Todido Fọnsọnku Tọn Tindo Huhlọn
Todido Fọnsọnku Tọn Tindo Huhlọn
“Yẹn to oya gúgú onú lẹpo tọn ji . . . na yẹn nido yọ́n [ Jesu Klisti] po huhlọn fọnsọnku etọn tọn po.”—FILIPPINU LẸ 3:8-10.
1, 2. (a) To owhe lẹ die wayi, nawẹ sinsẹ̀ngán dopo basi zẹẹmẹ fọnsọnku tọn gbọn? (b) Nawẹ fọnsọnku lọ na yin bibasi gbọn?
TO BẸJẸEJI owhe 1890 lẹ tọn, linlinnamẹnu lẹ na linlin do yẹwhehodidọ vonọtaun de heyin didọ gbọn sinsẹ̀ngán de dali ji to Brooklyn, New York, États-Unis. Ewọ dọ dọ fọnsọnku na bẹ vivọ́ bẹpli po vivọ́ hẹnwa ogbẹ̀ ohú po agbasalan lẹpo he ko wleawuna agbasa gbẹtọvi de tọn lẹ pọ́n hẹn, vlavo e yin vivasudo gbọn miyọ́n dali kavi nujijọ ajiji dali, yin dùdù gbọn gbekanlin de dali kavi yọ̀n do aigba lanmẹ. Yẹwhehodọtọ lọ zinnudeji dọ to azán ganhiho-24 tọn de gbè, jẹhọn na yin hinhẹn diyuu gbọn alọ lẹ, awà lẹ, afọ lẹ, alọvi lẹ, ohú lẹ, okàn agbasamẹ tọn lẹ, po ayú gbẹtọvi liva he ko kú lẹ tọn lẹ po dali. Agbasagonu ehelẹ na to adà agbasa dopolọ tọn devo lẹ dín pé. Enẹgodo alindọn lẹ na wá sọn olọn po zòmẹ po mẹ nado biọ agbasa heyin finfọnsọnku lẹ mẹ.
2 Fọnsọnku gbọn vivọ́ agbasagonu dowhenu tọn lẹ bẹplidopọ dali ma sọgbe hẹ lẹnpọn dagbe gba, podọ gbẹtọvi lẹ ma tindo alindọn jọmaku de gba. (Yẹwhehodọtọ 9:5, 10; Ezekiẹli 18:4) Jehovah, yèdọ Jiwheyẹwhe fọnsọnku tọn, ma tindo nuhudo nado vọ́ agbasagonu voovo he wleawuna agbasa gbẹtọvi de tọn to dowhenu lẹ bẹpli gba. E sọgan wleawuna agbasa yọyọ lẹ na mẹhe yin finfọnsọnku enẹlẹ. Jehovah ko na huhlọn lọ Visunnu etọn, Jesu Klisti nado fọ́n oṣiọ lẹ, po yọnbasi ogbẹ̀ madopodo tọn po. (Johanu 5:26) Enẹwutu Jesu dọmọ: “Yẹn wẹ fọnsọnku po ogbẹ̀ po; mẹhe yí mi sè, eyin e kú, e nasọ tin to ogbẹ̀.” (Johanu 11:25, 26) Opagbe homẹmiọnnamẹ tọn nankọtọn die! E nọ hẹn mí lodo nado doakọnna whlepọn lẹ podọ etlẹ yin nado pannukọn okú taidi Kunnudetọ nugbonọ Jehovah tọn lẹ.
3. Naegbọn Paulu tindo nuhudo nado basi avunlọyinanu de na fọnsọnku?
3 Fọnsọnku ma kọngbedopọ hẹ nuplọnmẹ lọ dọ gbẹtọvi lẹ tindo alindọn jọmaku de gba—yèdọ pọndohlan de he tamẹnuplọnmẹtọ Glẹki tọn Platon tindo. Enẹwutu, etẹwẹ jọ to whenuena apọsteli Paulu dekunnu hlan Glẹkinu nukundeji lẹ to Aleopagu to Atẹni, bo basi alọdlẹndonu he mayin tlọlọ tọn hlan Jesu, bo dọ dọ Jiwheyẹwhe fọ́n ẹn sọnku? Kandai lọ dọmọ: “Dinvie whenuena yé sè fọnsọnku oṣiọ lẹ tọn tọn, mẹdelẹ to vivlẹ.” (Owalọ lẹ 17:29-34) Susu mẹhe ko mọ Jesu Klisti heyin finfọnsọnku lọ lẹ gbẹsọ tin togbẹ̀ podọ, mahopọnna mẹṣanko, yé dekunnu dọ ewọ ko yin finfọ́n sọn oṣiọ lẹ mẹ. Ṣigba mẹplọntọ lalo tọn he kọnawudopọ hẹ agun he tin to Kọlinti lẹ gbẹ́ fọnsọnku dai. Enẹwutu Paulu basi avunlọyinanu huhlọnnọ de na nuplọnmẹ Klistiani tọn ehe to 1 Kọlintinu lẹ weta 15 mẹ. Sọwhiwhe yíyí do gbadopọnna hóyijlẹdohogo etọn lẹ do jidide po huhlọn todido fọnsọnku tọn po hia zẹ̀ ayihaawe tintindo depope go.
Kunnudenu Dolido Fọnsọnku Jesu Tọn
4. Kunnudenu yí nukun do mọ fọnsọnku Jesu tọn tẹlẹ wẹ Paulu na?
4 Doayi lehe Paulu bẹ avùnlọyiyi etọn jẹeji do go. (1 Kọlintinu lẹ 15:1-11) Adavo Kọlintinu lẹ lẹzun yisenọ lẹ to ovọ́ mẹ, yé dona tẹdo wẹndagbe whlẹngán tọn go. Klisti kú na ylando mítọn lẹ, yin dìdì, bosọ yin finfọ́n. Na nugbo tọn, Jesu heyin finfọnsọnku lọ sọawuhia Kefa (Pita), “whenẹnu to omẹ wiawe lẹ dè.” (Johanu 20:19-23) E yin mimọ gbọn nudi omẹ 500 lẹ dali, vlavo to whenuena e degbè dọ: ‘Mì yì, bo hẹn omẹ lẹ zun devi.’ (Matiu 28:19, 20) Jakobu mọ ẹn, dile apọsteli nugbonọ lẹpo mọ ẹn do ga. (Owalọ lẹ 1:6-11) Sẹpọ Damasku, Jesu sọawuhia Saulu “di omẹ he yè ji jẹnukọnna ojlẹ etọn”—taidi dọ ewọ ko yin finfọ́n do ogbẹ̀ gbigbọmẹ tọn de mẹ nkọtọn. (Owalọ lẹ 9:1-9) Kọlintinu lẹ lẹzun yisenọ na Paulu dọyẹwheho na yé, bọ yé kẹalọyi wẹndagbe lọ wutu.
5. Etẹwẹ yin aliho nuyijlẹdonugo Paulu tọn dile e yin kinkàndai to 1 Kọlintinu lẹ 15:12-19 mẹ do?
5 Doayi hukan nuyijlẹdonugo Paulu tọn go. (1 Kọlintinu lẹ 15:12-19) To whenuena e yindọ kunnudetọ yí nukun do mọ lẹ dọyẹwheho dọ Klisti yin finfọnsọnku, nawẹ e sọgan yin didọ gbọn dọ fọnsọnku de matin? Eyin Jesu mayin finfọ́n sọn oṣiọ lẹ mẹ, be yẹwhehodidọ mítọn po yise mítọn po yin to ovọ́ mẹ, bọ mí sọ yin lalonọ he to kunnude sọta Jiwheyẹwhe gbọn didọ dali dọ ewọ fọ́n Klisti sọnku. Eyin oṣiọ lẹ mayin finfọ́n, ‘be mí gbẹsọ tin to ylando mítọn lẹ mẹ,’ podọ mẹhe ko kú to kọndopọmẹ hẹ Klisti lẹ ko dọ̀n. Humọ, “Eyin e yin ogbẹ̀ mẹ fi ṣokẹdẹ wẹ mí do todido te to Klisti mẹ, be míwlẹ wẹ lèlènọ susu to gbẹtọ lẹpo mẹ.”
6. (a) Etẹwẹ Paulu dọ to nuzinzindo fọnsọnku Jesu tọn ji mẹ? (b) Etẹwẹ yin ‘kẹntọ godo tọn lọ,’ podọ nawẹ e na yin hinhẹn zun ovọ́ gbọn?
6 Paulu zinnudo fọnsọnku Jesu tọn ji. (1 Kọlintinu lẹ 15:20-28) Dile e yindọ Klisti wẹ yin “sinsẹ́n tintan” mẹhe ko damlọn to okú mẹ lẹ tọn, mẹdevo lẹ ga na yin finfọnsọnku. Dile okú dekọtọn sọn tolivivẹ dawe lọ Adam tọn mẹ do, fọnsọnku yin gbọn dawe lọ—Jesu gblamẹ. Mẹhe yin etọn lẹ na yin finfọ́n to tintin tofi etọn whenu. Klisti hẹn ‘gandudu lẹpo po aṣẹpipa lẹpo po gọna huhlọn lẹpo’ he diọnukunsọ nupojipetọ-yinyin Jiwheyẹwhe tọn ‘wá ovọ́ mẹ’ bosọ dugán taidi Ahọlu kakajẹ whenuena Jehovah na ze kẹntọ etọn lẹpo do afọ etọn lẹ glọ. Etlẹ yin ‘kẹntọ godo tọn’—yèdọ okú he yè dugu etọn sọn Adam dè—na yin hinhẹn zun ovọ́ gbọn dagbenu avọ́sinsan Jesu tọn gblamẹ. Enẹgodo Klisti na ze Ahọluduta jo na Jiwheyẹwhe po Otọ́ etọn po, bo na yin mẹmẹglọ hlan “[Omẹ lọ] he yí onú lẹpo do oglọ etọn, na Jiwheyẹwhe nido yin popo to onú popo mẹ.”
Yin Bibaptizi na Oṣiọ lẹ Ya?
7. Mẹnu lẹ “wẹ yè baptizi na oṣiọ lẹ wutu,” podọ etẹwẹ ehe zẹẹmẹdo na yé?
7 Mẹhe jẹagọdo fọnsọnku lẹ yin kinkanse dọmọ: “Etẹwutu wẹ yè baptizi yé na oṣiọ lẹ wutu?” (1 Kọlintinu lẹ 15:29) Paulu ma to didọ dọ mẹhe tin togbẹ̀ lẹ na yin bibaptizi do ota oṣiọ lẹ tọn mẹ gba, na devi Jesu tọn lẹ dopodopo dona plọnnu, yise, bosọ yin bibaptizi. (Matiu 28:19, 20; Owalọ lẹ 2:41) Klistiani yiamisisadode lẹ “wẹ yè baptizi na oṣiọ lẹ wutu” gbọn yinyin yinylọndo aliho gbẹzan tọn de he nọ dekọtọn do okú po fọnsọnku po mẹ dali. Baptẹm wunmẹ ehe bẹjẹeji to whenuena gbigbọ Jiwheyẹwhe tọn wleawuna todido olọn mẹ tọn do ahun yetọn lẹ mẹ bosọ wá vivọnu to whenuena yé yin finfọ́n sọn oṣiọ lẹ mẹ do ogbẹ̀ gbigbọnọ jọmaku tọn de mẹ to olọn mẹ.—Lomunu lẹ 6:3-5; 8:16, 17; 1 Kọlintinu lẹ 6:14.
8. Jidide etẹ tọn wẹ Klistiani lẹ sọgan tindo yèdọ eyin Satani po devizọnwatọ etọn lẹ po tlẹ hù yé?
8 Dile hogbe Paulu tọn lẹ dohia do, todido fọnsọnku tọn nọ hẹn Klistiani lẹ penugo nado pannukọn owù po okú po gbọzangbọzan na azọ́n yẹwhehodidọ-Ahọluduta lọ tọn wiwà wutu. (1 Kọlintinu lẹ 15:30, 31) Yé yọnẹn dọ Jehovah sọgan fọ́n yé sọnku eyin ewọ na dotẹnmẹ Satani po devizọnwatọ etọn lẹ po nado hù yé. Jiwheyẹwhe kẹdẹ wẹ sọgan và alindọn, kavi ogbẹ̀, yetọn sudo to Gẹhẹnna mẹ, he nọtena vasudo mavọmavọ.—Luku 12:5.
Nuhudo Nado Tin to Aṣeji
9. Eyin todido fọnsọnku tọn na tindo huhlọn mẹhẹndote tọn to gbẹzan mítọn mẹ, etẹwẹ mí dona dapana?
9 Todido fọnsọnku tọn hẹn Paulu dote. To whenuena e tin to Efesu, kẹntọ etọn lẹ sọgan ko dlan ẹn do aihundatẹn lọ mẹ nado hoavùn hẹ gbekanlin lẹ. (1 Kọlintinu lẹ 15:32) Eyin enẹ jọ janwẹ, ewọ yin whinwhlẹngán, yèdọ dile Daniẹli yin whinwhlẹngán sọn kinnikinni lẹ si do. (Daniẹli 6:16-22; Heblu lẹ 11:32, 33) To whenuena e yindọ e tindo todido to fọnsọnku mẹ, Paulu ma tindo walọyizan atẹṣitọ Juda tọn azán Isaia gbè tọn lẹ tọn gba. Yé nọ dọmọ: “Mì gbọ mí ni dù bo nù, na osọ̀ wẹ mí na kú.” (Isaia 22:13, Septante) Eyin todido fọnsọnku tọn na tindo huhlọn mẹhẹndote tọn to gbẹzan mítọn lẹ mẹ dile e wà do to Paulu tọn mẹ, mí dona dapana mẹhe tindo gbigbọ ylankan mọnkọtọn lẹ. “Yè klọ mì blo,” wẹ Paulu na avase dọ. “Ogbẹ́ ylankan nọ hẹn walọ dagbe gble.” (1 Kọlintinu lẹ 15:33) Na nugbo tọn, nunọwhinnusẹ́n ehe gando adà voovo gbẹzan tọn lẹ go.
10. Nawẹ todido fọnsọnku tọn mítọn sọgan yin hinhẹn dote gbọn?
10 Na mẹhe tindo ayihaawe gando fọnsọnku go lẹ, Paulu dọmọ: “Mì fọ́n hlan dodo, mì waylando blo: na mẹdelẹ ma tindo oyọnẹn Jiwheyẹwhe tọn: yẹn dọ ehe hlan winyan mìtọn.” (1 Kọlintinu lẹ 15:34) To “ojlẹ opodo tọn” ehe mẹ, mí dona yinuwa to kọndopọmẹ hẹ oyọnẹn he pegan Jiwheyẹwhe po Klisti po tọn. (Daniẹli 12:4; Johanu 17:3) Ehe na hẹn todido fọnsọnku tọn mítọn dote.
Yin Finfọnsọnku po Agbasa Nankọtọn Po?
11. Nawẹ Paulu basi nuyijlẹdonugo fọnsọnku Klistiani yiamisisadode lẹ tọn gbọn?
11 Enẹgodo Paulu dọhodo kanbiọ delẹ ji. (1 Kọlintinu lẹ 15:35-41) Vlavo to vivẹnudido mẹ nado hẹn ayihaawe wá fọnsọnku ji, dodinnanutọ de sọgan kanse dọmọ: “Nawẹ yè na ze oṣiọ lẹ tite gbọn? Agbasa tẹ po yé po wẹ na gọ̀?” Dile Paulu dohia do, okún de heyin didó do aigba glọ nọ kú bo nọ diọ nado lẹzun atinvu de. Mọdopolọ, gbẹtọvi heyin jiji gbọn gbigbọ dali de dona kú. Kẹdẹdile atin de nọ tọ́n sọn okún de mẹ taidi agbasa yọyọ de do, mọwẹ agbasa heyin finfọnsọnku Klistiani yiamisisadode lẹ tọn nọ gbọnvo na agbasalan gbẹtọvi tọn do. Dile etlẹ yindọ e tindo aliho gbẹzan tọn dopolọ he ewọ tindo whẹpo do kú, e na yin finfọ́n taidi nudida yọyọ de po agbasa gbigbọnọ de po he penugo nado nọgbẹ̀ to olọn mẹ. To jọwamọ-liho, mẹhe yin finfọnsọnku do aigba ji lẹ na yin finfọ́n to agbasa gbẹtọvi tọn lẹ mẹ.
12. Etẹwẹ hogbe lọ lẹ “agbasa ojiaganu tọn lẹ” po “agbasa okọ́mẹnu lẹ tọn” po zẹẹmẹdo?
12 Dile Paulu dọ do, agbasa gbẹtọvi tọn gbọnvo na kanlin lẹ tọn. Agbasa kanlin tọn tlẹ gbọnvo na ode awetọ. (Gẹnẹsisi 1:20-25) “Agbasa ojiaganu” nudida gbigbọnọ lẹ tọn gbọnvo to gigo mẹ na “agbasa okọ́mẹnu” agbasalan tọn lẹ. Vogbingbọn lẹ sọ tin ga to gigo owhè, osun, po sunwhlẹvu lẹ tọn po mẹ. Ṣigba mẹyiamisisadode heyin finfọnsọnku lẹ tindo gigo he klo hugan mọ taun.
13. Sọgbe hẹ 1 Kọlintinu lẹ 15:42-44, etẹwẹ yin didó podọ etẹwẹ yin finfọ́n dote?
13 To whenuena e ko donu vogbingbọn lẹ go vọ̀, Paulu yidogọ dọmọ: “Mọwẹ fọnsọnku oṣiọ lẹ tọn te ga.” (1 Kọlintinu lẹ 15:42-44) E dọmọ: “Yè dó e gbigble mẹ: yè ze e tite magble mẹ.” Tofi Paulu sọgan to hodọ gando mẹyiamisisadode lẹ go taidi pipli de. Yin didó to gbigble mẹ to okú whenu, e yin finfọ́n to magble mẹ, yèdọ vò sọn ylando si. Dile e ma yin gbégbòna gbọn aihọn lọ dali do sọ, e yin finfọ́n do ogbẹ̀ olọn mẹ tọn mẹ bosọ yin hinhẹn sọawuhia hẹ Klisti to gigo mẹ. (Owalọ lẹ 5:41; Kọlọsinu lẹ 3:4) To okú whenu e yin didó to “agbasa jọwamọ de mẹ” bo yin finfọ́n to “agbasa gbigbọnọ de mẹ.” To whenuena e yindọ ehe yọnbasi to whẹho Klistiani heyin jiji gbọn gbigbọ dali lẹ tọn mẹ, mí sọgan deji dọ mẹdevo lẹ na yin finfọ́n dogbẹ̀ do aigba ji.
14. Nawẹ Paulu do vogbingbọn he tin to Klisti po Adam po ṣẹnṣẹn hia gbọn?
14 Enẹgodo Paulu do vogbingbọn he tin to Klisti po Adam po ṣẹnṣẹn hia. (1 Kọlintinu lẹ 15:45-49) Adam, sunnu tintan lọ, ‘lẹzun alindọn gbẹ̀te de.’ (Gẹnẹsisi 2:7) “Adam godo tọn,”—Jesu—‘lẹzun gbigbọ ogbẹ̀-namẹtọ de.’ E yí ogbẹ̀ etọn jo taidi avọ́sinsan ofligọ tọn de, tintan do ota hodotọ yiamisisadode etọn lẹ tọn mẹ. (Malku 10:45) Taidi gbẹtọvi lẹ, yé ‘tindo awusọhia mẹhe yin didá sọn kọ́gudu mẹ tọn,’ ṣigba yé nọ taidi Adam godo tọn to whenuena yé yin finfọnsọnku. Na nugbo tọn, avọ́sinsan Jesu tọn na na alè gbẹtọvi tonusetọ lẹpo, gọna mẹhe yin finfọnsọnku do aigba ji lẹ.—1 Johanu 2:1, 2.
15. Naegbọn Klistiani yiamisisadode lẹ mayin finfọnsọnku to agbasalan mẹ, podọ nawẹ yé yin finfọ́n gbọn to tintin tofi Jesu tọn whenu?
15 To whenuena Klistiani yiamisisadode lẹ kú, yé ma nọ yin finfọ́n do agbasalan mẹ gba. (1 Kọlintinu lẹ 15:50-53) Agbasa gbigble po ohùn agbasalan tọn de po ma sọgan dugu magble po Ahọluduta olọn mẹ tọn po gba. Mẹyiamisisadode delẹ ma na tindo numimọ amlọndidọ gaa to okú mẹ tọn gba. To gbẹzan aigba ji tọn yetọn hinhẹnwa vivọnu mẹ to tintin tofi Jesu tọn whenu, “yè na diọ [yé] plaun, to nukunwhiwhe dopo mẹ.” Yé na yin finfọ́n to afọdopolọji do ogbẹ̀ gbigbọmẹ tọn mẹ to magble po gigo po mẹ. To agọgbọnẹnmẹ, sọha ‘asi-yọyọ’ olọn mẹ tọn Klisti tọn na yin 144 000.—Osọhia 14:1; 19:7-9; 21:9; 1 Tẹsalonikanu lẹ 4:15-17.
Awhàngbigba do Okú Ji!
16. Sọgbe hẹ Paulu po yẹwhegán dowhenu tọn lẹ po, etẹwẹ na jọ do okú heyin ogú etọn dù sọn Adam ylandonọ dè go?
16 Po awhàngbigba po Paulu lá dọ okú na yin zize mì kakadoi. (1 Kọlintinu lẹ 15:54-57) To whenuena gbigble po kúkú po ko ze magble po jọmaku po dó godo, hogbe ehelẹ na mọ hẹndi yí dọmọ: “Yè ze okú mì to awhàngbigba mẹ [kakadoi, NW].” “Okú E, fie awhàngba towe te? Okú E, fie adí towe te?” (Isaia 25:8; Hosea 13:14) Adí he nọ hẹn okú wá wẹ ylando, podọ huhlọn ylando tọn wẹ Osẹ́n, he nọ gblewhẹ okú tọn do ylandonọ lẹ. Ṣigba na avọ́sinsan po fọnsọnku Jesu tọn po wutu, okú he yè dugu etọn sọn Adam ylandonọ dè ma nasọ to awhàngba zọnmii ba.—Lomunu lẹ 5:12; 6:23.
17. Nawẹ hogbe 1 Kọlintinu lẹ 15:58 tọn lẹ yọn-na-yizan to egbezangbe gbọn?
17 “Enẹwutu, mẹmẹsunnu mẹyiwanna ṣie emi,” wẹ Paulu dọ, “mì yin tenọglinọ, masẹafọ, bo nọ to susudeji to azọ́n Oklunọ tọn mẹ whepoponu, sọle mì yọnẹn do dọ tuklajẹ mìtọn mayin ovọ́ to Oklunọ mẹ gba.” (1 Kọlintinu lẹ 15:58) Hogbe enẹlẹ gando pipòtọ mẹyiamisisadode tọn po “lẹngbọ devo” egbezangbe tọn Jesu tọn lẹ po go yèdọ eyin yé tlẹ kú to azán godo tọn ehelẹ mẹ. (Johanu 10:16) Tuklajẹ yetọn taidi lilatọ Ahọluduta lọ tọn lẹ ma yin to ovọ́ mẹ gba, na fọnsọnku de to tenọpọn yé. To whelọnu lo, taidi devizọnwatọ Jehovah tọn lẹ, mì gbọ mí ni hẹn alọnu ján to azọ́n Oklunọ tọn lọ mẹ dile mí to tenọpọn azán lọ to whenuena mí sọgan dawhá jẹgbonu po ayajẹ po dọmọ: “Okú E, fie awhàngba towe te?”
Todido Fọnsọnku Tọn Yin Hinhẹndi!
18. Nawẹ todido he Paulu tindo to fọnsọnku mẹ sinyẹn sọ?
18 Hogbe Paulu tọn lẹ heyin kinkàndai to 1 Kọlintinu lẹ weta 15 mẹ hẹn ẹn họnwun dọ todido fọnsọnku tọn tindo huhlọn to gbẹzan etọn mẹ. E tindo nujikudo mlẹnmlẹn dọ Jesu yin finfọ́n sọn oṣiọ lẹ mẹ podọ dọ mẹdevo lẹ nasọ yin tuntundote sọn yọdo paa gbẹtọvi tọn mẹ ga. Be hiẹ tindo nujikudo sinsinyẹn mọnkọtọn ya? Paulu pọ́n dagbenu ṣejannabi tọn lẹ hlan ‘di ogbó’ po “oya gúgú onú lẹpo tọn” po na ewọ nido sọgan “yọ́n [Klisti] po huhlọn fọnsọnku etọn tọn po.” Apọsteli lọ to jijlo nado kú okú de taidi dehe yin Klisti tọn po todido ‘fọnsọnku tintan’ mimọyi tọn po. E yin yiylọdọ ‘fọnsọnku tintan’ ga, na hodotọ yiamisisadode 144 000 Jesu tọn lẹ tindo numimọ etọn wutu. Mọwẹ, yé yin finfọ́n do ogbẹ̀ gbigbọmẹ tọn mẹ to olọn mẹ, to whenuena “oṣiọ he pò lẹ” na yin finfọnsọnku do aigba ji.—Filippinu lẹ 3:8-11; Osọhia 7:4; 20:5, 6.
19, 20. (a) Mẹdopodopo tẹlẹ to kandai Biblu tọn mẹ wẹ na yin finfọ́n dogbẹ̀ do aigba ji? (b) Fọnsọnku mẹnu lẹ tọn wẹ hiẹ to nukọn pọnhlan na?
19 Todido fọnsọnku tọn ko lẹzun nugbo gigonọ de na mẹyiamisisadode he ko yin nugbonọ kakajẹ okú lẹ. (Lomunu lẹ 8:18; 1 Tẹsalonikanu lẹ 4:15-18; Osọhia 2:10) Mẹhe na lùn “nukunbibia daho” lọ tọ́n lẹ na mọ todido fọnsọnku tọn yin hinhẹndi to aigba ji dile ‘ohù na jo oṣiọ he tin to e mẹ lẹ, bọ okú po Hadẹs po na jo oṣiọ he tin to yé mẹ lẹ.’ (Osọhia 7:9, 13, 14; 20:13) To mẹhe na yin finfọ́n dogbẹ̀ to aigba ji lẹ mẹ wẹ Job na tin te, mẹhe jiya hẹnbu visunnu ṣinawe po viyọnnu atọ̀n tọn po. Lẹnnupọndo ayajẹ etọn ji to kuavọdidona yé lẹkọ mẹ—podọ lehe yé na yin homẹhunnọ do sọ dọ yé tindo nọvisunnu ṣinawe po nọviyọnnu whanpẹnọ atọ̀n devo lẹ po!—Job 1:1, 2, 18, 19; 42:12-15.
20 Dona nankọ die e na yin to whenuena Ablaham po Sala po, Isaki po Lebeka po—mọwẹ po mẹsusu dogọ devo lẹ po, gọna ‘yẹwhegán lẹpo’—yin finfọ́n dogbẹ̀ to aigba ji! (Luku 13:28) Dopo to yẹwhegán enẹlẹ mẹ wẹ Daniẹli, mẹhe yè dopagbe fọnsọnku de tọn na to gandudu Mẹssia tọn glọ. Na nudi owhe 2 500 delẹ, Daniẹli to gbigbọjẹ to yọdo mẹ, ṣigba gbọn huhlọn fọnsọnku tọn gblamẹ, e na ‘fọntite na mimá etọn’ to madẹnmẹ taidi dopo to ‘ahọvi lẹ to aigba lọ blebu ji mẹ.’ (Daniẹli 12:13; Psalm 45:16) Ayajẹ nankọtọn die e na yin nado dokuavọna e ma yin omẹ nugbonọ hohowhenu tọn lẹ kẹdẹ gba ṣigba otọ́, onọ̀, visunnu, viyọnnu, kavi omẹ vivẹ́ towe devo he ko yin yíyí sọn dè we gbọn kẹntọ lọ okú dali lẹ!
21. Naegbọn mí ma dona dọngbàn to onú dagbe lẹ wiwà hlan mẹdevo lẹ mẹ?
21 Delẹ to họntọn po mẹyiwanna mítọn lẹ po mẹ sọgan ko sẹ̀n Jiwheyẹwhe na owhe ao ao lẹ bo ko sọ poyọnho taun. Yọnhowhe sọgan hẹn ẹn sinyẹnawu na yé nado dùto avùnnukundiọsọmẹnu gbẹmẹ tọn lẹ ji. Lehe e gọna owanyi do sọ nado na yé alọgọ depope he go mí sọgan pé todin! To whenẹnu mí ma na tindo nuvẹnamẹ depope gando azọngban mítọn lẹ hinhẹndi hlan yé go to aliho depope mẹ eyin okú tlẹ wá ze yé yì. (Yẹwhehodọtọ 9:11; 12:1-7; 1 Timoti 5:3, 8) Mí sọgan deji dọ Jehovah ma na wọnji onú dagbe lẹ he mí wà na mẹdevo lẹ go gba, mahopọnna owhe po ninọmẹ yetọn lẹ po. “Le míwlẹ mọtẹn do,” wẹ Paulu wlan, “mì gbọ mí ni nọ wà dagbe hlan omẹ popo, humọ hlan yé he yin yise whédo tọn lẹ.”—Galatianu lẹ 6:10; Heblu lẹ 6:10.
22. Kakajẹ whenuena todido fọnsọnku tọn na yin hinhẹndi, etẹwẹ mí dona magbè nado to wiwà?
22 Jehovah yin “Otọ́ lẹblanu lẹ tọn, Jiwheyẹwhe homẹmimiọn lẹpo tọn.” (2 Kọlintinu lẹ 1:3, 4) Ohó etọn nọ miọnhomẹna mí bo nọ gọalọ nado miọnhomẹna mẹdevo lẹ po todido huhlọnnọ fọnsọnku tọn po. Kakajẹ whenuena mí na mọ hẹndi todido enẹ tọn gbọn oṣiọ lẹ finfọ́n dogbẹ̀ to aigba ji dali, mì gbọ mí ni taidi Paulu, mẹhe tindo yise to fọnsọnku mẹ. Na mí ni hodo apajlẹ Jesu tọn na titengbe tọn, mẹhe todido etọn to huhlọn Jiwheyẹwhe tọn mẹ nado fọ́n ẹn sọnku mọ hẹndi yí. Mẹhe tin to yọdo oflin tọn mẹ lẹ na sè ogbè Klisti tọn to madẹnmẹ bo na jẹgbonu wá. Na ehe ni hẹn homẹmimiọn po ayajẹ po wá na mí. Ṣigba hú popolẹpo, mì gbọ mí ni dopẹ́ na Jehovah, mẹhe ko hẹn awhàngbigba do okú ji yọnbasi gbọn Oklunọ mítọn Jesu Klisti gblamẹ!
Etẹwẹ Yin Gblọndo Towe?
• Kunnudenu yí nukun do mọ fọnsọnku Jesu tọn tẹlẹ wẹ Paulu na?
• Etẹwẹ yin ‘kẹntọ godo tọn,’ podọ nawẹ e na yin hinhẹn zun ovọ́ gbọn?
• To whẹho Klistiani yiamisisadode lẹ tọn mẹ, etẹwẹ yin didó podọ etẹwẹ yin finfọ́n dote?
• Mẹdopodopo tẹlẹ to kandai Biblu tọn mẹ wẹ hiẹ na jlo nado mọ to whenuena yé na yin finfọ́n dogbẹ do aigba ji?
[Kanbiọ Oplọn Tọn Lẹ]
[Yẹdide to weda 16]
Apọsteli Paulu basi avunlọyinanu sinsinyẹn de na fọnsọnku
[Yẹdide to weda 20]
Fọnsọnku Job tọn, whẹndo etọn, po mẹsusu devo lẹ tọn po na yin asisa ayajẹ mado-dogbò tọn!