‘Jiwheyẹwhe E, Do Hinhọ́n Towe Hlan Gbonu’

“Do hinhọ́n towe po nugbo towe po hlan gbonu: na yé ni yin alihiamẹtọ ṣie.”—PSALM 43:3.

1. Nawẹ Jehovah nọ de lẹndai etọn lẹ hia gbọn?

 JEHOVAH yin mẹtọnhopọntọ taun to aliho he mẹ e nọ hẹn lẹndai etọn lẹ yin yinyọnẹn hlan devizọnwatọ etọn lẹ te. Kakati nado de nugbo lẹpo hia to afọdopolọji to hinhọ́n sisẹ́ mlanmlan he sọgan tọ́nnukunnamẹ tọn dopo mẹ, e nọ hẹn onú lẹ họnwun na mí vudevude. Zọnlinzinzin mítọn to aliho ogbẹ̀ tọn ji sọgan yin yiyijlẹdo zọnlin he gbejizọnlin basitọ de to zinzin gbọn omọliho de ji go. E bẹjẹeji to afọnnu fliflimẹ bo ma to númọ ganji. Dile owhè jẹ hùnhùn ji vudevude, gbejizọnlinzintọ lọ penugo nado yọ́n onú kleun delẹ to lẹdo etọn lẹ mẹ. Nuhe pò he  e mọ lẹ nọ dózin. Ṣigba dile owhè to hùnhùn, e sọgan mọnu hlan nukọn tlala yì fidindẹn lẹ. Mọdopolọ wẹ e te na hinhọ́n gbigbọmẹ tọn he Jiwheyẹwhe nọ wleawuna. E nọ na dotẹnmẹ mí nado tunwun onú kleun delẹ go to ojlẹ dopo mẹ. Visunnu Jiwheyẹwhe tọn, Jesu Klisti, wleawuna nukunnumọjẹnumẹ gbigbọmẹ tọn to aliho dopolọ mẹ. Mì gbọ mí ni gbadopọnna lehe Jehovah nọ hẹn omẹ etọn lẹ tindo nukunnumọjẹnumẹ to ojlẹ hohowhenu tọn lẹ mẹ po lehe e nọ wàmọ gbọn to egbehe po do.

2. Nawẹ Jehovah nọ wleawuna nukunnumọjẹnumẹ gbọn to ojlẹ he jẹnukọnna Klistiani tọn lẹ mẹ?

² Mẹhe basi bladopọ Psalm 43tọ tọn vlavo na ko yin visunnu Kola tọn lẹ. Taidi Levinu lẹ, yé tindo lẹblanulọkẹyi nado plọn Osẹ́n Jiwheyẹwhe tọn gbẹtọ lẹ. (Malaki 2:7) Na nugbo tọn, Jehovah wẹ yin Nuplọnmẹtọ Daho yetọn, podọ yé nọ pọ́n ẹn hlan taidi Asisa nuyọnẹn lẹpo tọn. (Isaia 30:20) “Jiwheyẹwhe E, . . . do hinhọ́n towe po nugbo towe po hlan gbonu,” wẹ psalm-kàntọ lọ hodẹ̀ dọ. “Na yé ni yin alihiamẹtọ ṣie.” (Psalm 43:1, 3) Dile e dẹnsọ bọ Islaelivi lẹ yin nugbonọ hlan ẹn, Jehovah plọn yé aliho etọn lẹ. To owhe kanweko susu lẹ godo, Jehovah do nukundagbe hia yé gọna hinhọ́n po nugbo po to wunmẹ heyin ayidego tlala tọn de mẹ. Jiwheyẹwhe wàmọ to whenuena e do Visunnu etọn hlan aigba ji.

3. Aliho tẹmẹ wẹ Ju lẹ yin whiwhlepọn te gbọn nuplọnmẹ Jesu tọn dali?

³ Taidi dawe lọ Jesu Klisti, Visunnu Jiwheyẹwhe tọn wẹ yin “hinhọ́n aihọn tọn.” (Johanu 8:12) E plọn gbẹtọ lẹ “onú susu . . . to oló lẹ mẹ”—yèdọ onú yọyọ lẹ. (Malku 4:2) E dọna Pọntiu Pilati dọmọ: “Ahọludu ṣie ma yin aihọn he tọn gba.” (Johanu 18:36) Linlẹn yọyọ de wẹ e nẹ yin na Lomunu de podọ na jide tọn na Juvi owanyina akọta mẹtọn tọ́ lẹ, na yé lẹndọ Mẹssia na hẹn Ahọluigba Lomu tọn jẹvọ́ bo hẹn Islaeli gọwá gigo dai tọn etọn mẹ. Jesu to hinhọ́n he sọn Jehovah dè dehia, ṣigba ohó etọn lẹ ma hẹn homẹ gandutọ Juvi lẹ tọn tọn hùn gba, mẹhe “yiwanna gigo gbẹtọ tọn hú gigo Jiwheyẹwhe tọn.” (Johanu 12:42, 43) Susu gbẹtọ lẹ tọn wẹ basi nudide nado tẹdo aṣa gbẹtọ tọn yetọn go kakati nado kẹalọyi hinhọ́n gbigbọmẹ tọn po nugbo tọn po sọn Jiwheyẹwhe dè.—Psalm 43:3; Matiu 13:15.

4. Nawẹ mí yọnẹn dọ devi Jesu tọn lẹ na zindonukọn nado to whinwhẹ́n to nukunnumọjẹnumẹ mẹ gbọn?

⁴ Etomọṣo, sunnu po yọnnu ahunjijlọnọ kleun delẹ po gbọn ayajẹ dali kẹalọyi nugbo he Jesu plọnmẹ. Yé basi nukọnyiyi vudevude to nukunnumọjẹnumẹ yetọn mẹ na nuhe dù lẹndai Jiwheyẹwhe tọn lẹ. Nalete, dile opodo gbẹzan aigba ji tọn Mẹplọntọ yetọn tọn to dindọnsẹpọ, yé gbẹ́ tindo onú susu nado plọn. Jesu dọna yé dọmọ: “Yẹn gbẹ́ sọ tindo onú susu nado dọ hlan mì, ṣigba mìwlẹ ma sọgan hẹn yé to dinvie gba.” (Johanu 16:12) Mọwẹ, devi lẹ na zindonukọn nado to whinwhẹ́n to nukunnumimọjẹ nugbo Biblu tọn mẹ.

Hinhọ́n lọ Zindonukọn Nado to Sisẹ́

5. Kanbiọ tẹlẹ wẹ fọndote to owhe kanweko tintan whenu, podọ mẹnu lẹ wẹ tindo azọngban lọ nado didẹ yé?

⁵ To okú po fọnsọnku Jesu tọn po godo, hinhọ́n sọn Jiwheyẹwhe dè họnwun dogọ hugan dai tọn. To numimọ heyin nina Pita de mẹ, Jehovah dehia dọ Kosi he ma gbowhẹ̀ lẹ bẹsọn din sọyi sọgan lẹzun hodotọ Klisti tọn. (Owalọ lẹ 10:9-17) Osọhia de wẹ enẹ yin! Etomọṣo, kanbiọ de fọndote to godo mẹ dọmọ: Be Jehovah biọ sọn Kosi mọnkọtọn lẹ dè nado yin whẹ̀gbòna to whenuena yé ko lẹzun Klistiani godo wẹ ya? Kanbiọ enẹ ma ko yin gblọndo etọn na to numimọ lọ mẹ gba, podọ whẹho lọ lẹzun hosọ nudindọn sinsinyẹn tọn de to Klistiani lẹ ṣẹnṣẹn. E dona yin dididẹ, e yin e mayin mọ pọninọ nujọnu tọn yetọn na yin hinhẹngble. Enẹwutu, to Jelusalẹm “apọsteli lẹ po mẹho lẹ po plidopọ nado lẹn ohó he pọ́n.”—Owalọ lẹ 15:1, 2, 6.

6. Aliho nuwiwa tọn tẹwẹ apọsteli lẹ po sunnu mẹho lẹ po hodo to whenuena yé gbadopọnna kanbiọ whẹ̀gbigbò tọn?

⁶ Nawẹ mẹhe tin to opli enẹ ji lẹ sọgan yọ́n ojlo Jiwheyẹwhe tọn na Kosi he yise lẹ gbọn? Jehovah ma do angẹli de hlan nado yin azinponọ na hodọdopọ lọ lẹ gba, mọjanwẹ e ma na nukundagbe mẹhe tin to finẹ lẹ po numimọ de po gba. Ṣogan, apọsteli lẹ po sunnu mẹho lẹ po ma yin jijodo mlẹnmlẹn matin anademẹ gba. Yé gbadopọnna kunnudenu lẹ sọn Klistiani Juvi delẹ dè he ko mọ lehe Jiwheyẹwhe ko bẹ nuyiwa jẹeji hẹ gbẹtọ akọta lẹ tọn, bo kọ̀n gbigbọ wiwe etọn do Kosi he ma gbowhẹ̀ lẹ ji. Yé sọ dindona Owe-wiwe lẹ na anademẹ. Taidi kọdetọn de, devi Jakobu  na ayinamẹ de he sinai do wefọ heyin nukunnumọjẹemẹ de ji. Dile yé lẹnnupọndo kunnudenu lọ ji, ojlo Jiwheyẹwhe tọn họnwun. Kosi lẹ ma dona yin whẹ̀gbòna whẹpo do sọgan duvivi alọkẹyi Jehovah tọn gba. Apọsteli lẹ po sunnu mẹho lẹ po ma dọngbàn depope nado kàn nudide lọ na Klistiani hatọ lẹ nido sọgan yin anadena gbọn dali etọn gba.—Owalọ lẹ 15:12-29; 16:4.

7. To aliho tẹmẹ wẹ Klistiani owhe kanweko tintan tọn lẹ zindonukọn te?

⁷ To vogbingbọn mẹ na nukọntọ sinsẹ̀nnọ Juvi lẹ, he tẹdo aṣa tọgbo yetọn lẹ tọn go, suhugan Klistiani Juvi lẹ jaya to whenuena yé mọ nukunnumọjẹnumẹ yọyọ lẹndai Jiwheyẹwhe tọn ehe yí gando kosi lẹ go, dile etlẹ yindọ alọkikẹyi ì biọ diọdo pọndohlan tọn gando Kosi lẹ go to paa mẹ. Jehovah dona gbigbọ whiwhẹ tọn yetọn, podọ “yè to agun lẹ hẹn [lodo] to yise mẹ, bosọ to hinhẹnsu do e ji egbesọegbesọ.”—Owalọ lẹ 15:31; 16:5.

8. (a) Nawẹ mí yọnẹn dọ hinhọ́n dogọ lẹ sọgan yin nukundo to whenuena owhe kanweko tintan wá vivọnu etọn gbọn? (b) Kanbiọ titengbe tẹlẹ wẹ mí na gbadopọnna?

⁸ Hinhọ́n gbigbọmẹ tọn zindonukọn nado to sisẹ́ gbọn owhe kanweko tintan lọ gblamẹ. Ṣigba Jehovah ma de adà lẹndai etọn tọn lẹpo hia hlan Klistiani fliflimẹ tọn lẹ gba. Apọsteli Paulu dọna yisenọ hatọ owhe kanweko-tintan tọn lẹ dọmọ: “Dinvie mí to numọ blèblè to mẹpọ́nnu de mẹ.” (1 Kọlintinu lẹ 13:12) Mẹpọ́nnu mọnkọtọn ma tindo nukunmẹ he nọ domẹhia ganji gba. Enẹwutu, to tintan whenu nukunnumọjẹnumẹ hinhọ́n gbigbọmẹ tọn na tindo dogbó. To okú apọsteli lẹ tọn godo, hinhọ́n lọ dózin na ojlẹ vude, ṣigba to ojlẹ agọe tọn lẹ mẹ oyọnẹn Owe-wiwe tọn ko lẹzun susugege. (Daniẹli 12:4) Nawẹ Jehovah nọ hẹn omẹ etọn lẹ tindo nukunnumọjẹnumẹ to egbehe gbọn? Podọ nawẹ mí na yinuwa gbọn to whenuena e hẹn nukunnumọjẹnumẹ Owe-wiwe lẹ tọn mítọn gblodeji?

Hinhọ́n lọ to Wunhọ́n to Aliho Debọdo-Dego Tọn Mẹ

9. Aliho Biblu pinplọn tọn vonọtaun po kọdetọn dagbe tọn po tẹwẹ yin yiyizan gbọn Biblu Plọntọ fliflimẹ tọn lẹ dali?

⁹ To ojlẹ egbezangbe tọn lẹ mẹ sisẹ́ nujọnu tọn tintan hinhọ́n lọ tọn sọawuhia to owhe 25 godo tọn owhe kanweko 19tọ tọn mẹ dile pipli sunnu po yọnnu Klistiani lẹ tọn de po bẹ oplọn vẹkuvẹku Owe-wiwe lẹ tọn jẹeji. Yé wleawuna aliho nuwiwa tọn he yọn-na-yizan de na oplọn Biblu tọn. Mẹde na fọ́n kanbiọ de dote; enẹgodo pipli lọ na gbeje wefọ Owe-wiwe tọn lẹ he gandego lẹpo pọ́n. To whenuena wefọ Biblu tọn dopo taidi nuhe jlo na sọta devo, Klistiani ahundoponọ ehelẹ nọ dovivẹnu nado hẹn awe lọ lẹ sọgbe. Ma taidi nukọntọ sinsẹ̀n tọn ojlẹ enẹ mẹ tọn lẹ, Biblu Plọntọ lọ lẹ (dile Kunnudetọ Jehovah tọn lẹ  yin yinyọnẹn do to whenẹnu) magbe nado dike Owe Wiwe lẹ ni yin anademẹnu yetọn, e mayin aṣa kavi osẹ́n hẹngogonọ heyin bibasi gbọn gbẹtọ dali lẹ gba. To whenuena yé ko gbadopọnna kunnudenu Owe-wiwe tọn he tin-to-aimẹ lẹpo, yé basi kandai tadona he kọ̀n yé wá lẹ tọn. To aliho enẹ mẹ nukunnumọjẹnumẹ sinsẹ̀n-nuplọnmẹ dodonu tọn Biblu tọn yetọn susu lẹ yin hinhẹn họnwun.

10. Alọgọnamẹnu oplọn Biblu tọn tẹwẹ Charles Taze Russell wlan?

¹⁰ Mẹhe diyin hugan to Biblu Plọntọ lọ lẹ mẹ wẹ Charles Taze Russell. E wlan alọgọnamẹnu debọdo-dego ṣidopo heyin alọgọ oplọn Biblu tọn he hosọ etọn yin Études des Écritures. Mẹmẹsunnu Russell tindo ojlo nado wlan bladopọ ṣinawetọ de, ehe na basi zẹẹmẹ owe Biblu tọn Ezekiẹli po Osọhia po tọn. “Whedepopenu he yẹn mọ họ̀nhungàn lọ,” wẹ e dọ, “yẹn na wlan Bladopọ Ṣinawetọ.” Ṣigba, e yidogọ dọmọ: “Eyin Oklunọ na họ̀nhungàn lọ hlan mẹdevo depope, e sọgan wlan ẹn.”

11. Kanṣiṣa tẹwẹ tin to finẹ to ojlẹ sisọ po nukunnumọjẹnumẹ lẹndai Jiwheyẹwhe tọn lẹ mítọn po ṣẹnṣẹn?

¹¹ Hodidọ enẹ gbọn C. T. Russell dali basi dohia adà titengbe de tọn to nugopipe mítọn nado mọnukunnujẹ wefọ Biblu tọn delẹ mẹ—yèdọ to ojlẹ sisọ mẹ. Mẹmẹsunnu Russell yọnẹn dọ emi ma sọgan hẹn hinhọ́n lọ nado họnwun do owe Osọhia tọn ji dogọ kẹdẹdile gbejizọnlin-basitọ vivẹnunọ de ma sọgan yinuwado owhè ji nado hùn jẹnukọnna ojlẹ dide etọn do.

Yin Didehia—Ṣigba to Ojlẹ Dide Jiwheyẹwhe Tọn Mẹ

12. (a) Whetẹnu wẹ dọdai Biblu tọn nọ yin nukunnumọjẹemẹ ganji? (b) Apajlẹ tẹwẹ dohia dọ nugopipe mítọn nado mọnukunnujẹ dọdai Biblu tọn mẹ sinai do tito ojlẹ tọn Jiwheyẹwhe tọn ji? (Pọ́n nudọnamẹ odò tọn.)

¹² Kẹdẹdile apọsteli lẹ mọnukunnujẹ dọdai susu lẹ mẹ gando Mẹssia lọ go kiki to okú po fọnsọnku Jesu tọn po godo do, Klistiani lẹ to egbehe mọnukunnujẹ dọdai Biblu tọn lẹ mẹ to gigọ́ etọn mẹ to whenuena e ko yin hinhẹndi godo kẹdẹ. (Luku 24:15, 27; Owalọ lẹ 1:15-21; 4:26, 27) Osọhia yin owe dọdai tọn de, enẹwutu mí sọgan donukun nado mọnukunnujẹemẹ hezeheze dogọ dile nujijọ he e basi zẹẹmẹ etọn lẹ to yinyin didehia. Di apajlẹ, C. T. Russell ma sọgan ko mọnukunnujẹ zẹẹmẹ gbekanlin wlanwlan vẹẹ yẹhiadonu tọn lọ heyin nùdego to Osọhia 17:9-11 mẹ po gbesisọ po gba, to whenuena e yindọ titobasinanu he gbekanlin lọ nọtena lẹ, heyin, Alẹnu Akọta lẹ tọn po Plidopọ Akọta lẹ tọn po, ma tlẹ tin-to-aimẹ kakajẹ okú etọn godo. a

13. Etẹwẹ nọ jọ to whedelẹnu to whenuena hinhọ́n yin titá do hosọ Biblu tọn taun de ji?

¹³ To whenuena Klistiani fliflimẹ tọn lẹ plọn dọ Kosi he ma gbowhẹ̀ lẹ sọgan lẹzun yisenọ hatọ lẹ, diọdo enẹ planmẹ jẹ kanbiọ yọyọ de kọ̀n gando nuhudo lọ go na kosi lẹ nado yin whẹ̀gbòna. Ehe whàn apọsteli lẹ po sunnu mẹho lẹ po nado vọ́ whẹho whẹ̀gbigbò tọn lọ blebu gbejepọn. Aliho nuwiwa tọn dopolọ yin nugbo to egbehe. Sisẹ́ mlanmlan hinhọ́n tọn do hosọ Biblu tọn dopo ji nọ deanana devizọnwatọ yiamisisadode Jiwheyẹwhe tọn lẹ to whedelẹnu, yèdọ “afanumẹ nugbonọ nuyọnẹntọ” lọ, nado vọ́ hosọ he gandego lẹ gbejepọn, dile apajlẹ he bọdego agọe tọn lẹ dohia do.—Matiu 24:45.

14-16. Nawẹ vọjlado de to pọndohlan mítọn mẹ gando tẹmpli gbigbọmẹ tọn go yinuwado nukunnumọjẹnumẹ mítọn heyin Ezekiẹli weta 40 jẹ 48 tọn ji gbọn?

¹⁴ To 1971 zẹẹmẹ dọdai Ezekiẹli tọn yin zinzinjẹgbonu to owe lọ “Les nations sauront que je suis Jéhovah”—Comment? mẹ. Weta dopo owe enẹ tọn dọhodo numimọ tẹmpli mẹ tọn Ezekiẹli tọn ji to kleun mẹ. (Ezekiẹli, weta 40 jẹ 48) To ojlẹ lọ mẹ, nùzindonuji lọ yin do lehe numimọ tẹmpli mẹ tọn Ezekiẹli tọn na yin hinhẹndi to aihọn yọyọ lọ mẹ do ji.—2 Pita 3:13.

¹⁵ Ṣigba, hosọ awe heyin zinzinjẹgbonu to Atọ̀họ̀-Nuhihọ́ Lọ Tọn 1^er décembre 1972 [Glẹnsigbe] tọn mẹ lẹ, yinuwado nukunnumọjẹnumẹ mítọn ji gando numimọ Ezekiẹli tọn go. Yé basi zẹẹmẹ tẹmpli gbigbọmẹ tọn daho lọ heyin zẹẹmẹ basina  gbọn apọsteli Paulu dali to Heblu lẹ weta 10 mẹ. Atọ̀họ̀-Nuhihọ́ Lọ Tọn basi zẹẹmẹ dọ otẹn Wiwe lọ po awánu homẹ tọn lọ po heyin tẹmpli gbigbọmẹ tọn lọ gando ninọmẹ mẹyiamisisadode lẹ tọn go to whenuena yé tin to aigba ji. To whenuena Ezekiẹli weta 40-48 yin dogbapọnna to owhe lẹ godo, e yin nukunnumọjẹemẹ dọ kẹdẹdile tẹmpli gbigbọmẹ tọn to nuyiwa to egbehe, mọdopolọ wẹ tẹmpli he Ezekiẹli mọ to numimọ mẹ lọsu dona to nuyiwa do to egbehe ga. Nawẹ e yinmọ gbọn?

¹⁶ To numimọ Ezekiẹli tọn mẹ, yẹwhenọ lẹ yin mimọ nado to yigọyigọ basi to awánu tẹmpli lọ tọn lẹ mẹ dile yé to devizọnwa hlan whẹndo he mayin yẹwhenọ tọn lẹ. E họnwun dọ yẹwhenọ ehelẹ nọtena “tado yẹwhenọduta tọn,” yèdọ devizọnwatọ yiamisisadode Jehovah tọn lẹ. (1 Pita 2:9) Ṣigba, yé ma na to devizọnwa to awánu tẹmpli aigba ji tọn mẹ to gblagbla Gandudu Owhe Fọtọ́n Klisti tọn blebu mẹ gba. (Osọhia 20:4) To suhugan ojlẹ enẹ tọn mẹ, yin e ma tlẹ yin popolẹpo etọn, mẹyiamisisadode lẹ na to devizọnwa hlan Jiwheyẹwhe to Fiwiwe Gbaugbau tẹmpli gbigbọmẹ tọn lọ tọn mẹ, yèdọ “olọn lẹ lọsu.” (Heblu lẹ 9:24) To whenuena e yindọ yẹwhenọ lẹ yin mimọ nado to yigọyigọ basi to awánu tẹmpli Ezekiẹli tọn tọn mẹ, numimọ enẹ dona to hẹndi mọyi to egbehe, dile delẹ to mẹyiamisisadode lẹ mẹ gbẹsọ tin to aigba ji. Po gbesisọ po, zinjẹgbonu linlinnamẹwe ehe tọn 1^er mars 1999, do pọndohlan vọjlado tọn de hia do hosọ ehe ji. Gbọnmọ dali, dohlan vivọnu owhe kanweko 20tọ tọn, hinhọ́n gbigbọmẹ tọn yin titá do dọdai Ezekiẹli tọn ji.

Tindo Ojlo Nado Basi Vọjlado na Pọndohlan Towe

17. Vọjlado tẹlẹ wẹ hiẹ ko basi to pọndohlan mẹdetiti tọn mẹ sọn whenuena hiẹ ko wá oyọnẹn nugbo tọn kọ̀n, podọ nawẹ yé ko hẹn alemọyi wá na we gbọn?

¹⁷ Mẹdepope he tindo ojlo nado wá oyọnẹn nugbo tọn kọ̀n dona jlo nado hẹn “linlẹn lẹpo . . . wá [mẹmẹglọ-ninọ mẹ] hlan tonusise Klisti tọn.” (2 Kọlintinu lẹ 10:5) Enẹ ma nọ saba bọawu to whepoponu gba, na titengbe tọn to whenuena pọndohlan lẹ ko hẹnai sinsinyẹn. Di apajlẹ, jẹnukọnna nugbo Jiwheyẹwhe tọn pinplọn, hiẹ sọgan ko duvivi hùnwhẹ gbọjẹzan sinsẹ̀n tọn delẹ bibasi tọn hẹ whẹndo towe. To whenuena hiẹ jẹ oplọn Biblu tọn ji godo, hiẹ doayi e go dọ hùnwhẹ ehelẹ na taun tọn tindo dodonu kosi lẹ tọn. To tintan whenu, hiẹ sọgan ko whleawu nado yí nuhe hiẹ to pinplọn lọ do yizan mẹ. Ṣigba, to godo mẹ, owanyi na Jiwheyẹwhe sọawuhia nado sinyẹn hugan numọtolanmẹ sinsẹ̀n tọn, podọ hiẹ doalọtena mahẹ tintindo to hùnwhẹ he ma nọ hẹn homẹ Jiwheyẹwhe tọn hùn lẹ mẹ. Be Jehovah ma ko dona nudide towe ya?—Yijlẹdo Heblu lẹ 11:25 go.

18. Nawẹ mí dona yinuwa gbọn to whenuena nukunnumọjẹnumẹ mítọn gando nugbo Biblu tọn go yin hinhẹn họnwun?

¹⁸ Mí nọ mọaleyi to whepoponu gbọn onú lẹ wiwà to aliho Jiwheyẹwhe tọn mẹ dali. (Isaia 48:17, 18) Enẹwutu to whenuena pọndohlan mítọn heyin wefọ Biblu tọn yin hinhẹn họnwun, mì gbọ mí ni jaya to nugbo he to nukọnzindo lọ mẹ! Na taun tọn, hinhẹn mí tindo nukunnumọjẹnumẹ dogọ zọnmii dohia dọ mí tin to aliho he sọgbe lọ ji. E yin “omọ́ nugbonọ tọn,” he “taidi hinhọ́n he sẹ́, he to sisẹ́ yì nukọn kakajẹ okle.” (Howhinwhẹn lẹ 4:18) Na nugbo tọn, to alọnu din mí mọ adà delẹ heyin lẹndai Jiwheyẹwhe tọn ‘to aliho he dózin de mẹ.’ Ṣigba to whenuena ojlẹ dide Jiwheyẹwhe tọn nasọ, mí na mọ nugbo lọ to whanpẹ etọn lẹpo mẹ, eyin afọ̀ mítọn lẹ gbọṣi ‘aliho lọ’ ji gligli. To ojlẹ dopolọ mẹ, mì gbọ mí ni jaya to nugbo lọ mẹ dọ Jehovah ko hẹn onú lẹ họnwun, bo to tenọpọn nukunnumọjẹnumẹ do dehe ma ko yin hinhẹn họnwun hezeheze lẹ ji.

19. Etẹwẹ yin aliho dopo nado dohia dọ mí yiwanna nugbo lọ?

¹⁹ Nawẹ mí sọgan basi dohia owanyi mítọn tọn na hinhọ́n lọ to aliho he yọn-na-yizan de mẹ gbọn? Aliho dopo wẹ yin Ohó Jiwheyẹwhe tọn hihia to gbesisọmẹ—yèdọ eyin e yọnbasi egbesọegbesọ. Be hiẹ to tito-to-whinnu gbesisọ Biblu  hihia tọn hodo ya? Linlinnamẹwe Atọ̀họ̀-Nuhihọ́ Lọ Tọn po Réveillez-vous! po sọ nọ wleawuna mí po núdùdù dagbe gbigbọmẹ tọn susugege de po nado duvivi etọn. Sọ gbadopọnna owe lẹ, alọnuwe lẹ, po owe devo lẹ po he yin awuwlena na alemọyi mítọn. Podọ etẹwẹ dogbọn linlin tulinamẹ tọn lẹ dali heyin nuwiwa yẹwhehodidọ Ahọluduta lọ tọn he nọ yin zinzinjẹgbonu to Annuaire des Témoins de Jéhovah mẹ?

20. Kanṣiṣa tẹwẹ tin to finẹ to hinhọ́n po nugbo sọn Jehovah dè po gọna opli Klistiani tọn mítọn lẹ yìyì ṣẹnṣẹn?

²⁰ Mọwẹ, Jehovah to aliho jiawu mẹ ko na gblọndo odẹ̀ heyin didọ to Psalm 43:3 mẹ tọn. To vivọnu wefọ enẹ tọn, mí hia dọmọ: “Na [hinhọ́n towe po nugbo towe po] ni sọ hẹn mi hẹ́ osó towe wiwe ji, podọ biọ gohọ̀ towe lẹ mẹ.” Be hiẹ to nukọn pọnhlan na sinsẹ̀n-bibasi hlan Jehovah, to pọmẹ hẹ gbẹtọ susugege devo lẹ ya? Anademẹ gbigbọmẹ tọn he nọ yin zizedonukọnnamẹ to opli mítọn lẹ ji yin aliho titengbe de he mẹ Jehovah nọ wleawuna nukunnumọjẹnumẹ te to egbehe. Etẹwẹ mí sọgan wà nado hẹn pinpẹn-nutọn-yinyọnẹn mítọn na opli Klistiani tọn lẹ siso? Mí basi oylọ na we nado gbadopọnna hogo ehe po odẹ̀ po to hosọ he bọdego mẹ.

[Nudọnamẹ Odò Tọn]

Be Hiẹ Sọgan na Gblọndo Ya?

• Naegbọn Jehovah nọ de lẹndai etọn lẹ hia debọdo-dego?

• Nawẹ apọsteli lẹ po sunnu mẹho lẹ po to Jelusalẹm didẹ whẹho whẹ̀gbigbò tọn gbọn?

• Aliho Biblu pinplọn tọn tẹwẹ Biblu Plọntọ fliflimẹ tọn lẹ wleawuna, podọ naegbọn e do yin vonọtaun?

• Basi dohia lehe hinhọ́n gbigbọmẹ tọn yin didehia to ojlẹ sisọ Jiwheyẹwhe tọn mẹ gbọn.

[Kanbiọ Oplọn Tọn Lẹ]

[Yẹdide to weda 12]

Charles Taze Russell yọnẹn dọ hinhọ́n na tá do owe Osọhia tọn ji to ojlẹ sisọ Jiwheyẹwhe tọn mẹ