Jehovah Klo Hugan Ahun Mítọn Lẹ

“OKLUNỌ tindo homẹhunhun do yé he dibusi i lẹ go,” wẹ psalm-kàntọ lọ wlan. Na nugbo tọn, Mẹdatọ lọ nọ jaya to ayidido gbẹtọvi devizọnwatọ etọn lẹ dopodopo go dile yé to vivẹnudo nado tẹdo nujinọtedo dodo tọn etọn lẹ go. Jiwheyẹwhe nọ dona omẹ nugbonọ etọn lẹ, nọ na tuli yé, bosọ nọ miọnhomẹna yé to ojlẹ ayimajai tọn lẹ mẹ. E yọnẹn dọ sinsẹ̀n-basitọ emitọn lẹ yin mapenọ, enẹwutu e nọ yin pọndohlan dagbenọ to nuhe e donukun sọn yé dè lẹ mẹ.—Psalm 147:11.

Mí sọgan nọ ma tindo awusinyẹnnamẹnu depope nado yise dọ Jehovah tindo owanyi daho na devizọnwatọ etọn lẹ to paa mẹ. Ṣigba, e taidi dọ mẹdelẹ nọ yin ahunmẹduna zẹjlẹgo gando nuṣiwa yedetiti tọn lẹ go sọmọ bọ yé nọ yin dududeji dọ Jehovah ma sọgan yiwanna yé pọ́n gbede. “Yẹn yin mapenọ hugan na Jehovah nado yiwanna mi,” wẹ yé sọgan dotana dọ. Na nugbo tọn, mímẹpo wẹ nọ tindo numọtolanmẹ agọ̀ lẹ sọn ojlẹ de mẹ jẹ devo mẹ. Ṣigba e taidi dọ mẹdelẹ nọ to avùn gbọzangbọzan tọn hò sọta numọtolanmẹ nuvọ́nọ-yinyin tọn.

Numọtolanmẹ Flumẹjijẹ Tọn Lẹ

To ojlẹ Biblu tọn lẹ mẹ sọha mẹdopodopo nugbonọ delẹ tọn jiya numọtolanmẹ flumẹjijẹ sinsinyẹn tọn. Job gbẹwanna gbẹninọ bosọ lẹndọ Jiwheyẹwhe ko gbẹ́ emi dai wẹ nkọtọn. Hanna, mẹhe lẹzun onọ̀ Samuẹli tọn, to ojlẹ de mẹ yin ayimajainọ sisosiso gando wẹnsinọ-yinyin etọn go bosọ viavi  vivẹvivẹ. Davidi “dokọdò susu,” podọ Epafloditu yin ayimajainọ na linlin awutu etọn tọn hẹn mẹmẹsunnu etọn lẹ blawu taun wutu.—Psalm 38:6; 1 Samuẹli 1:7, 10; Job 29:2, 4, 5; Filippinu lẹ 2:25, 26.

Etẹwẹ dogbọn Klistiani lẹ dali to egbehe? Vlavo awutu, yọnhopipo, kavi ninọmẹ mẹdetiti tọn devo lẹ glọnalina mẹdelẹ sọn nususu wiwà to sinsẹ̀nzọn wiwe mẹ dile yé sọgan jlo do. Ehe sọgan hẹn yé nado wá tadona lọ kọ̀n dọ yé ko hẹn Jehovah po yisenọ hatọ yetọn lẹ po jẹflumẹ. Kavi mẹdevo lẹ sọgan nọ gblewhẹdo yedelẹ gbọzangbọzan na nuṣiwa he ko wayi lẹ, bo nọ tindo ayihaawe eyin Jehovah ko jona yé. Vlavo mẹdevo lẹ he wá sọn dodonu whẹndo tọn sinsinyẹn lẹ mẹ nọ yin dududeji dọ yé ma jẹ nado yin owanyina gba. Nawẹ ehe yọnbasi gbọn?

Mẹdelẹ whẹ́n to whẹndo he mẹ gbigbọ he gbayipe lọ ma nọ yin owanyi tọn gba ṣigba ṣejannabi tọn, homọdọdomẹgo, po obu tọn po. Yé sọgan nọ ma yọ́n otọ́ de he nọ yiwanna yé sisosiso, he nọ dín dotẹnmẹ hundote lẹ nado na pipà po tuli po, he nọ ze nukun gbọn nuṣiwa flinflin lẹ ji bosọ nọ wleawu nado jona nuṣiwa he tlẹ yin sinsinyẹn lẹ, podọ zohunhun mẹhe tọn nọ hẹn whẹndo lọ blebu tindo numọtolanmẹ hihọ́ tọn de tọn gba. To whenuena e yindọ yé ma tindo otọ́ owanyinọ aigba ji tọn de pọ́n, yé sọgan mọ ẹn taidi nuhe sinyẹnawu nado mọnukunnujẹ nuhe e zẹẹmẹdo nado tindo Otọ́ owanyinọ olọn mẹ tọn de mẹ.

Di apajlẹ, Fritz wlan dọmọ: “Ovuwhenu po jọja whenu ṣie po yin nuyiwadeji sinsinyẹn gbọn jijọ owanyi matindo otọ́ ṣie tọn dali. a E ma nọ na pipà mẹ pọ́n gbede, podọ yẹn ma tindo numọtolanmẹ dindọnsẹpọ ẹ tọn pọ́n gbede gba. Na nugbo tọn, na suhugan ojlẹ lẹ tọn, yẹn nọ to budi na ẹn.” Taidi kọdetọn de, Fritz, he tin to owhe 50 etọn lẹ mẹ todin, gbẹsọ tindo numọtolanmẹ nugomape tọn lẹ. Podọ Margarette basi zẹẹmẹ dọmọ: “Mẹjitọ ṣie lẹ ma tindo numọtolanmẹ bo masọ nọ do owanyi hia gba. To whenuena yẹn jẹ Biblu plọn ji, e sinyẹnawuna mi nado yọ́n nuhe otọ́ owanyinọ de nọ taidi.”

Numọtolanmẹ mọnkọtọn lẹ, na whẹwhinwhẹ́n depope wutu, sọgan zẹẹmẹdo dọ devizọn mítọn hlan Jiwheyẹwhe to ojlẹ delẹ mẹ nọ yin whinwhàn, e mayin gbọn owanyi dali na titengbe tọn gba, ṣigba jẹ obá daho de mẹ gbọn whẹhuhu kavi obu dali. Dagbe hugan mítọn lẹ ma nọ taidi nuhe hẹn pekọ wá pọ́n gbede. Ojlo lọ nado hẹn homẹ Jehovah po yisenọ hatọ mítọn lẹ tọn po hùn sọgan hẹn mí tindo numọtolanmẹ lọ dọ mí ma penugo nado wà nuhe mí jlo nado wà lọ gba. Taidi kọdetọn de, mí sọgan gọ̀n ma jẹ yanwle mítọn lẹ kọ̀n, gblewhẹdo mídelẹ, bosọ tindo numọtolanmẹ flumẹjijẹ mlẹnmlẹn tọn.

Etẹwẹ sọgan yin wiwà? Vlavo mí dona flinnu mídelẹ gando lehe Jehovah yin awuvẹmẹtọ sọ go. Dopo to mẹhe mọnukunnujẹ adà gbẹtọ-yinyin owanyinọ Jiwheyẹwhe tọn ehe go wẹ apọsteli Johanu.

“Jiwheyẹwhe Klo Hugan Ahun Mítọn”

To vivọnu owhe kanweko tintan W.M., Johanu kanwe hlan yisenọ hatọ etọn lẹ dọmọ: “Podọ ehe mẹ wẹ mí yọnẹn te dọ, míwlẹ jọ sọn nugbo lọ dè, bo nasọ hẹn [ahun, NW] mítọn diun to nukọn etọn. Na eyin [ahun] mítọn gblewhẹdo mí, Jiwheyẹwhe klo [hugan ahun] mítọn bosọ yọ́n onú popo.” Etẹwutu wẹ Johanu wlan hogbe ehelẹ?—1 Johanu 3:19, 20.

Johanu yọnẹn hezeheze dọ e yọnbasi na devizọnwatọ Jehovah tọn de nado tindo numọtolanmẹ yinyin whẹgbledo to ahun mẹ tọn. Vlavo Johanu lọsu na edetiti ko tindo numọtolanmẹ mọnkọtọn lẹ pọ́n. Taidi dawe jọja de he tindo jijọ fifiẹ tọn, Johanu yin nugbẹna to ojlẹ delẹ mẹ gbọn Jesu Klisti dali na yinyin mẹhe nọ yinuwahẹ mẹdevo lẹ po numọtolanmẹ sinsinyẹn hugan po wutu. Na nugbo tọn, Jesu na Johanu po nọvisunnu etọn Jakobu po ‘yinkọ denamẹ lọ Boanege, he zẹẹmẹdo Visunnu Hẹviosò tọn lẹ.’—Malku 3:17; Luku 9:49-56.

To owhe 60 he bọdego lẹ mẹ, Johanu whiwhẹ bosọ lẹzun Klistiani jlẹkajinọtọ, owanyinọ, po lẹblanunọ de po. To ojlẹ he mẹ ewọ, taidi apọsteli he nọgbẹ̀ hugan lọ, kàn wekanhlanmẹ gbọdo etọn tintan, e yọnẹn dọ Jehovah ma nọ hẹn dopodopo devizọnwatọ etọn lẹ tọn nado dogbè nuṣiwa flinflin lẹ dopodopo tọn gba. Kakatimọ, ewọ yin Otọ́ zohunhunnọ, awuvẹmẹtọ, alọtlútọ, po mẹtọnhopọntọ de po, he nọ tindo owanyi sisosiso na mẹhe yiwanna ẹn bosọ nọ basi-sinsẹ̀n hlan ẹn to nugbo mẹ lẹpo. Johanu wlan dọmọ: “Jiwheyẹwhe wẹ owanyi.”—1 Johanu 4:8.

Jehovah Nọ Jaya Do Sinsẹ̀nzọn Mítọn Na Ẹn Ji

Jiwheyẹwhe yọ́n madogán jọwamọ tọn po awugbopo mítọn lẹ po, podọ e sọ nọ ze ehelẹ do  lẹnpọn mẹ. “Ewọ yọ́n didá mítọn; e flin dọ kọ́gudu wẹ mí,” wẹ Davidi wlan. Jehovah yọ́n nuyiwadomẹji he dodonu mítọn nọ tindo to hinhẹn mí lẹzun nuhe mí yin mẹ. Na nugbo tọn, ewọ yọ́n míwlẹ hugan lehe mílọsu lẹ yọ́n mídelẹ do.—Psalm 103:14.

E yọnẹn dọ suhugan mítọn lẹ na jlo nado yin mẹhe gbọnvo, ṣigba mí ma penugo nado duto mape mítọn lẹ ji. Ninọmẹ mítọn sọgan yin yiyijlẹdo enẹ heyin apọsteli Paulu tọn go, mẹhe wlan dọmọ: “Na dagbe he yẹn jlo yẹn ma wà, ṣigba ylankan he yẹn ma jlo, enẹ wẹ yẹn to wiwà.” Mímẹpo wẹ to mahẹ tindo to avùnhiho dopolọ mẹ. To nujijọ delẹ mẹ ehe sọgan dekọtọn do ahun whẹgbledomẹ tọn tintindo mítọn mẹ.—Lomunu lẹ 7:19.

Mì nọ flin ehe to whepoponu: Nuhe yin nujọnu hugan lehe mí nọ pọ́n mídelẹ hlan gbọn wẹ lehe Jehovah nọ pọ́n mí hlan do. To whedepopenu he ewọ mọ bọ mí to vivẹnudo nado hẹn homẹ etọn hùn, e mayin dọ e nọ yinuwa po pekọ homẹdagbe tọn po kẹdẹ wẹ gba ṣigba to ayajẹ mẹ ga. (Howhinwhẹn lẹ 27:11) Dile etlẹ yindọ nuhe mí wadotana sọgan taidi nuhe whè taun to nukun mídetiti tọn lẹ mẹ, ojlonọ-yinyin po mẹwhinwhàn dagbe mítọn po nọ hẹn ewọ jaya. E nọ pọnnu zẹ̀ nuhe mí wadotana go; e nọ tunwun nuhe mí jlo na wà; e yọ́n ojlo po linlẹn mítọn lẹ po. Jehovah sọgan yọ́n nuhe tin to ahun mítọn mẹ.—Jẹlemia 12:3; 17:10.

Di apajlẹ, susu Kunnudetọ Jehovah tọn lẹ tọn wẹ yin winyankutọ po mẹhe ma nọ gbàdo gbẹtọ mẹ to jọwamọ-liho lẹ po he ma nọ jlo na dọ̀n ayidonugo wá yedelẹ ji. Na omẹ mọnkọtọn lẹ, yẹwheho wẹndagbe lọ tọn didọ sọn whédegbè jẹ whédegbè sọgan yin avùnnukundiọsọmẹnu budonamẹ tọn de. Ṣogan, na yinyin whinwhàn gbọn ojlo nado sẹ̀n Jiwheyẹwhe podọ nado gọalọna kọmẹnu lẹ dali wutu, yèdọ winyankutọ lẹ lọsu tlẹ nọ plọn nado dọnsẹpọ kọmẹnu yetọn lẹ bosọ nọ dọho gando Biblu go. Yé sọgan lẹndọ onú vude wẹ yé wadotana, bọ numọtolanmẹ ehe sọgan yí ayajẹ yetọn sọn yé si. Ahun yetọn sọgan de linlẹn lọ tọ́n dọ lizọnyizọn gbangba tọn yetọn mayin nujọnu gba. Ṣigba Jehovah nọ jaya na jide tọn do vivẹnudido daho he omẹ mọnkọtọn lẹ nọ dó do sinsẹ̀nzọn yetọn ji mẹ. Humọ, yé ma sọgan yin nujikudonọ gando whenuena podọ fie okún nugbo lọ tọn heyin dido lẹ na wú, whẹ́n, bo de sinsẹ́n tọ́n te lẹ go gba.—Yẹwhehodọtọ 11:6; Malku 12:41-44; 2 Kọlintinu lẹ 8:12.

Kunnudetọ devo lẹ nọ jiya agbasamalo ojlẹ gaa tọn kavi yọnhopipo tọn. Na yewlẹ, opli lẹ yìyì to Plitẹnhọ Ahọluduta tọn mẹ to gbesisọmẹ sọgan lẹzun agbanpẹnmẹnu he bẹ awufiẹsa po magbọjẹ lẹ po hẹn. Todidoai na hodidọ de gando azọ́n yẹwhehodidọ lọ tọn go sọgan flin yé nuhe yé nọ wà dai po nuhe yé na gbẹsọ jlo nado wà po, ṣigba madogán ko glọnalina yé. Omẹ mọnkọtọn lẹ sọgan tindo numọtolanmẹ awufiẹsa whẹhuhu tọn lẹ na yé ma penugo nado hodo ayinamẹ lọ dile yé na jlo nado wà do wutu. Ṣogan, Jehovah na jide tọn nọ pọ́n nugbonọ-yinyin po akọ́ndonanu yetọn po hlan taidi nuhọakuẹ. Dile e na dẹnsọ bọ yé na yin nugbonọ, ewọ ma na wọnji kandai nugbonọ-yinyin yetọn tọn go gba.—Psalm 18:25; 37:28.

‘Hẹn Ahun Mítọn lẹ Diun’

To whenuena Johanu poyọnho, e dona ko mọnukunnujẹ nususu mẹ gando awuvẹmẹtọ-yinyin Jiwheyẹwhe tọn go. Flin dọ e wlan dọmọ: “Jiwheyẹwhe klo hú [ahun] mítọn bosọ yọ́n onú popo.” Humọ, Johanu na tuli mí nado “hẹn [ahun, NW] mítọn diun.” Etẹ dọ wẹ Johanu te dogbọn hogbe enẹlẹ dali?

Sọgbe hẹ Vine’s Expository Dictionary of Old and New Testament Words, hogbe nuyiwa Glẹki tọn heyin lilẹdogbedevomẹ do ‘hẹn diun’ zẹẹmẹdo “nado yí linlẹn didiọnamẹ zan, nado duto kavi hẹn sọgbe hẹ linlẹn mẹtọn, nado diọ linlẹn na.” To hogbe devo lẹ mẹ, nado hẹn ahun mítọn lẹ diun, mí dona duto ahun mítọn ji, kavi diọ linlẹn na ẹn nado yise dọ Jehovah yiwanna mí. Gbọnna?

Fritz, heyin nudego jẹnukọn to hosọ ehe mẹ, ko wadevizọn taidi mẹho de to dopo to agun Kunnudetọ Jehovah tọn lẹ tọn mẹ na nuhe hugan owhe 25 bo ko sọ mọdọ oplọn mẹdetiti tọn sọgan vọ́ ahun etọn hẹn deji gando owanyi Jehovah tọn go. “Yẹn nọ plọn Biblu po owe zinjẹgbonu mítọn lẹ po to gbesisọmẹ podọ po sọwhiwhe po. Ehe nọ gọalọna mi ma nado nọgbẹ̀ do nuhe ko wayi lẹ ji gba ṣigba nado tindo pọndohlan họnwun sọgodo jiawu mítọn tọn. To whedelẹnu, ojlẹ he juwayi ṣie lẹ nọ dotukla mi, bọ yẹn nọ lẹndọ Jiwheyẹwhe  ma sọgan yiwanna mi pọ́n gbede nkọtọn. Ṣigba, to paa mẹ, yẹn mọdọ oplọn gbesisọ tọn hẹn ahun ṣie lodo, hẹn yise ṣie whẹ́n deji, bosọ nọ gọalọna mi nado yin ayajẹnọ po jlẹkajinọtọ de po.”

Nugbo wẹ dọ, Biblu hihia po ayihamẹlinlẹnpọn po sọgan nọ ma diọ ninọmẹ taun mítọn. Ṣigba, e sọgan diọ aliho he mẹ mí nọ pọ́n ninọmẹ mítọn lẹ hlan te. Linlẹn lẹ yíyí sọn Ohó Jiwheyẹwhe tọn mẹ do ahun mítọn lẹ mẹ nọ gọalọna mí nado lẹnnupọn dile ewọ nọ wà do. Humọ, oplọn nọ hẹn mí penugo nado whẹn deji to nukunnumimọjẹ awuvẹmẹtọ-yinyin Jiwheyẹwhe tọn mẹ. Mí sọgan wá kẹalọyi vudevude dọ Jehovah ma nọ gblewhẹdo mí na lẹdo ovuwhenu tọn wutu gba, podọ e ma nọ gblewhẹdo mí na madogán mítọn lẹ gba. E yọnẹn dọ agbàn pinpẹn he suhugan mítọn lẹ hẹn—vlavo numọtolanmẹ kavi agbasamẹ tọn—ma nọ saba yin owhẹ̀ mítọn gba, podọ e nọ gbọn owanyi dali hò ehe pọ́n.

Etẹwẹ dogbọn Margarette, heyin nudego jẹnukọn dali? To whenuena e wá yọ́n Jehovah, Biblu pinplọn yin alemọyinu daho de na ewọ lọsu ga. Ewọ, taidi Fritz, dona vọ́ nulẹnpọndo nuhe yin pọndohlan etọn gando otọ́ de go ji. Odẹ̀ gọalọna Margarette nado hẹn nuhe e plọn gbọn oplọn dali lẹ lodo. “Nado bẹjẹeji yẹn nọ pọ́n Jehovah hlan taidi họntọn vivẹ de, to whenuena e yindọ yẹn tindo numimọ susu hẹ họntọn owanyinọ lẹ hugan lehe yẹn tindo hẹ otọ́ owanyinọ de do. Vudevude, yẹn plọn nado túntún numọtolanmẹ lẹ, ayihaawe tintindo lẹ, magbọjẹ lẹ, po nuhahun ṣie lẹ po jẹgbonu hlan Jehovah. Yẹn nọ dọho hẹ ẹ pludopludo to odẹ̀ mẹ, podọ to ojlẹ dopolọ mẹ nọ kọ̀n onú yọyọ he yẹn to pinplọn gando ewọ go lẹ dopọ. To ojlẹ vude godo, numọtolanmẹ ṣie lẹ na Jehovah wleawu jẹ obá mọnkọtọn de mẹ bọ na vlavo tọn wẹ yẹn nọ tindo nuhahun to pinpọn ewọ hlan taidi Otọ́ yiwanna ṣie mẹ,” wẹ Margarette dọ.

Túndote sọn Magbọjẹ Lẹpo Mẹ

Dile e na dẹnsọ bọ titonu ylankan, hoho ehe na gbọṣi aimẹ, mẹdepope ma sọgan lẹn nado vò sọn magbọjẹ lẹ si gba. Na Klistiani delẹ ehe zẹẹmẹdo dọ numọtolanmẹ magbọjẹ tọn kavi jimadedo-mẹdetiti go tọn sọgan nọ wá aimẹ gbọzangbọzan bosọ hẹn ayimajai wá. Ṣigba mí sọgan deji dọ Jehovah yọ́n mẹwhinwhàn dagbe mítọn po azọ́n sinsinyẹn he mí to wiwà to sinsẹ̀nzọn etọn mẹ po tọn. E ma na wọnji owanyi he mí dohia na oyín etọn gba.—Heblu lẹ 6:10.

To aihọn yọyọ he to dindọnsẹpọ to Ahọluduta Mẹssia tọn glọ lọ mẹ, gbẹtọvi nugbonọ lẹpo sọgan donukun nado yin tuntundote sọn agbàn pinpẹn titonu Satani tọn tọn lẹ glọ. Kọgbọ nankọtọn die enẹ na yin! To whenẹnu mí na tlẹ mọ kunnudenu dogọ lehe Jehovah yin awuvẹmẹtọ sọ tọn. Kakajẹ ojlẹ enẹ mẹ, mì gbọ mí ni yin hinhẹn deji dọ “Jiwheyẹwhe klo hú [ahun] mítọn bosọ yọ́n onú lẹpo.”—1 Johanu 3:20.

[Nudọnamẹ Odò Tọn]

[Yẹdide to weda 30]

Jehovah mayin nukọntọ hẹngogonọ sinsinyẹn de gba ṣigba Otọ́ zohunhunnọ, awuvẹmẹtọ, po mẹtọnhopọntọ de po

[Yẹdide to weda 31]

Ohó Jiwheyẹwhe tọn pinplọn nọ gọalọna mí nado nọ lẹnnupọn dile ewọ nọ wà do