Mí Yin Gbẹtọ Wunmẹ He Tindo Yise Lẹ

Todido Klistiani Tọn Mimá to Sénégal

WHÈVÍ ko yin núdùdù titengbe de sọn ojlẹ hohowhenu tọn lẹ mẹ. Na owhe fọtọ́n lẹ, gbẹtọ lẹ ko nọ hù whèví to ohù lẹ, otándò lẹ, po otọ̀ aihọn lọ tọn lẹ po mẹ. Delẹ to apọsteli Jesu Klisti tọn lẹ mẹ yin whèhutọ to Ohù Galili tọn ji. Ṣigba, Jesu ze whèhuhu wunmẹ devo donukọnna yé. Ehe wẹ whèhuhu gbigbọmẹ tọn he e mayin whèhutọ lọ lẹ kẹdẹ wẹ na mọaleyi sọn e mẹ gba ṣigba whèví lọ lẹ lọsu ga.

To kọndopọmẹ hẹ ehe, Jesu dọna whèhutọ lọ Pita dọmọ: “Sọn dinvie yì, hiẹ na wle gbẹtọ lẹ [gbẹ̀te, NW].” (Luku 5:10) Whèhuhu wunmẹ ehe to yinyin wiwà to egbehe to nuhe hugan aigba 230 lẹ ji, gọna Sénégal. (Matiu 24:14) Tofi “whèhutọ gbẹtọ lẹ tọn” egbezangbe tọn lẹ nọ gbọn adọgbigbo dali má todido Klistiani tọn yetọn hẹ mẹdevo lẹ.—Matiu 4:19.

Sénégal yin didoai do bẹbẹnu whèyihọ-waji Aflika tọn. E dlẹnkan sọn lẹdo danfafa yẹnkẹn tọn he pedo Sahara go to agewaji yì jẹ zungbo mimiọn lẹdo Casamance tọn lẹ mẹ to hùwaji. Sénégal yin aigba de he ji jẹhọn miyọnawu danfafa ji tọn nọ yìn gbọn gọna jẹhọn fifá, awumiọnnamẹ tọn Atlantique tọn. Hugan gbẹtọ livi ṣinẹnẹ wẹ nọ nọ̀ file. Tòmẹnu Sénégal tọn lẹ yin yinyọnẹn na walọ johẹmẹ tọn yetọn. Suhugan yetọn ma yigbe nado yin Klistiani gba. Susu yetọn yin lẹngbọhọtọ, to whenuena devo lẹ nọ yìn oyìn, kanklosọpóawenọ, po gbọgbọẹ lẹ po. Glesi lẹ tin ga, he nọ dó azín, sékànfun, po lẹsi po. Mọwẹ, podọ whèhutọ lẹ tin ga, he nọ hẹn odọ̀ gigọ́ whèví lẹ tọn wá sọn Ohù Atlantique tọn ji podọ sọn otọ̀ voovo susu devo he gbọn otò lọ gblamẹ lẹ ji. Azọ́nwhé whèhuhu tọn nọ yí adà titengbe de wà to ajọ́ho Sénégal tọn mẹ. Na taun tọn, núdùdù diyin akọta lọ tọn wẹ ceebu jën, yèdọ núdùdù vivi lẹsi, whèví, po omá lẹ tọn de po.

“Whèhutọ Gbẹtọ lẹ Tọn”

Nuhe hugan yẹwhehodọtọ zohunhunnọ Ahọluduta Jiwheyẹwhe tọn 863 wẹ tin to Sénégal. Whèhuhu gbigbọmẹ tọn bẹjẹeji tofi to fliflimẹ owhe 1950 lẹ tọn. Wekantẹn alahọ Watch Tower tọn de yin hùnhùn to Dakar, tatọ́-tònọ lọ tọn mẹ, to 1965. “Whèhutọ” mẹdehlan lẹ jẹ wiwá ji sọn otò dindẹn susu lẹ mẹ. Azọ́n “whèhuhu” tọn bẹjẹeji, podọ mimá todido Klistiani tọn jẹ nukọnzindo ji vudevude to Sénégal. To godo mẹ, azọ́nwatẹn alahọ tọn yọyọ lẹ yin gbigbá do Almadies, to gbonu Dakar tọn, bosọ yin kinklandowiwe hlan Jehovah to juin 1999. Ojlẹ ayajẹ tọn nankọtọn die!

Avùnnukundiọsọmẹ Alọkikẹyi Nugbo lọ Tọn

Gbẹtọ he wá sọn dodonu he gbọnvo tlala lẹ mẹ lẹ to yinyin dindọnsẹpọ to gbesisọmẹ, podọ delẹ ko yigbe dagbe hlan owẹ̀n todido tọn heyin mimọ to Ohó Jiwheyẹwhe tọn mẹ. Dile etlẹ yindọ mẹsusu ma tindo oyọnẹn Biblu tọn, yé nọ jaya nado yọnẹn dọ opagbe lẹ he Jehovah Jiwheyẹwhe do hlan yẹwhegán nugbonọ hohowhenu tọn lẹ na yin hinhẹndi to madẹnmẹ.

E nọ saba biọ adọgbigbo nado ze teninọ gligli na nunọwhinnusẹ́n Klistiani tọn lẹ, na titengbe tọn to whenuena e bẹ nuyiwa po aṣa whẹndo tọn lẹ po hẹn. Di apajlẹ, yọnnu-bibẹpli yin aṣa he gbayipe to Sénégal. Lẹnnupọndo whẹho dawe de tọn he tindo asi awe ji to whenuena e jẹ Biblu plọn ji. Be ewọ na tindo adọgbigbo lọ nado kẹalọyi nugbo Klistiani tọn bosọ sọgbe hẹ nubiọtomẹsi Owe-wiwe tọn nado yin asu yọnnu dopo kẹdẹ tọn ya? (1 Timoti 3:2) Podọ be ewọ na tẹdo asi ovu whenu tọn etọn, yèdọ yọnnu he e dà jẹnukọn lọ go ya? Enẹ wẹ yin nuhe e wà, podọ e to devizọnwa todin taidi mẹho zohunhunnọ de to dopo to agun daho he tin to lẹdo Dakar tọn lẹ tọn mẹ. Asi etọn tintan lọsu ko kẹalọyi nugbo lọ to pọmẹ hẹ ovi 12 etọn lẹ, 10 sọn asi etọn tintan dè podọ 2 sọn asi awetọ dai tọn dè.

Aliglọnnamẹnu devo na alọkikẹyi todido Klistiani tọn sọgan yin owe-mayọnhia. Be ehe dohia dọ mẹhe ma yọnwehia de ma sọgan kẹalọyi bosọ basi nugbo lọ wẹ ya? Paali. Lẹnnupọndo apajlẹ Marie tọn ji, yèdọ onọ̀ azọ́n sinsinyẹnwatọ ovi jọja ṣinatọ̀n tọn de. Po awuyiya po wẹ e mọ nujọnu-yinyin hodidọ do wefọ Biblu tọn de ji hẹ ovi jọja etọn lẹ to azán lẹpo gbè whẹpo yé nido tọ́n yì wehọmẹ bọ ewọ lọsu ni yì azọ́nmẹ. Ṣigba nawẹ e sọgan wà ehe gbọn, to whenuena e yindọ e ma sọgan hiawe?  To afọnnu fuu lẹpo, e nọ ze alọnuwe apomẹ tọn lọ Dogbigbapọnna Owe-wiwe Lẹ Egbesọegbesọ bo nọ ṣite to tòhomẹ-liho yẹnkẹn tọn lọ ji to ohọ̀ etọn nukọn. Dile gbẹtọ lẹ to jujuwayi, e nọ kanse yé eyin yé sọgan hiawe. To whenuena e mọ mẹde he sọgan, e nọ ze alọnuwe apomẹ tọn lọ jo bo nọ dọ po ovẹvivẹ po dọmọ: “Yẹn ma sọgan hiawe gba, enẹwutu be hiẹ sọgan jaale bo hia adà ehe na mi to egbehe ya?” E nọ dotoai po sọwhiwhe po na nuhihia lọ. Enẹgodo e nọ dopẹna aligbọntọ lọ bo nọ lẹkọyi họmẹ po awuyiya po nado tindo hodọdopọ zohunhun tọn de do wefọ lọ ji hẹ ovi etọn lẹ whẹpo yé nido tọ́n yì wehọmẹ!

Gbẹtọ Wunmẹ Lẹpo to Gbeyi

To Sénégal, gbẹtọ lẹ sọgan yin mimọ to aisinsin to tòhomẹ-liho lẹ ji bo to whèví, omá lẹ, kavi atin sinsẹ́n lẹ sà to ahì mẹ kavi sinai bo to gbọjẹ yí to atin baobab tọn daho de glọ bo to ataya nù, nudi tii amamú tọn he nọ vẹ́ de. Na gbemima nado má wẹndagbe lọ hẹ mẹhe yé dukosọ hẹ lẹpo, mẹmẹsunnu awe dọho hẹ dawe sẹ́kunọ de he to nubiọ to aliho ji. To nudidọ do e godo, yé dọmọ: “Mẹsusu nọ na we akuẹ ṣigba ma nọ nọte nado dọho gba. Míwlẹ ko wá nado dọho na we gando nude heyin nujọnu taun he gando sọgodo towe go.” E paṣa nubiọtọ lọ taun. “Mí na jlo nado kàn kanbiọ de sè we,” wẹ mẹmẹsunnu lọ lẹ zindonukọn dọ. “Etẹwẹ hiẹ lẹn he wutu yajiji do sù sọmọ to aihọn mẹ?” “Ojlo Jiwheyẹwhe tọn wẹ,” wẹ nubiọtọ lọ gblọn dọ.

Enẹgodo mẹmẹsunnu lọ lẹ lẹnnupọn hẹ ẹ sọn Owe-wiwe lẹ mẹ bosọ basi zẹẹmẹ Osọhia 21:4 tọn. Nubiọtọ lọ yin nuyiwadeji sisosiso gbọn owẹ̀n todido tọn ehe dali podọ gbọn nugbo lọ dali dọ mẹde tindo ojlo sọmọ to ewọ mẹ nado nọte bo dọhodo Biblu ji hẹ ẹ. Dasin gọ́ nukun etọn lẹ mẹ. Kakati dọ e ni biọ akuẹ, e vẹvẹna mẹmẹsunnu lọ lẹ nado bẹ akuẹ he e tindo to panu akuẹbibiọ tọn etọn mẹ lẹpo. E tẹkudeji sọmọ bọ ehe dọ̀n ayidonugo mẹhe to jujuwajei lẹpo tọn. Po awusinsinyẹn daho po wẹ mẹmẹsunnu lọ lẹ penugo nado diọlinlẹn na ẹn nado hẹn akuẹ etọn go. E yigbe to godo mẹ ṣigba tẹkudeji dọ yé ni dla emi pọ́n whla dopo dogọ.

Wehọmẹ alavọ tọn daho he tin to Dakar lọsu to yiyidogọna wiwle do odọ̀ whèhuhu gbigbọmẹ tọn mẹ. To finẹ wehọmẹvi amasinzọ́nwiwa tọn de he nọ yin Jean-Louis jẹ Biblu plọn ji. E kẹalọyi nugbo lọ po awuyiya po, klán gbẹzan etọn do wiwe hlan Jehovah, bosọ yin bibaptizi. Ojlo etọn wẹ nado sẹ̀n Jiwheyẹwhe to sinsẹ̀nzọn gbehosọnalitọ whenu-gigọ́ tọn mẹ, ṣigba e to vivi oplọn amasinzọnwiwa tọn etọn dù ga. Na gbemima he e ko basi hẹ otò he mẹ e tọ́n sọn wutu, e tin to dandan glọ nado dotana wepinplọn etọn lẹ. Ṣogan, e jẹ devizọnwa ji taidi gbehosọnalitọ alọgọtọ tọn to ojlẹ dopolọ mẹ. Ojlẹ vude to gbedewema yíyí etọn taidi dotozọ́nwatọ he pegan de godo, e yin oylọ basina nado wadevizọn to owhé Bẹtẹli tọn daho de gbè to Aflika taidi doto whẹndo lọ tọn. Dawe jọja devo heyin kosọdu hẹ to Wehọmẹ Alavọ Dakar tọn mẹ lọsu to devizọnwa todin hẹ whẹndo Bẹtẹli otò etọn mẹ tọn.

Whèhuhu gbigbọmẹ tọn to Sénégal yin alemọyinu de na jide tọn. Owe Biblu tọn Kunnudetọ Jehovah tọn lẹ tọn yin pinpẹn etọn yọnẹn taun podọ e to yinyin bibasi do ogbè Wolof lẹdo lọ mẹ tọn mẹ todin. Wẹndagbe lọ sisè to ogbè yedetiti tọn mẹ ko na tuli omẹ ahunjijlọnọ susu nado yigbe po pinpẹn-nutọn-yinyọnẹn po. Po dona Jehovah tọn po, matin ayihaawe whèví yẹhiadonu tọn susu dogọ na yin wiwle, dile “whèhutọ gbẹtọ lẹ tọn” Sénégal tọn zohunhunnọ lẹ to nukọnzindo nado to todido Klistiani tọn má to yise po adọgbigbo po mẹ.

[Yẹdide Otò Tọn/Yẹdide to weda 31]

(Na nudọnamẹ gigọ́, pọ́n linlinnamẹwe)

SÉNÉGAL

[Yẹdide]

Todido Klistiani tọn mimá to Sénégal

[Asisa Yẹdide Tọn]

Mountain High Maps® Copyright © 1997 Digital Wisdom, Inc.