Naegbọn Yè Dona Nọ Jonamẹ?

“LẸNUNNUYỌNẸNTỌ lẹ ko bẹ dodinnanu de jẹeji he ko to didohia dọ jonamẹ sọgan yidogọna agbasalilo dagbe numọtolanmẹ tọn—podọ, e yọnbasi taun—dọ e ni yidogọna agbasa tọn lọsu,” wẹ The Toronto Star Canada tọn na linlin dọ. Ṣogan, Mẹplọntọ wehọmẹ daho tọn Carl Thoresen heyin Wehọmẹ Alavọ Stanford tọn, to États-Unis, heyin nukọntọ na dodinnanutọ lọ lẹ na Nuzedai Jonamẹ Stanford tọn, doayi e go dọ “omẹ vude wẹ mọnukunnujẹ nuhe jonamẹ yin po lehe e nọ wazọ́n do po mẹ.”

Jonamẹ nujọnu tọn yin pinpọnhlan nado yin adà tangan sinsẹ̀n Klistiani tọn. Linlin The Toronto Star tọn basi zẹẹmẹ etọn taidi “yinyọnẹn dọ hiẹ ko yin nuṣiwa do, jijo homẹgble he dekọtọn lẹpo do, podọ nuyiwa hẹ mẹhe ṣinuwa do we lọ po awuvẹmẹ po podọ to owanyi mẹ to godo mẹ.” E dona yin kinklandovo na nukunpẹvi-yido-pọnnu, whẹjijọ dindin, jonamẹ, kavi gbigbẹ́ whẹhuhu de dai; mọjanwẹ e ma zẹẹmẹdo zize dewe do ninọmẹ de he mẹ hiẹ sọgan yin nuwayindo do gba. Linlin lọ dọ dọ họ̀nhungàn lọ na jonamẹ nugbonugbo wẹ “nado dike homẹgble po numọtolanmẹ agọ̀ lẹ po ni juwayi.”

Dodinnanutọ lẹ dọ dọ dodinnanu sọwhiwhe tọn na alemọyi agbasamẹ tọn gando jonamẹ go yin nuhudo etọn tindo. Ṣigba, yé na linlin alemọyi apọ̀n mẹ tọn lẹ, gọna “didepo kọgbidinamẹ, magbọjẹ, po flumẹjijẹ po tọn.”

Whẹwhinwhẹ́n tangan lọ nado yin jonamẹtọ yin didọ to Efesunu lẹ 4:32 mẹ, he dọmọ: “Mì nọ wà dagbe hlan mìnọzo, mì do homẹmimiọn, mì nọ jo ylando mìnọzo tọn, yèdọ dile Jiwheyẹwhe to Klisti mẹ ko jona mì do.” (wekun flinflin lẹ yin mítọn) To whenuena e wá jẹ jonamẹ ji, dile e yin do to whẹho devo lẹ mẹ, mí yin tulina nado lẹzun hodotọ Jiwheyẹwhe tọn.—Efesunu lẹ 5:1.

Gbigbẹ́ nado jona mẹdevo lẹ to whenuena dodonu de tin na lẹblanu sọgan yinuwa do haṣinṣan mítọn titi hẹ Jiwheyẹwhe ji to aliho agọ̀ mẹ. Jehovah nọ donukun sọn mí dè nado jona ode awetọ. To whelọnu lo mí sọgan hodẹ̀ dọ e na jona mí.—Matiu 6:14; Malku 11:25; 1 Johanu 4:11.