Mì Tẹdo Nuplọnmẹ Jijọ-di-Jiwheyẹwhe Tọn Go Gligli
Mì Tẹdo Nuplọnmẹ Jijọ-di-Jiwheyẹwhe Tọn Go Gligli
“Yí ahun towe lẹpo do dotudo Jehovah go bo ma ganjẹ nukunnumọjẹnumẹ dewetiti tọn go blo. Yọ́n ẹn to aliho towe lẹpo mẹ, podọ ewọ nasọ jlọ omọ́ towe lẹ.”—Howhinwhẹn lẹ 3:5, 6, NW.
1. Nawẹ mí yin hunhundonuvo hlan oyọnẹn gbẹtọvi tọn hugan gbede pọ́n tọn gbọn?
TO EGBEHE, nudi linlinnamẹwe egbesọegbesọ tọn 9 000 wẹ nọ yin mimá lẹdo aihọn pé. To owhe dopodopo mẹ nudi owe yọyọ 200 000 wẹ nọ yin zinzinjẹgbonu to États-Unis kẹdẹ. Sọgbe hẹ sọha-yi-nanú dopo, to mars 1998, nudi weda livi 275 lẹ wẹ tin to Internet ji lẹdo aihọn pé. Sọha lọ yin didọ nado nọ to jideji weda livi donu 20 tọn lẹ tindo to osun dopodopo mẹ. Hugan gbede tọn pọ́n, wẹ gbẹtọ lẹ tindo nudọnamẹ do hosọ depope ji. Dile etlẹ yindọ ninọmẹ lọ tindo adà dagbe etọn lẹ, nudọnamẹ susugege mọnkọtọn lẹ ko sọ hẹn nuhahun lẹ wá ga.
2. Nuhahun tẹlẹ wẹ sọgan dekọtọn sọn nudọnamẹ susugege tintindo mẹ?
2 Mẹdelẹ ko lẹzun mẹhe nudọnamẹ nọ duahunmẹna hugan, bo nọ to pekọ na ojlo he ma nọ yin pekọhẹnwana pọ́n gbede heyin nado to yìyì afọsu-afọsi hẹ nujijọ lẹ to whenue yé nọ gbẹkọ nuhe yin nujọnu hugan lẹ go. Mẹdevo lẹ nọ bẹ nudọnamẹ vude pli gando adà nuyọnẹn gigẹdẹ tọn lẹ go podọ to enẹgodo nọ pọ́n yedelẹ hlan taidi azọ́nyọnẹntọ lẹ. Sinai do nukunnumọjẹnumẹ he tindo dogbó de ji poun, yé sọgan basi nudide titengbe lẹ he sọgan gbleawuna yedelẹ kavi na mẹdevo lẹ. Podọ owù he nọ tin-to-aimẹ to whepoponu lọ wẹ yinyin hunhundonuvo hlan nudọnamẹ lalo tọn kavi dehe ma sọgbe lẹ. Aliho dejidego de ma nọ saba tin nado dindona eyin nudọnamẹ susugege lọ lẹ sọgbe bosọ tin to jlẹkaji gba.
3. Avase tẹlẹ gando afọdidona nuyọnẹn gbẹtọvi tọn lẹ go wẹ yin mimọ to Biblu mẹ?
3 Tlintlindo dindin ko yin jijọ gbẹtọvi tọn de na ojlẹ dindẹn. Owù he tin to whenu susu hugan hinhẹngú to afọdidona nudọnamẹ he mayin nujọnu kavi awugblenamẹ tọn lẹ mẹ yin yinyọnẹn yigodo jẹ azán Ahọlu Sọlọmọni tọn lẹ gbè. E dọmọ: “Setonu: to owe susu pinplọn mẹ, opodo ma tin; owe susu hihia wẹ awuku agbasa tọn.” (Yẹwhehodọtọ 12:12) Owhe kanweko susu lẹ to godo mẹ apọsteli Paulu wlanwe hlan Timoti dọmọ: “Pọ́n enẹ he yè [yí do alọmẹ na we go, nọ dapana ohó ovọ́ po ohógblo po he nọ hẹn nuhe yin wiwe flu podọ sọn nudindọn he yè yí lalo do ylọ dọ ‘oyọnẹn’ lẹ kọ̀n. Na gbọn dohia oyọnẹn mọnkọtọn lẹ tọn bibasi dali mẹdelẹ ko buali sọn yise mẹ.” (1 Timoti 6:20, 21, NW ) Mọwẹ, Klistiani lẹ to egbehe dona dapana yinyin hunhundonuvo he mayin dandan tọn hlan linlẹn awugblenamẹ tọn lẹ.
4. Aliho dopo tẹ mẹ wẹ mí sọgan do tudido do Jehovah po nuplọnmẹ etọn lẹ po go hia te?
4 Omẹ Jehovah tọn lẹ nasọ wà dagbe ga nado setonuna hogbe Howhinwhẹn lẹ 3:5, 6 tọn lẹ dọmọ: “Yí ahun towe lẹpo do dotudo Jehovah go bo ma ganjẹ nukunnumọjẹnumẹ dewetiti tọn go blo. Yọ́n ẹn to aliho towe lẹpo ji, podọ ewọ na sọ jlọ omọ́ towe.” Tudido do Jehovah go bẹ gbigbẹ́ linlẹn depope he jẹagọdo Ohó Jiwheyẹwhe tọn hẹn, vlavo e wá sọn nulẹnpọn mídetiti tọn mẹ kavi enẹ heyin gbẹtọ hatọ mítọn tọn mẹ. Nado basi hihọ́na gbigbọnọ-yinyin mítọn, onú titengbe wẹ e yin nado plọn huhlọn nulẹnpọn tọn mítọn lẹ na mí nido sọgan yọ́n nudọnamẹ he sọgan gbleawunamẹ lẹ bo gbẹkọ yé go. (Heblu lẹ 5:14) Mì gbọ mí ni dọhodo asisa nudọnamẹ mọnkọtọn lẹ tọn delẹ ji.
Aihọn de He Tin to Huhlọn Satani Tọn Glọ
5. Etẹwẹ yin asisa dopo linlẹn awugblenamẹ tọn lẹ tọn, podọ mẹnu wẹ tin to godo na ẹn?
5 Aihọn tonudidọ tọn yin asisa dagbe de na linlẹn awugblenamẹ tọn lẹ hinhẹn gbayipe. (1 Kọlintinu lẹ 3:19) Jesu Klisti hodẹ̀ hlan Jiwheyẹwhe gando devi etọn lẹ go dọmọ: “Yẹn ma basi okanbiọ dọ, hiẹ ni fọ̀ yé sọn aihọn mẹ gba, ṣigba dọ hiẹ ni whlá yé sọn [omẹ ylankan lọ si, NW].” (Johanu 17:15) Jesu biọdọ devi etọn lẹ ni yin hihọ́ basina sọn “omẹ ylankan lọ si” to yinyọ́n nuyiwadomẹji he Satani tindo to aihọn mẹ tọn. Klistiani yinyin mítọn ma nọ whlá mí sọn nuyiwadomẹji ylankan aihọn ehe tọn lẹ mẹ na taun tọn gba. Johanu wlan dọmọ: “Míwlẹ sọ yọnẹn dọ Jiwheyẹwhe dè mí jọ sọn, aihọn lẹpo sọ mlọnai to omẹ ylankan lọ mẹ.” (1 Johanu 5:19) Na titengbe tọn to adà godo tọn azán godo tọn ehe whenu, e dona yin nukundo dọ Satani po aovi etọn lẹ po na hẹn aihọn gọ́ po nudọnamẹ awugblenamẹ tọn lẹ po.
6. Nawẹ aihọn ayidedai tọn sọgan hù numọtolanmẹ walọdagbe tọn gbọn?
6 E sọ yin nukundo ga dọ delẹ to nudọnamẹ awugblenamẹ tọn ehelẹ mẹ sọgan sọawuhia taidi nuhe ma nọ gbleawunamẹ. (2 Kọlintinu lẹ 11:14) Di apajlẹ, lẹnnupọndo lẹdo ayidedai tọn ji, to kọndopọmẹ hẹ nudohia televiziọn tọn lẹ, sinimoto lẹ, húnhiho, po owe zinjẹgbonu etọn lẹ po. Mẹsusu wẹ yigbe dọ to whẹho he to susu deji dogọ lẹ mẹ, ayidedai wunmẹ delẹ nọ ze nuyiwa mẹdèpo tọn lẹ daga, taidi fẹnnuwiwa, danuwiwa, po amasin adínọ ṣiṣizan po. To yinyin hunhundonuvo to tintan whenu hlan wunmẹ ayidedai tọn de he yido taun to nujinọtedo liho mẹ, gbẹtọ lẹ sọgan yin hinhẹn jọsi. Ṣigba yinyin hunhundonuvo hlan ẹn gbọzangbọzan sọgan hù numọtolanmẹ mẹde tọn. Mí ma dona pọ́n ayidedai de he nọ ze linlẹn awugblenamẹ tọn lẹ daga hlan pọ́n gbede taidi nuhe yin alọkẹyi kavi ma nọ gbleawunamẹ lẹ gba.—Psalm 119:37.
7. Nuyọnẹn gbẹtọvi tọn wunmẹ tẹwẹ sọgan de jidide mítọn to Biblu mẹ pò?
7 Sọ lẹnnupọndo asisa devo nudọnamẹ he sọgan gbleawunamẹ lẹ tọn ji—yèdọ linlẹn susugege he nọ yin zinzinjẹgbonu gbọn lẹnunnuyọnẹntọ po weyọnẹntọ delẹ he diọavunnukunsọ gbesisọ-yinyin Biblu tọn lẹ po dali. (Yijlẹdo Jakobu 3:15 go.) Nudọnamẹ mọnkọtọn lẹ nọ sọawuhia gbọzangbọzan to linlinnamẹwe titengbe po owe he gbayipe taun lẹ po mẹ, podọ e sọgan de jidide mítọn to Biblu mẹ pò. Mẹdelẹ nọ doawagun to huhlọn didepo na aṣẹpipa he Ohó Jiwheyẹwhe tọn tindo mẹ po hopàdọ he ma tindo dogbó lẹ po. Owù mọnkọtọn de tin-to-aimẹ to azán apọsteli lẹ tọn gbè, dile e họnwun do sọn hogbe apọsteli Paulu tọn lẹ mẹ dọmọ: “Mì nọ payi do mìde na mẹde ma nado yí [tamẹnuplọnmẹ, NW] po oklọ tata po do bẹ mì, gbọn otanhoho gbẹtọ tọn dali, gbọn ojọgbe aihọn tọn mẹ, ehe ma dile Klisti tọn te.”—Kọlọsinu lẹ 2:8.
Kẹntọ Nugbo lọ Tọn Lẹ
8, 9. Nawẹ atẹṣiṣi nọ do ede hia gbọn to egbehe?
8 Atẹṣitọ lẹ sọgan sọ ze owù devo donukọnna gbigbọnọ-yinyin mítọn. Apọsteli Paulu dọ dọdai dọ atẹṣiṣi na fọ́n to ṣẹnṣẹn mẹhe ylọ yede dọ Klistiani lẹ tọn. (Owalọ lẹ 20:29, 30; 2 Tẹsalonikanu lẹ 2:3) To hẹndi mẹ na ohó etọn lẹ, to okú apọsteli lẹ tọn godo, atẹṣiṣi daho de dekọtọn do awuwiwle Mẹylọhodotọklisti tọn mẹ. To egbehe, atẹṣiṣi daho de ma to aimẹ wá to omẹ Jiwheyẹwhe tọn lẹ ṣẹnṣẹn gba. Etomọṣo, omẹ vude delẹ ko klán sọn mí go, podọ mẹdelẹ to yé mẹ ko magbè do Kunnudetọ Jehovah tọn lẹ hinhẹngble ji gbọn lalo po nudọnamẹ agọ̀ lẹ hinhẹn gbayipe po dali. Sọha vude nọ wazọ́n hẹ pipli devo lẹ to agọjẹdonu heyin titobasina sọta sinsẹ̀n-bibasi wiwe ṣeke mẹ. To mọwiwà mẹ, yé nọ kọnawudopọ hẹ atẹṣitọ titengbe tintan lọ, yèdọ Satani.
9 Atẹṣitọ delẹ to aliho he to jijideji de mẹ to wunmẹ voovo linlinnamẹnu lẹ tọn yizan, gọna Internet, nado hẹn nudọnamẹ lalo tọn lẹ gbayipe gando Kunnudetọ Jehovah tọn lẹ go. Taidi kọdetọn de, to whenuena omẹ ahundoponọ lẹ basi dodinnanu biọ nuyise mítọn lẹ mẹ, yé sọgan wá dukosọ hẹ nujijla oklọ atẹṣitọ lẹ tọn. Yèdọ Kunnudetọ delẹ tlẹ ko gbọn mayọnẹn dali hùn yedelẹ do nùvo hlan nudọnamẹ awugblenamẹ tọn ehelẹ. To yidogọ mẹ, atẹṣitọ lẹ to whedelẹnu nọ tindo mahẹ to tito-to-whinnu televiziọn po ladio tọn lẹ po mẹ. Etẹwẹ yin nuyiwa nuyọnẹn tọn he dona yin hihodo to pọndohlan mẹ na ehe?
10. Etẹwẹ yin nuyiwa nuyọnẹn tọn lọ hlan nujijla oklọ atẹṣitọ lẹ tọn lẹ?
10 Apọsteli Johanu deanana Klistiani lẹ ma nado kẹalọyi atẹṣitọ lẹ biọ owhé yetọn lẹ gbè. E wlan dọmọ: “Eyin mẹdepope wá mì dè, bo ma hẹn oplọn he wá, mì yí ì do owhé mìtọn gbè blo, mì sọ hodẹ̀ ali dagbe tọn na ẹn blo: na ewọ he hodẹ̀ ali dagbe tọn na ẹn, yin mimátọ to azọ́n ylankan etọn mẹ.” (2 Johanu 10, 11) Didapana kọndopọ lẹpo hẹ agọjẹdomẹtọ ehelẹ na basi hihọ́na mí sọn nulẹnpọn gblezọn yetọn mẹ. Hùnhùn mídelẹ do nùvo hlan nuplọnmẹ atẹṣiṣi tọn lẹ gbọn wunmẹ nuyizan voovo hodọdopọ tọn lẹ gblamẹ sọgan gbleawunamẹ kẹdẹdile atẹṣitọ lọ lọsu yíyí do owhé mítọn lẹ gbè sọgan wà do. Mí ma dona dike tlintlindo dindin ni klọ mí biọ nuyiwa ylankan mọnkọtọn mẹ gbede pọ́n!—Howhinwhẹn lẹ 22:3.
To Ṣẹnṣẹn Agun lọ Tọn
11, 12. (a) Etẹwẹ yin asisa linlẹn awugblenamẹ tọn lẹ to agun owhe kanweko-tintan whenu tọn mẹ? (b) Nawẹ Klistiani delẹ gboawupo to titẹdo nuplọnmẹ jijọ-di-Jiwheyẹwhe tọn lẹ go gligli mẹ gbọn?
11 Sọ lẹnnupọndo asisa linlẹn awugblenamẹ tọn devo he yọnbasi lẹ ji. Dile e ma tlẹ tindo linlẹn nado plọnmẹ lalo do sọ, Klistiani klandowiwe de sọgan wleawuna jijọ hodidọ agbàagba tọn. (Howhinwhẹn lẹ 12:18) Na jijọ mapenọ-yinyin mítọn tọn wutu, mímẹpo wẹ na nọ waylando po odẹ́ mítọn po to whedelẹnu. (Howhinwhẹn lẹ 10:19; Jakobu 3:8) E họnwun dọ, to azán apọsteli Paulu tọn gbè, mẹdelẹ tin to agun lọ mẹ he gboawupo nado deanana odẹ́ yetọn bosọ tindo mahẹ to nudindọn nutitlọ tọn lẹ mẹ gando hogbe lẹ go. (1 Timoti 2:8) Mẹdevo lẹ tin he nọ lẹnnupọn do linlẹn yedetiti lẹ tọn ji zẹjlẹgo bo tlẹ sọ nọ yì jẹ obá avùnnukundidiọsọ aṣẹpipa Paulu tọn mẹ. (2 Kọlintinu lẹ 10:10-12) Gbigbọ mọnkọtọn nọ dekọtọn do nudindọn he mayin dandan tọn lẹ mẹ.
12 To whedelẹnu gbèmanọpọ ehelẹ nọ yiaga biọ ‘nudindọn ylankan gando nuhe mayin nujọnu sọmọ lẹ go’ mẹ, bo nọ hẹn jijọho agun lọ tọn gble. (1 Timoti 6:5; Galatianu lẹ 5:15) Gando mẹhe nọ hẹn nudindọn ehelẹ wá lẹ go, Paulu wlan dọmọ: “Eyin mẹdepope sọ plọn omẹ gbọnvo, bọ e masọ yí nuyọnẹn do ohó he pegan go, yèdọ ohó Jesu Klisti Oklunọ mítọn tọn, podọ do oplọn go, he di [mẹdezejo, NW] jijọ-di-Jiwheyẹwhe tọn; saklanọ wẹ ewọ, e masọ yọ́n onú de, adavo nado dosẹ́n hókanbiọ po avùn ohó tọn po, ehe mẹ nuvẹun, avùn, nùzinzan, azinyan ylankan nọ gbọn tọ́n jẹgbonu.”—1 Timoti 6:3, 4.
13. Etẹwẹ yin walọyizan suhugan Klistiani lẹ tọn to owhe kanweko tintan whenu?
13 Po homẹhunhun po, to ojlẹ apọsteli lẹ tọn lẹ mẹ suhugan Klistiani lẹ tọn wẹ yin nugbonọ bosọ ze ayidonugo yetọn do azọ́n wẹndagbe Ahọluduta Jiwheyẹwhe tọn tọn lilá ji. Yé hẹn alọnu ján to nukunpipedo “tọṣiọvi po asuṣiọsi lẹ po” go mẹ bosọ hẹn yede “madodiho sọn aihọn dè,” bo ma hẹn whenu yetọn gú do nudindọn ovọ́ lẹ ji gando hogbe lẹ go gba. (Jakobu 1:27) Yé dapana “ogbẹ́ ylankan” etlẹ yin to agun Klistiani tọn ṣẹnṣẹn nado sọgan basi hihọ́na gbigbọnọ-yinyin yetọn.—1 Kọlintinu lẹ 15:33; 2 Timoti 2:20, 21.
14. Eyin mí ma họ́ míde, nawẹ linlẹn he sọgbe lẹ didọtọn hlan ode awetọ sọgan gblezọn biọ nudindọn awugblenamẹ tọn lẹ mẹ gbọn?
14 Mọdopolọ, ninọmẹ heyin zẹẹmẹ basina to hukan 11 mẹ lẹ gbayipe to agun Kunnudetọ Jehovah tọn lẹ tọn mẹ to egbehe. Etomọṣo, mí na wà dagbe nado yọn yọnbasi he nudindọn ovọ́ mọnkọtọn lẹ sọgan hẹn wa. Na nugbo tọn, nuhe sọgbe wẹ e yin nado dọhodopọ do kandai Biblu tọn lẹ ji kavi yin pipaṣa gando adà voovo aihọn yọyọ dopagbe lọ tọn he ma ko yin didehia todin lẹ go. Podọ nudepope ma ylan to linlẹn lẹ didọna ode awetọ mẹ do whẹho mẹdetiti tọn lẹ ji, taidi nusísọ́ po aṣọdido po kavi nudide ayidedai tọn gba. Ṣigba, eyin mí lẹzun hẹngogonọ gando linlẹn mítọn lẹ go bosọ nọ gblehomẹ to whenuena mẹdevo lẹ ma kọngbedopọ hẹ mí, agun lọ sọgan dekọtọn do yinyin kinklan do whẹho he mayin nujọnu tọn lẹ ji mẹ. Nuhe bẹjẹeji taidi hodidọ he ma nọ gbleawunamẹ sọgan lẹzun awugblenamẹnu na taun tọn.
Hihọ́ Bibasina Nuhe Yè Ze do Alọmẹ na Mí
15. Obá tẹ mẹ wẹ ‘nuplọnmẹ aovi lẹ tọn lẹ’ sọgan gbleawuna mí to gbigbọ-liho jẹ, podọ ayinamẹ tẹwẹ yin nina to Owe-wiwe lẹ mẹ?
15 Apọsteli Paulu na avase dọmọ: “Mọ [ohó gbọdo, NW] ko dọ dodo dọ, to ojlẹ godo tọn lẹ mẹ mẹdelẹ na jai sọn yise mẹ, bo nasọ na otó [ohó gbọdo, NW] oklọ, po oplọn aovi tọn po.” (1 Timoti 4:1) Mọwẹ, linlẹn awugblenamẹ tọn lẹ nọ ze owù nujọnu tọn de dote. Po nukunnumọjẹnumẹ po, Paulu vẹvẹna họntọn vivẹ etọn Timoti dọmọ: “Timoti E, pọ́n enẹ he yè ze do alọmẹ na we go, nọ dapana ohó ovọ́ po ohógblo po he nọ hẹn nuhe yin wiwe flu podọ sọn nudindọn he yè yí lalo do ylọ dọ ‘oyọnẹn’ lẹ kọ̀n. Na gbọn dohia oyọnẹn mọnkọtọn lẹ tọn bibasi dali mẹdelẹ ko buali sọn yise mẹ.”—1 Timoti 6:20, 21, NW.
16, 17. Etẹwẹ Jiwheyẹwhe ko zedo alọmẹ na mí, podọ nawẹ mí dona basi hihọ́na ẹn gbọn?
16 Nawẹ míwlẹ sọgan mọaleyi sọn avase owanyinọ ehe mẹ gbọn to egbehe? Nude yin zizedo alọmẹ na Timoti—yèdọ nuhọakuẹ he dona yin nukunpedego bosọ yin hihọ́ basina de. Etẹwẹ e yin? Paulu basi zẹẹmẹ dọmọ: “Hẹn ohia ohó tọn he pegan lọ go gligli, ehe hiẹ ko sè to dè e, to yise po owanyi po mẹ he tin to Klisti Jesu mẹ. Onú [zedo alọmẹnamẹ, NW] dagbe he yè na hlan we pọ́n e go gbọn [gbigbọ wiwe] he nọ̀ nọ mí mẹ dali. (2 Timoti 1:13, 14) Mọwẹ, nuhe yin zizedo alọmẹ na Timoti bẹ “ohó he pegan,” yèdọ ‘oplọn he tin to kọndopọmẹ hẹ mẹdezejo jijọ-di-Jiwheyẹwhe tọn’ hẹn. (1 Timoti 6:3) To kọndopọmẹ hẹ hogbe ehelẹ, Klistiani lẹ to egbehe magbè nado basi hihọ́na yise yetọn po nugbo lẹpo he ko yin zizedo alọmẹ na yé lẹ po.
17 Hihọ́ bibasina nuhe yin zizedo alọmẹ na mí bẹ awuwiwlena onú mọnkọtọn lẹ taidi walọ dagbe Biblu pinplọn tọn po dẹ̀hiho gbọzangbọzan po hẹn, dile mí to azọ́n ‘heyin dagbe lẹ wà hlan mẹlẹpo, ṣigba na titengbe tọn hlan mẹhe gando mí go to yise mẹ lẹ.’ (Galatianu lẹ 6:10; Lomunu lẹ 12:11-17) Paulu dotuhomẹnamẹ yinukọn dogọ dọmọ: “Nọ hodo dodo, [mẹdezejo, NW] jijọ-di-Jiwheyẹwhe tọn, yise, owanyi, homẹfa, walọmimiọn. Nọ hoavùn dagbe yise tọn, yí alọ do ogbẹ̀ madopodo ji gligli ehe kọ̀n yè ylọ we do ga, bọ hiẹ ko sọ yigbe dagbe to kunnudetọ susu nukọn.” (1 Timoti 6:11, 12) Yizan hogbe mọnkọtọn lẹ tọn taidi “nọ hoavùn dagbe yise tọn” po “yí alọ do . . . [e] ji gligli” po gbọn Paulu dali hẹn ẹn họnwun dọ mí dona yí zohunhun po gbemima po do nọavunte sọta nuyiwadomẹji he nọ gbleawunamẹ to gbigbọ-liho lẹ.
Nuhudo lọ na Wuntuntun
18. Nawẹ mí sọgan do jlẹkajininọ Klistiani tọn hia to nudọnamẹ aihọn tọn lẹ dindọnsẹpọ mítọn mẹ gbọn?
18 Nugbo wẹ dọ, to avùn dagbe yise tọn hihò mẹ, nuhudo tin na wuntuntun. (Howhinwhẹn lẹ 2:11; Filippinu lẹ 1:9) Di dohia, e na yin nuhe ma sọgbe hẹ lẹnpọn dagbe ma nado tindo jidide to nudọnamẹ aihọn tọn lẹpo mẹ. (Filippinu lẹ 4:5; Jakobu 3:17) E mayin linlẹn gbẹtọvi tọn lẹpo wẹ jẹagọdo Ohó Jiwheyẹwhe tọn gba. Jesu basi alọdlẹndonu he mayin tlọlọ tọn hlan nuhudo lọ na awutunọ lẹ nado dín dotozọ́nwatọ he pegan de mọ—heyin azọ́nyinyọnẹn aihọn tọn de. (Luku 5:31) Mahopọnna wunmẹ nukunmahun nukunpedomẹgo amasinzọnwiwa azán Jesu tọn gbè tọn, ewọ yigbe dọ alemọyi delẹ tin he na yin mimọyi sọn alọgọnamẹ dotozọ́nwatọ de tọn mẹ. Klistiani lẹ to egbehe nọ do jlẹkajininọ hia to whẹho nudọnamẹ aihọn tọn lẹ mẹ, ṣigba nọ nọavunte sọta yinyin hunhundonuvo hlan mẹdepope he sọgan gbleawuna yé to gbigbọ-liho.
19, 20. (a) Nawẹ mẹho lẹ nọ yinuwa po wuntuntun po do to whenuena yé to alọgọna mẹhe nọ dọho he ma tindo nuyọnẹn lẹ? (b) Nawẹ agun lọ nọ yinuwa hẹ mẹhe tẹkudo nuplọnmẹ lalo tọn lẹ zizedaga ji gbọn?
19 Wuntuntun sọ yin onú titengbe ga to adà mẹho lẹ tọn mẹ to whenuena yé yin oylọ basina nado gọalọna mẹhe nọ dọho po nuyọnẹn matindo po lẹ. (2 Timoti 2:7) To whedelẹnu, hagbẹ agun tọn lẹ sọgan yin dindọn biọ nudindọn mẹ gando whẹho he mayin nujọnu po hopàdọ tọn lẹ po go. Nado basi hihọ́na pọninọ agun lọ tọn, mẹho lẹ dona yawu nado penukundo nuhahun mọnkọtọn lẹ go. To ojlẹ dopolọ mẹ, yé nọ dapana ayilinlẹn ylankan tintindo gando mẹmẹsunnu yetọn lẹ go bo ma nọ nọ̀ whlẹndo ji nado pọ́n yé hlan taidi atẹṣitọ lẹ gba.
20 Paulu basi zẹẹmẹ gbigbọ he mẹ alọgọ dona yin ninamẹ te tọn. E dọmọ: “Mẹmẹsunnu emi, yèdọ eyin yè wle mẹde to ylando depope mẹ, mì mẹhe yin gbigbọnọ lẹ ni hẹn omẹ mọnkọtọn gọ̀ do otẹn etọn mẹ to gbigbọ walọmimiọn tọn mẹ.” (Galatianu lẹ 6:1) To hodidọ gando Klistiani he to avùnho hẹ ayihaawe tintindo lẹ go tlọlọ mẹ, Juda wlan dọmọ: “Mì zindonukọn nado to lẹblanu dohia hlan mẹdelẹ he tindo ayihaawe; mì nọ whlẹn yé gán gbọn dindọ̀n yé jẹgbonu sọn miyọ́n lọ mẹ dali.” (Juda 22, 23, NW ) Nugbo wẹ dọ, eyin mẹde gbọṣi nuplọnmẹ lalo tọn lẹ zizedaga mẹ to nukọnamẹ gbọzangbọzan tọn lẹ godo, mẹho lẹ dona ze afọdide nuyiwa nujikudo tọn nado sọgan basi hihọ́na agun lọ.—1 Timoti 1:20; Titu 3:10, 11.
Nuhe Jẹna Pipà lẹ Yíyí do Gọ́ Ayiha Mítọn lẹ Mẹ
21, 22. Gando etẹ go wẹ mí dona yin nuṣinyantọ, podọ etẹwẹ mí dona yí do gọ́ ayiha mítọn lẹ?
21 Agun Klistiani tọn gbẹkọ hogbe awugblenamẹ tọn he nọ “dùgbà di apà vivó” lẹ go. (2 Timoti 2:16, 17; Titu 3:9) Ehe yin nugbo vlavo hogbe mọnkọtọn lẹ do “nuyọnẹn” aihọn tọn he nọ hẹnmẹ buali lẹ hia, nujijla oklọ atẹṣitọ lẹ tọn, kavi hodidọ he ma tindo lẹnpọn to agun lọ mẹ lẹ. Dile etlẹ yindọ ojlo he sọgbe nado plọn onú yọyọ lẹ sọgan yin alemọyinu do, tlintlindo dindin he mayin anadena sọgan hùn mí do nùvo hlan linlẹn awugblenamẹ tọn lẹ. Mí matin to zinvlu mẹ gando ayilinlẹn Satani tọn lẹ go gba. (2 Kọlintinu lẹ 2:11) Mí yọnẹn dọ ewọ to vivẹnu daho lẹ dó nado fẹayihasẹna mí na mí nido gbọjọ to sinsẹ̀nzọn mítọn hlan Jiwheyẹwhe mẹ.
22 Taidi lizọnyizọnwatọ dagbe lẹ, mì gbọ mí ni tẹdo nuplọnmẹ jijọ-di-Jiwheyẹwhe tọn go gligli. (1 Timoti 4:6) Na mí ni basi yizan dagbe ojlẹ mítọn tọn gbọn yinyin nuṣinyantọ gando nudọnamẹ he mí dè nado yí do ahun mẹ lẹ go dali. To whenẹnu mí ma na yawu yin whinwhàn gbọn nujijla oklọ tọn heyin gbigbọdo sọn Satani dè lẹ dali gba. Mọwẹ, mì gbọ mí ni to nulẹnpọndo “nudepope he yin nugbo, nudepope he yin yẹyi, nudepope he yin jijlọ, nudepope he yin wiwe, nudepope he yin owanyi, nudepope he do wẹndagbe; eyin jijọdagbe de tin, eyin pipà de tin.” Eyin mí yí onú mọnkọtọn lẹ do gọ́ ayiha po ahun mítọn lẹ po mẹ, Jiwheyẹwhe jijọho tọn na tin hẹ mí.—Filippinu lẹ 4:8, 9.
Etẹwẹ Mí Plọn?
• Nawẹ nuyọnẹn aihọn tọn sọgan ze owù de donukọnna gbigbọnọ-yinyin mítọn gbọn?
• Etẹwẹ mí sọgan wà nado basi hihọ́na mídelẹ sọn nudọnamẹ awugblenamẹ atẹṣitọ lẹ tọn mẹ?
• Hogbe wunmẹ tẹlẹ wẹ dona yin didapana to agun lọ gblamẹ?
• Nawẹ jlẹkajininọ Klistiani tọn nọ yin didohia gbọn to whenuena yè to nuyiwa hẹ nudọnamẹ susugege egbezangbe tọn lẹ?
[Kanbiọ Oplọn Tọn Lẹ]
[Yẹdide to weda 9]
Linlinwe po owe he diyin susu lẹ po nọ jẹagọdo nuhọakuẹ Klistiani tọn mítọn lẹ
[Yẹdide to weda 10]
Klistiani lẹ sọgan dọ linlẹn lẹ na ode awetọ to ma lẹzun hẹngogonọ mẹ