‘Whlẹn Dewe po Mẹhe to Todoai Na We lẹ Po’
‘Whlẹn Dewe po Mẹhe to Todoai Na We lẹ Po’
“Payi dewe po mẹpinplọn towe po go. . . . Na ehe wiwà mẹ hiẹ na whlẹn dewe, po yé he to ohó towe sè lẹ po.”—1 TIMOTI 4:16.
1, 2. Etẹwẹ nọ whàn Klistiani nugbo lẹ nado zindonukọn to azọ́n ogbẹ̀-whlẹngán tọn yetọn mẹ?
TO GBÉTATÒ he tin to olá de mẹ to agewaji Thaïlande tọn, asu po asi po he ko wlealọ de heyin Kunnudetọ Jehovah tọn lẹ tẹn ogbè yọyọ he yé ṣẹṣẹ plọn lọ pọ́n do hagbẹ akọ̀ he tin to póplò de ji lẹ go. Nado sọgan má wẹndagbe Ahọluduta Jiwheyẹwhe tọn hẹ mẹhe tin to gbétatò lọ mẹ lẹ, asu po asi po lọ ko plọn ogbè Lahu tọn to agọe.
2 “E sinyẹnawu nado basi zẹẹmẹ ayajẹ po pekọ he mí tindo po tọn, to azọ́nwiwa to jlodotọ ehelẹ ṣẹnṣẹn,” wẹ asu lọ basi zẹẹmẹ dọ. “Na taun tọn mí tindo numọtolanmẹ mahẹ tintindo to hẹndi Osọhia 14:6, 7 tọn mẹ, to owẹ̀n ayajẹ tọn lilá ‘hlan akọta, akọ̀, po ogbè lẹpo po’ mẹ. Aigba kleun delẹ wẹ pò he wẹndagbe lọ ma ko lìn biọ, podọ na taun tọn ehe yin dopo to yé mẹ. Mí tindo diblayin plọnmẹ Biblu susu hugan ehe mí sọgan penugo bo deanana.” E họnwun dọ, asu po asi po ehe jlo nado whlẹn e mayin yedelẹ kẹdẹ gán gba ṣigba mẹhe dotoai hlan yé lẹ ga. Taidi Klistiani lẹ, be mímẹpo ma jlo nado wà onú dopolọ ya?
‘Payi Dewe Go’
3. Nado sọgan whlẹn mẹdevo lẹ gán, etẹwẹ mí dona wà jẹnukọn?
3 Apọsteli Paulu na ayinamẹ Timoti dọ, “Payi dewe po mẹpinplọn towe po go,” podọ ehe gando Klistiani lẹpo go. (1 Timoti 4:16) Na nugbo tọn, nado gọalọna mẹdevo lẹ nado mọ whlẹngán yí, mí dona payi mídelẹ go jẹnukọn whẹ́. Nawẹ mí sọgan wà ehe gbọn? Onú dopo wẹ yindọ, mí dona tin to aṣeji gando ojlẹ he mẹ mí to gbẹnọ te lẹ go. Jesu na ohia bẹdopọ tọn de na hodotọ etọn lẹ nido sọgan yọ́n whenuena “vivọnu whenu-nu lẹ tọn, NW ” ko wá. Etomọṣo, Jesu sọ dọ dọ mí ma na yọ́n ojlẹ taun lọ whenuena opodo lọ na wá gba. (Matiu 24:3, 36) Nawẹ mí dona yinuwa hlan whẹwhinwhẹ́n enẹ gbọn?
4. (a) Walọyizan tẹwẹ mí dona wleawuna dohlan ojlẹ he pò to titonu ehe mẹ? (b) Walọyizan tẹwẹ mí dona dapana?
4 Dopodopo mítọn sọgan kanse dọ, ‘Be yẹn to ojlẹ depope he pò na titonu ehe yizan nado whlẹn dee po mẹhe to todoai hlan mi lẹ po ya? Kavi be yẹn to linlẹn dọ, “To whenuena e yindọ mí ma yọ́n ojlẹ taun lọ whenuena opodo lọ na wá, yẹn ma dona yin ahunmẹduna gandego gba” wẹ?’ Walọyizan godo tọn lọ yin owùnú. E jẹagọdo tudohomẹnamẹ Jesu tọn tlọlọ dọmọ: “Mì ni wleawu dai: na ojlẹ he mẹ mì ma lẹn do wẹ Ovi gbẹtọ tọn ja.” (Matiu 24:44) Na taun tọn e mayin ojlẹ lọ die nado hẹn zohunhun mítọn na sinsẹ̀nzọn Jehovah tọn bu gba kavi nado lẹhlan aihọn lọ na hihọ́-basinamẹ kavi pekọ gba.—Luku 21:34-36.
5. Apajlẹ tẹwẹ kunnudetọ Jehovah tọn he jẹnukọnna ojlẹ Klistiani tọn lẹ zedai?
5 Aliho devo he mẹ mí sọgan dohia dọ mí to pipayi mídelẹ go te wẹ yin gbọn akọndidona po nugbonọ-yinyin po taidi Klistiani lẹ dali. Devizọnwatọ Jiwheyẹwhe tọn to ojlẹ he wayi lẹ mẹ gbọṣi akọ́ndonanu mẹ, vlavo yé tindo nukundido whlẹngán afọdopolọji tọn kavi lala. To whenuena e ko na apajlẹ kunnudetọ he tin jẹnukọnna ojlẹ Klistiani tọn lẹ taidi Abẹli, Enọki, Noa, Ablaham po Sala po godo, Paulu dọmọ: “[Yé] ma mọ opagbe lọ yí, ṣigba yé ko mọ ẹn to aganu boboe, bo yọnẹn to yede mẹ, bosọ jlẹgbèna yé, bosọ yigbe dọ jonọ, tòwiwehisizọnlinnọ wẹ yé to aihọn mẹ.” Yé ma joawuna nujlomẹ depope na gbẹzan awubibọ tọn, mọjanwẹ yé ma jogbe na kọgbidinamẹ mawé tọn he lẹdo yé pé lẹ gba, ṣigba yé pọ́n nukọn hlan po jejeji-ninọ po hlan ‘hẹndi opagbe lọ lẹ tọn.’—Heblu lẹ 11:13; 12:1.
6. Nawẹ pọndohlan Klistiani owhe kanweko tintan tọn lẹ gando whlẹngán go yinuwado aliho gbẹninọ tọn yetọn ji gbọn?
6 Klistiani owhe kanweko tintan tọn lẹ lọsu mọ yedelẹ taidi “wáṣinu” to aihọn ehe mẹ. (1 Pita 2:11) Etlẹ yin to whenuena yé ko yin whinwhlẹngán gbọn vasudo Jelusalẹm tọn gblamẹ to 70 W.M. godo, Klistiani nugbo lẹ ma doalọtena yẹwhehodidọ kavi lẹkọ do aliho gbẹzan aihọn lọ tọn mẹ gba. Yé yọnẹn dọ whlẹngán daho de to tenọpọn mẹhe gbọṣi nugbonọ-yinyin mẹ lẹ. Na nugbo tọn, to agọgbọnẹnmẹ to owhe 98 W.M., apọsteli Johanu wlan dọmọ: “Aihọn sọ to juju jei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17, 28.
7. Nawẹ Kunnudetọ Jehovah tọn lẹ ko do akọ́ndonanu hia to ojlẹ egbezangbe tọn lẹ mẹ gbọn?
7 To ojlẹ egbezangbe tọn lẹ mẹ Kunnudetọ Jehovah tọn lẹ ko sinyẹnlin to azọ́n Klistiani tọn mẹ ga, dile etlẹ yindọ yé ko tindo numimọ homẹkẹn sinsinyẹn tọn. Be akọ́ndonanu yetọn ko yin to ovọ́ mẹ wẹ ya? Na jide tọn e mayin mọ, na Jesu na mí jide dọmọ: “Mẹhe doakọnna kakajẹ opodo, mẹdopolọ wẹ yè na whlẹngán,” vlavo enẹ sọawuhia nado yin opodo titonu hoho lọ tọn kavi opodo gbẹzan dinwhenu mẹde tọn. To fọnsọnku mẹ, Jehovah na flin bosọ suahọ devizọnwatọ nugbonọ etọn lẹ he ko kú lẹpo.—Matiu 24:13; Heblu lẹ 6:10.
8. Nawẹ mí sọgan dohia gbọn dọ mí yọ́n pinpẹn akọ́ndonanu Klistiani ojlẹ he wayi lẹ tọn tọn?
8 Humọ, míwlẹ jaya dọ Klistiani nugbonọ ojlẹ he wayi tọn lẹ mayin ahunmẹduna po whlẹngán yedetiti tọn kẹdẹ po gba. Na jide tọn míwlẹ he ko plọnnu dogbọn Ahọluduta Jiwheyẹwhe tọn dali gbọn vivẹnudido yetọn lẹ gblamẹ dopẹ́ dọ yé doakọnnanu to azọ́ndenamẹ Jesu tọn hinhẹndi mẹ dọmọ: “Enẹwutu mì yì, bo hẹn akọta lẹpo zun nuplọntọ, . . . Na mì ni sọ nọ plọn yé nado nọ doayi onú [he yẹn ko degbè etọn, NW] lẹpo go.” (Matiu 28:19, 20) Dile e na dẹnsọ bọ dotẹnmẹ hundote lọ na gbọṣi nùvo na mí, mí sọgan do pinpẹn-nutọn-yinyọnẹn mítọn hia gbọn yẹwhehodidọ hlan mẹdevo he ma ko sè wẹndagbe lọ lẹ dali. Ṣigba, afọdide tintan poun wẹ yẹwhehodidọ yin dohlan devi lẹ bibasi.
‘Payi Mẹpinplọn Towe Go’
9. Nawẹ walọyizan dagbe nọ gọalọna mí nado bẹ plọnmẹ Biblu lẹ jẹeji gbọn?
9 Azọ́ndenamẹ mítọn bẹ e mayin yẹwhehodidọ kẹdẹ hẹn gba ṣigba mẹpinplọn ga. Jesu deazọ́nna mí nado plọn gbẹtọ lẹ nado doayi nuhe e degbè etọn lẹpo go. Na nugbo tọn, to aigba-denamẹ delẹ ji, e nọ taidi dọ omẹ vude wẹ nọ tindo ojlo nado plọnnu dogbọn Jehovah dali. Ṣigba pọndohlan agọ̀ tintindo gando aigba-denamẹ lọ go sọgan glọnalina vivẹnudido mítọn nado bẹ plọnmẹ Biblu lẹ jẹeji. Yvette, gbehosọnalitọ de he tin to aigba-denamẹ he mẹdelẹ ko ylọdọ aigba he ma nọ de sinsẹ́n tọ́n de ji, doayi e go dọ mẹhe nọ basi dlapọn wá lẹdo lọ mẹ, he ma tindo walọyizan agọ̀ mọnkọtọn, bẹ plọnmẹ Biblu lẹ jẹeji. To whenuena e ko wleawuna pọndohlan dagbe dogọ godo, Yvette lọsu mọ gbẹtọ he tindo ojlo nado plọn Biblu lẹ.
10. Etẹwẹ yin azọngban dodonu tọn mítọn taidi mẹplọntọ Biblu tọn lẹ?
10 Klistiani delẹ sọgan whleawu nado biọ to jlodotọ lẹ si nado plọn Biblu hẹ yé na yé ma lẹndọ yé sọgan deanana oplọn de wutu. Na nugbo tọn, mí tindo nugopipe to obá voovo mẹ. Ṣigba mí ma dona yin azọ́nyọnẹntọ hugan lẹ dandan nado tindo kọdetọn dagbe taidi mẹplọntọ Ohó Jiwheyẹwhe tọn tọn lẹ gba. Owẹ̀n wiwe-ṣeke Biblu tọn yin huhlọnnọ, podọ Jesu dọ dọ omẹ taidi lẹngbọ lẹ yọ́n ogbè Lẹngbọhọtọ nugbo lọ tọn to whenuena yé sè. To whelọnu lo, azọngban mítọn wẹ nado dó owẹ̀n Lẹngbọhọtọ Daho lọ, Jesu tọn, hezeheze dile mí penugo do.—Johanu 10:4, 14.
11. Nawẹ hiẹ sọgan yin kọdetọn dagbenọ dogọ to alọgigọna Biblu plọntọ de mẹ gbọn?
11 Nawẹ hiẹ sọgan dó owẹ̀n Jesu tọn po kọdetọn dagbe po dogọ gbọn? Nado bẹjẹeji, hẹn dewe jẹakọ hẹ nuhe Biblu dọ gando hosọ he to yinyin dogbapọnna lọ go. Hiẹ dona mọnukunnujẹ hosọ de mẹ na dewe whẹpo hiẹ nido plọn ẹn mẹdevo lẹ. Mọdopolọ, tẹnpọn nado hẹn ninọmẹ yẹyidogonamẹ tọn po họntọnjihẹmẹ tọn de po go to oplọn lọ whenu. Nuplọntọ lẹ, gọna ovivu taun lẹ, nọ plọnnu ganji to whenuena yé tindo numọtolanmẹ vivomẹ-ninọ tọn bọ mẹplọntọ lọ do sisi po homẹdagbe po hia yé.—Howhinwhẹn lẹ 16:21.
12. Nawẹ hiẹ sọgan hẹn ẹn diun dọ nuplọntọ lọ mọnukunnujẹ nuhe hiẹ to pinplọn ẹn mẹ gbọn?
12 Taidi mẹplọntọ de, hiẹ ma na jlo nado ze whẹwhinwhẹ́n lẹ donukọnna nuplọntọ de nado na gblọndo lẹ gbọn dọvọdọ etọn didọ poun dali gba. Gọalọna ẹn nado mọnukunnujẹ nuhe e to pinplọn lọ mẹ. Wepinplọn nuplọntọ de tọn, numimọ gbẹ̀mẹ tọn, po akọjijẹhẹ Biblu po na yinuwado nukunnumọjẹnumẹ etọn ji gando nuhe dọ hiẹ te go. Enẹwutu, hiẹ sọgan kanse dewe, ‘Be ewọ mọnukunnujẹ nujọnu-yinyin wefọ heyin dide do owe oplọn tọn lọ mẹ ya?’ Hiẹ sọgan yọ́n nuhe tin to linlẹn etọn mẹ po kanbiọ lẹ po he ma sọgan yin gblọndo etọn na po hogbe bọawu lẹ po taidi mọwẹ kavi lala ṣigba he biọ zẹẹmẹ de. (Luku 9:18-20) To alọ devo mẹ, nuplọntọ delẹ nọ whleawu nado kanhose mẹplọntọ de. Gbọnmọ dali, yé sọgan to nukọnzindo matin nukunnumimọjẹ nuhe yè to pinplọn yé lẹ mẹ. Na tuli nuplọntọ lọ nado kàn kanbiọ lẹ sè podọ nado dọ na we whenuena e ma mọnukunnujẹ nuagokun delẹ mẹ.—Malku 4:10; 9:32, 33.
13. Nawẹ hiẹ sọgan gọalọna nuplọntọ lọ nado lẹzun mẹplọntọ de gbọn?
13 Lẹndai titengbe de na anadena plọnmẹ Biblu de wẹ nado gọalọna nuplọntọ lọ nado lẹzun mẹplọntọ de. (Galatianu lẹ 6:6) Nado jẹ yanwle enẹ kọ̀n, taidi dogbapọn oplọn towe tọn de, hiẹ sọgan kanse e nado basi zẹẹmẹ nuagokun de tọn to hogbe he bọawu lẹ mẹ, taidi dọ e to zẹẹmẹ etọn basi na mẹde he to sisè e to tintan whenu. To enẹgodo, whenuena e pegan nado tindo mahẹ to lizọnyizọn lọ mẹ, hiẹ sọgan basi oylọna ẹn nado kọnawudopọ hẹ we to lizọnyizọn lọ mẹ. E yọnbasi dọ ewọ ni tindo numọtolanmẹ awuvivo tọn to azọ́nwiwa hẹ we mẹ, podọ numimọ lọ na gọalọna ẹn nado whẹ́n to adọgbigbo mẹ kakajẹ whenuena e na penugo nado tọ́n biọ lizọnyizọn lọ mẹ na ede.
Gọalọna Nuplọntọ lọ Nado Lẹzun Họntọn Jehovah Tọn
14. Etẹwẹ yin yanwle towe tintan taidi mẹplọntọ de, podọ etẹwẹ na yidogọna kọdetọn dagbe to mimọ ẹn yí mẹ?
14 Yanwle tintan Klistiani mẹplọntọ lẹpo tọn wẹ nado gọalọna nuplọntọ lọ nado tindo họntọnjihẹmẹ Jehovah tọn. Hiẹ sọgan basi wadotana ehe tọn e mayin gbọn ohó towe lẹ kẹdẹ dali wẹ gba ṣigba gbọn apajlẹ towe dali ga. Mẹpinplọn gbọn apajlẹ dali nọ tindo nuyiwadomẹji huhlọnnọ de do ahun nuplọntọ lẹ tọn ji. Nuyiwa lẹ sọgan yin kọdetọn dagbenọ dogọ hugan hogbe lẹ na taun tọn, na titengbe tọn to whenuena e wá jẹ jẹhẹnu walọdagbe tọn lẹ didó do ahun po zohunhun jijlọdote to nuplọntọ lọ mẹ po ji. Eyin ewọ mọdọ hogbe po nuwiwa towe lẹ po nọ wá sọn haṣinṣan dagbe de tintindo hẹ Jehovah mẹ, ewọ sọgan yin whinwhàn dogọ nado wleawuna haṣinṣan mọnkọtọn na edetiti.
15. (a) Naegbọn e yin onú titengbe dọ nuplọntọ lọ ni wleawuna mẹwhinwhàn he sọgbe na Jehovah sinsẹ̀n? (b) Nawẹ hiẹ sọgan gọalọna nuplọntọ lọ nado to nukọnzindo to nukọnyiyi gbigbọmẹ tọn tintindo mẹ gbọn?
15 Hiẹ jlo dọ nuplọntọ lọ ni sẹ̀n Jehovah e mayin dọ na e ma jlo nado yin vivasudo to Amagẹdọni poun wẹ gba ṣigba na e yiwanna ẹn wutu. Gbọn alọgigọna ẹn nado wleawuna mẹwhinwhàn wiwe-ṣeke mọnkọtọn dali, hiẹ na to dido po azọ́nwanu he miyọ́n ma nọ dù lẹ po he sọgan lùn mẹtẹnpọn yise etọn tọn tọ́n. (1 Kọlintinu lẹ 3:10-15) Mẹwhinwhàn agọ̀, taidi ojlo tintindo zẹjlẹgo nado hodo apajlẹ towe kavi gbẹtọ devo depope tọn, ma na na ẹn huhlọn nado nọavunte sọta nuyiwadomẹji he ma sọgbe hẹ Klistiani tọn mọjanwẹ e ma na na ẹn adọgbigbo nado wà nuhe sọgbe do niyẹn. Flin dọ, hiẹ ma na yin mẹplọntọ etọn kakadoi. Dile hiẹ tindo dotẹnmẹ hundote lọ, hiẹ sọgan na ẹn tuli nado dọnsẹpọ Jehovah hugan gbede pọ́n tọn gbọn Ohó Jiwheyẹwhe tọn hihia egbesọegbesọ po nulinlẹnpọn gandego po dali. To aliho ehe mẹ e na zindonukọn nado doadọ̀do to “ohia ohó tọn he pegan lọ” mẹ sọn Biblu po owe sinai do Biblu ji lẹ po mẹ na ojlẹ dindẹn to whenuena oplọn towe hẹ ewọ ko wá vivọnu godo.—2 Timoti 1:13.
16. Nawẹ hiẹ sọgan plọn nuplọntọ lọ nado nọ hodẹ̀ sọn ahun mẹ wá gbọn?
16 Hiẹ sọgan sọ gọalọna nuplọntọ lọ nado dọnsẹpọ Jehovah pẹkipẹki gbọn pinplọn ẹn nado hodẹ̀ sọn ahun mẹ dali. Nawẹ hiẹ sọgan wà ehe gbọn? Vlavo hiẹ sọgan deanana ẹn hlan odẹ̀ apajlẹnọ Jesu tọn, mọdopolọ dohlan odẹ̀ ahundoponọ susu heyin kinkàndai to Biblu mẹ lẹ, taidi dehe tin to psalm mẹ lẹ. (Psalm lẹ 17, 86, 143; Matiu 6:9, 10) To yidogọ mẹ, to whenuena nuplọntọ towe sè bọ hiẹ hodẹ̀ bẹjẹeji po tadona tọn po na oplọn lọ, ewọ na yọ́n numọtolanmẹ towe dohlan Jehovah. Enẹwutu, odẹ̀ towe dona nọ do ahundoponọ-yinyin po hunhundonuvo po hia whepoponu, mọdopolọ wẹ jlẹkaji-ninọ gbigbọmẹ po numọtolanmẹ tọn po ga.
Azọ́nwiwa Nado Whlẹn Ovi Towe lẹ Gán
17. Nawẹ mẹjitọ lẹ sọgan gọalọna ovi yetọn lẹ nado gbọṣi omọ́-liho whlẹngán tọn ji gbọn?
17 Na nugbo tọn, to mẹhe mí jlo dọ yé ni yin whinwhlẹngán lẹ mẹ wẹ hagbẹ whẹndo tọn mítọn lẹ tin te. Sọha daho ovi lẹ tọn he tindo mẹjitọ Klistiani lẹ yin ahundoponọ bosọ ‘lodo to yise mẹ.’ Nalete, nugbo lọ sọgan nọ ma doadọ̀do sisosiso to ahun devo lẹ tọn mẹ. (1 Pita 5:9; Efesunu lẹ 3:17; Kọlọsinu lẹ 2:7) Susu to jọja ehelẹ mẹ nọ jo aliho Klistiani tọn dó to whenuena yé dọnsẹpọ kavi biọ mẹhowhe mẹ. Eyin mẹjitọ de wẹ hiẹ yin, etẹwẹ hiẹ sọgan wà nado de kọdetọn lọ pò vlavo? Tintan, hiẹ sọgan wazọ́n do awuwiwlena lẹdo dagbe whẹndo tọn de ji. Gbẹzan whẹndo tọn dagbe de nọ ze dodonu dai na pọndohlan dagbe aṣẹpipa tọn, pinpẹn-nutọn-yinyọnẹn na nujọnu lẹ, po haṣinṣan ayajẹ tọn hẹ mẹdevo lẹ po. (Heblu lẹ 12:9) Gbọnmọ dali, haṣinṣan pẹkipẹki lẹ to whẹndo lọ mẹ sọgan yin dodonu he ji haṣinṣan ovi de tọn hẹ Jehovah sọgan whẹ́n te. (Psalm 22:10) Whẹndo he lodo lẹ nọ wà onú lẹpo dopọ to kọndopọmẹ—eyin mẹjitọ lẹ dona tlẹ yí whenu he sọgan yin yiyizan na dagbenu mẹdetiti tọn lẹ do sanvọ́. To aliho ehe mẹ hiẹ sọgan gbọn apajlẹ dali plọnnu ovi towe lẹ nado basi nudide dagbe lẹ to gbẹzan mẹ. Mẹjitọ lẹ emi, nuhe ovi mìtọn lẹ tindo nuhudo etọn sọn mì dè hugan wẹ, e mayin dagbenu nutindo agbasa tọn lẹ gba, ṣigba mìwlẹ—yèdọ whenu, huhlọn, po owanyi mìtọn po. Be hiẹ to onú ehelẹ na ovi towe lẹ ya?
18. Kanbiọ wunmẹ tẹlẹ wẹ mẹjitọ lẹ dona gọalọna ovi yetọn lẹ nado didẹ̀?
18 Mẹjitọ Klistiani lẹ ma dona lẹn pọ́n gbede dọ ovi yetọn lẹ na lẹzun Klistiani lẹ to jọwamọ-liho gba. Daniel, heyin mẹho po otọ́ ovi atọ́n tọn po, doayi e go dọmọ: “Mẹjitọ lẹ dona yí whenu zan nado gọalọ bo de ayihaawe tintindo he mayọ́n dapana he ovi yetọn lẹ ko plọn to wehọmẹ podọ to fidevo lẹ sẹ̀. Yé dona yí sọwhiwhe do gọalọna ovi yetọn lẹ nado mọ gblọndo lẹ hlan kanbiọ lẹ taidi: ‘Be mí to gbẹnọ to ojlẹ opodo tọn mẹ nugbonugbo ya? Be sinsẹ̀n nugbo dopo kẹdẹ wẹ tin nugbonugbo ya? Naegbọn wehọmẹvigbẹ́ he taidi omẹ dagbe delẹ mayin gbẹdido dagbe? Be nuhe jẹagọ wẹ e yin to whepoponu nado tindo zanhẹmẹ jẹnukọnna alọwle ya?’ ” Mẹjitọ lẹ emi, mì sọgan nọ ganjẹ Jehovah go nado dona vivẹnudido mìtọn lẹ, na ewọ lọsu tindo ojlo to dagbemẹ-ninọ ovi mìtọn lẹ tọn mẹ.
19. Naegbọn e do pọnte dọ mẹjitọ lẹ lọsu titi ni plọnnu hẹ ovi yetọn lẹ?
19 Mẹjitọ delẹ sọgan tindo numọtolanmẹ nugomape tọn to whenuena e wá jẹ nupinplọn hẹ ovi yetọn titi lẹ ji. Ṣigba, hiẹ ma dona tindo numọtolanmẹ to aliho ehe mẹ gba, na mẹdepope matin to otẹn dagbe de mẹ nado plọn ovi towe lẹ hugan hiẹ gba. (Efesunu lẹ 6:4) Oplọn bibasi hẹ ovi towe titi lẹ na na we dotẹnmẹ nado yọ́n nuhe tin to ahun yetọn lẹ mẹ tlọlọ. Be hodidọ yetọn lẹ yin ahundopo tọn kavi ojlo matindo tọn ya? Be yé yí nuhe yé to pinplọn lẹ sè nugbonugbo ya? Be Jehovah yin nujọnu na yé ya? Hiẹ sọgan mọ gblọndo lẹ na ehelẹ po kanbiọ nujọnu tọn devo lẹ po kiki eyin hiẹ lọsu nọ plọnnu hẹ ovi towe lẹ.—2 Timoti 1:5.
20. Nawẹ mẹjitọ lẹ sọgan hẹn oplọn whẹndo tọn yin awuvivi po alemọyi tọn po gbọn?
20 Nawẹ hiẹ sọgan hẹn tito-to-whinnu oplọn whẹndo tọn towe go to whenuena hiẹ ko bẹjẹeji gbọn? Joseph, heyin mẹho de po otọ́ visunnu po viyọnnu jọja de tọn po, dọmọ: “Taidi oplọn Biblu tọn lẹpo, oplọn whẹndo tọn dona yin vivi etọn dù, yèdọ nude he mẹlẹpo na to nukọn pọ́n hlan na. Nado jẹ enẹ kọ̀n to whẹndo mítọn mẹ, mí ma sọgan yin hẹngogonọ gando ojlẹ go gba. Oplọn mítọn sọgan dẹ̀n na ganhiho dopo, ṣigba eyin mí tlẹ tindo nukunwhiwhe ao poun to whedelẹnu, mí gbẹsọ nọ plọnnu. Onú dopo he nọ hẹn oplọn mítọn yin onú titengbe to osẹ lọ mẹ na ovi lẹ wẹ yindọ mí nọ basi wadohia nujijọ lẹ tọn sọn Owe Ṣie Heyin Otàn Biblu Tọn mẹ. a Nuyiwadomẹji sisosiso po nukunnumọjẹnumẹ he nọ dekọtọn lọ po yin nujọnu tlala hugan sọha hukan he yin dogbapọnna lẹ tọn.”
21. Whetẹnu wẹ mẹjitọ lẹ sọgan plọnnu ovi yetọn lẹ?
21 Na nugbo tọn, ovi towe lẹ pinplọn ma nọte do ojlẹ oplọn aṣa tọn ji gba. (Deutelonomi 6:5-7) Kunnudetọ lọ to Thaïlande heyin nùdego to bẹjẹeji dọmọ: “Yẹn nọ flin po zohunhun po lehe Papa nọ saba hẹn mi yì azọ́n yẹwhehodidọ tọn mẹ do, to kẹkẹ mítọn ji, yì lẹdo he tin to olá aigba-denamẹ agun mítọn tọn lẹ ji. Nado dọhójọhó, apajlẹ dagbe mẹjitọ mítọn lẹ tọn po pinplọn mí to ninọmẹ lẹpo mẹ yetọn po wẹ gọalọna mí nado basi nudide nado biọ lizọnyizọn whenu-gigọ́ tọn mẹ. Podọ nupinplọn lọ lẹ dona ko gbọṣi kọdetọn dagbe tintindo mẹ. Yẹn gbẹsọ to azọ́nwa to lẹdo he tin to olá aigba-denamẹ lọ tọn lẹ ji!”
22. Etẹwẹ sọgan dekọtọn sọn ‘ayipipa dewe po mẹpinplọn towe po go’ mẹ?
22 To madẹnmẹ to gbèdopo, to ojlẹ he sọgbe mẹ, Jesu na wá nado hẹn whẹdida Jiwheyẹwhe tọn ṣẹ do titonu ehe ji. Nujijọ daho enẹ to whelọnu na juwayi biọ whenuho wẹkẹ tọn mẹ, ṣigba devizọnwatọ nugbonọ Jehovah tọn lẹ na zindonukọn nado to sinsẹ̀n ẹn po pọndohlan whlẹngán mavọmavọ tọn po. Be hiẹ jlo nado tin to ṣẹnṣẹn yetọn, gọna ovi towe lẹ po Biblu plọntọ towe lẹ po ya? To whelọnu lo flin: “Payi dewe po mẹpinplọn towe po go; nọ nọte to yé mẹ; na ehe wiwà mẹ hiẹ na whlẹn dewe, po yé he to ohó towe sè lẹ po.”—1 Timoti 4:16.
[Nudọnamẹ Odò Tọn]
a Yin zinzinjẹgbonu gbọn Watchtower Bible and Tract Society of New York, Inc. dali.
Be Hiẹ Sọgan Basi Zẹẹmẹ Ya?
• Etẹwẹ dona yin walọyizan mítọn, to whenuena e yindọ mí ma yọ́n ojlẹ taun lọ na whẹdida Jiwheyẹwhe tọn?
• To aliho tẹlẹ mẹ wẹ mí sọgan ‘payi mẹpinplọn mítọn go’ te?
• Nawẹ hiẹ sọgan gọalọna nuplọntọ de nado lẹzun họntọn Jehovah tọn gbọn?
• Naegbọn e do yin nujọnu dọ mẹjitọ lẹ ni de whenu dai nado plọn ovi yetọn lẹ?
[Kanbiọ Oplọn Tọn Lẹ]
[Yẹdide to weda 15]
Nupinplọn nọ yin hinhẹn bọawu gbọn ninọmẹ yẹyidogonamẹ po họntọnjihẹmẹ tọn de po dali
[Yẹdide to weda 18]
Wadohia otàn Biblu tọn lẹ bibasi, taidi aliho he mẹ Sọlọmọni dawhẹna ayọdetọ awe lẹ te, nọ hẹn oplọn whẹndo tọn lẹ yin awuvivinu