Mẹjitọ lẹ Jẹagọdo Nuvẹun Mẹplọntọ de Tọn

Mẹplọntọ wehọmẹ-dokọ tọn de to Cassano Murge, Italie, yí owe he nọ yin titlẹ́ donugo lẹ na delẹ to wehọmẹvi etọn lẹ mẹ nado hẹn yì whégbè. Owe he nọ yin titlẹ́ donugo ehelẹ, he yin linlẹn nado yin titlẹ́ do ohọ̀n gbonu tọn go, tindo nudọnamẹ lọ dọmọ: “Katoliki wẹ míwlẹ yin. Yè biọ to Kunnudetọ Jehovah tọn lẹ si ma nado húhú ohọ̀n ehe.”

Dile etlẹ yindọ yé ma yin Kunnudetọ Jehovah tọn lẹ do sọ, delẹ to mẹjitọ wehọmẹvi lọ lẹ tọn lẹ mẹ jẹagọ sinsinyẹn do nuyiwa mẹplọntọ lọ tọn lẹ. Sọgbe hẹ linlinnamẹwe Muoviti Muoviti, mẹjitọ lọ lẹ ylọwhẹ dọ ‘owẹ̀n ehe nkọtọn lẹ nina ovi lẹ nọ yidogọna gbigbẹ́ mẹdepope he ma nọ lẹnnupọn dile yewlẹ nọ wà do dai kavi nado gbẹ́kọ mẹde go na ewọ “gbọnvo” to sinsẹ̀n-liho wutu.’ Mẹjitọ dopo he kanwe hlan linlinnamẹwe lọ ylọ owe he nọ yin titlẹ́ donugo lọ dọ “okún ogbé tọn de, yèdọ nudetọn wunvinọ-yinyin po nulunọ-yinyin tọn po.”

Dile linlin ehe dohia do, omẹ ahun-jijlọnọ susu lẹ yọ́n owù he tin to okún nuvẹun tọn lẹ dido mẹ. Yé sọ tindo sisi na lizọnyizọn Klistiani tọn he to yinyin wiwà gbọn Kunnudetọ Jehovah tọn lẹ dali to Italie blebu mẹ podọ to aihọn lọ blebu mẹ ga. Naegbọn hiẹ ma na kanse Kunnudetọ Jehovah tọn lẹ na ‘whẹwhinwhẹ́n de na todido he tin to yé mẹ’? Yé na hùnhomẹ nado dọhodopọ deji hẹ we, bo wàmọ to ‘osi sisosiso’ mẹ.—1 Pita 3:15.