Mẹnu Wẹ Na Hẹn Danuwiwa Wá Opodo?

TO septembre 1999, Wekantọ-Daho Plidopọ Akọta lẹ tọn Kofi Annan dokuavọna afọzedaitọ lẹ wá adà 54tọ́ Plidopọ Daho whemẹwhemẹ tọn tẹnmẹ. Dile e yin linlin etọn na do to The Toronto Star mẹ, e ze avùnnukundiọsọmẹ de donukọnna nukọntọ aihọn tọn lẹ, dọmọ: “Sọha susu gbẹtọ lẹ tọn wẹ tin he tindo nuhudo hugan hogbe awuvẹmẹ tọn lẹ poun sọn ogbẹ́ akọjọpli tọn lọ dè. Yé tindo nuhudo godonọnamẹ po gbemima nujọnu tọn po nado yin alọgọna nado doalọtena danuwiwa debọdo-dego yetọn lẹ, podọ nado wleawuna yé nado jẹ ninọmẹ dagbe de mẹ hlan kọdetọn dagbe tintindo kọ̀n.”

Be Plidopọ Akọta lẹ tọn po akọta hagbẹ etọn lẹ po sọgan wleawuna “godonọnamẹ po gbemima nujọnu tọn po” heyin nuhudo etọn tindo nado doalọtena danuwiwa ya? Dile e yin hoyidọ sọn e dè to linlin Star tọn dopolọ mẹ do, Togán États-Unis tọn Bill Clinton dọmọ: “To hùnsọndai owhe kanweko ehe tọn lẹpo godo, mí yọnẹn dọ e bọawu nado dọ ‘e ma na jọ gbede ba,’ ṣigba e sinyẹnawu tlala nado hẹn ẹn yin mọ.” E yidogọ dọmọ: “Opagbe susu dido sọgan yin kanyinylan kẹdẹdile mẹtọnmahopọn depope sọgan yin do.”

Hugan owhe 2 500 die wayi, yẹwhegán Jẹlemia dọ gando vivẹnudido gbẹtọ tọn go dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewlọsu mẹ gba: e ma tin to omẹ he to zọnlinzin mẹ nado do afọdide etọn lẹ gba.” (Jẹlemia 10:23) To whelọnu lo, todido tẹwẹ tin to finẹ nado hẹn danuwiwa wá opodo?

Dile mí hia do to Isaia 60:18 mẹ, Jiwheyẹwhe na nujikudo dọmọ: “Yè ma na sè danuwiwa to aigba towe ji bà, gbakija kavi dindọ̀n to dogbo towe lẹ mẹ, NW .” Dọdai enẹ mọ hẹndi tintan etọn yí to whenuena Jiwheyẹwhe hẹn omẹ etọn he tin to kanlinmọgbenu lẹ gọwá aigba yetọn ji. E sọ tindo hẹndi daho hugan de he mí sọgan duvivi etọn. Jehovah Jiwheyẹwhe ma ‘dopagbe susu hugan’ gba. Taidi Ganhunupotọ po Mẹdatọ gbẹtọvi lẹ tọn po, ewọ tin to otẹn dagbe hugan lọ mẹ nado hẹn “danuwiwa debọdo-dego” wá opodo. To Ahọluduta Jiwheyẹwhe tọn glọ, jijọho na gbayipe. Danuwiwa na juwayi kakadoi!—Daniẹli 2:44.