Sè Nuhe Gbigbọ Tindo Nado Dọ
Sè Nuhe Gbigbọ Tindo Nado Dọ
“Otó towe na sè ohó de to godo towe dọmọ, Ehe wẹ aliho, mì zinzọnlin to e mẹ, whenuena mì lẹ́ do adusi, podọ whenuena mì lẹ́ do amiyọn.”—Isaia 30:21.
1, 2. Nawẹ Jehovah ko dọho hẹ gbẹtọvi lẹ to whenuho gblamẹ gbọn?
LOPO Porto Rico tọn ji wẹ nuhe nọ má ogbè ladio tọn dopo gee he klo hugan to aihọn mẹ lọ tin te. Na owhe ao ao lẹ, lẹnunnuyọnẹntọ lẹ ko to linlẹn nado mọ nudọnamẹ lẹ yí sọn ogbẹ̀ he tin to gbonu agblò aigba ji tọn mẹ, gbọn nuyizan blibata ehe yiyizan dali. Ṣigba nudọnamẹ mọnkọtọn lẹ depope ma ko yin mimọyi gba. Nalete, po gbesisọ po, nudọnamẹ he họnwun lẹ ko tin sọn gbonu agblò gbẹtọvi tọn lẹ mẹ he mẹdepope to mí mẹ sọgan mọyi to ojlẹ depope mẹ—matin yizan nuyiwa gigẹdẹ lẹ tọn. Ehelẹ nọ wá sọn Asisa he yiaga tlala hugan lẹdo agblò aigba tọn depope he ji yè sọgan lẹnnupọndo tọn mẹ. Mẹnu wẹ yin Asisa hodọdopọ mọnkọtọn lẹ tọn, podọ mẹnu lẹ wẹ to mimọ ẹn yí? Etẹwẹ owẹ̀n lọ lẹ dọ?
2 Kandai Biblu tọn lẹ bẹ linlin nujijọ susu lẹ tọn hẹn to whenuena owẹ̀n he wá sọn olọn mẹ lẹ yin sisè hezeheze gbọn otó gbẹtọvi tọn lẹ dali. To whedelẹnu owẹ̀n ehelẹ nọ yin dido gbọn nudida gbigbọnọ he to devizọnwa taidi wẹnsagun Jiwheyẹwhe tọn lẹ dali. (Gẹnẹsisi 22:11, 15; Zekalia 4:4, 5; Luku 1:26-28) To nujijọ atọ̀n whenu, ogbè Jehovah lọsu titi tọn yin sisè. (Matiu 3:17; 17:5; Johanu 12:28, 29) Jiwheyẹwhe sọ dọho gbọn yẹwhegán gbẹtọvi tọn lẹ gblamẹ ga, yèdọ mẹhe susu yetọn lẹ wlan nuhe e gbọdo yé nado dọ lẹ tọn dai. To egbehe, mí tindo Biblu, he bẹ susu linlin heyin kinkàndai hodọdopọ ehelẹ tọn hẹn, gọna nuplọnmẹ Jesu po devi etọn lẹ tọn po. (Heblu lẹ 1:1, 2) Jehovah ko to nudọnamẹ lẹ na nudida gbẹtọvi tọn etọn lẹ na nugbo tọn.
3. Etẹwẹ yin lẹndai owẹ̀n Jiwheyẹwhe tọn tọn, podọ etẹwẹ yin nukundo sọn míwlẹ dè?
3 Owẹ̀n gbọdo ehe lẹpo sọn Jiwheyẹwhe dè do onú vude poun hia gando wẹkẹ yinukundomọ lọ go. Yé ze ayidonugo do whẹho heyin nujọnu hugan, he nọ yinuwado gbẹzan mítọn lẹ ji todin podọ to sọgodo. (Psalm 19:7-11; 1 Timoti 4:8) Jehovah nọ yí wẹndomẹ gbọdo lẹ zan nado dọ ojlo etọn namẹ podọ nado na mí anademẹ. Yé yin dopo to aliho he mẹ hogbe yẹwhegán Isaia tọn lẹ to yinyin hinhẹndi te dọmọ: “Otó towe na sè ohó de to godo towe dọmọ, Ehe wẹ aliho, mì zinzọnlin to e mẹ, whenuena mì lẹ́ do adusi, podọ whenuena mì lẹ́ do amiyọn.” (Isaia 30:21) Jehovah ma nọ hẹn mí po huhlọn po nado dotoaina “ohó” etọn gba. E pò to mí si nado hodo anademẹ Jiwheyẹwhe tọn bosọ zinzọnlin to aliho etọn ji. Na whẹwhinwhẹ́n enẹ wutu Owe-wiwe lẹ dotuhomẹna mí nado dotoaina hodọdopọ he wá sọn Jehovah dè lẹ. To owe Osọhia tọn mẹ, tulinamẹ lọ nado “sè nuhe gbigbọ to didọ” sọawuhia whla ṣinawe.—Osọhia 2:7, 11, 17, 29; 3:6, 13, 22.
4. Be e sọgbe hẹ lẹnpọn dagbe to azán mítọn gbè nado donukun dọ Jiwheyẹwhe ni dọho hẹ mí tlọlọ sọn olọn mẹ wẹ ya?
4 To egbehe, Jehovah ma nọ dọhodopọ hẹ mí tlọlọ sọn agblò olọn tọn mẹ gba. Etlẹ yin to ojlẹ Biblu tọn lẹ mẹ, hodọdopọ he yiaga hugan gbẹtọvi tọn ehelẹ yin nujijọ he ma gbayipe sọmọ lẹ, to whedelẹnu nọ dẹn na owhe kanweko susu lẹ. To whenuho gblamẹ, Jehovah nọ saba dọho hẹ omẹ etọn lẹ to aliho he mayin tlọlọ sọmọ lẹ mẹ. Enẹ wẹ yin whẹho lọ to azán mítọn gbè. Mì gbọ mí ni gbadopọnna aliho atọ̀n to ehe mẹ Jehovah nọ dọho hẹ mí te to egbehe.
“Owe Wiwe Lẹpo [Yin] Gbingbọ́n”
5. Etẹwẹ yin nuyizan titengbe Jehovah tọn na hodọdopọ to egbehe, podọ nawẹ mí sọgan mọaleyi sọn e mẹ gbọn?
5 Azọ́nwanu titengbe hugan hodọdopọ to Jiwheyẹwhe po gbẹtọvi lẹ po ṣẹnṣẹn tọn wẹ Biblu. E yin gbigbọdo gbọn Jiwheyẹwhe dali, podọ nuhe e bẹhẹn lẹpo wẹ sọawuhia nado yin alenu na mí. (2 Timoti 3:16) Biblu gọfla na apajlẹ gbẹtọ nujọnu tọn he yí ojlo mẹdekannujẹ yetọn zan nado basi dide vlavo nado dotoaina ogbè Jehovah tọn kavi lala. Apajlẹ mọnkọtọn lẹ flin mí nuhewutu e yin onú titengbe nado dotoaina nuhe gbigbọ Jiwheyẹwhe tọn to didọ. (1 Kọlintinu lẹ 10:11) Biblu sọ bẹ nuyọnẹn he yọn-na-yizan hẹn ga, bo nọ na mí ayinamẹ to ojlẹ lẹ mẹ whenuena mí pannukọn nudide bibasi gbẹ̀mẹ tọn lẹ. E nọ taidi dọ Jiwheyẹwhe tin to godo mítọn, bo to hodọ do otó mítọn mẹ dọmọ: “Ehe wẹ aliho, mì zinzọnlin to e mẹ.”
6. Naegbọn Biblu yiaga tlala hugan owe devo lẹpo depope he yin kinkàn?
6 Nado sọgan sè nuhe gbigbọ to didọ gbọn weda Biblu tọn lẹ gblamẹ, mí dona nọ hia ẹ to gbesisọmẹ. Biblu mayin owe kinkàn dagbe, he diyin, yèdọ dopo to owe susu he tin-to-aimẹ to egbehe lẹ mẹ poun gba. Biblu yin gbigbọdo gbọn gbigbọ dali bosọ bẹ linlẹn Jiwheyẹwhe tọn lẹ hẹn. Heblu lẹ 4:12 dọmọ: “Ohó Jiwheyẹwhe tọn tin to ogbẹ̀, e do huhlọn, bo dá hú ohí nùawenọ, e nọ sọ́ omẹ, yèdọ nado klán ayiha po gbigbọ po do voovo, agómẹ hupetẹn tọn po ojó ohú mẹ tọn po, ewọ sọ wẹ linlẹn ayiha tọn po ojlo ayiha tọn po yọnẹntọ.” Dile mí to Biblu hia, nuhe e bẹhẹn lẹ nọ sọ́ mí biọ linlẹn po mẹwhinwhàn taun ahun mẹ tọn mítọn lẹ po mẹ taidi ohí de nkọtọn, bo nọ de obá he mẹ gbẹzan mítọn lẹ sọgbe hẹ ojlo Jiwheyẹwhe tọn jẹ hia.
7. Naegbọn Biblu hihia yin onú titengbe, podọ nawẹ mí yin tulina nado nọ tindo mahẹ to e mẹ gbọzangbọzan sọ?
7 “Linlẹn ayiha mẹ tọn po ojlo ayiha tọn po” sọgan diọ dile ojlẹ to yìyì podọ dile mí yin nuyiwadeji gbọn numimọ mítọn lẹ dali to gbẹ̀mẹ—yèdọ awuvivi tọn po awusinyẹn tọn lẹ po. Eyin mí ma nọ plọn Ohó Jiwheyẹwhe tọn gbọzangbọzan, linlẹn, walọyizan, po numọtolanmẹ mítọn lẹ po ma nasọ tin to kọndopọmẹ hẹ nunọwhinnusẹ́n jijọ-di-Jiwheyẹwhe tọn lẹ ba. Enẹwutu, Biblu dotuhomẹna mí dọmọ: “Mì dindona mìde, eyin mì tin to yise mẹ; mì mọdona mìde dagbedagbe.” (2 Kọlintinu lẹ 13:5) Eyin mí na to nuhe gbigbọ to didọ lọ sè zọnmii, mí dona setonuna ayinamẹ lọ nado nọ hia Ohó Jiwheyẹwhe tọn egbesọegbesọ.—Psalm 1:2.
8. Hogbe apọsteli Paulu tọn tẹlẹ wẹ gọalọna mí nado gbeje mídelẹ pọ́n gando Biblu hihia go?
8 Nuflinmẹ titengbe de na Biblu hiatọ lẹ wẹ ehe: Nọ na ojlẹ he pé nado dike nuhe hiẹ hia ni biọ ahun towe mẹ! To vivẹnudido mẹ nado setonuna ayinamẹ lọ nado nọ hia Biblu egbesọegbesọ, mí ma na jlo nado mọ mídelẹ nado to whinwhlẹndo to weta susu lẹ hihia mẹ to ma mọnukunnujẹ nuhe mí hia mẹ gba. Dile etlẹ yindọ Biblu hihia to gbesisọmẹ yin onú titengbe, mẹwhinwhàn mítọn ma dona yin nado to yìyì afọsu-afọsi hẹ tito-to-whinnu de gba; mí dona tindo ojlo nujọnu tọn nado plọnnu dogbọn Jehovah po lẹndai etọn lẹ po dali. Gando ehe go, mí sọgan basi yizan dagbe hogbe apọsteli Paulu tọn lẹ na mẹdetiti gbigbejepọ́n. To wekanhlan Klistiani hatọ lẹ mẹ, e dọmọ: “Na ehe wutu wẹ yẹn do tin to oklota to Otọ́ . . . dè, na ewọ nido yí na mì, . . . na Klisti nido nọ̀ [ahun, NW] mìtọn mẹ gbọn yise dali; dọ le yè ko yí afọ mìtọn hẹnai, bosọ yí dodo mìtọn hẹnai to owanyi mẹ do, na mìwlẹ nido tunwun hẹ mẹwiwe lẹpo ga, onú he gbigblo, tedidi, sisosiso po ojiyiyi po yin; podọ nado yọ́n owanyi Klisti tọn, he sù hú nuyọnẹn, na mì nido gọ́ na gigọ́ Jiwheyẹwhe tọn lẹpo.”—Efesunu lẹ 3:14, 16-19.
9. Nawẹ mí sọgan wleawuna bosọ hẹn ojlo mítọn nado plọnnu sọn Jehovah dè siso deji gbọn?
9 Nugbo wẹ dọ, mẹdelẹ to mí mẹ to jọwamọ-liho ma nọ duvivi wehihia tọn, to whenuena mẹdevo lẹ yin wehiatọ zohunhunnọ lẹ. Ṣigba, mahopọnna ninọmẹ dopodopo mítọn lẹ tọn, mí sọgan wleawuna bosọ hẹn ojlo mítọn nado plọnnu sọn Jehovah dè siso deji. Apọsteli Pita basi zẹẹmẹ dọ mí dona tindo ojlo sinsinyẹn na oyọnẹn Biblu tọn, podọ ewọ yọnẹn dọ ojlo mọnkọtọn de sọgan yin awuwlena. E wlan dọmọ: “Di ovi yọyọ to anọ́nù, mì jlo oyìnnọ ohó lọ tọn he tin matin oklọ, na mì nido whẹ́n gbọn e dali jẹ whlẹngán.” (1 Pita 2:2) Mẹplọnlọ-dido-mẹdetiti go yin nujọnu eyin mí na ‘wleawuna ojlo’ na Biblu pinplọn. Kẹdẹdile mí sọgan wleawuna ojlo na núdùdù yọyọ de to didọ́ ẹ pọ́n whlasusu godo do, walọyizan mítọn dohlan wehihia po nupinplọn po sọgan diọ na dagbe eyin mí do mẹplọnlọ mídelẹ go nado hodo aṣa nuyiwa gbesisọ tọn de.
“Núdùdù . . . to Osaa Sisọ Mẹ”
10. Mẹnu lẹ wẹ wleawuna “afanumẹ nugbonọ nuyọnẹntọ” lọ, podọ nawẹ Jehovah to yé yizan gbọn to egbehe?
10 Aliho devo he Jehovah nọ yizan nado dọho na mí to egbehe yin didohia gbọn Jesu dali to Matiu 24:45-47 mẹ. To finẹ e dọho gando agun Klistiani tọn heyin amisisa yí do dè gbọn gbigbọ dali go—yèdọ “afanumẹ nugbonọ, nuyọnẹntọ” lọ ko yin dide nado wleawuna ‘núdùdù gbigbọmẹ tọn to osaa sisọ mẹ.’ Taidi mẹdopodopo lẹ, hagbẹ pipli ehe tọn lẹ yin ‘whédo’ Jesu tọn. Ehelẹ, to pọmẹ hẹ “gbẹtọ susugege” “lẹngbọ devo” lẹ tọn, nọ mọ tulinamẹ po anademẹ po yí. (Osọhia 7:9; Johanu 10:16) Suhugan núdùdù to osaa sisọ mẹ ehe tọn nọ wá to wunmẹ owe zinjẹgbonu lẹ tọn mẹ, taidi Atọ̀họ̀-Nuhihọ́ Lọ Tọn, Réveillez-vous!, po owe zinjẹgbonu devo lẹ po. Núdùdù gbigbọmẹ tọn dogọ nọ yin ninamẹ to wunmẹ hodidọ lẹ po wadohia lẹ tọn po mẹ to plidopọ agbegbe lẹ, plidopọ lẹ, po opli agun tọn lẹ po ji.
11. Nawẹ mí nọ dohia gbọn dọ mí dotoaina nuhe gbigbọ tindo nado dọ gbọn “afanumẹ, nugbonọ nuyọnẹntọ” lọ gblamẹ?
11 Nudọnamẹ ehelẹ he nọ yin awuwlena gbọn “afanumẹ nugbonọ, nuyọnẹntọ” lọ dali nọ yin awuwlena nado hẹn yise mítọn lodo bosọ plọn huhlọn nulẹnpọn tọn mítọn lẹ. (Heblu lẹ 5:14) Ayinamẹ mọnkọtọn lẹ sọgan yin to wunmẹ he gbloada mẹ nado sọgan na dotẹnmẹ dopodopo mítọn lẹ nado basi yọn-na-yizan mẹdetiti tọn. Sọn ojlẹ de mẹ jẹ devo mẹ, mí sọ nọ mọ ayinamẹ he gando adà tangan walọyizan mítọn lẹ tọn go yí. Walọyizan tẹwẹ mí dona tindo eyin mí to todoai na nuhe gbigbọ to didọ gbọn hagbẹ afanumẹ lọ tọn gblamẹ nugbonugbo? Apọsteli Paulu gblọn dọmọ: “Mì nọ setonuna mẹhe to nukọntọ yin to mì ṣẹnṣẹn lẹ bo nọ litai.” (Heblu lẹ 13:17, NW ) Nugbo wẹ dọ, mẹhe tito ehe bẹhẹn lẹpo wẹ yin gbẹtọ mapenọ lẹ. Etomọṣo, Jehovah nọ hùn homẹ to devizọnwatọ gbẹtọvi tọn etọn lẹ yiyizan mẹ, yèdọ dile yé tlẹ yin mapenọ sọ, nado deanana mí to ojlẹ opodo tọn ehe mẹ.
Anademẹ sọn Ayihadawhẹnamẹnu Mítọn Dè
12, 13. (a) Asisa anademẹ tọn devo tẹwẹ Jehovah ko sọ na mí? (b) Nuyiwadomẹji dagbe tẹwẹ ayihadawhẹnamẹnu sọgan tindo etlẹ yin do mẹhe ma tindo oyọnẹn he pegan Ohó Jiwheyẹwhe tọn lẹ ji?
12 Jehovah ko na mí asisa anademẹ tọn devo—yèdọ ayihadawhẹnamẹnu mítọn. E dá gbẹtọ po linlẹn homẹ tọn po na nuhe sọgbe po dehe ma sọgbe po. Apadewhe aliho he mẹ mí yin didá te tọn wẹ e yin. To wekanhlanmẹ etọn hlan Lomunu lẹ mẹ, apọsteli Paulu basi zẹẹmẹ dọmọ: “Na whenuena kosi lẹ, he ma tindo osẹ́n, wà onú he tin to osẹ́n mẹ lẹ gbọn jijọ dali, ehelẹ, le yé ma tindo osẹ́n, yé yin osẹ́n de hlan yéde: to enẹ mẹ yé do azọ́n osẹ́n tọn he yè wlan do ayiha yetọn mẹ hia, [ayihadawhẹnamẹnu, NW] yetọn ga sọ to kunnude, linlẹn yetọn lẹ sọ nọ to owhẹ̀ yenọzo tọn jẹ, eyin e mayin mọ yé na nọ mọhodọ na yenọzo.”—Lomunu lẹ 2:14, 15.
13 Jẹ obá de mẹ, susu mẹhe ma jẹakọ hẹ Jehovah lẹ tọn sọgan hẹn linlẹn po nuyiwa yetọn lẹ po wá kọndopọmẹ hẹ nunọwhinnusẹ́n jijọ-di-Jiwheyẹwhe tọn lẹ gando nuhe sọgbe po dehe jẹagọ po go. E nọ taidi dọ yé to ogbè he ma yiaga sọmọ homẹ tọn de sè nkọtọn he to anadena yé to aliho he sọgbe lọ mẹ. Eyin ehe sọgan yin nugbo gando mẹhe ma tindo oyọnẹn he pegan Ohó Jiwheyẹwhe tọn lẹ go, nẹmunẹmu wẹ ogbè homẹ tọn enẹ dona dọho to whẹho Klistiani nugbo lẹ tọn mẹ! Na jide tọn, ayihadawhẹnamẹnu Klistiani tọn de heyin kiklọwé gbọn oyọnẹn he pegan Ohó Jiwheyẹwhe tọn dali bosọ nọ wazọ́n to kọndopọ mẹ hẹ gbigbọ wiwe Jehovah tọn sọgan wleawuna anademẹ he go yè sọgan ganjẹ.—Lomunu lẹ 9:1.
14. Nawẹ ayihadawhẹnamẹnu heyin pinplọn gbọn Biblu dali de sọgan gọalọna mí nado hodo anademẹ gbigbọ Jehovah tọn gbọn?
14 Ayihadawhẹnamẹnu dagbe de, heyin pinplọn gbọn Biblu dali, sọgan flin mí aliho he ji gbigbọ lọ jlo dọ mí ni zinzọnlin gbọn. Ojlẹ delẹ sọgan tin to whenuena Owe-wiwe lẹ kavi owe zinjẹgbonu sinai-do-Biblu ji mítọn lẹ ma basi zẹẹmẹ tlọlọ do ninọmẹ tangan de he mẹ mí sọgan mọ mídelẹ te ji. Etomọṣo, ayihadawhẹnamẹnu mítọn sọgan na avase, yèdọ gbẹnuna mí sọta aliho nuyiwa tọn de he sọgan gbleawunamẹ. To whẹho mọnkọtọn lẹ mẹ, kọgbigbẹ́ nuhe ayihadawhẹnamẹnu mítọn dọ go sọgan, to paa mẹ, zẹẹmẹdo kọgbigbẹ́ nuhe gbigbọ Jehovah tọn to didọ go. To alọ devo mẹ, gbọn pinplọn nado ganjẹ ayihadawhẹnamẹnu heyin pinplọn Klistiani tọn mítọn go dali, mí sọgan basi nudide nuyọnẹn tọn lẹ etlẹ yin to whenuena anademẹ tangan de ma tin to kandai mẹ. Ṣigba, onú titengbe wẹ e yin nado hẹn do ayiha mẹ dọ to whenuena nunọwhinnusẹ́n, gbedide, kavi osẹ́n sọn olọn mẹ wá de mayin awuwlena, nuhe ma sọgbe de wẹ e na yin nado zín nudide ayihadawhẹnamẹnu mídetiti tọn lẹ do Klistiani hatọ lẹ ji to nuhe yin whẹho mẹdetiti tọn na taun tọn lẹ mẹ.—Lomunu lẹ 14:1-4; Galatianu lẹ 6:5.
15, 16. Etẹwẹ sọgan hẹn ayihadawhẹnamẹnu mítọn ma nado wazọ́n ganji, podọ nawẹ mí sọgan glọnalina enẹ ma nado jọ gbọn?
15 Ayihadawhẹnamẹnu mimẹ́n, heyin pinplọn gbọn Biblu dali yin nunina dagbe de sọn Jiwheyẹwhe dè. (Jakobu 1:17) Ṣigba mí dona basi hihọ́na nunina ehe sọn nuyiwadomẹji mẹhẹngble tọn lẹ si eyin e na wazọ́n ganji taidi nuyizan hihọ́-basinamẹ walọdagbe tọn de. Eyin yé yin hihodo, aṣa, po walọyizan lẹdo mẹ tọn he sọta nujinọtedo Jiwheyẹwhe tọn lẹ po sọgan hẹn ayihadawhẹnamẹnu mítọn ma nado wazọ́n ganji bosọ gboawupo nado deanana mí to aliho he sọgbe lọ mẹ. Mí sọgan sọawuhia ma nado penugo nado basi nudide whẹho lẹ tọn ganji bo tlẹ sọgan sọ klọ mídelẹ nado lẹndọ nuyiwa ylankan de yin dagbe na taun tọn wẹ nkọtọn.—Yijlẹdo Johanu 16:2 go.
16 Eyin mí zindonukọn nado to kọgbẹ́ avase he ayihadawhẹnamẹnu mítọn to nina lẹ go janwẹ, ogbè etọn na to doyi vudevude kaka ahun mítọn na sinyẹn kavi ma na tindo numọtolanmẹ walọ dagbe tọn ba. Psalm-kàntọ lọ dọho gando omẹ mọnkọtọn lẹ go to whenuena e dọmọ: “[Ahun, NW] yetọn whèdopọ di yìnnọ́hihò.” (Psalm 119:70) Mẹdelẹ he gbẹkọ anademẹ ayihadawhẹnamẹnu yetọn lẹ tọn go hẹn nugopipe nado lẹnnupọn ganji bu. Yé ma gbẹsọ nọ yin anadena gbọn nunọwhinnusẹ́n jijọ-di-Jiwheyẹwhe tọn lẹ dali bo masọ penugo nado basi nudide he sọgbe lẹ gba. Nado dapana ninọmẹ mọnkọtọn, mí dona tin to aṣeji hlan anademẹ ayihadawhẹnamẹnu Klistiani tọn mítọn lẹ etlẹ yin to whenuena whẹho he tin-to-aimẹ lọ lẹ taidi nuhe mayin nujọnu sọmọ.—Luku 16:10.
Ayajẹnọ Wẹ Mẹhe Dotoai bo Setonu Lẹ
17. Dile mí to todoai na ‘oho he tin to godo mítọn’ bosọ to tonusena ayihadawhẹnamẹnu heyin pinplọn gbọn Biblu dali mítọn, nawẹ mí na yin didona gbọn?
17 Dile mí do aliho nuyiwa todidoai hlan ‘ogbè he to godo mítọn’ tọn de ai—dile e to yinyin awuwlena gbọn Owe-wiwe lẹ po afanumẹ nugbonọ lọ po dali do—podọ dile mí to tonusena nuflinmẹ ayihadawhẹnamẹnu heyin pinplọn gbọn Biblu dali mítọn tọn lẹ, Jehovah na dona mí po gbigbọ etọn po. To godo mẹ, gbigbọ wiwe na hẹn nugopipe mítọn nado mọyi bosọ mọnukunnujẹ nuhe Jehovah to didọna mí mẹ pọnte deji.
18, 19. Nawẹ anademẹ Jehovah tọn sọgan na alè mí to lizọnyizọn mítọn po gbẹzan mẹdetiti tọn mítọn po mẹ gbọn?
18 Gbigbọ Jehovah tọn nasọ na adọgbigbo mí nado pannukọn ninọmẹ awusinyẹnnamẹ tọn lẹ to nuyọnẹn po tugbigbo po mẹ. Dile e yin do to whẹho apọsteli lẹ tọn mẹ, gbigbọ Jiwheyẹwhe tọn sọgan fọ́n huhlọn nulẹnpọn tọn mítọn lẹ dote bosọ gọalọna mí nado yinuwa bosọ dọho to kọndopọmẹ hẹ nunọwhinnusẹ́n Biblu tọn lẹ to whepoponu. (Matiu 10:18-20; Johanu 14:26; Owalọ lẹ 4:5-8, 13, 31; 15:28) Kọndopọ gbigbọ Jehovah tọn po vivẹnudido mẹdetiti tọn mítọn lẹ po na hẹn kọdetọn dagbe wá na mí dile mí to nudide titengbe lẹ basi to gbẹ̀mẹ, bo na na mí tugbigbo nado doafọna nudide enẹlẹ. Di apajlẹ, hiẹ sọgan to nulẹnpọndo vọjlado bibasi to aliho ogbẹ̀ tọn towe mẹ ji nado mọ ojlẹ dogọ na onú gbigbọmẹ tọn lẹ. Kavi hiẹ sọgan wá pannukọn nudide nujọnu tọn, he nọ diọ gbẹzan mẹtọn lẹ, taidi alọwlemẹ de dide, nulinlẹnpọndo nuzedonukọnnamẹ agbasazọ́n tọn de ji, kavi owhé de hihọ̀ ji. Kakati nado dike numọtolanmẹ gbẹtọvi tọn lẹ ni yin whẹwhinwhẹ́n lẹ kẹdẹ na nudide mítọn lẹ, mí dona dotoai na nuhe gbigbọ Jiwheyẹwhe tọn dọ bosọ yinuwa to kọndopọmẹ hẹ anademẹ etọn.
19 Na nugbo tọn, mí nọ yọ́n pinpẹn nuflinmẹ po ayinamẹ he jọmẹ he mí nọ mọyi sọn Klistiani hatọ lẹ dè tọn lẹ po, gọna mẹho lẹ. Ṣigba, mí ma dona nọtepọn mẹdevo lẹ nado hẹn whẹho lẹ wá ayidonugo mítọn mẹ to whepoponu gba. Eyin mí yọ́n aliho nuyiwa nuyọnẹn tọn he dona yin hihodo lọ po vọjlado he mí tindo nuhudo nado basi to walọyizan mítọn lẹ mẹ nado hẹn homẹ Jiwheyẹwhe tọn hùn po, mì gbọ mí ni yinuwa. Jesu dọmọ: “Eyin mì yọ́n onú helẹ, donanọ wẹ mì eyin mì basi yé.”—Johanu 13:17.
20. Dona tẹwẹ nọ wá mẹhe dotoaina ‘ohó he tin to godo yetọn’ lẹ ji?
20 E họnwun dọ, nado sọgan yọ́n lehe yè na hẹn homẹ Jiwheyẹwhe tọn hùn do, Klistiani lẹ ma tindo nuhudo nado sè ogbè paa de sọn olọn mẹ gba, mọjanwẹ yé ma tindo nuhudo nado mọ dlapọn de yí sọn angẹli de dè do niyẹn. Yé yin didona po Ohó heyin kinkàndai gọna anademẹ owanyinọ Jiwheyẹwhe tọn po gbọn hagbẹ yiamisisadode etọn he tin to aigba ji lẹ gblamẹ. Eyin yé yí sọwhiwhe do dotoaina ‘ogbè he tin to godo yetọn’ lọ bosọ hodo anademẹ ayihadawhẹnamẹnu heyin pinplọn gbọn Biblu dali yetọn, yé na tindo kọdetọn dagbe to ojlo Jiwheyẹwhe tọn wiwà mẹ. To whenẹnu wẹ yé na mọ hẹndi opagbe apọsteli Johanu tọn na jide tọn dọmọ: “Ewọ he to ojlo Jiwheyẹwhe tọn wà wẹ na nọte kakadoi.”—Johanu 2:17.
Dogbapọnnanu Kleun De
• Naegbọn Jehovah nọ dọhodopọ hẹ nudidá gbẹtọvi tọn etọn lẹ?
• Nawẹ míwlẹ sọgan mọaleyi sọn tito-to-whinnu Biblu hihia gbesisọ tọn de mẹ gbọn?
• Nawẹ mí dona yigbe hlan anademẹ he nọ wá sọn hagbẹ afanumẹ lọ tọn dè gbọn?
• Naegbọn mí ma dona gbẹ́ anademẹ ayihadawhẹnamẹnu heyin pinplọn gbọn Biblu dali de tọn lẹ dai?
[Kanbiọ Oplọn Tọn Lẹ]
[Yẹdide to weda 13]
Gbẹtọ lẹ ma tindo nuhudo nuyizan gigẹdẹ lẹ tọn nado mọ nudọnamẹ lẹ yí sọn Jiwheyẹwhe dè gba
[Asisa Yẹdide Tọn]
Courtesy Arecibo Observatory/David Parker/Science Photo Library
[Yẹdide to weda 15]
Jehovah nọ dọho na mí gbọn Biblu gblamẹ podọ gbọn “afanumẹ, nugbonọ nuyọnẹntọ” lọ gblamẹ