Be Hiẹ Flin Ya?

Be hiẹ ko yọ́n pinpẹn hihia zinjẹgbonu Atọ̀họ̀-Nuhihọ́ Lọ Tọn agọe tọn lẹ tọn ya? Eyọn, pọ́n eyin hiẹ sọgan na gblọndo kanbiọ he bọdego helẹ tọn:

• Etẹwẹ hẹn Noẹli bọawu nado yin alọkẹyi to Corée?

Nuyise hoho tọn de tin to Corée po aigba devo lẹ po ji gando yẹwhe adohọsa tọn de go he yè lẹndọ e nọ wá gbọn adogán lọ gblamẹ bo nọ hẹn nunina lẹ wá to décembre mẹ. Podọ ga, to Wẹkẹ-Whàn II godo, awhànfuntọ États-Unis tọn lẹ má nunina po alọgọnamẹnu lẹ po to ṣọṣi lẹdo lọ tọn lẹ mẹ.—15/12, weda 4, 5.

• To hẹndi Isaia 21:8 tọn mẹ, “nuhọ́tọ” tẹwẹ Jiwheyẹwhe ko tindo to ojlẹ mítọn mẹ?

Klistiani yiamisisadode gbọn gbigbọ dali lẹ, he to devizọnwa taidi pipli nuhọ́tọ tọn de, ko na avase gbẹtọ lẹ gando zẹẹmẹ nujijọ aihọn tọn he to dọdai Biblu tọn hẹndi lẹ go. Yé ko sọ gọalọna nuplọntọ Biblu tọn lẹ nado yọnẹn bosọ dapana sinsẹ̀n-nuplọnmẹ po nuyiwa he mayin Owe-wiwe tọn lẹ po.—1/1, weda 8, 9.

• Mẹnu lẹ wẹ yin “Hagbẹ Sinsẹ̀n Pologne Tọn lẹ”?

Yé yin pipli sinsẹ̀n tọn kleun de to owhe kanweko 16tọ po 17tọ po gblamẹ to Pologne he na tuli Biblu go titẹdo tọn podọ gbọnmọ dali gbẹ́ sinsẹ̀n-nuplọnmẹ ṣọṣi tọn he to gbigbayipe lẹ dai, taidi Atọ̀n-to-dopomẹ, baptẹm ovivu lẹ tọn, po olọnzomẹ po. To madẹnmẹ, yé yin homẹkẹndo sinsinyẹn bosọ yin hinhẹn po huhlọn po nado gbapé yì aigba devo lẹ ji.—1/1, weda 21-3.

• Naegbọn dọdai Biblu tọn lẹ dona yin jidedego kakati ni yin dọdai heyin didọ gbọn sọgodo-plọntọ lẹ kavi sunwhlẹvu-plọntọ lẹ dali lẹ?

Gbẹtọvi he ylọ yede dọ yẹwhegán lẹ sọawuhia nado yin mẹhe go yè ma sọgan dejido na yé gbẹ́ Jehovah po Biblu po dai wutu. Dọdai Biblu tọn lẹ kẹdẹ wẹ sọgan gọalọna we nado yọ́n lehe nujijọ lẹ sọgbe to lẹndai Jiwheyẹwhe tọn mẹ do, bo na hẹn alè wá na we podọ na whẹndo towe kakadoi.—15/1, weda 3.

• Etẹwẹ yin kunnudenu debọdo-dego delẹ he dohia dọ mí to gbẹnọ to azán godo tọn lẹ mẹ?

Mí sọgan mọ nugandomẹgo yinyan jẹgbonu sọn olọn mẹ Satani tọn lẹ. (Osọhia 12:9) Mí to gbẹnọ to ojlẹ “ahọlu” godo tọn heyin nùdego to Osọhia 17:9-11 mẹ tọn mẹ. Sọha Klistiani yiamisisadode nujọnu tọn lẹ to didepo, ṣogan e taidi dọ delẹ to yé mẹ na gbẹ́ pò to aigba ji to whenuena nukunbibia daho lọ na bẹjẹeji.—15/1, weda 12, 13.

• Whetẹnu wẹ owe Habbakuk tọn yin kinkàn, podọ naegbọn mí dona tindo ojlo to e mẹ?

Owe Biblu tọn ehe yin kinkàn to nudi 628 J.W.M. E bẹ whẹdida Jehovah tọn hẹn sọta Juda hohowhenu tọn podọ sọta Babilọni. E sọ dọho gando whẹdida sọn olọn mẹ wá he na wá titonu ylankan egbehe tọn ji to madẹnmẹ go.—1/2, weda 8.

• Fie to Biblu mẹ wẹ mí sọgan mọ ayinamẹ onọ̀ nuyọnẹntọ de tọn na asi nugopetọ de te?

Weta godo tọn owe Howhinwhẹn lẹ tọn, weta 31, yin asisa dagbe hugan de na ayinamẹ mọnkọtọn.—1/2, weda 30, 31.

• Naegbọn mí dona dopẹ́ dọ Jehovah ko de “ayiha Klisti tọn” hia mí? (1 Kọlintinu lẹ 2:16)

Gbọn kandai Wẹndagbe lẹ tọn gblamẹ, Jehovah ko hẹn mí penugo nado plọnnu gando linlẹn, numọtolanmẹ, nuyiwa, po nuhe tin to otẹn tintan mẹ na Jesu lẹ po go. Ehe sọgan gọalọna mí nado tin taidi Jesu, na titengbe tọn to nùzindonuji he mí nọ ze do azọ́n ogbẹ̀ whlẹngán tọn yẹwhehodidọ tọn ji mẹ.—15/2, weda 25.

• Be Jiwheyẹwhe nọ na gblọndo odẹ̀ lẹ tọn to egbehe ya?

Mọwẹ. Dile etlẹ yindọ Biblu dohia dọ Jiwheyẹwhe ma nọ na gblọndo na odẹ̀ lẹpo, numimọ egbezangbe tọn lẹ dohia dọ ewọ nọ saba yigbe hlan mẹhe ko hodẹ̀ na homẹmiọnnamẹ po alọgọ po to whẹho lẹ taidi nuhahun alọwle tọn lẹ dididẹ mẹ.—1/3, weda 3-7.

• Etẹwẹ mí sọgan wà nado mọ hlọnhlọn Jiwheyẹwhe tọn yí?

Mí sọgan biọ ẹ to odẹ̀ mẹ, ganjẹ Biblu go na hlọnhlọn gbigbọmẹ tọn, bosọ yin hinhẹn lodo gbọn gbẹdido Klistiani tọn gblamẹ.—1/3, weda 15, 16.

• Nawẹ mẹjitọ lẹ sọgan gọalọna ovi yetọn lẹ nado mọaleyi dogọ sọn opli Klistiani tọn lẹ mẹ gbọn?

Yé sọgan gọalọna ovi yetọn lẹ nado nọ nukle, vlavo nado dike yé ni damlọn jẹnukọn. Ovi lẹ sọgan yin tulina nado basi “kandai lẹ,” taidi nado basi ohia do wema ji to whedepopenu he hogbe kavi yinkọ heyin jijẹakọhẹ lẹ yin yiyizan.—15/3, weda 17, 18.

• Etẹwẹ yin onú delẹ he mí sọgan plọn sọn apajlẹ Job tọn mẹ?

Job ze haṣinṣan etọn hẹ Jiwheyẹwhe do otẹn tintan mẹ, mayin mẹnukuntahopọntọ to nuyiwa hẹ gbẹtọvi hatọ lẹ mẹ gba, dovivẹnu nado yin nugbonọ hlan alọwlemẹ etọn, do ahunmẹdunamẹ hia na gbigbọnọ-yinyin whẹndo etọn tọn, bosọ doakọnnanu po nugbonọ-yinyin po to whlepọn glọ.—15/3, weda 25-7.

• Be Biblu bẹ wekun he tindo zẹẹmẹ he whlá he nọ namẹ wuntuntun do owẹ̀n he ma tindo zẹẹmẹ lẹ ji hẹn wẹ ya?

Lala. Alọsọakọ́n lẹ gando nuhe yin linlẹn taidi wekun he tindo zẹẹmẹ he whlá lẹ go sọgan sọ yin didọ gando owe aihọn tọn devo lẹ go domọ ga. Nuhe yin linlẹn nado yin wekun he tindo zẹẹmẹ to Biblu mẹ lẹ na lẹzun nuhe ma tindo zẹẹmẹ de gbọn vogbingbọn lẹ to wekun alọnuwe-hihia Heblu tọn lẹ mẹ dali.—1/4, weda 30, 31.