegbesọ tọn; mọwẹ, e nọ zẹẹmẹdo ojlẹ towe podọ na titengbe tọn owanyi po mẹtọnhopọn sisosiso towe nina yé mlẹnmlẹn po. Mẹjitọ he nọ na nuhudo dodonu tọn ehelẹ ovi yetọn lẹ to nuhe Jiwheyẹwhe dọ e yin dandan nado sọgan duvivi gbẹzan whẹndo kọdetọn dagbe tọn de lẹ wà.

Be hiẹ lẹndọ ehe nọ biọ nususu hugan wẹ ya? Mẹjitọ susu nọ gbọn nuyiwa yetọn lẹ dali dohia dọ yé lẹndọ e yinmọ. Ṣogan, nunina sọn Jiwheyẹwhe dè ehelẹ—yèdọ ovi towe lẹ—jẹna ayidonugo vonọtaun dogọ na nugbo tọn.

Lehe Yè na Penukundo Yé Go Do

Po nuyọnẹn po, gbadopọnna apajlẹ mẹhe ko duvivi kọdetọn dagbe to ovi lẹ go pinpọn whẹ́n mẹ lẹ tọn. Linlinwe  dopo, to hosọ wepa  ji tọn “Whẹndo Jiawu Lẹ” glọ, dọ onú ẹnẹ he yin titengbe to nukunpipedo jọja lẹ go whẹ́n po kọdetọn dagbe po dọmọ: “Hodọdopọ he nọ fọ́n dodinnanu apọ̀nmẹ tọn dote to núdùdù pọmẹ whèjai tọn whenu, gbẹdido owe dahodaho lẹ tọn, mẹwhinwhàn apajlẹ dagbe gbẹzan tọn lẹ, linlẹn lọ dọ aṣa whẹndo tọn de tin nado tẹdego.”—U.S. News & World Report, 12 décembre 1988.

Gando “hodọdopọ núdùdù pọmẹ whèjai tọn whenu” go, flindọ Jiwheyẹwhe dọna mẹjitọ lẹ nado nọ plọn ovi yetọn lẹ to whenuena yé sinai to họmẹ. Be whẹndo towe nọ sinai gbọzangbọzan lẹdo tafo de to ojlẹ núdùdù tọn lẹ mẹ, bo nọ gbọnmọ dali wleawuna dotẹnmẹ hundote egbesọegbesọ tọn lẹ na gbẹdido po hodọdopọ he nọ whanmẹ lẹ po ya? Ojlẹ mọnkọtọn lẹ nọ yin titengbe bosọ nọ yin finflin gbọn ovi lẹ dali, yèdọ nọ ze linlẹn dolido po hihọ́ tọn de po donukọnna yé. Owhe ṣidopo-mẹvi de dọ dọ emi yiwanna ojlẹ núdùdù tọn lẹ “na hiẹ ma dona to nuhapọn gando ode awetọ go gba,” to whenuena e yindọ mẹlẹpo wẹ tin topọ.

Etẹwẹ dogbọn jẹhẹnu hodọdopọ núdùdù pọmẹ whèjai tọn whenu mìtọn dali? Be e nọ saba sinai do nuhe “owe dahodaho lẹ” bẹhẹn, gọna Biblu po owe sinai-do-Biblu ji he dọho do sinsẹ̀nzọn mítọn hlan Jiwheyẹwhe kavi whẹho he gando nudida Jiwheyẹwhe tọn lẹ go ji ya? To yidogọmẹ na hodọdopọ núdùdù pọmẹ whèjai tọn whenu wunmẹ ehe, gbọn tito gbesisọ oplọn tọn de dali, mẹjitọ lẹ dona wleawuna owanyi na Jehovah po osẹ́n dodo tọn etọn lẹ po do ovi yetọn lẹ mẹ.

“Nado dùnú dopọ to gbesisọmẹ mayin nuhahun de gba,” wẹ otọ́ ovi ṣidopo tọn heyin nudego jẹnukọn lọ dọ. “Ehe yin nuyiwa aṣa tọn, podọ e yinuwa nado kọ̀n mí dopọ. Ṣigba tito-to-whinnu plọnmẹ Biblu gbesisọ tọn de tintindo sinyẹnawu.” Na nuṣikọnamẹ to azán azọ́n sinsinyẹn wiwà tọn de godo wutu, to whedelẹnu e nọ samlọngọ to oplọn lọ whenu. Ṣogan, e ma doalọtena anadidena plọnmẹ Biblu gbesisọ tọn de hẹ ovi etọn lẹ gba, podọ e nọ dọho hẹ dopodopo yetọn to gbesisọmẹ bosọ nọ dotoai na yé na ojlẹ dindẹn lẹ.

Gbọnvona yinyin nukọntọ to hodọdopọ he tindo zẹẹmẹ núdùdù pọmẹ whèjai tọn whenu po awuwiwlena gbẹdido owe dahodaho lẹ tọn po, be hiẹ nọ hẹn ẹn diun dọ ovi towe lẹ nọ mọ “mẹwhinwhàn apajlẹ dagbe gbẹzan tọn lẹ” yí ya? Nugbo lọ wẹ yindọ, titobibasina ovi towe lẹ nado nọ dogbẹ́ to gbesisọmẹ hẹ mẹhe nọ hodo apajlẹ sunnu daho hugan he ko nọgbẹ̀ pọ́n, yèdọ Jesu Klisti tọn lẹ, yin onú titengbe eyin yé na wá lẹzun mẹhomẹ kọdetọn dagbenọ lẹ.

To tadona mẹ, etẹwẹ dogbọn “linlẹn lọ dọ aṣa whẹndo tọn de tin nado tẹdego” dali? Ovi towe lẹ dona mọnukunnujẹemẹ dọ nujinọtedo whẹndo tọn lẹ tin he yé yin nukundo nado tẹdego—dọ walọyizan, hodidọ, aṣọdido, nuyiwa lẹ po mọmọ po delẹ, mayin alọkẹyi gba podọ nọ jẹagọdo aṣa whẹndo tọn. Yé dona yọnẹn dọ nado jẹagọdo aṣa whẹndo tọn yin whẹho nujọnu tọn de—dọ hiẹ na yin awugblena taun, dile e yin do na tọgbo Jakobu hohowhenu tọn, mẹhe na walọyizan winyandomẹ visunnu etọn lẹ tọn wutu hẹn ewọ “nado lunwan to mẹhe yin aigbanọ lẹ ṣẹnṣẹn.”—Gẹnẹsisi 34:30.

Otọ́ ovi ṣidopo tọn he pọ́n ovi etọn lẹ hlan taidi nutindo Jiwheyẹwhe tọn zinnudo “aṣa whẹndo tọn” ji na titengbe tọn. E nọ yihojlẹdohogo gbọzangbọzan hẹ ovi etọn lẹ do lehe nujinọtedo whẹndo lọ tọn do aṣọdido, nusísọ́, kadaninọ sọn aliho aihọn tọn lẹ mẹ nọ gọalọ nado tin to kọndopọ mẹ hẹ gbigbọ anademẹ Mẹdatọ lọ, yèdọ Jehovah Jiwheyẹwhe tọn lẹ do. Taidi kọdetọn ojlẹ, owanyi, po mẹtọnhopọn sisosiso susugege heyin nina yé po tọn—yèdọ na yinyin pinplọn to aliho he ji yé dona gbọ̀n mẹ wutu—ovi ṣidopo lọ lẹpo ko yigbe bo ‘ma tọ́nsọn aliho heyin zizedai na yé lọ ji.’—Howhinwhẹn lẹ 22:6.

Lẹdo aihọn pé, kọndopọ whẹndo tọn he lodo mọnkọtọn fọtọ́n susu lẹ wẹ tin. Pipà nankọtọn die ehelẹ yin na Mẹdatọ yetọn, podọ alè nankọtọn die yé nọ yin na mẹjitọ, he mayin ṣejannabinọ, owanyinọ lẹ! Dile owhe lẹ to jujuyi, ovi he ko mọaleyi sọn vivẹnudido yetọn mẹ lẹ nọ to pinpẹn-nutọn-yọnẹn na mẹjitọ mọnkọtọn lẹ deji dogọ.