Mì Nọ Gbògbéna Mẹhe Yè Yí Aṣẹpipa Na Do Mì Ji Lẹ
Mì Nọ Gbògbéna Mẹhe Yè Yí Aṣẹpipa Na Do Mì Ji Lẹ
“Mì nọ gbògbéna gbẹtọ wunmẹ lẹpo, mì tindo owanyi na gbẹdido blebu mẹmẹsunnu lẹ tọn, mì nọ dibusi Jiwheyẹwhe, mì nọ gbògbéna ahọlu.”—1 PITA 2:17, NW.
1, 2. Nawẹ gbẹtọ lẹ nọ pọ́n aṣẹpipa hlan gbọn to egbehe? Etẹwutu?
“OVIVU lẹ tindo jlọjẹ lẹpo. Sisi matin na mẹjitọ lẹ gba,” wẹ onọ̀ de wule dọ. “Diọnukunsọ Aṣẹpipa” wẹ wema he yè nọ tlẹ do mọto go de dọ. Enẹlẹ yin awe poun to dohia ninọmẹ he gbayipe to egbehe lẹ mẹ, dile hiẹ dona yọnẹn do. Sisi ma tindo na mẹjitọ lẹ, mẹplọntọ lẹ, azọ́nmẹyimẹdotọ lẹ, po nukunmọnu ahọlu tọn lẹ po to paa mẹ gbayipe lẹdo aihọn pé.
2 Mẹdelẹ sọgan whèkọdakun bo dọ dọ, ‘Eyọn, mẹhe tin to otẹn aṣẹpipa tọn mẹ lẹ ma jẹ nado mọ sisi yí sọn dee gba.’ To whedelẹnu, hodidọ enẹ sọgan yin nuhe vẹawu nado gbẹdai. Mí nọ yin nukọnpan dogbọn linlin voovo he nọ yin zinzinjẹgbonu gando nukunmọnu ahọlu tọn he ko gblezọn lẹ, azọ́nmẹyimẹdotọ nukunkẹnnọ lẹ, mẹplọntọ he ma pegan lẹ, po mẹjitọ he nọ yí onú agọ̀ wà do ovi lẹ go po dali. Po homẹhunhun po, Klistiani kleun delẹ wẹ nọ pọ́n mẹhe tin to otẹn aṣẹpipa tọn mẹ to agun lọ mẹ lẹ hlan to aliho enẹ mẹ.—Matiu 24:45-47.
3, 4. Naegbọn Klistiani lẹ dona nọ do sisi hia hlan mẹhe tin to otẹn aṣẹpipa tọn mẹ lẹ?
3 Taidi Klistiani lẹ, mí tindo ‘whẹwhinwhẹ́n he lodo’ nado na sisi mẹhe to aṣẹpipa tonudidọ tọn yizan lẹ. Apọsteli Paulu dotuhomẹna Klistiani lẹ nado “yin mẹmẹglọ hlan [aṣẹpipa, NW] daho lẹ. Na [aṣẹpipa] de matin adavo sọn Jiwheyẹwhe dè; huhlọn he tin lẹ Jiwheyẹwhe dè wẹ yè do yé ai sọn.” (Lomunu lẹ 13:1, 2, 5; 1 Pita 2:13-15) Paulu sọ do whẹwhinwhẹ́n he sọgbe devo hia na tonusisena aṣẹpipa he tin to whẹndo mẹ lẹ dọmọ: “Mì asi lẹ, mì yin mẹmẹglọ hlan asu mìtọn lẹ, dile e jẹ do to Oklunọ mẹ. Mì ovi lẹ, mì nọ setonuna mẹjitọ mìtọn lẹ to onú popo mẹ, na ehe yọnwhanpẹ tlala to Oklunọ dè.” (Kọlọsinu lẹ 3:18, 20) Mẹho agun tọn lẹ jẹna gbégbigbò mítọn na ‘gbigbọ wiwe ko de yé taidi nugopọntọ lẹ, nado yìn lẹngbọpa agun Jiwheyẹwhe tọn tọn’ wutu. (Owalọ lẹ 20:28) Sisi tintindo hlan Jehovah wẹ e yin dọ mí ni gbògbéna aṣẹpipa gbẹtọvi tọn lẹ. To jọwamọ-liho, gbégbigbòna aṣẹpipa Jehovah tọn nọ jẹnukọn to gbẹzan mítọn lẹ mẹ to whepoponu.—Owalọ lẹ 5:29.
4 Po aṣẹpipa nupojipetọ Jehovah tọn po to ayiha mẹ, mì gbọ mí ni gbadopọnna apajlẹ mẹdelẹ he ma gbògbéna mẹhe tin to otẹn aṣẹpipa tọn mẹ lẹ tọn po mẹdevo he wàmọ lẹ tọn po.
Sisi Matindo Nọ Dekọtọn Do Nukundagbe Hinhẹnbu Mẹ
5. Walọyizan sisi matindo tọn tẹwẹ Mikali dohia hlan Davidi, podọ etẹ mẹ wẹ enẹ dekọtọn do?
5 Sọn whenuho Ahọlu Davidi tọn mẹ, mí sọgan mọ lehe Jehovah nọ pọ́n mẹhe yí nukunpẹvi do pọ́n aṣẹpipa heyin ninamẹ gbọn Jiwheyẹwhe dali lẹ hlan gbọn. To whenuena Davidi mọ bọ aki alẹnu tọn yin hinhẹnwá Jelusalẹm, asi etọn Mikali “[mọ] bọ Davidi to linlọ́n bo to wèdu to OKLUNỌ nukọn; ewọ sọ vlẹ ẹ to ayiha etọn mẹ.” Mikali dona ko yọ́n Davidi e mayin taidi tatọ́ whẹndo lọ tọn kẹdẹ gba ṣigba taidi ahọlu aigba lọ tọn ga. Ṣigba, e dọ numọtolanmẹ etọn lẹ tọ́n po mẹṣanko po dọmọ: “Nawẹ ahọlu Islaeli tọn yin gigonọ do to egbe, mẹhe dè ede do omẹ́ to egbe to nukun deviyọnnu devisunnu etọn lẹ tọn lẹ tọn mẹ, dile dopo sọn omẹ fúsa lẹ mẹ nọ yí matin winyan do dè ede do omẹ́ do!” Kọdetọn ehe tọn wẹ yindọ Mikali ma sọ jivi pọ́n ba.—2 Samuẹli 6:14-23.
6. Nukun tẹwẹ Jehovah yí do pọ́n sisi matindo Kola tọn na mẹyiamisisadode Etọn lẹ?
6 Apajlẹ he ylan hugan heyin sisi matindo hlan nukọntọ yẹwhehọluduta tọn heyin dide gbọn Jiwheyẹwhe dali wẹ dehe yin Kola tọn. Taidi Kohatinu de, lẹblanulọkẹyi nankọtọn die ewọ nọ duvivi etọn to Jehovah sinsẹ̀n mẹ to gòhọtúntún lọ mẹ! Etomọṣo, e mọ nuṣiwa to Mose po Aalọn po mẹ, yèdọ nukọntọ yiamisisadode Jiwheyẹwhe tọn lẹ do Islaelivi lẹ ji. Kola kọngbedopọ hẹ nukọntọ whédo Islaeli tọn devo lẹ bosọ dọ po homẹgble po hlan Mose po Aalọn po dọmọ: “Mimọ agun lọ lẹpo wẹ wiwe, dopodopo yetọn, podọ OKLUNỌ lọ sọ tin to yé ṣẹnṣẹn: whenẹnu etẹwutu mìwlẹ ze mìde daga do agunpipli OKLUNỌ lọ tọn ta?” Nawẹ Jehovah pọ́n walọyizan Kola po godonọnamẹtọ etọn lẹ tọn po hlan gbọn? Jiwheyẹwhe pọ́n nuyiwa yetọn hlan taidi nuhe ma gbògbéna Jehovah lọsu titi. To whenuena yé ko mọ bọ aigba mì mẹhe tin to adà yetọn mẹ lẹpo vọ̀ godo, Kola po nukọntọ whédo Islaeli tọn 250 lẹ po yin vivasudo gbọn miyọ́n he wá sọn Jehovah dè de dali.—Osọha lẹ 16:1-3, 28-35.
7. Be “apọsteli daho daho” lẹ tindo whẹwhinwhẹ́n depope nado mọhodọdo aṣẹpipa Paulu tọn go wẹ ya?
7 To agun Klistiani owhe kanweko tintan whenu tọn mẹ, mẹdelẹ tin he ma gbògbéna aṣẹpipa yẹwhehọluduta tọn. “Apọsteli daho daho” he tin to agun Kọlintinu lẹ tọn mẹ lẹ tindo walọyizan sisi matindo tọn hlan Paulu. Yé mọhodọdo nugopipe hodidọ tọn etọn go, dọmọ: “Tintọ́nkọ etọn to agbasa mẹ yin madogánnọ, hogbe etọn sọ vlẹ.” (2 Kọlintinu lẹ 10:10; 11:5) Vlavo Paulu yin hodọtọ he didẹ́ de kavi lala, e jẹna sisi taidi apọsteli de. Ṣigba be hogbe Paulu tọn lẹ vlẹ na nugbo tọn wẹ ya? Hodidọ gbangba tọn etọn lẹ heyin kinkàndai to Biblu mẹ na kunnudenu lehe ewọ yin hodọtọ he dutomẹji de do. Etẹ, taidi kọdetọn hodidọ kleun de hẹ Hẹlodi Aglippa II, yèdọ mẹhe yin ‘azọ́nyọnẹntọ to nudindọn Ju lẹ tọn lẹpo mẹ’ de, Paulu hẹn ahọlu lọ jẹ ninọmẹ de mẹ nado dọmọ: “Hoyidọdọ̀nmẹ pẹẹde dogọ hiẹ do jlo yí homẹhunhun do hẹn mi yin Klistiani de”! (Owalọ lẹ 13:15-43; 17:22-34; 26:1-28) Etomọṣo, apọsteli daho daho he tin to Kọlinti lẹ sawhẹdokọna ẹn dọ hogbe etọn lẹ vlẹ! Nawẹ Jehovah pọ́n walọyizan yetọn hlan gbọn? To wẹndomẹ de mẹ hlan nugopọntọ agun Efesunu lẹ tọn lẹ, Jesu Klisti dọho dagbe gando mẹhe gbẹ́ nado yin dindọ̀n sọyi gbọn mẹhe ‘dọ dọ yé yin apọsteli lẹ, ṣigba bọ yé mayin mọ’ lẹ dali.—Osọhia 2:2.
Sisi Mahopọnna Mapenọ-Yinyin
8. Nawẹ Davidi dohia dọ emi gbògbéna aṣẹpipa he Jehovah ko na Sauli gbọn?
8 Apajlẹ susu wẹ tin to Biblu mẹ heyin mẹhe gbògbéna aṣẹpipa lẹ tọn, yèdọ etlẹ yin to whenuena ehelẹ ṣì aṣẹpipa yetọn zan kavi ma yí ì zan to aliho he sọgbe mẹ. Davidi yin apajlẹ dagbe mọnkọtọn dopo. Ahọlu Sauli, mẹhe glọ e to devizọnwa te, lẹzun awuwhàntọ gando nuwadotana Davidi tọn lẹ go bosọ to díndín nado hù i. (1 Samuẹli 18:8-12; 19:9-11; 23:26) Ṣogan, dile etlẹ tindo dotẹnmẹ hundote lẹ nado hù Sauli do sọ, Davidi dọmọ: “OKLUNỌ dike blo dọ yẹn nado dè alọ ṣie jẹgbonu do mẹyiamisisadode OKLUNỌ tọn ji.” (1 Samuẹli 24:3-6; 26:7-13) Davidi yọnẹn dọ owhẹ̀ Sauli tọn ma whẹ́n gba, ṣigba e jo e do alọ Jehovah tọn mẹ nado dawhẹna ẹn. (1 Samuẹli 24:12, 15; 26:22-24) E ma dọho to aliho agọ̀ mẹ kavi do Sauli go gba.
9. (a) Etẹwẹ yin numọtolanmẹ Davidi tọn dile e to yinyin nuyiwa hẹ to aliho agọ̀ mẹ gbọn Sauli dali? (b) Nawẹ mí sọgan yọnẹn gbọn dọ sisi he Davidi tindo na Sauli yin nugbo tọn?
9 Be Davidi yin ayimajainanọ to whenuena e to yinyin nuyiwa hẹ agọ̀ wẹ ya? “Budonamẹtọ lẹ . . . to ayiha ṣie dín,” wẹ Davidi dawhá jẹgbonu hlan Jehovah dọ. (Psalm 54:3) E kọ̀n ahun etọn jẹgbonu hlan Jehovah dọmọ: “Jiwheyẹwhe ṣie E, tútlú mi sọn kẹntọ ṣie lẹ si . . . Asuka lẹ pli do oji e; e mayin na tasinyẹn ṣie wutu, kavi na ylando ṣie wutu gba, OKLUNỌ E. Yé dowezun, yé sọ wleawuna yede matin nuwayindo ṣie: fọ́n, nado pé mi, bosọ doayi e go.” (Psalm 59:1-4) Be hiẹ ko tindo numọtolanmẹ to aliho dopolọ mẹ pọ́n gbede—dọ hiẹ ma ko waylan depope do mẹde he tin to otẹn aṣẹpipa tọn mẹ, ṣogan ewọ to awusinyẹnnamẹnu lẹ hẹnwa na we ya? Davidi ma gboawupo nado do sisi hia Sauli gba. To okú Sauli tọn godo, kakati nado jẹaglin to ayajẹ mẹ, Davidi pà ohàn awubla tọn de dọmọ: “Sauli po Jonatani po yin mẹvivẹ podọ vivinọ to ogbẹ̀ yetọn lẹ mẹ . . . Yé yin awuyatọ hú akùn lẹ, yé sọ yin sinsinyẹn hú kinnikinni lẹ. Mì viyọnnu Islaeli tọn lẹ, mì viavi do Sauli ji.” (2 Samuẹli 1:23, 24) Apajlẹ dagbe sisi nujọnu tọn na mẹyiamisisadode Jehovah tọn nankọtọn die, dile etlẹ yindọ Sauli ko wanuyindo do Davidi sọ!
10. Apajlẹ dagbe tẹwẹ Paulu zedai to gbégbigbòna aṣẹpipa hagbẹ anademẹtọ lọ tọn heyin ninamẹ gbọn Jiwheyẹwhe dali lọ mẹ, podọ etẹ mẹ wẹ enẹ dekọtọn do?
10 To ojlẹ Klistiani tọn mẹ, mí sọ mọ apajlẹ vonọtaun mẹhe gbògbéna aṣẹpipa heyin ninamẹ gbọn Jiwheyẹwhe dali tọn lẹ ga. Di dohia, yí Paulu taidi apajlẹ. E do sisi hia na nudide hagbẹ anademẹtọ owhe kanweko tintan whenu agun Klistiani tọn tọn lẹ. To dlapọn godo tọn Paulu tọn yì Jelusalẹm whenu, hagbẹ anademẹtọ lọ na ẹn ayinamẹ nado lẹ̀ ede wé to aṣa-liho nado dohia mẹdevo lẹ dọ emi ma tindo numọtolanmẹ agọ̀ hlan Osẹ́n Mose tọn gba. Paulu sọgan ko lẹnnupọn dọ: ‘Mẹmẹsunnu enẹlẹ dọna mi to ojlẹ de mẹ wayi dọ yẹn ni tọ́n sọn Jelusalẹm to whenuena ogbẹ̀ ṣie tin to owù mẹ. Todin yé jlo dọ yẹn ni dohia to gbangba dọ yẹn tindo sisi na Osẹ́n Mose tọn. Yẹn ko kàn wekanhlanmẹ de hlan Galatianu lẹ wayi bo to ayinamẹ na yé nado nọla na tonusisena Osẹ́n lọ. Eyin yẹn yì tẹmpli lọ mẹ, mẹdevo lẹ sọgan mọnukunnujẹ nuyiwa ṣie mẹ to aliho agọ̀ mẹ, bo na to linlẹn dọ yẹn to awukọndopọ hẹ mẹhe yin hagbẹ whẹmagbo tọn lẹ wẹ.’ Etomọṣo, kunnudenu dohia dọ Paulu ma lẹnnupọn to aliho enẹ mẹ gba. To whenuena e yindọ e ma bẹ gbejijona nunọwhinnusẹ́n Klistiani tọn de hẹn, e na sisi bosọ setonuna ayinamẹ hagbẹ anademẹtọ owhe kanweko tintan whenu tọn lẹ tọn. Kọdetọn afọdopolọji tọn wẹ yindọ Paulu dona yin whinwhlẹngán sọn gbẹtọgun bẹwlunọ Juvi lẹ tọn si, podọ e yí owhe awe zan to ganpa mẹ to godo mẹ. To agọgbọnẹnmẹ, ojlo Jiwheyẹwhe tọn yin wiwà. Paulu dekunnu to ahọluzọnwatọ gbóogbó lẹ nukọn to Sesalea podọ to enẹgodo to gbedide gandudu lọ tọn mẹ e yin zize yì Lomu nado dekunnu to Sesali lọsu nukọn.—Owalọ lẹ 9:26-30; 21:20-26; 23:11; 24:27; Galatianu lẹ 2:12; 4:9, 10.
Be Hiẹ Nọ Do Sisi Hia Ya?
11. Nawẹ mí sọgan do sisi hia hlan asẹpipa tonudidọ tọn lẹ gbọn?
11 Be hiẹ nọ do sisi he jẹ hia hlan mẹhe tin to otẹn aṣẹpipa tọn mẹ lẹ ya? Klistiani lẹ yin gbedena nado “suahọ mẹtọn-mẹtọn yé . . . osi hlan mẹhe osi yin etọn, gbégbò hlan mẹhe gbégbò yin etọn.” Na nugbo tọn, mẹmẹglọ yinyin mítọn hlan ‘aṣẹpipa daho lẹ’ ma bẹ takuẹ mítọn lẹ kẹdẹ súsú hẹn gba ṣigba dọ mí ni gbògbéna aṣẹpipa lẹ gbọn walọ po hodidọ mítọn lẹ po dali. (Lomunu lẹ 13:1-7) Eyin mí wá pannukọn nukunmọnu ahọlu tọn fifiẹtọ lẹ, nawẹ mí na yinuwa gbọn? To Ayimatẹn Chiapas tọn, to Mexique, aṣẹpatọ lẹ to lẹdo dopo mẹ ko yí ogle whẹndo 57 Kunnudetọ Jehovah tọn lẹ tọn na Klistiani ehelẹ ma tindo mahẹ to hùnwhẹ sinsẹ̀n tọn delẹ mẹ wutu. To opli heyin bibasi nado didẹ whẹho lọ whenu, Kunnudetọ lọ lẹ, he mẹ́n bosọ doaṣọ ganji, nọ saba dọho to yẹyi po sisi po mẹ. Hugan owhe dopo to godo mẹ, nudide lọ yin bibasi na dagbe yetọn. Walọyizan yetọn mọ sisi ayidonugotọ delẹ tọn yí jẹ obá de mẹ bọ yé lọsu lẹ jlo na lẹzun Kunnudetọ Jehovah tọn lẹ!
12. Naegbọn e yin nujọnu nado tindo “osi sisosiso” na asu mayisenọ mẹtọn?
12 Nawẹ hiẹ sọgan do sisi hia hlan aṣẹpipa heyin ninamẹ gbọn Jiwheyẹwhe dali to whẹndo mẹ gbọn? To whenuena e ko dọho do apajlẹ Jesu tọn ji do yajiji ji godo, apọsteli Pita dọmọ: “Mọkẹdẹ wẹ mì asi lẹ ni nọ yin mẹmẹglọ hlan asu mìtọn titi lẹ; na, eyin mẹde ma yí ohó lọ sè, yè nido dọ̀n yé gbọn owalọ asi lẹ tọn dali, matin ohó lọ; whenuena yé to owalọ wiwe mìtọn po osi [sisosiso, NW] po pọ́n.” (1 Pita 3:1, 2; Efesunu lẹ 5:22-24) Tofi Pita zinnudo nujọnu-yinyin mẹmẹglọ-yinyin asi de tọn hlan asu etọn “po osi sisosiso po” ji, dile etlẹ yindọ asu delẹ sọgan gọ̀n ma nọ wà onú susu nado jẹna sisi mọnkọtọn. Walọyizan sisi tintindo asi de tọn sọgan dù to ahun asu mayisenọ etọn tọn ji.
13. Nawẹ asi lẹ sọgan gbògbéna asu yetọn lẹ gbọn?
13 To lẹdo hodidọ wefọ ehelẹ tọn lẹ mẹ, Pita dọ̀n ayidonugo mítọn wá apajlẹ Sala tọn ji, mẹhe asu etọn, Ablaham, yin apajlẹ vonọtaun yise tọn de. (Lomunu lẹ 4:16, 17; Galatianu lẹ 3:6-9; 1 Pita 3:6) Be asi he tindo asu yisenọ lẹ dona na gbégbigbò he whè hugan dehe asi he tindo asu mayisenọ lẹ dona na yetọn lẹ wẹ ya? Etẹwẹ eyin hiẹ ma kọngbedopọ hẹ asu towe do whẹho delẹ ji? Jesu na ayinamẹ delẹ he sọgan yin yiyizan to aliho paa tọn de mẹ tofi dọmọ: “Eyin mẹdepope yí huhlọn do hẹn we yì liu dopo, yì hẹ ẹ jẹ awe.” (Matiu 5:41) Be hiẹ nọ gbògbéna asu towe gbọn gbekinkọndopọ hẹ ojlo etọn lẹ dali ya? Eyin ehe taidi nuhe sinyẹnawu hugan, dọ numọtolanmẹ towe lẹ do whẹho lọ ji hẹ ẹ. Ma lẹndọ ewọ yọ́n nuhe yin numọtolanmẹ towe lẹ gando whẹho lọ go blo. Ṣigba to whenuena hiẹ to ojlo towe lẹ hẹn zun yinyọnẹn hlan ẹn, wàmọ to aliho sisi tọn de mẹ. Biblu dotuhomẹna mí dọmọ: “Mì gbọ hogbe mìtọn ni tin po ojọmiọn po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo.”—Kọlọsinu lẹ 4:6.
14. Etẹwẹ gbégbigbò didohia na mẹjitọ lẹ bẹhẹn?
14 Etẹwẹ dogbọn mì ovi lẹ dali? Ohó Jiwheyẹwhe tọn degbè dọmọ: “Mì ovi emi, mì setonuna mẹjitọ mìtọn lẹ to Oklunọ mẹ; na ehe wẹ jlọjẹ. Gbògbéna otọ́ towe po onọ̀ po; heyin osẹ́n tintan po opagbe po.” (Efesunu lẹ 6:1-3) Doayi e go dọ tonusisena mẹjitọ towe lẹ yin onú dopolọ hẹ ‘gbégbigbò na otọ́ towe po onọ̀ towe po.’ Hogbe Glẹki tọn heyin lilẹdogbedevomẹ do “gbògbéna” zẹẹmẹdo “yí nukun nujọnu tọn do pọ́n” kavi “yí nuhọakuẹ de blá dego.” Gbọnmọ dali, yinyin tonusetọ biọ nususu hugan awuwhiwhle yíyí do hodo osẹ́n mẹjitọ lẹ tọn he sọgan taidi nuhe ma sọgbe hẹ lẹnpọn dagbe hlan we. Jiwheyẹwhe biọ to hiẹ si nado yí nukun nujọnu tọn do pọ́n mẹjitọ towe lẹ bosọ yí nukun nuhọakuẹ tọn do pọ́n anademẹ yetọn lẹ.—Howhinwhẹn lẹ 15:5.
15. Nawẹ ovi lẹ sọgan hẹn sisi yetọn go gbọn yèdọ eyin yé tlẹ tindo numọtolanmẹ lọ dọ mẹjitọ yetọn lẹ ko basi nuṣiwa de?
15 Eyin mẹjitọ towe lẹ wà nude he jlo na de sisi towe hlan yé pò, etẹwẹ dona yin wiwà to whenẹnu? Tẹnpọn nado pọ́n whẹho lẹ hlan sọn pọndohlan yetọn mẹ. Be e ma yin dọ yewlẹ wẹ ko “ji we” bo ko sọ wleawu onú lẹ tọn na we ya? (Howhinwhẹn lẹ 23:22) Be e mayin owanyi yetọn na we wẹ whàn yé ya? (Heblu lẹ 12:7-11) Dọho po sisi po hlan mẹjitọ towe lẹ, bo basi zẹẹmẹ nuhe yin numọtolanmẹ towe tọn to gbigbọ whiwhẹ tọn mẹ. Etlẹ yindọ yé yigbe to aliho he hiẹ ma yiwanna de mẹ, dapana hodidọ sisi matindo tọn hlan yé. (Howhinwhẹn lẹ 24:29) Flin lehe Davidi hẹn sisi etọn hlan Sauli go do etlẹ yin to whenuena ahọlu lọ ko buali sọn ayinamẹ Jiwheyẹwhe tọn hihodo mẹ. Biọ Jehovah nado na we alọgọ nado dùto numọtolanmẹ towe lẹ ji. “[Mì] kọ̀n ayiha mìtọn jẹgbonu to nukọn etọn,” wẹ Davidi dọ. “Jiwheyẹwhe wẹ fibẹtado de na mí.”—Psalm 62:8; Avigbè Jẹlemia tọn 3:25-27.
Gbògbéna Mẹhe to Nukọntọ Yin Lẹ
16. Etẹwẹ mí sọgan plọn sọn apajlẹ mẹplọntọ lalonọ lẹ po angẹli lẹ tọn po mẹ?
16 Mẹho agun tọn lẹ yin dide gbọn gbigbọ wiwe dali, ṣogan yé gbẹsọ yin mapenọ lẹ bosọ nọ ṣinuwa. (Psalm 130:3; Yẹwhehodọtọ 7:20; Owalọ lẹ 20:28; Jakobu 3:2) Taidi kọdetọn de, mẹdelẹ to agun lọ mẹ sọgan tindo numọtolanmẹ pekọ matindo tọn hẹ mẹho lẹ. Nawẹ mí dona yinuwa gbọn to whenuena mí mọdọ nude mayin nukunpedego to agun lọ mẹ to aliho he sọgbe mẹ, kavi e whè gbau dile e sọawuhia do? Doayi vogbingbọn he tin to mẹplọntọ lalonọ owhe kanweko tintan whenu tọn lẹ po angẹli lẹ po ṣẹnṣẹn go: “Adingbannọ, mẹdetọnjlotọ, [mẹplọntọ lalonọ lẹ] ma nọ sinú nado zannù do mẹgángán lẹ go, whenuena angẹli, he klo hú to huhlọn po hlọnhlọn po mẹ, ma hẹn owhẹ̀ nùzinzan tọn wá, [na sisi hlan Jehovah wutu, NW].” (2 Pita 2:10-13) To whenuena mẹplọntọ lalonọ lẹ nọ dọho nùzinzan tọn “do mẹgángán lẹ go”—yèdọ mẹho heyin nina aṣẹpipa to agun Klistiani owhe kanweko tintan tọn mẹ lẹ—angẹli lẹ ma dọho nùzinzan tọn do mẹplọntọ lalonọ he to kinklan hẹn wá mẹmẹsunnu lẹ ṣẹnṣẹn go gba. Angẹli lẹ, na yé tin to otẹn he yiaga hugan mẹ bosọ tindo numọtolanmẹ whẹdida dodo tọn tlala hugan gbẹtọvi lẹ wutu, yọ́n nuhe to jijọ to agun lọ mẹ lẹ. Ṣogan, “na sisi hlan Jehovah wutu,” yé jo whẹdida do alọ Jiwheyẹwhe tọn mẹ.—Heblu lẹ 2:6, 7; Juda 9.
17. Nawẹ yise towe yin gingandego gbọn to whenuena hiẹ to nuyiwa hẹ nuhahun lẹ to ehe mẹ hiẹ tindo numọtolanmẹ lọ dọ mẹho lẹ ko ṣinuwa?
17 Yèdọ eyin nude mayin nukunpedego to aliho he mẹ e dona yin te pẹpẹ, be mí ma dona tindo yise to Jesu Klisti mẹ taidi Ota he tin togbẹ̀ agun Klistiani tọn tọn ya? Be ewọ ma yọ́n nuhe to jijọ to agun etọn mẹ lẹdo aihọn pé wẹ ya? Be mí ma dona na sisi aliho he mẹ ewọ to nukunpedo ninọmẹ lọ go te bosọ kẹalọyi nugopipe etọn nado deanana whẹho lẹ ya? Na nugbo tọn, ‘mẹnu wẹ míwlẹ yin nado to owhẹ̀ kọmẹnu mítọn tọn dá?’ (Jakobu 4:12; 1 Kọlintinu lẹ 11:3; Kọlọsinu lẹ 1:18) Naegbọn hiẹ ma nado hẹn ahunmẹdunamẹnu towe wá Jehovah nukọn to odẹ̀ towe lẹ mẹ?
18, 19. Etẹwẹ hiẹ sọgan wà eyin hiẹ tindo numọtolanmẹ lọ dọ mẹho de ko ṣinuwa?
18 Na mapenọ-yinyin gbẹtọvi tọn wutu, awusinyẹnnamẹnu lẹ kavi nuhahun lẹ sọgan fọ́n. Ojlẹ delẹ tlẹ sọgan tin to whenuena mẹho de nọ ṣinuwa, bo nọ hẹn ayimajai wá na mẹdevo lẹ. Nuyiwa plaplaji-ninọ tọn mítọn to ninọmẹ mọnkọtọn lẹ mẹ ma na diọ ninọmẹ lọ gba. E sọgan yinuwa nado hẹn nuhahun lọ sinyẹn deji poun wẹ. Mẹhe tindo wuntuntun gbigbọmẹ tọn lẹ na nọte pọ́n Jehovah nado didẹ̀ onú lẹ bosọ na mẹplọnlọ depope he nuhudo etọn sọgan tin to ojlẹ po aliho ewọ lọsu tọn po mẹ.—2 Timoti 3:16; Heblu lẹ 12:7-11.
19 Etẹwẹ lo eyin hiẹ tindo numọtolanmẹ ayimajai tọn do whẹho delẹ ji? Kakati nado to hodọ hẹ mẹdevo lẹ to agun lọ mẹ, naegbọn hiẹ ma na gbọn sisi dali dọnsẹpọ mẹho lẹ na alọgọ? To mayin hẹngogonọ mẹ, basi zẹẹmẹ lehe hiẹ ko yin nuyiwadeji gbọn tọn. Nọ tindo ‘numọtolanmẹ mẹmẹsunnu tọn’ to whepoponu hlan yé, bosọ hẹn sisi go dile hiẹ tindo jide do yé go. (1 Pita 3:8) Ma lẹhlan hodidọ mẹhẹngble tọn lẹ kọ̀n blo, ṣigba dotudo whinwhẹn Klistiani tọn yetọn go. Yọ́n pinpẹn tulinamẹ Owe-wiwe tọn depope he yé sọgan gbọn hogbe dagbe dali zedonukọnnamẹ. Podọ eyin e sọawuhia dọ nuhudo tin na aliho vọjlado tọn devo lẹ, tindo jidide dọ Jehovah na deanana mẹho lẹ nado wà nuhe yọ́n bosọ sọgbe.—Galatianu lẹ 6:10; 2 Tẹsalonikanu lẹ 3:13.
20. Etẹwẹ mí na gbadopọnna to hosọ he na bọdego lọ mẹ?
20 Ṣigba, adà devo gbẹsọ tin nado yin dogbapọnna gando gbégbigbò po sisi nina mẹhe tin to otẹn aṣẹpipa tọn mẹ lẹ po go. Be mẹhe yin zizedo otẹn aṣẹpipa tọn mẹ lẹ ma dona na sisi mẹhe yin zizedo nukunpedomẹgo yetọn glọ lẹ wẹ ya? Mì gbọ mí ni gbadopọnna enẹ to hosọ he bọdego mẹ.
Nawẹ Hiẹ Na Na Gblọndo Gbọn?
• Whẹwhinwhẹ́n dagbe tẹwẹ mí tindo na gbégbigbòna mẹhe tindo aṣẹpipa lẹ?
• Nukun tẹwẹ Jehovah po Jesu po nọ yí do pọ́n mẹhe ma na sisi aṣẹpipa heyin ninamẹ gbọn Jiwheyẹwhe dali lẹ?
• Apajlẹ dagbe tẹlẹ wẹ mí tindo heyin mẹhe gbògbéna mẹhe yin nina aṣẹpipa lẹ tọn?
• Etẹwẹ mí sọgan wà eyin e taidi dọ mẹde he to aṣẹpa do mí ji ko ṣinuwa?
[Kanbiọ Oplọn Tọn Lẹ]
[Yẹdide to weda 12]
Sala na sisi sisosiso aṣẹpipa Ablaham tọn bosọ yin ayajẹnọ
[Yẹdide to weda 13]
Mikali gboawupo nado na sisi aṣẹpipa Davidi tọn taidi tatọ́ whẹndo tọn po ahọlu po
[Yẹdide to weda 15]
“OKLUNỌ dike blo dọ yẹn nado dè alọ ṣie jẹgbonu do mẹyiamisisadode OKLUNỌ tọn ji.”
[Yẹdide to weda 16]
Naegbọn hiẹ ma nado hẹn ahunmẹdunamẹnu towe lẹ wá Jehovah nukọn to odẹ̀ towe lẹ mẹ?