Nujijọ Vonọtaun de—Be Hiẹ na Tin to Finẹ Ya?

TO AZÁN ayidego tọn de ji hugan owhe 3 500 die wayi, Jehovah Jiwheyẹwhe dike bọ whédo Islaelivi lẹ tọn dopodopo heyin kanlinmọ to Egipti lẹ hù lẹngbọvu de kavi gbọgbọẹ de bosọ sá ohùn etọn do odòtin lẹ po aga ohọ̀n ohọ̀ yetọn lẹ tọn po go. To ozán enẹ mẹ, angẹli Jiwheyẹwhe tọn dasa ohọ̀ heyin hiadogona to aliho ehe mẹ lẹ ṣigba hù visunnu plọnji lẹ to owhé Egiptinu lẹ tọn lẹpo gbè. Enẹgodo Islaelivi lẹ jẹ mẹdekannu. To hùnwhẹ whemẹwhemẹ nujijọ enẹ tọn tẹnmẹ, Ju lẹ ko basi hùnwhẹ Juwayi tọn.

To afọdopolọji to whenuena Jesu Klisti dotana hùnwhẹ Juwayi tọn godotọn etọn hẹ apọsteli etọn lẹ godo, e ze núdùdù de dai he na yin nuflinmẹ na okú avọ́sinsan tọn etọn. E yí akla madotọ́n na apọsteli etọn lẹ bo dọmọ: “Yí, dù; ehe wẹ agbasa ṣie.” Enẹgodo e na yé kọfo ovẹn tọn de bosọ dọmọ: “Mì omẹ pó ni nù to e mẹ. Na ehe wẹ ohùn ṣie alẹnu yọyọ lọ tọn, he yè kọ̀n dai na omẹ susu hlan desẹ ylando tọn.” Jesu sọ dọmọ: “Mì nọ basi ehe to oflin ṣie mẹ.” (Matiu 26:26-28; Luku 22:19, 20) Enẹwutu Jesu degbena hodotọ etọn lẹ nado nọ basi hùnwhẹ okú etọn tọn ehe.

To owhe ehe mẹ hùnwhẹ okú Jesu tọn na wá aimẹ to mercredi 19 avril, to họyìyì owhè tọn godo. Kunnudetọ Jehovah tọn lẹ lẹdo aihọn pé na pli to ozán vonọtaun ehe mẹ nado basi Oflin ehe to aliho he mẹ Jesu biọ dọ e ni yin bibasi te. Hiẹ yin oylọ basina po zohunhun tlala po nado kọnawudopọ hẹ mí taidi hùnwhẹ basitọ lẹ. Jaale dindona to Kunnudetọ Jehovah tọn lẹ dè na ganmẹ taun lọ po nọtẹn opli lọ tọn po.