Huhlọn Odẹ̀ Tọn

Owhè to họ̀yi do tòdaho Naholi tọn ji to Ṣẹnṣẹn Whèzẹtẹn tọn mẹ. Dawe Silianu de he nọ yin Eliẹzẹli po kanklosọpoawenọ ao po wá dòtọ de tó to gbonu tòdaho lọ tọn. Matin ayihaawe dile e tlẹ yindọ onú na ko ṣikọna ẹn podọ nùgbla na ko hùi, nuhudo mẹdevo lẹ tọn duahunmẹna Eliẹzẹli tlala. E ko wá sọn aigba jonọ tọn de ji nado din asi na visunnu ogán etọn tọn. Humọ, e dona mọ asi ehe to ṣẹnṣẹn hẹnnumẹ ogán etọn lẹ tọn tọn. Nawẹ e na basi wadotana azọ́n sinsinyẹn ehe tọn gbọn?

ELIẸZẸLI tindo yise to huhlọn odẹ̀ tọn mẹ. Po ayidego po, yèdọ to yise jidedomẹgo tọn mẹ, e basi obiọ whiwhẹ tọn ehe dọmọ: “OKLUNỌ, Jiwheyẹwhe Ablaham [klunọ] ṣie tọn, yẹn vẹ̀ we, hùn ali dagbe na mi egbé, bosọ wà dagbe hlan Ablaham klunọ ṣie. Doayi e go, yẹn to ote to ofi to asisa osìn tọn kọ̀n; viyọnnu otò lọ tọn lẹ to tintọ́njẹgbonu jà osìn dà gbé; bo gbọ e ni jọ dọ, awhli he yẹn na dọ hlan, dọmọ, Yẹn vẹ̀ we, zlọn tọ̀zẹn towe dai, na yẹn ni nù; bọ ewọ nasọ dọmọ, Nù, yẹn nasọ dà na kanklosọpoawenọ towe lẹ nù ga: ewọ lọ wẹ ni yin asi lọ he hiẹ ko dè na devi towe, Isaki; gbọn ehe mẹ yẹn na yọnẹn dọ hiẹ do dagbe hia hlan klunọ ṣie.”—Gẹnẹsisi 24:12-14.

Jidide Eliẹzẹli tọn to huhlọn odẹ̀ tọn mẹ ma yin to ovọ́ mẹ gba. Yèdọ, yọnnu tintan he wá dotọ̀ lọ tó yin viyọnnu ovivi nọvisunnu Ablaham tọn! Oyín etọn wẹ Lebeka, podọ ewọ yin tlẹnnọ, walọ wiwenọ, bosọ diwhẹ̀n. E jẹ na ayidego, e mayin dọ e na osìn Eliẹzẹli kẹdẹ wẹ gba ṣigba gbọn homẹdagbe dali na osìn kanklosọpoawenọ etọn lẹ. Enẹgodo, to hodọdopọ whẹndo tọn de godo, Lebeka po ojlo po yigbe nado lẹkọ po Eliẹzẹli po yì aigba dindẹn de ji nado lẹzun asi Isaki visunnu Ablaham tọn tọn. Gblọndo sẹhundaga he họnwun nankọtọn die hlan odẹ̀ Eliẹzẹli tọn to ojlẹ de mẹ whenuena Jiwheyẹwhe nọ saba dádo nujijọ lẹ mẹ to azọ́njiawu-liho!

Mí sọgan plọn nususu sọn odẹ̀ Eliẹzẹli tọn mẹ. E do yise he lodo etọn, whiwhẹ, po ahunmẹdunamẹ matin ṣejannabi na nuhudo mẹdevo lẹ tọn hia. Odẹ̀ Eliẹzẹli tọn sọ do taliai etọn hlan aliho nuyiwahẹmẹ Jehovah tọn hẹ gbẹtọvi lẹ hia. Matin ayihaawe ewọ yọ́n haṣinṣan vonọtaun Jiwheyẹwhe tọn hlan Ablaham mọdopolọ na opagbe Etọn dọ dona sọgodo tọn lẹ na wá na gbẹtọvi lẹpo gbọn Ablaham gblamẹ. (Gẹnẹsisi 12:3) Gbọnmọ dali, Eliẹzẹli bẹ odẹ̀ etọn jẹeji po hogbe lọ po dọmọ: “OKLUNỌ Jiwheyẹwhe [klunọ] ṣie Ablaham tọn.”

Jesu Klisti yin kúnkan Ablaham tọn mẹhe gblamẹ yè na dona gbẹtọvi tonusetọ lẹpo te. (Gẹnẹsisi 22:18) Eyin mí jlo dọ odẹ̀ mítọn lẹ ni mọ gblọndo yí to egbehe, mí dona do oyọnẹn whiwhẹ tọn heyin aliho nuyiwahẹmẹ Jiwheyẹwhe tọn hẹ gbẹtọvi lẹ gbọn Visunnu etọn gblamẹ hia. Jesu Klisti dọmọ: “Eyin mì nọnọ̀ yẹn mẹ, bọ ohó ṣie lẹ sọ nọnọ̀ mìwlẹ mẹ, mì na kàn nuhe mì jlo biọ, e bo nasọ yin wiwà hlan mì.”—Johanu 15:7.

 Hodotọ Klisti tọn he tindo numimọ nugbo-yinyin ohó Jesu tọn ehelẹ tọn wẹ apọsteli Paulu. Yise etọn to huhlọn odẹ̀ tọn mẹ na taun tọn mayin to ovọ́ mẹ gba. E na tuli Klistiani hatọ lẹ nado hẹn tuklajijẹ yetọn lẹpo yì Jiwheyẹwhe dè to odẹ̀ mẹ bo dọmọ: “Yẹn sọgan wà onú popo gbọn Klisti he to huhlọnna mi mẹ.” (Filippinu lẹ 4:6, 7, 13) Be ehe zẹẹmẹdo dọ obiọ dẹ̀hiho Paulu tọn hlan Jiwheyẹwhe lẹpo wẹ yin mimọyi ya? Mì gbọ mí ni pọ́n.

E Mayin Obiọ Lẹpo Wẹ Nọ Yin Alọkẹyi Gba

To lizọnyizọn matin ṣejannabi etọn tọn mẹ, Paulu jiya sọn nuhe e basi zẹẹmẹ etọn taidi “owun . . . to agbasalan mẹ” si. (2 Kọlintinu lẹ 12:7) Ehe sọgan ko yin ayimajai apọnmẹ po numọtolanmẹ po tọn he yin hinhẹn wá gbọn agọjẹdomẹtọ lẹ po “mẹmẹsunnu lalonọ lẹ” po dali. (2 Kọlintinu lẹ 11:26; Galatianu lẹ 2:4) Kavi e sọgan yin manọna agbasa tọn heyin yasanamẹ sinsinyẹn nukun tọn. (Galatianu lẹ 4:15) Depope he whẹho sọgan yin, “owun . . . to agbasalan mẹ” ehe tindo nugandomẹgo madogán tọn de do Paulu ji. “Yẹn . . . vẹ̀ Oklunọ whlaatọ̀n na onú he, na e ni dè e sọn dee,” wẹ e wlan. Ṣigba, obiọ Paulu tọn mayin alọkẹyi gba. Paulu yin zẹẹmẹ basina dọ alemọyi gbigbọmẹ tọn he e ko mọyi sọn Jiwheyẹwhe dè, taidi huhlọn nado doakọnna whlepọn lẹ, ko pé. Humọ, Jiwheyẹwhe dọmọ: “Madogán mẹ wẹ yè hẹn huhlọn ṣie sọgbe te.”—2 Kọlintinu lẹ 12:8, 9.

Etẹwẹ mí plọn sọn apajlẹ Eliẹzẹli po Paulu po tọn mẹ? Na nugbo tọn Jehovah Jiwheyẹwhe nọ dotoai hlan odẹ̀ mẹhe gbọn whiwhẹ dali dín nado basi sinsẹ̀n hlan ẹn lẹ tọn. Ṣigba ehe ma zẹẹmẹdo dọ e nọ na obiọ yetọn lẹ to whepoponu gba na Jiwheyẹwhe nọ tindo pọndohlan he yinukọn gando whẹho lẹ go wutu. E yọ́n dagbenu mítọn lẹ tlala hugan lehe mí wà do. Titengbe hugan, e nọ saba yinuwa to kọndopọmẹ hẹ lẹndai heyin didọ etọn dile e yin kinkàndai to Biblu mẹ do.

Ojlẹ Azọ̀nhẹngbọ Gbigbọmẹ Tọn

Jiwheyẹwhe dopagbe nado hẹn azọ̀n agbasa tọn, apọnmẹ tọn, po numọtolanmẹ tọn lẹpo po gbọ̀ na gbẹtọvi lẹ to Gandudu Owhe Fọtọ́n tọn heyin Visunnu etọn tọn to aigba ji whenu. (Osọhia 20:1-3; 21:3-5) Klistiani ahundoponọ lẹ po jejeji-ninọ po nọtepọn sọgodo heyin opagbe etọn do ehe, po yise gigọ́ tintindo to huhlọn Jiwheyẹwhe tọn mẹ po nado hẹn ẹn di. To whenuena e yindọ yé ma to nukundo azọ́njiawu azọ̀nhẹngbọ tọn mọnkọtọn todin, yé nọ hodẹ̀ hlan Jiwheyẹwhe na homẹmiọnnamẹ po huhlọn etọn po nado pehẹ whlepọn lẹ. (Psalm 55:22) To whenuena yé jẹazọ̀n, yé sọgan sọ hodẹ̀ na anademẹ Jiwheyẹwhe tọn nado mọ nukunpedomẹgo dagbe yí sọgbe hẹ akuẹ he yé tindo.

Sinsẹ̀n delẹ nọ na tuli awutunọ lẹ nado hodẹ̀ nado yin azọ̀nhẹngbọna todin, bo nọ dlẹnalọdo azọ́njiawu azọ̀nhẹngbọ tọn he Jesu po apọsteli etọn lẹ po wà. Ṣigba azọ́njiawu mọnkọtọn lẹ yin wiwà na lẹndai vonọtaun de. Yé yinuwa nado dohia dọ Jesu Klisti wẹ yin Mẹssia nugbo lọ podọ nado dohia dọ nukundagbe Jiwheyẹwhe tọn ko yin didesẹ sọn akọta Juvi lẹ tọn ji bo yin yiyina agun Klistiani tọn yọyọ lọ. To ojlẹ enẹ mẹ, nunina azọ́njiawu tọn lẹ yin nuhudo etọn tindo nado hẹn yise agun Klistiani tọn yọyọ heyin zizedai lọ tọn lodo. To whenuena agun yọyọ lọ hẹnai, dile e nọ yin didọ do, bosọ whèwhín, nunina azọ́njiawu tọn lọ ‘doalọte.’—1 Kọlintinu lẹ 13:8, 11.

To ojlẹ sinsinyẹn ehe mẹ, Jehovah Jiwheyẹwhe to anadena sinsẹ̀n-basitọ etọn lẹ to azọ́n titengbe hugan heyin azọ̀nhẹngbọ gbigbọmẹ tọn mẹ. To whenuena yé gbẹ́ tindo whenu, gbẹtọ lẹ dona yigbe hlan ovẹvivẹ ehe po niyaniya-yinyin po dọmọ: “Mì din OKLUNỌ, whenu yè sọgan mọ ẹn do, mì ylọ ẹ, whenuena e tin to yakẹ. Omẹ ylankan ni gbẹ́ aliho etọn dai, mawadodonọ linlẹn etọn: bo gbọ̀ e ni gọ̀ do OKLUNỌ dè, ewọ nasọ wàlẹblanu na ẹn, podọ do Jiwheyẹwhe mítọn dè, e nasọ jona susugege.”—Isaia 55:6, 7.

Azọ̀nhẹngbọ gbigbọmẹ tọn he yin ylanwatọ he lẹnvọjọ lẹ tọn to yinyin wiwadotana gbọn yẹwheho wẹndagbe Ahọluduta Jiwheyẹwhe tọn didọ dali. (Matiu 24:14) Gbọn huhlọn nina devizọnwatọ etọn lẹ nado hẹn azọ́n ogbẹ̀-whlẹngán tọn ehe di dali, Jehovah Jiwheyẹwhe to alọgọna gbẹtọ livi susu lẹ sọn akọta lẹpo mẹ nado lẹnvọjọ sọn ylando yetọn lẹ mẹ bosọ wá haṣinṣan nukundagbe tọn de mẹ hẹ ẹ whẹpo titonu ylankan ehe nido wá vivọnu. Mẹhe nọ hodẹ̀ sọn ahun mẹ wá na azọ̀nhẹngbọ gbigbọmẹ tọn mọnkọtọn lẹpo podọ mẹhe nọ hodẹ̀ na alọgọ nado wà azọ́n azọ̀nhẹngbọ tọn ehe lẹpo na taun tọn mọ odẹ̀ yetọn lẹ nado yin gblọndo na na.

[Yẹdide/Asisa Yẹdide tọn to weda 3]

Eliẹzẹli po Lebeka po/The Doré Bible Illustrations/Owe Dover tọn lẹ