Lilatọ Ahọluduta Tọn lẹ Na Linlin

Gbẹzan Whẹndo Ayajẹnọ Dọ̀n Mẹdevo lẹ Wá Jiwheyẹwhe Dè

JEHOVAH dona Josẹfu po nuyọnẹn daho po gọna wuntuntun. (Owalọ lẹ 7:10) Taidi kọdetọn de, zinzin Josẹfu tọn “sọ yọ́n to nukun Falo tọn mẹ, podọ to nukun devi etọn lẹ tọn tọn mẹ.”—Gẹnẹsisi 41:37.

Mọdopolọ to egbehe, Jehovah nọ na omẹ etọn lẹ zinzin po wuntuntun po gbọn oplọn Biblu tọn gblamẹ. (2 Timoti 3:16, 17) Nuyọnẹn po wuntuntun po ehe nọ de sinsẹ́n dagbe lẹ tọ́n dile ayinamẹ sinai do Biblu ji to yinyin yiyizan. Walọyizan dagbe yetọn ko nọ saba ’sọawuhia nado yin dagbe to nukun mẹhe doayi e go lẹ tọn mẹ,’ dile numimọ he bọdego lẹ sọn Zimbabwe dohia do.

• Yọnnu de tindo kọmẹnu lẹ he yin Kunnudetọ Jehovah tọn lẹ. Dile etlẹ yindọ e ma yiwanna Kunnudetọ lẹ, e na pipà walọyizan yetọn, na titengbe tọn gbẹzan whégbè tọn yetọn. E doayi e go dọ asu po asi po lọ tindo haṣinṣan dagbe taun de podọ ovi yetọn lẹ yin tonusetọ. E doayi e go na taun tọn dọ asu lọ yiwanna asi etọn tlala.

Nuyise de he gbayipe to aṣa Aflikanu lẹ tọn delẹ mẹ wẹ yin dọ eyin asu de yiwanna asi etọn, asi lọ dona ko yí obó de zan nado “whiwhẹ” ewọ. Enẹwutu yọnnu lọ dọnsẹpọ asi Kunnudetọ lọ tọn bo kanse e dọmọ: “Be hiẹ sọgan jaale bo na mi obó he hiẹ zán na asu towe na asu ṣie nido yiwanna mi kẹdẹdile towe yiwanna we do ya?” Kunnudetọ lọ gblọn dọmọ: “Gbau, mọwẹ, yẹn na hẹn ẹn wá na we to osọ̀ whèmẹ.”

To wunkẹngbe, mẹmẹyọnnu lọ dla kọmẹnu etọn pọ́n po “obó” etọn po. Etẹwẹ yin onú lọ? Biblu wẹ, gọna owe Oyọnẹn He Nọ Planmẹ Sọyi Ogbẹ̀ Madopodo Mẹ. To dogbigbapọnna nudọnamẹ sọn owe Oyọnẹn tọn mẹ do hosọ lọ “Awuwlena Whẹndo He Nọ Gbògbéna Jiwheyẹwhe De” ji godo, e dọna yọnnu lọ dọmọ: “Ehe wẹ yin ‘obó’ lọ he asu ṣie po yẹn po yizan nado ‘whiwhẹ’ ode awetọ, podọ enẹwutu wẹ mí yiwanna ode awetọ tlala.” Oplọn Biblu tọn de bẹjẹeji, podọ yọnnu lọ yinukọn po awuyiya po jẹ obá yẹhiadonu klandowiwe etọn tọn bibasi hlan Jehovah gbọn baptẹm osin tọn dali kọ̀n.

• Gbehosọnalitọ titengbe awe heyin azọ́ndena hlan agun pẹvi de mẹ sẹpọ dogbó agewaji whèzẹtẹn-waji Zimbabwe po Mozambique tọn po ma tọ́n yì lizọnyizọn họndekọn-jẹ-họndekọn tọn mẹ na osẹ awe. Etẹwutu? Na gbẹtọ lẹ to yé dè wá nado dotoaina nuhe yé tindo nado dọ. Dopo to gbehosọnalitọ lọ lẹ mẹ dọ lehe ehe yì gbọn dọmọ: “Mí nọ basi gbejizọnlin na kilomẹtlu 15 nado deanana plọnmẹ Biblu whégbè tọn sẹmẹsẹmẹ tọn hẹ jlodotọ de. E ma nọ bọawu na mí nado jẹ lẹdo ehe mẹ. Mí dona zinzọnlin gbọn obọ́ mẹ, podọ mí dona dasá otọ̀-sisa he yí mẹ jẹ okọ̀. Ehe bẹ avọ̀ po afọpa mítọn lẹ po hinhẹn do ota mítọn lẹ hẹn, bo dasá otọ̀ lọ, podọ to enẹgodo sọ́nu whladopo dogọ to adà awetọ ji.

“Zohunhun mítọn yinuwado kọmẹnu jlodotọ lọ tọn lẹ ji. To mẹhe doayinugo lẹ mẹ wẹ nukọntọ titobasinanu sinsẹ̀n lẹdo lọ mẹ tọn de tin te. E dọna hodotọ etọn lẹ dọ: ‘Be mìwlẹ ma jlo nado yin zohunhunnọ taidi sunnu jọja awe enẹlẹ heyin Kunnudetọ Jehovah tọn lẹ ya?’ To wunkẹngbe, susu to hodotọ etọn lẹ mẹ wá owhé mítọn gbè nado dindona nuhewutu míwlẹ do yin linsinyẹntọ sọmọ. To yidogọmẹ, to osẹ awe he bọdego lẹ mẹ, mí tindo dlapọn-basinamẹtọ susu sọmọ bọ mí ma tlẹ tindo whenu nado wleawu núdùdù tọn na mídelẹ!”

Dopo to mẹhe dla owhé gbehosọnalitọ lọ lẹ tọn pọ́n to osẹ awe lọ lẹ whenu wẹ nukọntọ sinsẹ̀n tọn lọ. Lẹnnupọndo ayajẹ gbehosọnalitọ lọ lẹ tọn ji to whenuena e kẹalọyi oplọn Biblu whégbè tọn de!