Setonuna Avase Lọ!

BUM! To 3 juin 1991, po wanyinyẹn daho de po, Osó Fugen tọn to Japon tún ozì po afín osé miyọnawu tọn po jẹgbonu. Nuṣakadopọ he hùnmiyọ́n hugan lọ sà gbọ̀n pópló lọ ji wá odò. Wuwujẹgbonu lọ hù gbẹtọ 43. Susu mẹhe luntọ́n po awusinyẹn po lẹ jimiyọ́n tlala. “Mì jaale, osin, osin,” wẹ mẹdelẹ dawhá dọ. Miyọ́n-ṣitọ lẹ po ponọ-zọ́nwatọ lẹ po dowezun tlala nado yì gọalọna yé.

OSÉ yíyọ́ he ko sinyẹn de yin mimọ to bẹbẹnu Osó Fugen tọn to nudi osẹ awe jẹnukọn, enẹwutu aṣẹpipa lẹ po tòmẹnu lẹ po ko tin to nukundido mẹ. Na nuhe hugan osẹ dopo jẹnukọnna nugbajẹmẹji lọ, avase de ko yin nina nado họnyi sọn lẹdo lọ mẹ. Azán dopo poun jẹnukọnna wuwujẹgbonu lọ, ponọ lẹ ko gbẹ́ na linlin-kàntọ lẹ nado doalọtena lẹdo heyin gbigbẹdai lọ mẹ yìyì. Etomọṣo, to whèmẹ nujijọ ylankan enẹ tọn gbẹtọ 43 he go onú jọ do lẹ tin to lẹdo lọ mẹ.

Naegbọn mẹsusu sọmọ do ze yedelẹ do owù mẹ nado yì lẹdo lọ mẹ kavi gbọṣi finẹ? Glesi delẹ he ko sẹtẹn sọn owhé yetọn lẹ gbè lẹkọyi nado yì pọ́n nutindo po ogle yetọn lẹ po. Lẹnunnuyọnẹntọ osó miyọnnọ tọn atọ̀n to tintẹnpọn nado dọnsẹpọ osó miyọnnọ lọ dile e sọgan yọnbasi do nado na pekọ ojlo dodinnanu tọn yetọn. Linlin-kàntọ po fọtodetọ sọha delẹ po sinyẹnta nado dasá dogbó lọ na yé jlo na mọdona nuyiwà osó miyọnnọ lọ tọn wutu. Mọto-kùntọ atọ̀n heyin hihaya gbọn linlin-kàntọ lẹ dali tin to nujijọ lọ tẹnmẹ. Ponọ-zọ́nwatọ po miyọ́n-ṣitọ mẹdezejotọ lẹ po tin to azọ́nmẹ. Omẹ dopodopo tindo whẹwhinwhẹ́n etọn na lẹdo owù tọn lọ mẹ yìyì—podọ kọdetọn lọ wẹ yindọ e hẹn ogbẹ̀ etọn bu.

Be Hiẹ Tin to Lẹdo owù Tọn de mẹ Wẹ Ya?

Mímẹpo sọgan nọ ma to gbẹnọ sẹpọ osó miyọnnọ he to adanji de. Ṣogan, etẹwẹ eyin mí wá pannukọn nugbajẹmẹji globu tọn de, he ze mímẹpo do lẹdo owù tọn he bẹ globu lọ blebu hẹn mẹ? Owe he ko sọawuhia nado yin asisa dejidego nudọnamẹ dọdai tọn de na avase mí gando nugbajẹmẹji lẹdo aihọn pé tọn he ja de go bosọ basi zẹẹmẹ etọn to aliho ehe mẹ dọmọ: “Yè na hẹn owhè dozinvlu, osun ma to na yí hinhọ́n etọn hia, sunwhlẹvu lẹ nasọ flẹ sọn olọn,  huhlọn olọn lẹ tọn lẹ́ wẹ yè nasọ whàn. . . . Whẹndo he tin to aihọn mẹ lẹpo na blawu.” (Matiu 24:29, 30) Tofi nujijọ olọn mẹ tọn lẹ he na gbloada jẹ wẹkẹ lọ blebu ji yin zẹẹmẹ basina nado gando “whẹndo he tin to aihọn mẹ lẹpo” go. To hogbe devo lẹ mẹ, dọdai ehe gando nugbajẹmẹji de he na yinuwado mímẹpo ji go.

Owe dọdai tọn he go yè sọgan dejido ehe wẹ Biblu. Po awuvivi po, lẹdo hodidọ tọn wefọ heyin nudego to aga lọ tọn basi zẹẹmẹ gigọ́ nuhe na planmẹ jẹ nugbajẹmẹji globu tọn lọ kọ̀n tọn. Kẹdẹdile osé yíyọ́ he ko sinyẹn de po nuhe nọ dohiagonanu osó miyọnnọ tọn devo lẹ po na whẹwhinwhẹ́n lẹ ogán todaho Shimabara tọn lẹ nado yọ́n lẹdo owù tọn lọ do, mọwẹ Biblu na mí whẹwhinwhẹ́n lẹ nado tin to aṣeji podọ nado wleawudai na mídelẹ na lunluntọ́n do niyẹn. Mí sọgan plọn nupinplọn de sọn nugbajẹmẹji osó Fugen tọn mẹ bosọ yọ́n nujọnu-yinyin nuhe tin to nukọn ja tọn.

[Asisa Yẹdide Tọn 3]

Yomiuri/Orion Press/Sipa Press