Fie Wẹ Hiẹ Sọgan Lẹhlan Na Ayinamẹ Dagbe?

“Azọ́nwhé ayinamẹ tọn” ko lẹzun ajọwiwa dọla-liva-susu to owhe dopo mẹ tọn de todin. Gbẹtọ lẹ jlo alọgọ. Azọ́nyọnẹntọ dagbemẹ-ninọ apọ̀nmẹ tọn Heinz Lehmann doayi e go dọmọ: “[To ogbẹ́ egbezangbe tọn mẹ] awugbopo wepinplọn po ogbẹ́ tọn lẹ po tin-to-aimẹ. Nujinọtedo sinsẹ̀n tọn lẹ ma sọ yin nuhe yé nọ yin dai gba. Whẹndo lẹ ma sọ dolido sọmọ ba . . . , podọ taidi kọdetọn de gbẹtọ lẹ ma sọ lodo ba.” Wekantọ Éric Maisel dọmọ: “Mẹhe nọ lẹhlan fákantọ akọ̀ yetọn tọn, sinsẹ̀ngán kavi doto whẹndo tọn dè na alọgọ nuhahun apọ̀nmẹ, gbigbọmẹ po agbasamẹ tọn po to ojlẹ de mẹ wayi dai lẹ nọ lẹhlan owe he nọ na ayinamẹ do nukọnyiyi mẹdetiti tọn ji nado wleawuna gblọndo lẹ todin.”

OGBẸ́ Lẹnunnuyọnẹntọ Walọyizan Gbẹtọ tọn Amelika tọn ze pipli de dai nado dindona azọ́nwhé he to yindi po awuyiya po ehe. Yé dọ dọ dile etlẹ yindọ “yọnbasi daho tin nado gọalọna mẹdopodopo lẹ nado mọnukunnujẹ yedelẹ po mẹdevo lẹ po mẹ do sọ . . . , alọsọakọ́n po tẹnmẹ-yinkọ mẹzedaga tọn he zọnpọ hẹ tito-to-whinnu ehelẹ po nọ yin nùzindeji zẹjlẹgo bosọ nọ yin hinhẹn fọ́n numọtolanmẹ dote.” Wekantọ Toronto Star tọn de dọmọ: “Họ́ dewe sọta sọha oklọ sinsẹ̀n po gbigbọnọ-yinyin tọn lẹ po. . . . Họ́ dewe na titengbe tọn sọta owe alọgọnamẹ-mẹdetiti tọn lẹpo, hoyidokanji kavi opli mẹpinplọn tọn he nọ ze nususu hugan lẹ donukọnnamẹ, to ojlẹ he whègli taun de mẹ, na vivẹnudido kavi mẹplọnlọ-dido-mẹdetiti go vude poun lẹ.” Nugbo wẹ dọ, gbẹtọ susugege wẹ tin he to tintẹnpọn nado gọalọna mẹhe tin to nuhudo mẹ lẹ nugbonugbo. Ṣigba, nugbo awubla tọn lọ tin-to-aimẹ dọ sọha mẹhe tin to jlòkòkò lẹ tọn de tin he nọ yí ṣokẹdẹ-ninọ po yajiji gbẹtọ lẹ tọn po zan, bo ma nọ ze alọgọ kavi pọngbọ nujọnu tọn depope donukọnnamẹ gba.

To pọndohlan mẹ na ehe, etẹwẹ yin asisa titengbe alọgọ tọn he go mí sọgan dejido? Fie wẹ mí sọgan mọ ayinamẹ yọn-na-yizan he na wazọ́n na ojlẹ dindẹn te?

Asisa Anademẹ He Ma Nọ Gbọ̀vọ́ Tọn

Yẹwhehodọtọ owhe kanweko 19tọ Amelika tọn Henry Ward Beecher dọmọ: “Biblu yin yẹdide alidohiamẹ otọ̀ ji tọn de he Jiwheyẹwhe na we nado deanana we, nado basi hihọ́na we sọn hunsiọmẹ mẹ, podọ nado do fie ohúnglintẹn lọ te hia we, po lehe hiẹ sọgan jẹ finẹ matin ginglin do osó kavi yẹnkẹn otọ̀glọ tọn lẹ ji do po.” Dawe devo dọ gando Biblu go dọmọ: “Mẹdepope ma nọ whẹ́n hugan Owe-wiwe gba; owe lọ nọ to gbigblo bo nọ to sisosiso deji to gbesisọmẹ hẹ owhe mítọn lẹ.” Naegbọn hiẹ dona na dogbapọnnanu titengbe asisa ehe?

To whẹsuna ede mẹ, Biblu dọmọ: “Owe-wiwe lẹpo gbingbọ́n sọn Jiwheyẹwhe mẹ yin alenọ ga na mẹpinplọn, na wọhẹmẹ, na anademẹ, na nuplọnmẹ he tin to dodo mẹ: na Jiwheyẹwhe gbẹtọ nido pegan, he yè hẹn sọgbe mlẹnmlẹn hlan azọ́n dagbe lẹpo.” (2 Timoti 3:16, 17) Nuhe tin to Biblu mẹ lẹ wá sọn Asisa taun ogbẹ̀ tọn dè, yèdọ Jehovah Jiwheyẹwhe. (Psalm 36:9) Taidi omẹ mọnkọtọn de, ewọ yọ́n nuhe mí yin taun, dile Psalm 103:14 flinnu mí do dọmọ: “Na ewọ yọ́n didá mítọn;  e sọ flin dọ kọ́gudu wẹ mí.” Enẹwutu, mí sọgan tindo jidide gigọ́ to nuhọakuẹ Biblu tọn mẹ.

Na nugbo tọn, Biblu bẹ nunọwhinnusẹ́n po anademẹ susu lẹ po hẹn he sọgan yin yiyizan po alemọyi po to ninọmẹ depope he mẹ hiẹ sọgan mọ dewe te. Gbọn dali etọn Jiwheyẹwhe dọna mí dọmọ: “Ehe wẹ aliho [lọ], mì zinzọnlin to e mẹ.” (Isaia 30:21) Be Biblu sọgan na pekọ nuhudo mẹdopodopo lẹ tọn to egbehe nugbonugbo ya? Mì gbọ mí ni pọ́n.

Biblu Hẹn Pekọwana Nuhudo Mítọn lẹ . . .

To Pipehẹ Magbọjẹ lẹ Mẹ. Biblu dọna mí dọmọ: “Mì jẹtukla nudepope tọn blo; ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú [linlẹn lẹpo na whlá ahun mìtọn lẹ po huhlọn apọ̀nmẹ tọn mìtọn lẹ po, NW] to Klisti Jesu mẹ.” (Filippinu lẹ 4:6, 7) Be odẹ̀ ko sọawuhia nado tindo kọdetọn dagbe to pipehẹ numọtolanmẹ magbọjẹ tọn lẹ he nọ yin kinkọndopọ hẹ awusinyẹnnamẹnu akuẹzinzan tọn, nuyiwahẹmẹ agọ̀ zanhẹmẹ tọn po mẹzunzun lẹ po, kavi okú mẹyiwanna de tọn ya? Lẹnnupọndo numimọ he bọdego ji.

Jackie, to whenuena e yọnẹn dọ viyọnnu etọn ko yin zinzanhẹ agọ̀ godo, yigbe dọmọ: “Numọtolanmẹ whẹhuhu tọn na yinyin mẹhe ma tindo huhlọn nado basi hihọ́na ovi mẹtọn zẹ̀ nuhe onù sọgan dọ go. Yẹn dona hoavùn hẹ numọtolanmẹ adidudu, wangbẹna, po homẹgble tọn po. Numọtolanmẹ ehelẹ jẹ gbẹzan ṣie hẹngble ji. Yẹn tindo nuhudo Jehovah tọn vẹkuvẹku nado basi hihọ́na ahun ṣie.” To hihia po vivọ́ Filippinu lẹ 4:6, 7 po hia godo, e wazọ́n sinsinyẹn nado yí ayinamẹ etọn do yizan mẹ. “Yẹn nọ hodẹ̀ egbesọegbesọ, bo nọ to bibiọ gbọzangbọzan dọ yẹn ni ma dike numọtolanmẹ agọ̀ lẹ ni hẹn gbẹzan ṣie gble blo, podọ Jehovah ko gọalọna mi nado wleawuna ahun whiwhẹ po ayajẹ tọn de po. Yẹn tindo numọtolanmẹ jijọho tọn to homẹ na nugbo tọn,” wẹ Jackie dọ.

Hiẹ lọsu sọgan mọ dewe to ninọmẹ de mẹ he zẹ̀ nugopipe towe go nado deanana kavi didẹ podọ enẹ nọ hẹn numọtolanmẹ magbọjẹ tọn etọn lẹ wá. Gbọn hihodo tudohomẹnamẹ Biblu tọn nado hodẹ̀ dali, hiẹ sọgan doakọnna po kọdetọn dagbe po. Psalm-kàntọ lọ na tuli mí po hogbe ehelẹ po dọmọ: “Jo ali towe do alọ OKLUNỌ tọn mẹ, dotudo e go ga; ewọ nasọ basi i.”—Psalm 37:5.

Na Tulimimọyi. Psalm-kàntọ lọ dọ hogbe pinpẹn-nutọn-yinyọnẹn tọn ehe dọmọ: “OKLUNỌ, yẹn yiwanna aisintẹn ohọ̀ towe mẹ tọn, po fie gòhọ gigo towe tọn te po. Afọ ṣie nọte to fie sọgbe: to agun lẹ mẹ wẹ yẹn na nọ na dona OKLUNỌ te.” (Psalm 26:8, 12) Mí yin tulina to Biblu mẹ nado nọ pli dopọ to gbesisọmẹ nado basi sinsẹ̀n hlan Jehovah. Nawẹ gbẹdido ehe sọgan na pekọ nuhudo towe lẹ gbọn? Etẹwẹ mẹdevo lẹ ko mọ?

Becky dọmọ: “Mẹjitọ ṣie lẹ ma nọ sẹ̀n Jehovah gba, enẹwutu yé nọ jẹagọdo mi sinsinyẹn to whenuena yẹn tẹnpọn nado wà nudepope he tin to kọndopọmẹ hẹ devizọnwiwa hlan Jiwheyẹwhe. E nọ biọ vivẹnudido daho na yẹn nado yì opli lẹ.” Becky tindo numọtolanmẹ lọ dọ dona susu lẹ ko wá ewọ ji na e ko sinyẹnlin tlala nado nọ yì opli Klistiani tọn lẹ to gbesisọmẹ wutu. “Opli lẹ hẹn yise ṣie lodo, na yẹn nido sọgan doakọnna kọgbidinamẹnu egbesọegbesọ tọn lẹ taidi wehọmẹvi de, viyọnnu de, po devizọnwatọ Jehovah tọn de po. Mẹhe tin to Plitẹnhọ Ahọluduta tọn mẹ lẹ gbọnvo tlala na wehọmẹvi he tin to wehọmẹ lẹ! Yé yin mẹtọnhopọntọ po alọgọnamẹtọ lẹ po, hodọdopọ mítọn lẹ nọ saba yin tulinamẹ tọn. Yé yin họntọn nujọnu tọn lẹ.”

Mọwẹ, gbọn hihodo anademẹ Biblu tọn nado nọ pli dopọ to gbesisọmẹ dali, Jehovah sọgan na pekọ nuhudo mítọn na tulimimọyi. File wẹ yin fie mí tindo numimọ nugbo-yinyin hogbe psalm-kàntọ lọ tọn lẹ te dọmọ: “Jiwheyẹwhe wẹ fibẹtado po huhlọn mítọn po, alọgọ alọnu-alọnu tọn to tukla mẹ.”—Psalm 46:1.

Na Azọ́n Pekọnamẹ po Dehe Họakuẹ Tọn Po. “Mì yin tenọglinọ, masẹafọ, bo nọ to susudeji to azọ́n Oklunọ tọn mẹ whepoponu, sọle mì yọnẹn do dọ tuklajẹ mìtọn mayin ovọ́ to Oklunọ mẹ gba,” wẹ Biblu dọ. (1 Kọlintinu lẹ 15:58) Be “azọ́n Oklunọ tọn” nọ namẹ pekọ nugbonugbo ya? Be lizọnyizọn Klistiani tọn nọ basi wadotana nude he họakuẹ tọn ya?

 Amelia dọ nuhe yin numọtolanmẹ etọn dọmọ: “Yẹn plọn Biblu hẹ asu po asi po de he tin to bẹbẹnu gbakija tọn. Yẹn sọ gọalọna yọnnu de he viyọnnu etọn yin hùhù po kanyinylan po ga. Yọnnu lọ nọ yin yasana gbọn nujikudo matindo gando ninọmẹ oṣiọ lẹ tọn go dali. To whẹho awe ehelẹ mẹ, yíyí nunọwhinnusẹ́n Biblu tọn lẹ do yizan mẹ hẹn jijọho po todido po wá gbẹzan yetọn lẹ mẹ. Yẹn tindo numọtolanmẹ ayajẹ po pekọ daho tọn po na yẹn ko tindo mahẹ to alọgigọna yé mẹ wutu.” Scott dọmọ: “Eyin hiẹ tindo numimọ dagbe de to lizọnyizọn kunnudegbe tọn mẹ, jẹ plọnmẹ Biblu yọyọ de ji, kavi duvivi kọdetọn dagbe delẹ tọn sọn kunnudide mayin aṣa tọn mẹ, hiẹ na nọ dọho gandego na owhe lẹ to nukọnmẹ. Numọtolanmẹ po awuvivinamẹnu dopolọ lẹ po nọ yin finflin to dopodopo numimọ lọ lẹ tọn didọ whenu! Lizọnyizọn lọ yin fie ayajẹ daho po dehe nọ dẹn-to-aimẹ hugan po nọ wá sọn.”

E họnwun dọ, anademẹ Biblu tọn yiyi-do-yizan mẹ nado lẹzun lizọnyizọnwatọ zohunhunnọ lẹ ko hẹn pekọwana nuhudo omẹ ehelẹ tọn lẹ na azọ́n pekọhẹnwanamẹ po dehe họakuẹ tọn po wutu. Hiẹ lọsu yin oylọ basina nado tindo mahẹ to azọ́n wepinplọn mẹdevo lẹ gando aliho po nunọwhinnusẹ́n Jiwheyẹwhe tọn lẹ tọn po go ehe mẹ, to ojlẹ dopolọ mẹ hiẹ lọsu nasọ to alemọyi.—Isaia 48:17; Matiu 28:19, 20.

Alemimọyi sọn Ohó Jiwheyẹwhe Tọn Mẹ

Matin ayihaawe, Biblu yin asisa anademẹ yọn-na-yizan lẹ tọn he go yè sọgan dejido to aihọn egbezangbe tọn mẹ. Nado mọaleyi sọn e mẹ, mí dona dovivẹnu to gbesisọmẹ. Mí dona nọ hia ẹ gbọzangbọzan, plọn ẹn, bosọ lẹnayihamẹpọn deji. Paulu dotuhomẹnamẹ dọmọ: “Nọ doayi onú helẹ go, jo dewe hlan yé petepete; na whinwhẹ́n towe nido diun jẹgbonu to omẹ popo dè.” (1 Timoti 4:15; Deutelonomi 11:18-21) Jiwheyẹwhe na nujikudo dọ eyin hiẹ wazọ́n nado yí ayinamẹ etọn heyin mimọ to Biblu mẹ lẹ do yizan mẹ, hiẹ na tindo kọdetọn dagbe. E dopagbe dọmọ: “Dotudo OKLUNỌ go . . . Yọ́n ẹn to aliho towe lẹpo ji, ewọ nasọ jlọ omọ́ towe.”—Howhinwhẹn lẹ 3:5, 6.

[Yẹdide to weda 31]

Hihodo ayinamẹ Biblu tọn nọ hẹn ogbẹ̀ yin pekọnamẹnu po dehe tindo zẹẹmẹ po