Mí Yin Gbẹtọ Wunmẹ He Tindo Yise Lẹ

Yise Jijlọdote Gbọn Plọnmẹ Biblu Dali to Inde

SỌN Osó daho Himalaya tọn, he nọ yin ṣinṣinyọ́n gbọn osin-agó dali to agewaji yì huto he nọ to azọ̀ti Ohù Inde tọn lẹ ji to hùwaji, Inde yin aigba he tindo vogbingbọn susu, to ninọmẹ aimẹ tọn liho podọ to sinsẹ̀n-liho. Na tòmẹnu etọn he hugan gbẹtọ liva dopo lẹ, nudi 83 to kanweko ji yin Hindu lẹ, 11 to kanweko ji yin Malẹnu lẹ, bọ pipòtọ lẹ na taun tọn bẹ kinklan kleun kleun Klistiani lẹ tọn, Sikh-sẹ̀ntọ lẹ, Bouddha-sẹ̀ntọ lẹ, po Jain-sẹ̀ntọ lẹ po hẹn. Yemẹpo nọ duvivi mẹdekannujẹ sinsẹ̀n-bibasi tọn. “Sinsẹ̀n nọ yí azọngban titengbe de wà to aliho gbẹninọ Inde-nu lẹ tọn mẹ,” wẹ The World Book Encyclopedia dọ.

Gbẹninọ to kọndopọ mẹ hẹ yise Klistiani tọn yetọn basi zẹẹmẹ Kunnudetọ Jehovah tọn lẹ tọn ganji, he sọha yetọn hugan 21 200 to Inde. Taidi hagbẹ gbigbọmẹ tọn yetọn lẹ to adà aihọn lọ tọn devo lẹ mẹ, Kunnudetọ he tin to Inde lẹ nọ pọ́n ẹn hlan taidi lẹblanulọkẹyi de nado gọalọna kọmẹnu yetọn lẹ nado jlọ yise sinsinyẹn dote to Ohó Jiwheyẹwhe tọn, Biblu Wiwe lọ mẹ. (2 Timoti 3:16, 17) Lẹnnupọndo lehe whẹndo dopo to Chennai to hùwaji Inde tọn wá oyọnẹn nugbo Biblu tọn kọ̀n gbọn ji.

Jẹnukọnna kosọdudu yetọn hẹ Kunnudetọ Jehovah tọn lẹ, whẹndo ehe nọ tindo mahẹ zohunhun tọn to nuyiwa azọ́njiawu Katoliki tọn lẹ mẹ, sọalọakọ́n nado nọ mọ numimọ lẹ, dọho to ogbè voovo lẹ mẹ, bo nọ hẹnazọngbọna awutunọ lẹ. Yé diyin taun to ṣọṣi lọ po lẹdo lọ po mẹ, gbẹtọ lẹ tlẹ nọ ylọ hagbẹ whẹndo lọ tọn delẹ dọ “swami,” he zẹẹmẹdo “oklunọ.” Enẹgodo to gbèdopo Kunnudetọ de dla whẹndo lọ pọ́n bo dohia yé sọn Biblu mẹ dọ Jesu yin Visunnu Jiwheyẹwhe tọn, e mayin Jiwheyẹwhe Ganhunupotọ, dile yise lọ gbayipe do gba. Kunnudetọ lọ sọ dohia yé dọ yinkọ Jiwheyẹwhe tọn wẹ Jehovah podọ lẹndai Jehovah tọn na aigba wẹ nado hẹn ẹn zun paladisi whanpẹnọ de.—Psalm 83:18; Luku 23:43; Johanu 3:16.

Na yé nọ na sisi Ohó Jiwheyẹwhe tọn bosọ yiwanna nuhe yé sè wutu, hagbẹ whẹndo lọ tọn lẹ yigbe na plọnmẹ Biblu gbesisọ tọn de hẹ Kunnudetọ Jehovah tọn lẹ. Ehe hẹn vlẹko wá sọn hagbẹ ṣọṣi tọn yetọn lẹ dè. Etomọṣo, whẹndo lọ gbọṣi gbemima mẹ nado zindonukọn to plọnmẹ Biblu tọn yetọn mẹ. Dile oyọnẹn yetọn jideji bọ yise yetọn whẹ́n deji, yé doalọtena nuyiwa sinsẹ̀n lalo tọn yetọn lẹ. To egbehe, hagbẹ atọ̀n whẹndo ehe tọn yin Kunnudetọ zohunhunnọ, he ko yí baptẹm lẹ, podọ onọ̀ lọ nọ wadevizọn taidi gbehosọnalitọ alọgọtọ tọn to whedepopenu he e yọnbasi.

Yise Nado Dù to Madogán lẹ Ji

Sunder Lal, heyin sunnu jọja de he nọ nọ̀ gbétatò de mẹ to Punjab, tindo nuhudo yise po adọgbigbo sinsinyẹn tọn po nado sọgan má wẹndagbe Ahọluduta Jiwheyẹwhe tọn tọn hẹ mẹdevo lẹ. (Matiu 24:14) Whẹwhinwhẹ́n dopo wẹ yindọ, ewọ ko jo yise tintindo to yẹwhe susu mẹ whẹndo po gbétatò etọn tọn lẹ po do nado basi sinsẹ̀n hlan Jiwheyẹwhe nugbo lọ, yèdọ Jehovah. Whẹwhinwhẹ́n devo wẹ yindọ, Sunder Lal ma tindo afọ depope gba.

Kakajẹ 1992, gbẹzan Sunder Lal tọn yin nuyiwa aṣa tọn de. E nọ wazọ́n taidi alọgọtọ na Doto de bosọ nọ kọnawudopọ hẹ whẹndo etọn to sinsẹ̀n-bibasi hlan yẹwhe voovo lẹ mẹ to anademẹ sinsẹ̀n-nuplọnmẹtọ gourou tọn heyin dide gbọn yé dali lọ glọ. Enẹgodo to zánmẹ gbedopo, e jai to whenuena e to didasa pínpàn-gàn de. Pínpàn de gbọn oji etọn bosọ sán afọ etọn awe lẹ sẹ̀ jẹ asagbada. Dile etlẹ yindọ e gán, gbẹzan etọn yin hinhẹngble. Po nukunnumọjẹnumẹ po, Sunder Lal jẹflumẹ sisosiso  bo tlẹ lẹnnupọndo mẹdetiti hùhù ji. Whẹndo etọn gọalọna ẹn taun, ṣigba e taidi dọ todido de ma tin na sọgodo etọn.

To enẹgodo dopo to Kunnudetọ Jehovah tọn lẹ mẹ basi dlapọn na Sunder Lal bosọ dohia ẹ sọn Biblu mẹ dọ Jiwheyẹwhe ko dopagbe nado hẹn aigba lọ zun paladisi awuvivi tọn de podọ nado na agbasalilo pipé mẹhe yiwanna bosọ nọ dibusi i lẹpo. Sunder Lal yigbe na plọnmẹ Biblu de, podọ na owhe dopo e plọnnu po sọwhiwhe po. E yin oylọ basina nado yì opli Klistiani tọn lẹ podọ to agọgbọnẹnmẹ e yì to godo kẹkẹ họntọn de tọn ji. Dile etlẹ yindọ kẹkẹ-kùnkùn awufiẹsa tọn de wẹ e yin, alemọyi lọ sù taun. Nuhe e ko plọn to plọnmẹ Biblu mẹdetiti tọn etọn tẹnmẹ yin hinhẹn lodo dile e dukosọ hẹ mẹdevo lẹ he yise nugbonugbo to opagbe Ohó Jiwheyẹwhe tọn lẹ mẹ bosọ nọ nọgbẹ̀ to kọndopọmẹ hẹ nuplọnmẹ Biblu tọn lẹ.

Sunder Lal jẹ wẹndagbe lọ má hẹ kọmẹnu etọn lẹ ji, podọ e yin bibaptizi to 1995. To tintan whenu, e nọ tindo mahẹ to lizọnyizọn lọ mẹ gbọn ede dindọ̀n sọn ohọ̀n de kọ̀n jẹ ohọ̀n devo kọ̀n dali to gbétatò etọn mẹ, yèdọ aliho gbesisọ tọn etọn na yìyì sọn fide jẹ fidevo. Ṣigba e tindo nunina de sọn mẹmẹsunnu gbigbọmẹ tọn etọn lẹ dè todin—yèdọ kẹkẹ afọ-atọ̀nnọ de he yin awuwlena na taun tọn nado yin “kùnkùn” po alọ po. Na kẹkẹ afọ-atọ̀nnọ etọn wutu, e penugo todin nado nọ dánpe na ede podọ penugo nado nọ basi gbejizọnlin kilomẹtlu 12 tọn yì opli agun tọn lẹ na ede. To whedelẹnu e nọ kùn ede gbọn jikun po jẹhọn sinsinyẹn lẹ po nu; to ojlẹ devo lẹ mẹ ninọmẹ aimẹ tọn nọ hùnmiyọ́n hugan 43°C.

To yidogọmẹ na opli lẹ yìyì, Sunder Lal nọ deanana plọnmẹ Biblu susu hẹ mẹdevo lẹ he jlo alọgọ nado jlọ yise sinsinyẹn dote to Jiwheyẹwhe nugbo lọ, yèdọ Jehovah mẹ. Na nugbo tọn, ṣinawe to Biblu plọntọ dai tọn etọn lẹ mẹ ko yin bibaptizi todin, dile omẹ atọ̀n devo he e dukosọ hẹ ṣigba bọ Kunnudetọ hatọ lẹ ko plọn Biblu hẹ lẹ ko wà do.

Sọgbe hẹ Biblu, “omẹ pó ma tindo yise gba.” (2 Tẹsalonikanu lẹ 3:2) Ṣigba na mẹhe ‘tindo ahun jijlọ na ogbẹ̀ madopodo lẹ,’ Ohó Jiwheyẹwhe tọn pinplọn to gbesisọmẹ sọgan jlọ yise sinsinyẹn dote. (Owalọ lẹ 13:48) Oplọn mọnkọtọn de sọ nọ hẹn nukun lẹ nado to sisẹ́ po todido sọgodo jiawu de tọn po—yèdọ nude he mẹ sọha he to jijideji gbẹtọ lẹ tọn to Inde to yise dohia te.

[Yẹdide Otò Tọn to weda 30]

AFGANISTAN

PAKISTAN

NÉPAL

BHOUTAN

CHINE

BANGLADESH

MYANMAR

LAOS

THAÏLANDE

VIÊT-NAM

CAMBODGE

SRI LANKA

INDE

[Asisa Yẹdide Tọn]

Mountain High Maps® Copyright © 1997 Digital Wisdom, Inc.