Gbigbọṣi Nugbonọ Yinyin mẹ Hlan Jehovah

NUGBONỌ-YINYIN, dile etlẹ yin jẹhẹnu de he ma gbayipe sọmọ to egbehe do, e yin jẹhẹnu de he nọ dohiagona devizọnwatọ Jiwheyẹwhe nugbo lọ, yèdọ Jehovah tọn lẹ. Gbẹtọ nugbonọ de nọ nọte gligli to whlepọn lẹ mẹ bo ma nọ whàngo mahopọnna jujuyi ojlẹ tọn. Lẹnnupọndo Ahọlu dagbe Hẹzekia ji. “To godo etọn mẹde ma tin di i to ahọlu Juda tọn lẹpo ṣẹnṣẹn, kavi to yé he ko tin nukọn etọn lẹ ṣẹnṣẹn,” wẹ Biblu dọ. Etẹwẹ hẹn Hẹzekia nado gbọnvo? Ewọ “sẹbọdo OKLUNỌ dè,” dile etlẹ yindọ e yin lilẹdo pé gbọn sinsẹ̀n-basitọ yẹwhe lalo Moleki tọn lẹ dali do. Mọwẹ, Hẹzekia “ma fọnyi sọn hihodo [Jehovah] mẹ gba, ṣigba bo to gbedide etọn lẹ yìn.”—2 Ahọlu lẹ 18:1-6.

Apọsteli Paulu yin mẹdevo he gbọṣi nugbonọ-yinyin mẹ hlan Jehovah. Kandai lizọnyizọn etọn tọn dile e yin mimọ to Owe-wiwe Klistiani Glẹki tọn lẹ mẹ do na kunnudenu huhlọnnọ lẹ gando gbesisọnọ-yinyin Paulu tọn to devizọnwiwa po alindọn lẹpo po hlan Jiwheyẹwhe mẹ. Sẹpọ vivọnu gbẹzan aigba ji etọn tọn, Paulu sọgan dọ gando ede go dọmọ: “Yẹn ko hoavùn dagbe lọ, yẹn ko hẹn ali ṣie jẹ opodo, yẹn ko yìn yise lọ.”—2 Timoti 4:7.

Apajlẹ dagbe nugbonọ-yinyin tọn nankọtọn lẹ die mí tindo to Hẹzekia po Paulu po mẹ! Mì gbọ mí ni hodo apajlẹ yise yetọn tọn gbọn gbigbọṣi nugbonọ-yinyin mẹ hlan Mẹdatọ Daho mítọn dali, yèdọ Jehovah.—Heblu lẹ 13:7.