Lehe Jehovah Nọ Deanana Mí Gbọn
Lehe Jehovah Nọ Deanana Mí Gbọn
“Hẹn mi gbọn ali jijlọ ji.”—PSALM 27:11
1, 2. (a) Nawẹ Jehovah to anadena omẹ etọn lẹ to egbehe gbọn? (b) Etẹwẹ dotẹnmẹ hundote gigọ́ opli lẹ tọn yiyizan bẹhẹn?
JEHOVAH wẹ yin Asisa hinhọ́n po nugbo po tọn, dile mí plọn to hosọ he jẹnukọn lọ mẹ do. Ohó etọn nọ tá hinhọ́n do aliho mítọn ji dile mí to zọnlinzin to ali jijlọ lọ ji. Jehovah nọ deanana mí gbọn nupinplọn mí to aliho etọn lẹ mẹ dali. (Psalm 119:105) Taidi psalmkantọ hohowhenu tọn lọ, mí nọ gbọn pẹdido dali yigbena anademẹ Jiwheyẹwhe tọn bosọ hodẹ̀ dọmọ: “Plọn ali towe mi, OKLUNỌ E, bo hẹn mi gbọn ali jijlọ ji.”—Psalm 27:11.
2 Aliho dopo he mẹ Jehovah nọ wleawuna nuplọnmẹ te to egbehe wẹ dogbọn opli Klistiani tọn lẹ gblamẹ. Be mí nọ yí dotẹnmẹ hundote gigọ́ awuwledainanu owanyinọ ehe zan gbọn (1) yìyì to gbesisọ mẹ, (2) todidoai po sọwhiwhe po hlan tito-to-whinnu lọ, podọ (3) mahẹ tintindo po jejeji-ninọ po to adà lẹ he bẹ mẹplidopọ lọ hẹn mẹ dali ya? Humọ, be mí nọ yigbe po homẹhun po to whenuena mí mọ ayinamẹ lẹ yí he na gọalọna mí nado gbọṣi “ali jijlọ ji” ya?
Nawẹ Opli Yìyì Towe te Do?
3. Nawẹ devizọnwatọ whenu-gigọ́ tọn dopo wleawuna walọyizan dagbe opli yìyì to gbesisọmẹ tọn gbọn?
3 Wẹnlatọ Ahọluduta tọn delẹ ko nọ to opli lẹ yì to gbesisọmẹ sọn ovuwhenu gbọ́n. “To whenuena nọviyọnnu ṣie lẹ po yẹn po to whinwhẹ́n to owhe 1930 lẹ gblamẹ, mí ma dona kanse mẹjitọ mítọn lẹ eyin mí na yì opli gba. Mí yọnẹn dọ mí na yì adavo eyin mí jẹazọ̀n. Whẹndo mítọn ma nọ gọ̀n opli lẹ poun,” wẹ lizọnyizọnwatọ whenu-gigọ́ tọn heyin Kunnudetọ Jehovah tọn lẹ tọn dopo flin. Taidi yẹwhegán-yọnnu Anna, mẹmẹyọnnu ehe “ma fọnyi” sọn otẹn sinsẹ̀n-bibasina Jehovah tọn mẹ pọ́n gbede gba.—Luku 2:36, 37.
4-6. (a) Naegbọn wẹnlatọ Ahọluduta lọ tọn delẹ nọ gọ̀n opli lẹ? (b) Naegbọn e do yin nujọnu nado nọ yì opli lẹ?
4 Be hiẹ tin to mẹhe nọ yì opli Klistiani tọn lẹ to gbesisọmẹ lẹ mẹ, kavi be hiẹ ko lẹzun gbemasọtọ to adà ehe mẹ wẹ ya? Klistiani delẹ he lẹndọ yé to dagbe wà magbe nado hẹn ẹn diun. Na osẹ kleun delẹ, yé basi kandai opli he yé yì lẹpo tọn. To whenuena yé gbadopọnna kandai lọ to vivọnu ojlẹ heyin hiadogona lọ tọn, sọha opli he yé ko gọ̀n lẹ tọn paṣa yé tlala.
5 ‘Abajọ,’ mẹde sọgan dọ dọ. ‘Gbẹtọ lẹ tin to kọgbidinamẹnu glọ sọmọ to egbehe bọ e ma bọawu na yé nado yin gbesisọnọ to opli lẹ ji.’ Nugbo taun wẹ e yin dọ mí to gbẹnọ to ojlẹ sinsinyẹn tlala tọn lẹ mẹ. Dehe yin titengbe hugan, kọgbidinamẹnu lọ matin ayihaawe na jideji na taun tọn. (2 Timoti 3:13) Ṣigba be enẹ ma hẹn ẹn yin nujọnu hugan dogọ nado nọ yì opli lẹ to gbesisọmẹ ya? Matin núdùdù gbesisọ tọn dagbe gbigbọmẹ tọn nado hẹn mí dote, mí ma sọgan tindo todido nado doakọnna kọgbidinamẹnu lọ he titonu ehe nọ hẹnwa gba. Yèdọ, matin gbẹdido gbesisọ tọn mí sọgan yin whiwhlepọn nado gbẹ́ ‘aliho dodowiwa tọn lọ dai’ mlẹnmlẹn! (Howhinwhẹn lẹ 4:18) Na nugbo tọn, to whenuena mí wá whégbè to vivọnu azán azọ́n sinsinyẹn de wiwà tọn, mí sọgan nọ mayin whinwhàn to whepoponu nado yì opli. Ṣigba, to whenuena mí yì mahopọnna nuṣikọnamẹ mítọn, mí nọ hẹn alemọyi wá na míde, podọ mí sọ nọ na tuli Klistiani hatọ mítọn lẹ to Plitẹnhọ Ahọluduta tọn mẹ.
6 Heblu lẹ 10:25 na ayinamẹ titengbe devo nuhewutu mí dona yin gbesisọnọ to opli yìyì mẹ. To finẹ apọsteli Paulu dotuhomẹna Klistiani hatọ lẹ nado pli yedelẹ dopọ ‘humọ dile yé yọnẹn dọ azán lọ to dindọnsẹpọ.’ Mọwẹ, mí ma dona hẹn pọndohlan nugbo lọ tọn dọ “azán Jehovah tọn, NW ” to dindọnsẹpọ bu gba. (2 Pita 3:12) Eyin mí na wá tadona kọ̀n dọ vivọnu titonu ehe tọn gbẹ́ dẹ̀n tlala, mí sọgan jẹ didike na yanwle mẹdetiti tọn lẹ ni jẹ otẹn yí sọn nuwiwa heyin dandannu gbigbọmẹ tọn lẹ si ji, taidi opli yìyì. To whelọnu lo, dile Jesu na avase do, ‘azán lọ sọgan wá mí ji ajiji di omọ̀ de.’—Luku 21:34.
Yin Todoaitọ Dagbe
7. Naegbọn e do yin onú titengbe na ovi lẹ nado nọ dotoai to opli lẹ ji?
7 E ma ko pé nado nọ yì opli lẹ poun. Mí dona dotoai po sọwhiwhe po, yèdọ payi nuhe to yinyin didọ to finẹ lẹ go. (Howhinwhẹn lẹ 7:24) Ehe bẹ ovi mítọn lẹ hẹn. To whenuena ovi de yì wehọmẹ, e nọ yin nukundo nado dotoai hlan mẹplọntọ lọ, etlẹ yin whenuena hosọ titengbe de ma dọn ẹn dogo kavi taidi nuhe yiaga hugan nuhe mẹ e sọgan mọnukunnujẹ. Mẹplọntọ lọ yọnẹn dọ eyin ovi lọ tẹnpọn nado dotoai, e whè gbau e na de alemọyi delẹ sọn oplọn lọ mẹ. To whelọnu lo, be e ma sọgbe hẹ lẹnpọn dagbe na ovi he tin to owhe wehọmẹ-yìyì tọn mẹ lẹ nado dotoai na nuplọnmẹ heyin awuwlena to opli agun tọn lẹ ji kakati nado na ẹn dotẹnmẹ nado damlọn to whenuena opli ko bẹjẹeji ya? Nugbo wẹ dọ, nugbo họakuẹ heyin mimọ to Owe-wiwe lẹ mẹ wẹ “onú he sinyẹnawu nado yọnẹn delẹ” tin te. (2 Pita 3:16) Ṣigba mí ma dona yí nukun pẹvi do pọ́n nugopipe ovi de tọn nado plọnnu. Jiwheyẹwhe ma nọ wàmọ gba. To ojlẹ Biblu tọn lẹ mẹ, e degbena devizọnwatọ etọn heyin jọja lẹ nado ‘dotoai bosọ plọnnu bo dibusi Jehovah bosọ payi nado setonuna ohó osẹ́n ehe tọn lẹpo,’ ehe matin ayihaawe delẹ sinyẹnawu na ovi lẹ nado mọnukunnujẹemẹ. (Deutelonomi 31:12; yijlẹdo Levitiku 18:1-30 go.) Be Jehovah donukun nuhe whè humọ depope sọn ovi lẹ dè to egbehe wẹ ya?
8. Afọdide tẹlẹ wẹ mẹjitọ delẹ ze nado gọalọna ovi yetọn lẹ nado yin todoaitọ to opli lẹ ji?
8 Mẹjitọ Klistiani lẹ yọnẹn dọ nuhudo gbigbọmẹ tọn ovi yetọn lẹ tọn nọ yin pekọhẹnwana to apadewhe gbọn nuhe yé plọn to opli lẹ ji dali. Enẹwutu, mẹjitọ delẹ nọ basi tito na ovi yetọn lẹ nado damlọn vude jẹnukọnna opli lẹ na yé nido sọgan wá Plitẹnhọ Ahọluduta lọ tọn mẹ to ninọmẹ dagbe mẹ bosọ tin to aṣeji nado plọnnu. Mẹjitọ delẹ sọgan gbọn nugotẹdo dali na dogbò kavi tlẹ gbọn nuyọnẹn dali gbẹ́ televiziọn pinpọ́n na ovi yetọn lẹ to zanmẹ plizangbe tọn lẹ. (Efesunu lẹ 5:15, 16) Podọ mẹjitọ mọnkọtọn lẹ nọ dè ayihafẹsẹnamẹnu lẹ pò, bo nọ na tuli ovi yetọn lẹ nado dotoai podọ nado plọnnu, to gbesisọmẹ hẹ owhe po nugopipe yetọn lẹ po.—Howhinwhẹn lẹ 8:32.
9. Etẹwẹ sọgan gọalọna mí nado wleawuna nugopipe mítọn nado dotoai?
9 Jesu to hodọ hlan mẹhe ko whẹ́n lẹ to whenuena e dọmọ: “Mì ni payi le mì to sisè do go.” (Luku 8:18) To azán ehelẹ gbè, enẹ nọ saba yin didọ po awubibọ po hugan wiwà. Eyin alọkẹyi dọ, todidoai po zohunhun po yin azọ́n sinsinyẹn, ṣigba nugopipe lọ nado dotoai sọgan yin awuwlena. Dile hiẹ to todoai na hodidọ Biblu tọn de kavi adà opli tọn de, tẹnpọn nado de linlẹn titengbe lẹ dovo. Lẹnnupọndo nuhe hodọtọ lọ na dọ bọdego ji. Dín nuagokun lẹ he hiẹ sọgan yizan to lizọnyizọn towe mẹ kavi yizan to gbẹzan towe mẹ. Gbadopọnna nuagokun lẹ to tamẹ dile yé to yinyin hodọdeji. Basi kandai kleun lẹ.
10, 11. Nawẹ mẹjitọ delẹ ko gọalọna ovi yetọn lẹ nado lẹzun todoaitọ dagbe lẹ gbọn, podọ aliho nuwiwa tọn tẹlẹ wẹ hiẹ ko mọ nado yin alọgọnamẹnu?
10 Walọyizan todidoai tọn dagbe nọ yin pinplọn ganji to owhe bẹjẹeji tọn mẹ. Etlẹ yin whẹpo yé plọn wehihia po wekinkan po, ovi he ma ko tindo owhe wehọmẹ yìyì tọn delẹ nọ yin tulina gbọn mẹjitọ yetọn lẹ dali nado nọ basi “kandai lẹ” to opli lẹ whenu. Yé nọ basi ohia do wema deji to whenuena hogbe heyin jijẹakọhẹ lẹ taidi “Jehovah,” “Jesu,” kavi “Ahọluduta” yin yiyizan. To aliho ehe mẹ, ovi lẹ sọgan plọn nado nọ ze ayidonugo do nuhe to yinyin didọ sọn oplò ji lọ ji.
11 To whedelẹnu ovi he ko whẹ́n lẹ tlẹ nọ tindo nuhudo tulinamẹ tọn nado dotoai. To ayididego dọ ayiha visunnu owhe-11-mẹvi etọn tọn to dindanpe to plidopọ agbegbe Klistiani lẹ tọn de whenu, tatọ whẹndo tọn dopo yí Biblu de na visunnu lọ bo biọ to e si nado hùn wefọ lẹ dile yé to yinyin dide gbọn hodọtọ lẹ dali. Otọ́ lọ, he to kandai lẹ basi, nọ pọ́n dile visunnu etọn hẹn Biblu lọ go. To enẹgodo, visunnu lọ hodo tito-to-whinnu plidopọ lọ tọn po zohunhun po dogọ.
Dike Ogbè Towe Ni Yin Sisè
12, 13. Naegbọn e do yin onú titengbe nado nọ tindo mahẹ to hanjiji agun tọn mẹ?
12 Ahọlu Davidi jihàn dọmọ: “Yẹn na lẹ́do agbà towe pé, OKLUNỌ E: na yẹn nido hẹn ogbè opẹ́ tọn zùn sisè.” (Psalm 26:6, 7) Opli Kunnudetọ Jehovah tọn lẹ tọn wleawuna dotẹnmẹ hundote dagbe lẹ na mí nado basi dohia yise mítọn tọn po gbèzeyiaga po. Aliho dopo he mẹ mí sọgan wà ehe te wẹ gbọn mahẹ tintindo to ohanjìjì agun tọn mẹ dali. Ehe yin adà titengbe sinsẹ̀n-bibasi mítọn tọn de, ṣigba e sọgan yin nukunpẹvi yido pọ́n po awubibọ po.
13 Ovi delẹ he ma ko sọgan hiawe nọ plọn hàngbe ohàn Ahọluduta lọ tọn he na yin jiji to opli lẹ ji to osẹ dopodopo mẹ lẹ do tamẹ. Yé nọ jaya nado jihàn to kọndopọmẹ hẹ mẹhe ko whẹ́n lẹ. Ṣigba, dile ovi lẹ to whinwhẹ́n vudevude dogọ, mẹwhinwhàn yetọn nado kọnawudopọ to ohàn Ahọluduta lọ tọn jiji mẹ sọgan depò. Mẹhe ko whẹ́n delẹ sọ nọ whleawu nado jihàn to opli lẹ ji. Ṣogan, hanjiji yin apadewhe sinsẹ̀n-bibasi mítọn tọn, kẹdẹdile lizọnyizọn kunnudegbe tọn yin apadewhe sinsẹ̀n-bibasi mítọn tọn do. (Efesunu lẹ 5:19) Mí nọ wà nuhe go mí pé lẹpo nado pà Jehovah to lizọnyizọn kunnudegbe tọn mẹ. Be mí ma nasọ pagigona ẹn gbọn ogbè mítọn lẹ zizedaga dali—vlavo to hànjiji mẹ kavi lala—yèdọ to ohàn pipà tọn jiji po ahundopo po mẹ ya?—Heblu lẹ 13:15.
14. Naegbọn owe he mí nọ plọn to opli agun tọn lẹ ji jẹna awuwiwle sọwhiwhe tọn jẹnukọn?
14 Mí sọ nọ hẹn pipà wá na Jiwheyẹwhe to whenuena mí na gblọndo mẹjlọdote tọn lẹ to adà opli mítọn lẹ tọn ji he nọ biọ mahẹ tintindo mẹplidopọ lẹ tọn. Ehe nọ biọ awuwledai. E nọ biọ whenu nado lẹnnupọndo adà he siso Ohó Jiwheyẹwhe tọn tọn ji. Apọsteli Paulu, Owe-wiwe lẹ plọntọ vivẹnunọ de, yọ́n ehe. E wlan dọmọ: “Ṣo! na adọkun, nuyọnẹn po zìnzìn Jiwheyẹwhe tọn po siso sọ!” (Lomunu lẹ 11:33) Tatọ whẹndo tọn lẹ emi, onú titengbe wẹ e yin dọ mì ni gọalọna hagbẹ whẹndo tọn dopodopo nado dín nuyọnẹn Jiwheyẹwhe tọn, dile eyin didohia to Owe-wiwe lẹ mẹ do. Klán ojlẹ delẹ dovo to oplọn Biblu tọn whẹndo tọn whenu nado basi zẹẹmẹ nuagokun lẹ tọn podọ nado gọalọna whẹndo towe nado wleawu na opli lẹ.
15. Ayinamẹ tẹlẹ wẹ sọgan gọalọna mẹde nado na gblọndo to opli lẹ ji?
15 Eyin hiẹ jlo nado na gblọndo gbọzangbọzan to opli lẹ ji, naegbọn hiẹ ma do wleawuna nuhe hiẹ jlo nado dọ lẹ jẹnukọn? Zẹẹmẹ gaa lẹ mayin dandan gba. Wefọ Biblu tọn he sọgbe de hihia po nujikudo po kavi hogbe kleun heyin awuwlena ganji lẹ didọ sọn ahun mẹ wá na yin pinpẹn etọn yọnẹn. Wẹnlatọ delẹ nọ biọ to anademẹtọ lọ si nado dike e ni na gblọndo tintan hukan tangan de tọn, na yé ni ma do gbọ̀ dotẹnmẹ hundote lọ nado basi dohia yise yetọn tọn go.
Mayọndenọ Lẹzun Nuyọnẹntọ
16, 17. Ayinamẹ tẹwẹ mẹho dopo na devizọnwatọ lizọnyizọnwiwa tọn de, podọ naegbọn e do tindo kọdetọn dagbe?
16 To opli Kunnudetọ Jehovah tọn lẹ tọn ji, mí nọ saba yin finflin nado hia Ohó Jiwheyẹwhe tọn egbesọegbesọ. Mọwiwà yin kọfanamẹnu. E sọ nọ gọalọna mí nado basi nudide nuyọnẹn tọn lẹ, nado basi vọjladona oblọ gbẹtọ-yinyin tọn lẹ, nọavunte sọta whlepọn lẹ, podọ nado vọ́ jlẹkajininọ gbigbọmẹ tọn mítọn gọyí eyin mí ko ze afọdide de to aliho he ma sọgbe mẹ.—Psalm 19:7.
17 Mẹho agun tọn numimọnọ lẹ tin to aṣeji nado wleawuna ayinamẹ Owe-wiwe lẹ tọn heyin hinhẹn sọgbe hẹ nuhudo mítọn lẹ. Nuhe mí dona wà lẹpo wẹ nado ‘dọ̀n ẹn’ gbọn ayinamẹ he sinai do Biblu ji yetọn dindin dali. (Howhinwhẹn lẹ 20:5) To gbèdopo jọja devizọnwatọ lizọnyizọnwiwa zohunhunnọ de kàn ayinamẹ lẹ se mẹho de do lehe e sọgan lẹzun mẹhe yọn-na-yizan dogọ to agun lọ mẹ do ji. Mẹho lọ, he yọ́n jọja sunnu lọ ganji, hùn Biblu etọn do 1 Timoti 3:3 mẹ, ehe dọ dọ sunnu dide lẹ dona yin ‘lẹnpọn dagbenọ.’ E gbọn homẹdagbe dali dlẹnalọdo aliho lẹ he mẹ jọja sunnu lọ sọgan do lẹnpọn dagbenọ-yinyin hia te to haṣinṣan etọn hẹ mẹdevo lẹ mẹ. Be mẹmẹsunnu jọja lọ yin homẹhẹngblena gbọn ayinamẹ tlọlọ he e mọyi lọ dali wẹ ya? Paali! E basi zẹẹmẹ dọ, “mẹho lọ yí Biblu zan, enẹwutu yẹn yọnẹn dọ ayinamẹ lọ to wiwá sọn Jehovah dè.” Devizọnwatọ lizọnyizọnwiwa tọn lọ yí ayinamẹ lọ do yizan mẹ po homẹhunhun po bosọ to nukọnyiyi dagbe tindo.
18. (a) Etẹwẹ gọalọna Klistiani jọja dopo nado nọavunte sọta mẹtẹnpọn to wehọmẹ? (b) Wefọ Biblu tọn tẹlẹ wẹ hiẹ nọ flin to whenuena hiẹ pannukọn mẹtẹnpọn?
18 Ohó Jiwheyẹwhe tọn sọgan sọ gọalọna jọja lẹ ga nado “họ̀n na wantuntun yọpọ whenu tọn.” (2 Timoti 2:22) Jọja Kunnudetọ Jehovah tọn de he mọ gbedewema yí sọn wehọmẹ daho mẹ to agọe penugo nado nọavunte sọta whlepọn to owhe wehọmẹ yìyì tọn etọn lẹ blebu gblamẹ gbọn nulinlẹnpọndo wefọ Biblu tọn delẹ ji po yiyi yé zan po dali. E nọ saba lẹnnupọndo ayinamẹ lọ heyin kinkàndai to Howhinwhẹn lẹ 13:20 mẹ ji dọmọ: “Ewọ he to zọnlinzin hẹ nuyọnẹntọ na yọnnu in.” Po gbesisọ po, e yin sọwhiwhenọ nado wleawuna họntọnjiji hẹ mẹhe nọ na sisi nunọwhinnusẹ́n Owe-wiwe lẹ tọn kẹdẹ. E yihojlẹdohogo dọ: “Yẹn ma pọnte hugan mẹdevo depope gba. Eyin yẹn kọnawudopọ hẹ mẹhe to onú agọ̀ wà lẹ, yẹn na jlo nado hẹn homẹ họntọn ṣie lẹ tọn hùn, podọ enẹ sọgan dekọtọn do nuhahun mẹ.” Ayinamẹ Paulu tọn heyin kinkàndai to 2 Timoti 1:8 mẹ sọ gọalọna ẹn ga. E wlan dọmọ: “Hiẹ kuwinyan okunnu Oklunọ mítọn tọn blo, . . . ṣigba hiẹ ni yín mahẹtọ to nukunbibia wẹndagbe tọn lẹ mẹ.” To kọndopọmẹ hẹ ayinamẹ enẹ, ewọ gbọn adọgbigbo dali má nuyise sinai do Biblu ji etọn hẹ klasigbẹ́ etọn lẹ to dotẹnmẹ hundote he sọgbe lẹpo mẹ. Whedepopenu he ewọ yin azọ́ndena nado na linlin nùmẹ tọn hlan klasi lọ, e nọ de hosọ de he nọ na ẹn dotẹnmẹ nado na kunnudide nuyọnẹn tọn de gando Ahọluduta Jiwheyẹwhe tọn go.
19. Naegbọn jọja sunnu de ma penugo nado nọavunte sọta kọgbidinamẹ aihọn ehe tọn lẹ, ṣigba etẹwẹ na ẹn huhlọn gbigbọmẹ tọn?
19 Eyin e wá jọ bọ mí buali sọn ‘aliho dodowiwa tọn lọ’ ji janwẹ, Ohó Jiwheyẹwhe tọn sọgan gọalọna mí nado basi vọjlado na afọdide mítọn lẹ. (Howhinwhẹn lẹ 4:18) Jọja sunnu de he nọ nọ̀ Aflika plọn ehe tlọlọ. To whenuena dopo to Kunnudetọ Jehovah tọn lẹ mẹ basi dlapọn na ẹn, e kẹalọyi plọnmẹ Biblu de. E duvivi nuhe e to pinplọn tọn ṣigba to madẹnmẹ kọnawudopọ hẹ ogbẹ́ ylankan to wehọmẹ. To madẹnmẹ, e jai jẹ aliho gbẹzan mawé tọn de mẹ. “Ayihadawhẹnamẹnu ṣie to tuklado mi, podọ yẹn dona doalọtena opli lẹ yìyì,” wẹ e yigbe dọ. To godo mẹ, e jẹ opli lẹ yì ji whladopo dogọ. Jọja sunnu lọ basi zẹẹmẹ dò-denamẹ tọn ehe dọmọ: “Yẹn yọnẹn dọ whẹwhinwhẹ́n titengbe lọ na ehe lẹpo wẹ yindọ yẹn tin to huvẹ to gbigbọmẹ. Yẹn ma nọ basi oplọn mẹdetiti tọn gba. Enẹwutu wẹ yẹn ma sọgan nọavunte sọta mẹtẹnpọn. Enẹgodo yẹn jẹ Atọ̀họ̀-Nuhihọ́ Lọ Tọn po Réveillez-vous! po hia ji. Vudevude, yẹn gọ̀ huhlọn gbigbọmẹ tọn ṣie yí bosọ klọ́ gbẹzan ṣie wé. Ehe yin kunnudide dagbe de hlan mẹhe doayi diọdo he yẹn basi lẹ go. Yẹn yí baptẹm, podọ todin yẹn yin homẹhunnọ.” Etẹwẹ na huhlọn jọja sunnu ehe nado duto madogán agbasa tọn etọn lẹ ji? E gọ̀ huhlọn gbigbọmẹ tọn etọn mọyi, gbọn oplọn Biblu tọn mẹdetiti tọn, gbesisọ tọn dali.
20. Nawẹ jọja de sọgan nọavunte sọta mẹgbeyinyan Satani tọn gbọn?
20 Jọja Klistiani lẹ emi, mì tin to mẹgbeyinyan glọ to egbehe! Eyin mì na nọavunte sọta mẹgbeyinyan Satani tọn, mì dona nọ dù núdùdù gbigbọmẹ tọn to gbesisọmẹ. Psalmkantọ lọ, he e họnwun dọ e yin dẹpẹ de, mọnukunnujẹ ehe mẹ. E dopẹ́ na Jehovah na awuwiwlena Ohó etọn, na ‘sunnu jọja de nido sọgan klọ́ aliho etọn.’—Psalm 119:9.
Fidepope He Jiwheyẹwhe to Anadena Mí Yì, Mí na Nọ Hodo E
21, 22. Naegbọn mí ma dona wá tadona kọ̀n dọ aliho nugbo tọn ko sinyẹn gbau?
21 Jehovah deanana akọta Islaeli tọn sọn Egipti biọ Aigba Pagbe tọn lọ ji. Aliho he e dè sọgan ko taidi dehe sinyẹnawu bo mayin dandan tọn sọn pọndohlan gbẹtọ tọn mẹ. Kakati nado gbọn aliho he taidi dehe bọawu lọ, yèdọ aliho he tin to tlọlọ lọ gbọn Ohù Méditerranée pá, Jehovah plan omẹ etọn lẹ gbọn aliho danfafa awusinyẹnnamẹ tọn de ji. Ṣigba, ehe na taun tọn yin homẹdagbe to adà Jiwheyẹwhe tọn mẹ. Dile etlẹ yindọ e whègli, aliho ohù ji tọn lọ na ko hẹn Islaelivi lẹ gbọn aigba Filistininu kanylantọ lẹ tọn ji. Gbọn aliho devo dide dali, Jehovah hẹn omẹ etọn lẹ nado dapana yiyawu biọ nudindọ̀n mẹ hẹ Filistininu lẹ.
22 Mọdopolọ, aliho he ji Jehovah to mí plan gbọn to egbehe sọgan taidi nuhe sinyẹnawu to whedelẹnu. To osẹ dopodopo mẹ, mí nọ tindo todohukanji gigọ́ nuwiwa Klistiani tọn lẹ, he bẹ opli agun tọn lẹ, oplọn mẹdetiti tọn, po sinsẹ̀nzọn kunnudegbe tọn po hẹn. Aliho devo lẹ sọgan taidi dehe bọawu. Ṣigba eyin mí hodo anademẹ Jiwheyẹwhe tọn kẹdẹ wẹ mí na jẹ fie mí to azọ́nwa sinsinyẹn nado yì lọ. Enẹwutu, mì gbọ mí ni zindonukọn nado kẹalọyi nuplọnmẹ nujọnu tọn lẹ sọn Jehovah dè bosọ gbọṣi “ali jijlọ ji” kakadoi!—Psalm 27:11.
Be Hiẹ Sọgan Basi Zẹẹmẹ Ya?
• Na titengbe tọn naegbọn mí dona nọ yì opli Klistiani tọn lẹ to gbesisọmẹ?
• Etẹwẹ mẹjitọ lẹ sọgan wà nado gọalọna ovi yetọn lẹ nado dotoai to opli lẹ ji?
• Etẹwẹ yinyin todoaitọ dagbe de bẹhẹn?
• Etẹwẹ sọgan gọalọna mí nado na gblọndo to opli lẹ ji?
[Kanbiọ Oplọn Tọn Lẹ]
[Yẹdide to weda 16]
Opli Klistiani tọn lẹ yìyì nọ gọalọna mí nado hẹn azán Jehovah tọn do ayiha mẹ
[Yẹdide to weda 18]
Aliho voovo lẹ wẹ tin nado pà Jehovah to opli Klistiani tọn lẹ ji