Be Hiẹ Nọ Yí Nuhe Hiẹ Ma Sọgan Mọ Sè Ya?

TO WHENUENA mẹde dọ, ‘Yẹn nọ yí nuhe yẹn sọgan mọ kẹdẹ sè,’ e ma to hodọ to aliho paa de mẹ gba. Na taun tọn, mímẹpo wẹ nọ yí nuhe mí ma sọgan mọ lẹ sè.

Di apajlẹ, to wehọmẹ hiẹ sọgan ko basi nutẹnpọn de heyin awuwlena nado do tintin-to-aimẹ huhlọn nudọndogo ogàn-mú tọn hia. E zindonukọn dole: Vúnvún ogàn flinflin lẹ do wema de ji. Enẹgodo ze wema lọ do ogàn-mú-nudọndogo tọn lọ ji. To whenuena wema lọ yin whinwhàn, taidi nuwiwa nujijlẹ tọn ogàn flinflin lọ lẹ nọ hoplidopọ sẹpọ ogàn nudọndogo tọn lọ bo nọ  wleawuna aliho nuwiwa huhlọn nudọndogo tọn. Eyin hiẹ wà enẹ, be hiẹ sọgan mọ huhlọn nudọndogo ogàn-mú tọn lọ na nugbo tọn ya? Lala, ṣigba nugandomẹgo etọn do ogàn flinflin lẹ ji sọgan yin mimọ hezeheze, bo na we kunnudenu nujikudo tọn dọ gànmú-nudọndogo tọn tin.

Matin ayihaawe mí nọ kẹalọyi onú devo lẹ he mí ma sọgan mọ. To whenuena mí pọ́n yẹdide whanpẹnọ de kavi yin pipaṣa gando anazọnwiwa dagbe de go, mí ma nọ tindo ayihaawe gando tintin yẹdenanutọ kavi anazọ́nwatọ de tọn go gba. Enẹwutu to whenuena mí lẹnnupọndo otọ̀ sisa de ji kavi pọ́n zizẹ̀ owhè tọn de, be mí ma nọ yin whinwhàn e whè gbau nado lẹnnupọndo yọnbasi lọ ji dọ yé yin azọ́n Yẹdenanutọ kavi Anazọ́nwatọ Daho de tọn ya?

Nuhewutu Mẹdelẹ Ma Nọ Yise

Nado dọhojọho, mẹdelẹ ko doalọtena yise tintindo to Jiwheyẹwhe mẹ na nuhe yé yin pinplọn to ṣọṣi mẹ wutu. Ehe yin nugbo gando dawe Norvège tọn de go heyin didọna dọ Jiwheyẹwhe nọ fiọ mẹylankan lẹ to zòmẹ. Na poun tọn dawe lọ ma sọgan mọnukunnujẹ Jiwheyẹwhe wunmẹ he na sayana gbẹtọ lẹ to aliho enẹ mẹ gba, enẹwutu e lẹzun mẹhe ma yise dọ Jiwheyẹwhe tin de.

Ṣigba, to godo mẹ, dawe lọ yigbe nado gbadopọnna Biblu, yin alọgọna gbọn dopo to Kunnudetọ Jehovah tọn lẹ dali. E paṣa ẹ nado plọn dọ Biblu ma plọnmẹ dọ mẹylankan lẹ nọ yin yasana to zòmẹ gba. Biblu yí okú jlẹdo amlọn go. To yọdo mẹ, mí ma nọ tindo numọtolanmẹ awufiẹsa tọn; mí ma nọ yọ́n nudepope gba. (Yẹwhehodọtọ 9:5, 10) Dawe lọ sọ plọn ga dọ gbẹtọvi he Jiwheyẹwhe dawhẹna nado yin mẹylankan he ma sọgan yin vivọjlado lẹ na gbọṣi yọdo mẹ kakadoi. (Matiu 12:31, 32) Pipòtọ oṣiọ lẹ tọn na yin finfọnsọnku to ojlẹ dide Jiwheyẹwhe tọn mẹ, po nukundido lọ po nado mọ ogbẹ̀ madopodo yí to ninọmẹ Paladisi tọn lẹ mẹ. (Johanu 5:28, 29; 17:3) Zẹẹmẹ ehe sọgbe hẹ lẹnpọn dagbe. E tin to kọndopọmẹ hẹ hodidọ Biblu tọn dọ “Jiwheyẹwhe wẹ owanyi.” (1 Johanu 4:8) Dawe ahundoponọ ehe zindonukọn to oplọn Ohó Jiwheyẹwhe tọn etọn mẹ podọ, to madẹnmẹ, wá yiwanna Jiwheyẹwhe Biblu tọn lọ.

Mẹdevo lẹ gbẹ́ tintin Mẹdatọ owanyinọ de tọn dai na gbigbayipe ayimajai po whẹdida mawadodo tọn po wutu. Yé kọngbedopọ hẹ dawe Suède-nu de he to ojlẹ de mẹ wayi dlẹnalọdo olọn lẹ bosọ kanse dọmọ: “Nawẹ Jiwheyẹwhe nupojipetọ, awuwledainanutọ alọtlutọ de sọgan tin to aga finẹ to whenuena mí tindo mẹhodu po kanyinylan susu sọmọ po to odò tofi?” Na mẹdepope ma sọgan na gblọndo na kanbiọ etọn wutu, ewọ lọsu lẹzun mẹhe ma yise dọ Jiwheyẹwhe tin de. Enẹgodo e jẹ Biblu plọn hẹ Kunnudetọ Jehovah tọn lẹ ji. E plọn dọ Ohó Jiwheyẹwhe tọn wleawuna gblọndo pekọhẹnwanamẹ tọn de hlan kanbiọ dẹn-to-aimẹ lọ, Naegbọn  Jiwheyẹwhe do jo dotẹnmẹ do na kanyinylan? a

Dawe ahundoponọ ehe plọn dọ tintin kanyinylan tọn to ede mẹ ma dohia dọ Jiwheyẹwhe ma tin gba. Nado basi dohia: Dawe de sọgan basi ohí de nado nọ yin yiyizan nado sán olàn. Ahisinọ de sọgan họ̀ ohí lọ bosọ yí ì zan, e mayin nado sán olàn gba, ṣigba nado yí do hù hlọ̀n. Nugbo lọ dọ ohí lọ yin ṣiṣizan ma dohia to aliho depope mẹ dọ basitọ etọn ma tin gba. Mọdopolọ, nugbo lọ dọ aigba ma ko to yinyin yiyizan to gbesisọmẹ hẹ lẹndai he yè tindo linlẹn etọn na ẹn ma zẹẹmẹdo dọ e ma tindo Didatọ de gba.

Biblu plọnmẹ dọ pipé wẹ azọ́n Jiwheyẹwhe tọn. To ewọ dè “whẹdida mawadodo depope matin; dodonọ podọ jlọjẹnọ wẹ ewọ, NW .” (Deutelonomi 32:4) Jiwheyẹwhe na nunina dagbe gbẹtọ lẹ, ṣigba delẹ to nunina lọ lẹ mẹ ko yin ṣiṣizan, he nọ hẹn yajiji madosọha lẹ wá. (Jakobu 1:17) Ṣigba, Jiwheyẹwhe na hẹn opodo wá na yajiji. To enẹgodo, “homẹmiọnnọ lẹ na dugu aigba tọn; . . . bo nasọ nọnọ̀ e mẹ kakadoi.”—Psalm 37:11, 29.

Dawe Suède-nu heyin nùdego jẹnukọn lọ yin nuyiwadeji tlala to whenuena e mọ yajiji gbẹtọ hatọ lẹ tọn. Na nugbo tọn, numọtolanmẹ awuvẹmẹ tọn etọn na mẹdevo lẹ hẹn tintin Jiwheyẹwhe tọn lodo. Nawẹ e yinmọ gbọn?

Na suhugan gbẹtọ lẹ tọn, aliho dopo kẹdẹ lọ he gbọnvona yise to Jiwheyẹwhe mẹ wẹ yise to nulẹ tin yededenu mẹ. Mẹhe tindo yise to nulẹ tin yededenu mẹ lẹ nọ plọnmẹ “lunluntọ́n nugopetọ hugan lẹ tọn”—dọ gbẹtọvi lẹ po kanlin lẹ po nọ whlẹnagba to wunmẹ yedelẹ tọn mẹ na lunluntọ́n. Nugopetọ hugan lẹ nọ luntọ́n; madogannọ hugan lẹ nọ kú. Enẹ wẹ yin tito jọwamọ onú lẹ tọn, wẹ yé dọ. Ṣigba eyin onú “jọwamọ” tọn wẹ eyin na madogánnọ lẹ nado kú nado sọgan hùn dotẹnmẹ dote na mẹhe yin nugopetọ hugan lẹ, nawẹ mí sọgan basi zẹẹmẹ whẹwhinwhẹ́n lọ tọn dọ, taidi dawe Suède-nu lọ, gbẹtọvi huhlọnnọ delẹ nọ yin nuyiwadeji tlala to whenuena yé mọ yajiji gbẹtọ hatọ yetọn tọn?

Jiwheyẹwhe Yinyọnẹn

Mí ma sọgan mọ Jiwheyẹwhe gba na e ma tindo wunmẹ gbẹtọvi tọn de wutu. Ṣogan, Jiwheyẹwhe jlo dọ mí ni yọ́n emi. Aliho dopo he mẹ mí sọgan jẹakọ hẹ ẹ te wẹ gbọn ayidido azọ́n jiawu etọn lẹ go dali—yèdọ “yẹdide lẹ” po “anazọnwiwa” nudida tọn lẹ po. To Lomunu lẹ 1:20 mẹ, Biblu dọmọ: “Na yè mọ onú mamọ [Jiwheyẹwhe tọn] lẹ sọn whẹwhẹwhenu aihọn tọn to wedede, yè to nuyọnẹn onú he yè basi lẹ tọn do to yé yọnẹn, yèdọ huhlọn madopodo po [Jiwheyẹwhe-yinyin, NW] etọn po.” Mọwẹ, kẹdẹdile yẹdide de kavi anazọnwiwa de pinplọn sọgan gọalọna hiẹ nado tindo nukunnumọjẹnumẹ gando gbẹtọ-yinyin yẹdenanutọ lọ tọn go do, mọwẹ nulinlẹnpọn do azọ́n jiawu Jiwheyẹwhe tọn lẹ ji sọgan gọalọna we nado jẹakọ hẹ gbẹtọ-yinyin etọn ganji do.

Nugbo wẹ dọ, mí ma sọgan na gblọndo na kanbiọ tukladomẹ gbẹ̀mẹ tọn lẹpo gbọn pinpọn azọ́n nudida Jiwheyẹwhe tọn lẹ hlan poun dali gba. Ṣigba mí sọgan mọ gblọndo na kanbiọ mọnkọtọn lẹ gbọn dodinna Ohó Jiwheyẹwhe tọn, Biblu dali. Gbọn Biblu hihia po ahun he tin to nùvo de po dali wẹ dawe awe heyin nùdego to bẹjẹeji lẹ wá tadona lọ kọ̀n dọ Jiwheyẹwhe tin podọ dọ e nọ yin ahunmẹduna gando nuhe nọ jọ do mí go lẹ go.

[Nudọnamẹ Odò Tọn]

[Yẹdide/Asisa Yẹdide Tọn to weda 28]

J. Hester po P. Scowen po (AZ State Univ.), NASA