‘Yẹn Na Nọ Zinzọnlin Lẹdo Agbà Towe Pé, Oklunọ E’

“YẸN na klọ́ alọ ṣie to homẹvọ mẹ; mọwẹ yẹn na [nọ zinzọnlin, NW] lẹdo agbà towe pé, OKLUNỌ E.” (Psalm 26:6) Po ohó ehelẹ po Ahọlu Davidi hohowhenu tọn lá mẹdezejo etọn hlan Jehovah. Ṣigba, etẹwutu wẹ ewọ na “nọ zinzọnlin lẹdo” agbà Jehovah tọn pé, podọ to linlẹn tẹ mẹ?

Na Davidi, ahọ́nkan sinsẹ̀n-bibasi Jehovah tọn wẹ yin gòhọtúntún po agbà avọ́sinsan tọn heyin gànvẹẹ ṣinyọndo etọn po, ehe to ojlẹ gandudu etọn tọn whenu yin didoai do Gibeọni, hlan agewaji Jelusalẹm tọn. (1 Ahọlu lẹ 3:4) Agbà lọ tindo tedidi mẹtlu 2,2 to adà etọn ẹnẹ lẹ mẹ, ehe whè hugan agbà daho hugan lọ he na yin didoai do awánu tẹmpli Sọlọmọni tọn mẹ. a Etomọṣo, Davidi tindo homẹhunhun susu to gòhọtúntún lọ po agbà etọn po mẹ, he yin ahọ́nkan sinsẹ̀n-bibasi wiwe-ṣeke tọn to Islaeli.—Psalm 26:8.

Avọ́nunina mimẹ̀n lẹ, avọ́sinsan jijọho tọn lẹ, po avọ́nunina ylando tọn lẹ po nọ yin bibasi to agbà lọ ji, podọ Azán Ovẹsè whemẹwhemẹ tọn nọ ze avọ́sinsan heyin bibasi do ota akọta lọ tọn mẹ donukọnnamẹ. Agbà lọ po avọ́sinsan etọn lẹ po tindo zẹẹmẹ na Klistiani lẹ to egbehe. Apọsteli Paulu basi zẹẹmẹ dọ agbà lọ nọtena ojlo Jiwheyẹwhe tọn, to gbesisọmẹ hẹ ehe Ewọ kẹalọyi avọ́sinsan he sọgbe de na ofligọ gbẹtọvi lẹ tọn. Paulu dọmọ: “Gbọn ojlo he mẹ yè hẹn mí zun wiwe gbọn yíyí agbasa Jesu Klisti tọn do sanvọ́ whladopo akàn dali.”—Heblu lẹ 10:5-10.

To whenuena yé jlo na wadevizọn to agbà nukọn, yẹwhenọ lẹ to aliho aṣa tọn nọ klọ́ alọ yetọn lẹ to osin mẹ nado hẹn yede zun wiwe. Po gbesisọ po to whenẹnu, Ahọlu Davidi klọ́ alọ etọn lẹ ‘to homẹvọ lọsu mẹ’ jẹnukọnna ‘zọnlinzinzin lẹdo agbà lọ.’ E yinuwa ‘to tenọgli ahun mẹ tọn mẹ, podọ to jlọjlọ mẹ.’ (1 Ahọlu lẹ 9:4) Eyin ewọ ma ko klọ́ alọ etọn lẹ to aliho ehe mẹ, sinsẹ̀n-bibasi etọn lẹ—‘zọnlinzinzin etọn lẹdo agbà lọ’—ma na ko yin alọkẹyi gba. Na nugbo tọn, Davidi ma yin Levinu de gba bo ma sọ tindo lẹblanulọkẹyi nado wà sinsẹ̀nzọn yẹwhenọ tọn to agbà kọ̀n gba. Dile etlẹ yin ahọlu de do, ewọ mayin dotẹnmẹ na to awánu gòhọtúntún lọ tọn mẹ gba. Etomọṣo, taidi Islaelivi nugbo de, e setonuna Osẹ́n Mose tọn bosọ nọ hẹn avọ́nunina etọn lẹ wá agbà nukọn na nuzedonukọnnamẹ to gbesisọmẹ. E zinzọnlin lẹdo agbà lọ to linlẹn gbẹzan etọn zize sinai do sinsẹ̀n-bibasi wiwe-ṣeke ji tọn mẹ.

Be míwlẹ to egbehe sọgan hodo apajlẹ Davidi tọn ya? Mọwẹ. Míwlẹ lọsu sọgan klọ́ alọ mítọn lẹ to homẹvọnọ-yinyin mẹ bosọ zinzọnlin lẹdo agbà Jiwheyẹwhe tọn pé eyin mí yí yise zan to avọ́sinsan Jesu tọn mẹ bo, ‘tindo alọ wiwe bosọ wé ṣeke to ahun mẹ,’ bo sẹ̀n Jehovah po ahundopo po.—Psalm 24:4.

[Nudọnamẹ Odò Tọn]

[Yẹdide to weda 23]

Agbà lọ nọtena ojlo Jehovah tọn, gbọn ehe dali e kẹalọyi avọ́sinsan gbesisọ tọn de na ofligọ gbẹtọvi lẹ tọn