Be Hiẹ to Whẹsuna Dewe Hlan Mẹdevo lẹ Ya?

MÌ HÒ (video kavi hoyidokanji lọ)

Be Hiẹ to Whẹsuna Dewe Hlan Mẹdevo lẹ Ya?

‘Yẹn ma kiya na nuhe mẹdevo lẹ lẹn gba!’ To ojlẹ homẹgble kavi flumẹjijẹ tọn de whenu, vlavo hiẹ ko mọ dewe nado to hodidọ adọgbigbo tọn ehe dọ. Ṣigba to afọdopolọji he adi homẹgble tọn lọ ko yido, hiẹ sọgan tindo numọtolanmẹ awuvivo matindo sinsinyẹn tọn de. Etẹwutu? Na suhugan mítọn nọ yin ahunmẹduna na nuhe mẹdevo lẹ lẹn gando mí go na taun tọn wutu wẹ.

NA NUGBO tọn, mí dona yin ahunmẹduna gando numọtolanmẹ mẹdevo lẹ tọn go. Na titengbe tọn míwlẹ taidi Klistiani, heyin devizọnwatọ dide Jehovah Jiwheyẹwhe tọn lẹ, dona tindo ahunmẹdunamẹnu he sọgbe de gando lehe mẹdevo lẹ nọ pọ́n mí hlan do go. Hú popolẹpo, mí yin “omẹ pinpọn de hlan aihọn.” (1 Kọlintinu lẹ 4:9) To 2 Kọlintinu lẹ 6:3, 4 mẹ, mí mọ ayinamẹ he whèwhín apọsteli Paulu tọn dọmọ: “Ma hẹn mẹde dahli to onú depope mẹ, na devizọn mítọn ma nado yin nugblewhẹdo: ṣigba to onú lẹpo mẹ míwlẹ to whẹsuna míde di devizọnwatọ Jiwheyẹwhe tọn.”

Nalete, etẹwẹ e zẹẹmẹdo nado suwhẹna mídelẹ hlan mẹdevo lẹ? Be e zẹẹmẹdo nado nọ ze mídelẹ daga kavi dọ̀n ayidonugo he ma sọgbe wá mídelẹ po nugopipe mítọn lẹ po ji wẹ ya? Lala. Ṣigba e nọ biọ yido-yizan mẹ hogbe Pita tọn lẹ to 1 Pita 2:12 mẹ dọmọ: “Na owalọ mìtọn ni yin dagbe to [kosi] lẹ ṣẹnṣẹn; dọ . . . gbọn azọ́n dagbe mìtọn dali he yé na to pinpọn, na yé nido pagigona Jiwheyẹwhe to azán dlapọn tọn gbè.” Klistiani lẹ nọ suwhẹna yedelẹ gbọn didike na walọ yetọn ni dekunnu na ede dali! To godo mẹ, ehe nọ hẹn pipà wá, e mayin na míwlẹ gba, ṣigba na Jiwheyẹwhe. Etomọṣo, whẹsuna mídelẹ hlan mẹdevo lẹ sọgan sọ tindo alemọyi mẹdetiti tọn delẹ. Mì gbọ mí ni gbadopọnna adà atọ̀n he mẹ ehe sọgan sọawuhia nado yin nugbo na we te.

Taidi Alọwlemẹ Sọgodo Tọn De

Di apajlẹ, pọ́n whẹho alọwle tọn. Nunina de wẹ e yin sọn Jehovah Jiwheyẹwhe dè, yèdọ omẹ lọ “he mẹ yè ylọ oyín whédo he tin to olọn mẹ po aihọn mẹ lẹpo po tọn te.” (Efesunu lẹ 3:15) Vlavo ojlo towe wẹ e yin nado wlealọ to gbèdopo. Eyin mọwẹ, obá tẹ mẹ wẹ hiẹ to whẹsuna dewe taidi alọwlemẹ sọgodo tọn de jẹ? Mọwẹ, oyín nankọtọn wẹ hiẹ ko basi na dewe taidi Klistiani tlẹnnọ sunnu kavi yọnnu de?

Ehe nọ yin ahunmẹdunamẹnu titengbe de na whẹndo delẹ to aigba delẹ ji. Di apajlẹ, to Ghana, to whenuena omẹ awe do ojlo hia nado wlealọ hẹ yedelẹ, aṣa lọ wẹ yindọ asu po asi po sọgodo tọn lẹ na dọna mẹjitọ yetọn lẹ. To godo mẹ, ehelẹ na dọna hagbẹ whẹndo tọn devo lẹ. Enẹgodo whẹndo sunnu lọ tọn nọ jẹ dodinna jijọ yọnnu lọ tọn to lẹdo etọn mẹ ji. To whenuena mẹjitọ lọ lẹ tindo nujikudo gando gbesisọ-yinyin yọnnu lọ tọn go, yé na dọna whẹndo yọnnu lọ tọn gando ojlo visunnu yetọn tọn nado wlealọ hẹ viyọnnu yetọn go. Todin whẹndo yọnnu lọ tọn na dindona jijọ sunnu lọ tọn whẹpo do yigbe na alọwle lọ. Gbọnmọ dali oló Ghana tọn de dọ dọ, “Dindona sọn mẹhe dona yọnẹn lẹ dè whẹpo hiẹ nido biọ alọwle mẹ.”

Etẹwẹ dogbọn aigba Whèyihọ-waji tọn lẹ dali, to fie mẹdopodopo nọ yin dotẹnmẹ na to paa mẹ nado de alọwlemẹ yede titi tọn lẹ te? Etlẹ yin to finẹ, sunnu kavi yọnnu Klistiani he whèwhín de na yin nuyọnẹntọ nado dín whẹsunamẹ he sọgbe de sọn mẹhe yọ́n alọwlemẹ sọgodo tọn de dagbedagbe lẹ dè, taidi mẹjitọ lẹ po họntọn he whèwhín lẹ po. Sọgbe hẹ owe Aṣli Ayajẹ Whẹndo Tọn, yọnnu jọja de sọgan kanse dọ: “ ‘Oyín nankọtọn wẹ dawe ehe tindo? Mẹnu lẹ wẹ yin họntọn etọn? Be e nọ do mawazẹjlẹgo hia ya? Nawẹ e nọ yinuwa hẹ mẹhomẹ lẹ gbọn? Wunmẹ whẹndo tẹ tọn mẹ wẹ e tọ́n sọn? Nawẹ e nọ yinuwa hẹ yé do? Etẹwẹ yin walọyizan etọn dohlan akuẹ? Be e nọ ṣì ahàn sinsinyẹn zan wẹ? Be fifiẹtọ kavi zingidinọ wẹ e yin ya? Azọngban agun tọn tẹlẹ wẹ e tindo, podọ nawẹ e nọ penukundo yé go gbọn? Be yẹn sọgan na ẹn sisi sisosiso ya?’—Levitiku 19:32; Howhinwhẹn lẹ 22:29; 31:23; Efesunu lẹ 5:3-5, 33; 1 Timoti 5:8; 6:10; Titu 2:6, 7.” a

Mọdopolọ wẹ sunnu de na jlo nado dindona gando yọnnu Klistiani depope he ewọ to linlẹn nado wlealọ hẹ go do. Sọgbe hẹ Biblu, Boazi tindo ojlo mọnkọtọn de to Luti mẹ, yèdọ yọnnu de he e wlealọ hẹ to godo mẹ. To whenuena Luti kanse dọmọ: “Etẹwutu wẹ yẹn mọ nukundagbe to nukun towe mẹ, bọ hiẹ [sọ doayi yẹn go, NW], mimọ dọ jonọ de wẹ yẹn?” Boazi dọmọ: “Yè ko yí gigọ́ do do e hia mi, onú he hiẹ ko wà [lẹpo].” (Luti 2:10-12) Mọwẹ, e mayin dọ Boazi na edetiti doayi e go dọ Luti yin yọnnu nugbonọ, he klán ede dovo, po azọ́n sinsinyẹnwatọ de po wẹ gba ṣigba e sọ mọ nudọnamẹ dagbe lẹ yí sọn mẹdevo lẹ dè ga.

Mọdopolọ, walọyizan towe na tindo nugandomẹgo de do vlavo lehe mẹdevo lẹ pọ́n we hlan taidi alọwlemẹ he sọgbe de do ji. Nawẹ hiẹ to whẹsuna dewe hlan mẹdevo lẹ gbọn to whẹho ehe mẹ taun?

Taidi Mẹyidoazọnmẹ De

Azọ́nwatẹn yin lẹdo devo he mẹ walọyizan dagbe de go hinhẹn sọgan yinuwa na alemọyi towe te. Agbàwhinwhlẹn na azọ́n lẹ sọgan sinyẹn taun. Mẹyidoazọnmẹ heyin yinyọnẹn na tasinsinyẹn, whenugbigbọ whepoponu tọn, po nugbomadọ po lẹ nọ saba yin yinyan. Azọ́nwhé lẹ sọgan sọ do mẹyidoazọnmẹ numimọnọ lẹ te nado sọgan de akuẹzinzan pò. To whenuena mẹhe ma tindo azọ́n lẹ to azọ́n yọyọ lẹ dín, yé sọgan mọdọ azọ́nwhé lẹ nọ dindona sọn azọ́nmẹyimẹdotọ dai tọn lẹ dè nado yọ́n ninọmẹ azọ́nwiwa, walọyizan, po numimọ yetọn lẹ po tọn. Klistiani susu lẹ ko gbọn kọdetọn dagbe dali suwhẹna yedelẹ hlan azọ́nmẹyimẹdotọ lẹ gbọn walọyizan sisi tọn, nusísọ́ jlẹkaji tọn, walọyizan he sọgbe, po jẹhẹnu vonọtaun Klistiani tọn yetọn lẹ po dali.

Nugbodidọ yin jẹhẹnu mọnkọtọn de—yèdọ dehe nọ tin to otẹn tintan mẹ hugan na azọ́nmẹyimẹdotọ susu lẹ. Taidi apọsteli Paulu, mí jlo na ‘yin nugbonọ to onú lẹpo mẹ.’ (Heblu lẹ 13:18) To azọ́nwhé he nọ kùn sika de mẹ to Ghana, ajo-flinflin jijẹ yin linlin etọn na. Mẹnunọtọ de to gànkọntẹn lọ, heyin Kunnudetọ de, hẹn azọ́n etọn go to whenuena mẹdevo lẹ yin yinyan. Etẹwutu? Nukunpedonugotọ azọ́nwhé lọ tọn lẹ ko doayi nugbodidọ etọn go na owhe susu lẹ. Azọ́n sinsinyẹn wiwà po sisi nina aṣẹpipa po etọn lọsu sọ yin yinyọnẹn ganji. Mọwẹ, walọyizan dodowiwa tọn etọn hẹn azọ́n etọn dote!

Etẹwẹ yin onú devo delẹ he Klistiani de sọgan wà nado suwhẹna ede to azọ́n wiwà mẹ? Plọn nado yin azọ́nyọnẹntọ to azọ́n depope heyin nina we mẹ. (Howhinwhẹn lẹ 22:29) Nọ yí sọwhiwhe po ahundopo po do wazọ́n. (Howhinwhẹn lẹ 10:4; 13:4) Nọ yinuwa hẹ azọ́nmẹyimẹdotọ po mẹnunọtọ azọ́n towe tọn po to sisi mẹ. (Efesunu lẹ 6:5) Azọ́nmẹ yìyì do mẹwhenu, nugbodidọ, azọ́n dagbe wiwà, po azọ́n sinsinyẹn wiwà po yin jẹhẹnu lẹ he azọ́nmẹyimẹdotọ lẹ nọ yí nukun nuhọakuẹ tọn do pọ́n, podọ jẹhẹnu enẹlẹ sọgan gọalọna we nado mọ agbasazọ́n yèdọ etlẹ yin to whenuena azọ́n lẹ hán.

Lẹblanulọkẹyi Agun Tọn Lẹ

Todin hugan gbede pọ́n, nuhudo tin na sunnu he whèwhín lẹ nado yin nukọntọ to agun Klistiani tọn mẹ. Etẹwẹ yin whẹwhinwhẹ́n lọ? Isaia dọ dọdai dọmọ: “Hẹn tẹnmẹ gòhọ towe tọn gblo, bo gbọ̀ yé ni vlọn avọ̀dido aisintẹn towe tọn jẹgbonu.” (Isaia 54:2) To hẹndi dọdai ehe tọn mẹ, agun lẹdo aihọn pé Jehovah tọn to numimọ jideji tọn tindo zọnmii.

Enẹwutu eyin Klistiani sunnu de wẹ hiẹ yin, nawẹ hiẹ sọgan suwhẹna dewe gbọn taidi mẹde he pegan nado wadevizọn to otẹn mẹdide tọn de mẹ? Lẹnnupọndo apajlẹ jọja sunnu Timoti tọn ji. Luku na linlin dọ “mẹmẹsunnu he tin to Listla po Ikonioni po lẹ to dagbe” Timoti tọn dọ. Mọwẹ, gbọn walọ dagbe etọn dali, jọja sunnu ehe ko suwhẹna ede hlan mẹdevo lẹ to tòdaho voovo awe mẹ. Enẹwutu Paulu basi oylọna Timoti nado kọnawudopọ hẹ ẹ to lizọnyizọn tomẹyiyi tọn mẹ.—Owalọ lẹ 16:1-4.

Nawẹ sunnu de sọgan ‘pegan na azọ́ntẹn nugopọntọ tọn de’ to aliho he sọgbe, jijọ-di-Jiwheyẹwhe tọn mẹ gbọn to egbehe? Na nugbo tọn e mayin gbọn ajọ́jijla bibasi nado yin dide dali gba ṣigba gbọn awuwiwlena jẹhẹnu gbigbọmẹ tọn lẹ he nuhudo etọn tin na azọngban mọnkọtọn lẹ dali wẹ. (1 Timoti 3:1-10, 12, 13; Titu 1:5-9) Ewọ sọgan sọ dohia dọ emi “jlo azọ́n dagbe de” gbọn mahẹ gigọ́ tintindo to azọ́n yẹwhehodidọ po devi lẹ bibasi tọn po mẹ dali. (Matiu 24:14; 28:19, 20) Mẹhe suwhẹna yedelẹ taidi sunnu Klistiani nugopetọ lẹ nọ tindo ojlo nugbo tọn to dagbemẹ-ninọ mẹmẹsunnu gbigbọmẹ tọn yetọn lẹ tọn mẹ. Yé nọ hodo ayinamẹ apọsteli Paulu tọn dọmọ: “Mì nọ má hlan matindo mẹwiwe lẹ tọn [sọgbe hẹ nuhudo yetọn lẹ, NW]; mì jo mìde hlan johẹmẹ.” (Lomunu lẹ 12:13) Gbọn onú mọnkọtọn lẹ wiwà dali, sunnu Klistiani de sọgan ‘suwhẹna ede taidi lizọnyizọnwatọ Jiwheyẹwhe tọn’ nugbonugbo.

To Ojlẹ Lẹpo Mẹ

Whẹsuna mídelẹ hlan mẹdevo lẹ ma zẹẹmẹdo yẹnuwiwa kavi nado lẹzun “mẹhe to gbẹtọ nukunta dín” lẹ gba. (Efesunu lẹ 6:6) Yigodo-yinukọn, e zẹẹmẹdo whẹsuna mídelẹ hlan Mẹdatọ mítọn, Jehovah Jiwheyẹwhe, gbọn yíyí sọwhiwhe do hodo osẹ́n po nunọwhinnusẹ́n etọn lẹ po dali. Eyin hiẹ wleawuna gbigbọnọ-yinyin towe bosọ hẹn haṣinṣan towe hẹ Jehovah Jiwheyẹwhe lodo, mẹdevo lẹ na doayi nukọnyiyi lọ go to aliho he mẹ hiẹ nọ yinuwa hẹ hagbẹ whẹndo towe tọn lẹ, azọ́nwatọgbẹ́ lẹ, po Klistiani hatọ lẹ po mẹ te. Yé nasọ doayi dolilo po jlẹkajininọ towe po go, wuntuntun towe, nugopipe towe nado penukundo azọngban go, po whiwhẹ towe po go. Ehe na hẹn owanyi po sisi yetọn po wá na we podọ, dehe yin titengbe hugan, na hẹn we tindo alọkẹyi Jehovah Jiwheyẹwhe tọn na hiẹ suwhẹna dewe hlan mẹdevo lẹ wutu!

[Nudọnamẹ Odò Tọn]

a Yin zinzinjẹgbonu gbọn Watchtower Bible and Tract Society of New York, Inc. dali.

[Yẹdide to weda 19]

Mẹjitọ susu nọ gbọn nuyọnẹn dali dindona jijọ mẹhe visunnu kavi viyọnnu yetọn tindo ojlo nado wlealọ hẹ tọn

[Yẹdide to weda 20]

Mẹmẹsunnu de nọ suwhẹna ede na lẹblanulọkẹyi sinsẹ̀nzọn tọn lẹ gbọn mẹdevo lẹ tọn hihopọn dali

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN