Be Gbẹzan Towe Sọgan Tindo Zẹẹmẹ Nujọnu Tọn Ya?

NUHE yin nuhọakuẹ nugbo lẹ ma nọ sọawuhia nado yin nuhe yé yin to nukunta to whepoponu gba. Wema akuẹ tọn he tindo nuhọakuẹ hugan heyin didetọn to États-Unis tindo nuhọakuẹ dọla 10 000 Amelika tọn. Ṣogan, wema he ji e yin zinzinjẹgbonu do tindo nuhọakuẹ vude poun.

Be e ko paṣa we pọ́n gbede dọ wema tata he tindo nuhọakuẹ dodonu tọn vude sọgan na zẹẹmẹ nujọnu tọn gbẹzan towe ya? Mẹsusu lẹndọ yé wamọ. Gbẹtọ livi susu nọ wazọ́n to ozán po okle po nado sọgan mọ akuẹ susu yí dile e sọgan yọnbasi do. To whedelẹnu afọdona akuẹ nọ zẹẹmẹdo agbasalilo yetọn, họntọn yetọn lẹ, podọ etlẹ yin whẹndo yetọn yíyí do sanvọ́. Po kọdetọn nankọtọn po? Be akuẹ—kavi nuhe mí yí ì do họ̀—sọgan hẹn pekọ nujọnu tọn po ehe dẹn-to-aimẹ po wá ya?

Sọgbe hẹ dodinnanutọ lẹ, lehe mí dín pekọ he sinai do nutindo agbasa tọn lẹ ji sọ, mọwẹ yọnbasi he mí tindo nado mọ ayajẹ yí nọ whè do niyẹn. Linlin-kàntọ Alfie Kohn dotana dọ “nado dọ ẹ poun pekọ ma nọ yin hihọ̀ gba. . . . Gbẹtọ he adọkun yin onú tangan de na to gbẹ̀mẹ lẹ nọ tindo numimọ magbọjẹ po flumẹjijẹ tọn po jẹ obá he yiaga de mẹ bosọ nọ tindo doyiyi dagbemẹ-ninọ tọn to paa mẹ.”  —International Herald Tribune.

Nalete dodinnanutọ lẹ sọgan yọnẹn dọ gbẹzan he tindo zẹẹmẹ de nọ biọ nude he gbọnvona akuẹ, mẹsusu nọ lẹnnupọn to aliho he gbọnvo mẹ. Ehe mayin nupaṣamẹ de gba, to whenuena e yindọ mẹhe nọ nọ̀ aigba Whèyihọ-waji tọn ji lẹ sọgan yin gbigbaṣinyọ́n po ajọ́jijla diblayi 3 000 lẹ po to gbèdopo. Vlavo ehelẹ yin ajọ́jijla mọto lẹ tọn kavi bọmbọm lẹ tọn, linlẹn dodonu tọn lọ wẹ: ‘Họ̀ ehe, podọ hiẹ na yin ayajẹnọ.’

Etẹwẹ yin kọdetọn godoninọna nuhọakuẹ agbasanu lẹ tọn he mado-dogbó lọ tọn? Etẹ, nuhọakuẹ gbigbọmẹ tọn lẹ nọ saba yin gbigbẹdai! Sọgbe hẹ linlin de to linlinnamẹwe Newsweek tọn mẹ, yẹwhenọgan Cologne tọn, to Allemagne, to agọe lá dọ “Jiwheyẹwhe ma sọ yin hosọ he nọ yin hodọdeji ba.”

Vlavo hiẹ ko dibla yí huhlọn towe lẹpo zan nado to nutindo lẹ bẹpli. Vlavo hiẹ lẹn dọ whenu vude wẹ hiẹ tindo nado wà onú devo depope. Etomọṣo, to whedelẹnu hiẹ sọgan lẹn dọ e biọ nususu dogọ nado nọgbẹ̀ hugan nado to wezundo madoalọte to godo na apọṣimẹnu de kakajẹ whenuena agbasalilo towe kavi owhe towe biọ alọdidote na nuwiwa towe lẹ.

Be ayidonugo dogọ zizedo whẹho gbigbọmẹ tọn lẹ ji sọgan hẹn pekọ he jideji wá na we ya? Etẹwẹ na hẹn ogbẹ̀ towe tindo zẹẹmẹ nujọnu tọn?