Nunamẹ He Họakuẹ to Nukun Jehovah Tọn lẹ Mẹ

Wekanhlanmẹ he bọdego ehe yin mimọyi gbọn wekantẹn alahọ Kunnudetọ Jehovah tọn lẹ tọn he tin to Mozambique dali:

“Visunnu owhe-ṣinawe-mẹvi de wẹ yẹn yin. Yẹn gbẹ́ pò to wehọmẹ dokọ̀ tọn yì. Yẹn to akuẹ ehe he yẹn mọ sọn koklovi de yìnyìn mẹ dohlan. Yẹn sà ẹ yin Meticais 12 000 [dọla 1 Amelika tọn]. Yẹn dopẹna Jehovah na hinhẹn koklovi tintan he yẹn yìn pọ́n whẹ́n bo lẹzun koklosu de. Yẹn na jlo dọ nunina ṣie ni yin yiyizan na azọ́n Ahọluduta Jehovah tọn.

“Ayidonugo: Otọ́ ṣie wẹ gọalọna mi nado kàn wekanhlanmẹ ehe.”

Mẹdelẹ nọ kọ̀n alọtútlú dopọ hẹ mẹhe tindo agbasanu susugege lẹ. Ṣigba, to whenuena mí hia kandai Biblu tọn he gando asuṣiọsi he dlan “abọgan-kuẹ flinflin awe [he ma họakuẹ sọmọ, NW]” do adọkun potin mẹ, mí sọgan mọnukunnujẹemẹ dọ alọtútlú nọ yin jijlẹ, e mayin gbọn lehe e sù sọ dali gba, ṣigba gbọn mẹwhinwhàn ahun mẹ tọn he sọgbe dali.—Luku 21:1-4.

Jehovah nọ yọ́n pinpẹn nunina lẹpo tọn, he wá sọn ahun heyin whinwhàn gbọn owanyi dali mẹ mahopọnna lehe e whè sọ. Podọ e nọ dona mẹhe hodo apajlẹ alọtútlú etọn tọn gbọn ojlẹ, huhlọn, kavi nutindo agbasa tọn yetọn lẹ nina do ota Ahọluduta etọn tọn mẹ dali lẹ susugege.—Matiu 6:33; Heblu lẹ 6:10.