Nuhe to E Go Gbọ̀ Gando Todaho New York Tọn Go
Nuhe to E Go Gbọ̀ Gando Todaho New York Tọn Go
OHIA heyin mimọ tofi ko yin didohia hezeheze to dopo to azọ́nhọ Ogbẹ́ Watchtower tọn lẹ go to Brooklyn, New York, sọn 1950 lẹ gbọ́n. Ali-gbọ̀ntọ lẹ, tomẹyitọ saditọ lẹ, po mẹdevo he jugbọn finẹ lẹ po nọ yin finflin nado hia Biblu egbesọegbesọ. Wekanhlanmẹ he bọdego lọ, heyin mimọyi sọn viyọnnu jọja Kunnudetọ de dè, do kọdetọn dagbe nuflinmẹ ehe tọn hia.
“Yẹn to hodọ hẹ klasi-gbẹ́ de do nuhe yẹn na jlo nado wà to whenuena yẹn na tọ́n sọn wehọmẹ daho ji. Yẹn jẹ hodọ gando Bẹtẹli go ji, yèdọ tatọ́-tẹnnọ Kunnudetọ Jehovah tọn lẹ tọn, podọ ewọ yin ojlo fọndotena taun. E dọna mi dọ emi ko nọ̀ Todaho New York tọn mẹ na gbẹzan emitọn lẹpo. Whẹndo etọn ma tindo ojlo to sinsẹ̀n mẹ sọmọ, ṣigba to afọnnu lẹpo he ewọ pọ́n fleṣenu hlan gbonu, ohia de tin he dọ dọ ‘Nọ Hia Ohó Jiwheyẹwhe Tọn Biblu Egbesọegbesọ.’ Enẹwutu e nọ hia Biblu etọn to afọnnu lẹpo whẹpo do tọ́n yì wehọmẹ.
“To whenuena e ko sẹtẹn sọn todaho lọ mẹ, e dọ dọ nuhe go emi gbọ̀ gando Todaho New York tọn go wẹ yindọ to whenuena emi fọ́n, emi ma gbẹsọ nọ mọ nuflinmẹ lọ nado hia Biblu emitọn gba. Ṣigba na ohia he tin to ohọ̀ Watchtower tọn lọ go tọn wutu, Biblu hihia ko lẹzun aṣa de, enẹwutu e zindonukọn nado nọ hia Biblu egbesọegbesọ.”
Etẹwẹ sọgan yin aliho he yọ́n hugan de nado bẹ jẹ azán lọ ji hugan hihia adà Ohó Jiwheyẹwhe tọn tọn de! To mọwiwà mẹ, matin ayihaawe hiẹ na wá yọ́n pinpẹn hogbe apọsteli Paulu tọn lẹ tọn dọmọ: “Owe wiwe . . . sọgan hẹn we zun nuyọnẹntọ hlan whlẹngán gbọn yise he tin to Klisti Jesu mẹ.”—2 Timoti 3:15-17.