Be Hiẹ Sọgan Mọ Jijọho Ahun mẹ Tọn Ya?
Be Hiẹ Sọgan Mọ Jijọho Ahun mẹ Tọn Ya?
Yigodo jẹ 1854, wekantọ Amelika tọn Henry Thoreau wlan dọmọ: “Susugege gbẹtọ lẹ tọn nọ zan gbẹzan todido matindo abọẹ tọn.”
E họnwun dọ, suhugan gbẹtọ lẹ tọn ma duvivi jijọho ahun mẹ tọn to azán etọn gbè gba. Ṣigba, enẹ yin diblayi owhe 150 lẹ die wayi. Be onú lẹ gbọnvo to egbehe wẹ ya? Kavi be hogbe Thoreau tọn lẹ gbẹsọ gando mí go wẹ? Etẹwẹ dogbọn hiẹ na dewetiti dali? Be jijọho, ko pekọ na we wẹ ya? Kavi be hiẹ ma tindo numọtolanmẹ hihọ́ tọn, yèdọ tindo ayihaawe gando sọgodo go, ‘to todido matindo abọẹ tọn’ mẹ, nado yí hogbe Thoreau tọn lẹ zan wẹ ya?
PO AWUBLA po, onú susu wẹ to aihọn lọ mẹ he nọ hò jijọho ahun mẹ tọn yí sọn gbẹtọ lẹ si. Mì gbọ mí ni donu vude poun go. To otò susu lẹ mẹ azọ́nmamọwà po akuẹ kleun he nọ wá họmẹ po nọ hẹn ohẹ́n po todido matindo akuẹzinzan tọn etọn po wá. To aigba devo lẹ ji gbẹtọ susu wẹ nọ zan suhugan huhlọn yetọn lẹ to afọdidona adọkun po nutindo agbasa tọn lẹ po mẹ. Nalete, aliho gbẹzan agbàwhinwhlẹn tọn he e bẹhẹn nọ saba hẹn magbọjẹ wá, e mayin jijọho gba. Awutu, awhàn, sẹ́nhẹngba, whẹdida mawadodo, po kọgbidinamẹ lọsu po nọ hò jijọho yí sọn gbẹtọ lẹ si.
Yé Dín Jijọho Ahun mẹ Tọn
Mẹsusu ma nọ jlo nado doakọnna onú lẹ to aihọn lọ mẹ dile e te do gba. Antônio a yin nukọntọ hagbẹ azọ́nwatọ lẹ tọn de to azọ́nwhé daho de mẹ to São Paulo, Brésil. Po todido nado hẹn ninọmẹ gbẹzan tọn lẹ pọnte po wutu, e nọ tindo mahẹ to azọ́n gbigbẹdai po gufinfọ́n lẹ po mẹ, ṣigba ehe ma hẹn jijọho ahun mẹ tọn wá na ẹn gba.
Todido mẹdelẹ tọn wẹ yindọ alọwle na hẹn vivomẹninọ wá gbẹzan yetọn mẹ jẹ obá de mẹ, ṣigba yé sọgan yin hinhẹn jẹflumẹ. Marcos yin ajọwatọ kọdetọn dagbenọ de. E jẹ mahẹ tindo to tonudidọ mẹ ji bosọ lẹzun togán todaho azọ́nwhé tọn de tọn. Ṣigba, gbẹzan whẹndo tọn etọn gboawupo mlẹnmlẹn. To whenuena ovi etọn lẹ tọ́n sọn whégbè, ewọ po asi etọn po klán na wiwọ́ he ma sọgan yin dididẹ lẹ wutu.
Gerson, yèdọ ovi de he whẹn to tòhomẹ-liho ji to Salvador, Brésil, nọ doafọna gbẹzan he gọna owù lẹ. E nọ to fuflúpe sọn todaho de jẹ devo mẹ, bo nọ to gbejizọnlin basi hẹ agbànhún-kùntọ lẹ. To madẹnmẹ e lẹzun amasin adínọ ṣizantọ de, bo nọ jẹajo do gbẹtọ lẹ nado suahọ ylanwiwa etọn tọn. E yin wiwle gbọn ponọ lẹ dali whlasusu. Ṣigba, mahopọnna gbẹtọ-yinyin kanyinylan po danuwiwa tọn de po, Gerson jlo jijọho ahun mẹ tọn vẹkuvẹku. Be e sọgan mọ ẹn gbede ya?
To whenuena Vania gbẹsọ tin to ovu, onọ̀ etọn kú, bọ Vania lẹzun mẹhe na penukundo whégbè go, gọna nukunpipedo nọviyọnnu awutunọ etọn go. Vania nọ yì ṣọṣi ṣigba tindo numọtolanmẹ yinyin gbigbẹdai gbọn Jiwheyẹwhe dali tọn. E họnwun dọ ewọ ma tindo jijọho ahun mẹ tọn gba.
Mẹdevo wẹ Marcelo. Nuhe Marcelo tindo nuhudo etọn lẹpo wẹ gbẹdudu. E yiwanna agọdudu hẹ jọja devo lẹ—yèdọ wedudu, ahànnunu, po amasin adínọ ṣiṣizan po. To ojlẹ de mẹ e hoavùn bosọ gbleawuna jọja devo. To godo mẹ, nuhe e ko wà lọ vẹ́ na ẹn bọ e sọ hodẹ̀ hlan Jiwheyẹwhe na alọgọ. Ewọ lọsu jlo jijọho ahun mẹ tọn.
Numimọ ehelẹ basi dohia ninọmẹ delẹ he sọgan hẹn jijọho ahun mẹ tọn gble tọn. Be aliho depope tin he mẹ nukọntọ azọ́nwatọgbẹ́ tọn lọ, tonudọtọ lọ, ovi he whẹ́n to tòhomẹ-liho ji lọ, viyọnnu he azọ́n suhugan lọ, po agọdutọ lọ po sọgan jẹ jijọho ahun mẹ tọn he yé to dindin lọ kọ̀n ya? Be nuhe jọ do yé go lẹ plọn nudepope mí ya? Gblọndo na kanbiọ awe lọ lẹ yin mọwẹ, dile mí na mọ do to hosọ he bọdego mẹ.
[Nudọnamẹ Odò Tọn]
a Yinkọ delẹ ko yin didiọ.
[Yẹdide to weda 3]
Be hiẹ tindo ojlo vẹkuvẹku na jijọho ahun mẹ tọn ya?