Todido Fọnsọnku Tọn Yin Jide Tọn!
Todido Fọnsọnku Tọn Yin Jide Tọn!
“Yẹn sọ tindo todido hlan Jiwheyẹwhe dè . . . dọ, fọnsọnku . . . de na tin.”—OWALỌ LẸ 24:15.
1. Naegbọn mí sọgan tindo todido to fọnsọnku mẹ?
JEHOVAH ko na whẹwhinwhẹ́n he lodo lẹ mí nado tindo todido to fọnsọnku mẹ. Ohó etọn dọna mí dọ oṣiọ lẹ na fọ́n, yèdọ fọ́n ṣite wá ogbẹ̀ whladopo dogọ. Podọ lẹndai etọn gando mẹhe to amlọndọ to okú mẹ lẹ go na mọ hẹndi yí na jide tọn. (Isaia 55:11; Luku 18:27) Na nugbo tọn, Jiwheyẹwhe ko do huhlọn etọn nado fọ́n oṣiọ lẹ hia.
2. Nawẹ todido fọnsọnku tọn sọgan yin alemọyinu na mí do?
2 Yise to awuwledainanu Jiwheyẹwhe tọn na finfọ́n oṣiọ lẹ gbọn Visunnu etọn, Jesu Klisti gblamẹ, sọgan hẹn mí dote to ojlẹ ayimajai tọn lẹ mẹ. Jidide gando todido fọnsọnku tọn go sọgan sọ gọalọna mí nado hẹn tenọgli go hlan Otọ́ olọn mẹ tọn mítọn etlẹ yin kakajẹ okú. E yọnbasi dọ, todido fọnsọnku tọn mítọn na yin hinhẹn lodo dile mí gbadopọnna hinhẹngọwá ogbẹ̀ heyin kinkàndai to Biblu mẹ lẹ. Azọ́njiawu ehe lẹpo yin wiwadotana gbọn huhlọn he wá sọn Oklunọ Nupojipetọ Jehovah dè gblamẹ.
Yé Mọ Oṣiọ Yetọn Yí Gbọn Fọnsọnku Dali
3. Etẹwẹ Elija yin huhlọnna nado wà to whenuena visunnu asuṣiọsi Zalefati tọn kú?
3 To dogbapọnnanu ojlofọndotenamẹ tọn de heyin yise heyin didohia gbọn kunnudetọ he jẹnukọnna ojlẹ Klistiani tọn Jehovah tọn lẹ dali mẹ, apọsteli Paulu wlan dọmọ: “Yọnnu lẹ to oṣiọ yetọn lẹ mọyi gbọn fọnsọnku de dali.” (Heblu lẹ 11:35; 12:1) Dopo to yọnnu enẹlẹ mẹ wẹ asuṣiọsi wamọnọ de to todaho Phoenice tọn Zalefati mẹ. Na ewọ yi jonọ yẹwhegán Jiwheyẹwhe tọn Elija wutu, linfín po amì etọn po yin hinhẹn sù deji to azọ́njiawu-liho to ojlẹ huvẹ tọn de he na ko yí ogbẹ̀ etọn po dehe yin visunnu etọn tọn po whenu. To whenuena ovi lọ kú to godo mẹ, Elija tẹ́ ẹ do adọ́zan de ji, hodẹ̀, bo dlẹn ede do visunnu lọ ji whlaatọ̀n, bosọ vẹvẹ dọmọ: “OKLUNỌ E Jiwheyẹwhe ṣie, yẹn vẹ̀ we, gbọ alindọn ovi he tọn ni sọ gọ̀ wá biọ ewọ mẹ.” Jiwheyẹwhe sọ dike alindọn, kavi ogbẹ̀, ni lẹkọ wá visunnu lọ mẹ. (1 Ahọlu lẹ 17:8-24) Lẹnnupọndo ayajẹ asuṣiọsi enẹ tọn ji dile yise etọn yin ahọsuna gbọn fọnsọnku tintan heyin kinkàndai dali—yèdọ dehe yin visunnu vivẹ́ ewọ lọsu titi tọn!
4. Azọ́njiawu tẹwẹ Eliṣa wà to Ṣunẹmi?
4 Yọnnu devo he mọ oṣiọ etọn yí gbọn fọnsọnku dali nọ nọ̀ todaho Ṣunẹmi tọn mẹ. Taidi asi dawe yọnhonọ de tọn, he do homẹdagbe hia hlan yẹwhegán Eliṣa po mẹmẹsi etọn po. E yin ahọsuna po visunnu de po. Ṣigba, to owhe susu lẹ godo, e dowẹn ylọ yẹwhegán lọ, he mọ oṣiọ visunnu lọ tọn to owhé etọn gbè. To whenuena Eliṣa ko hodẹ̀ bo ze afọdide delẹ godo, “[vudevude, NW] agbasalan ovi lọ tọn sọ gblọ.” E “sọ ṣìnyìn whlà ṣinawe, ovi lọ sọ hùn nukun etọn lẹ.” Matin ayihaawe fọnsọnku ehe hẹn ayajẹ daho wá na onọ̀ lọ po visunnu etọn po. (2 Ahọlu lẹ 4:8-37; 8:1-6) Ṣigba lehe yé na yin ayajẹnọ sọ to whenuena yé na yin finfọ́n dogbẹ̀ do aigba ji to “fọnsọnku he yọnwhanpẹ hú” lọ mẹ—yèdọ dehe ze yọnbasi ma nado kú whladopo dogọ pọ́n gbede tọn donukọnna yé! Whẹwhinwhẹ́n nankọtọn die na pẹdidona Jiwheyẹwhe owanyinọ fọnsọnku tọn, yèdọ Jehovah!—Heblu lẹ 11:35.
5. Nawẹ Eliṣa tindo mahẹ to azọ́njiawu de mẹ etlẹ yin to okú etọn godo gbọn?
5 Etlẹ yin to okú po dìdì Eliṣa tọn po godo, gbọn gbigbọ wiwe dali Jiwheyẹwhe hẹn ohú etọn lẹ yin huhlọnnọ. Mí hia dọmọ: “Le [Islaelivi delẹ] to dawe de di, wẹ, doayi e go, yé mọ awhàngbẹ́ [Moabinu tọn] de hlan; yé sọ ze dawe lọ dlan olidò Eliṣa tọn mẹ: ṣaun le dawe [oṣiọ] lọ jẹ ohú Eliṣa tọn lẹ ji, e [gọwá ogbẹ̀ to afọdopolọji, NW], bosọ fọ́n ṣite to afọ etọn lẹ ji.” (2 Ahọlu lẹ 13:20, 21) Lehe e na ko paṣa dawe enẹ bọ e na ko sọ jaya do sọ! Lẹnnupọndo ayajẹ he na yin numimọ etọn tindo to whenuena mẹyiwanna mítọn lẹ yin finfọ́n dogbẹ̀ to kọndopọmẹ hẹ lẹndai he ma na gboawupo Jehovah Jiwheyẹwhe tọn!
Visunnu Jiwheyẹwhe Tọn Fọ́n Oṣiọ Lẹ
6. Azọ́njiawu tẹwẹ Jesu wà sẹpọ todaho Naini tọn, podọ nawẹ nujijọ ehe sọgan yinuwado mí ji gbọn?
6 Visunnu Jiwheyẹwhe tọn, yèdọ Jesu Klisti ko na mí whẹwhinwhẹ́n he lodo lẹ na yiyise dọ oṣiọ lẹ sọgan yin finfọnsọnku, po nukundido ogbẹ̀ madopodo tọn po. Nujijọ de he wá aimẹ sẹpọ todaho Naini tọn sọgan gọalọna mí nado yọnẹn dọ azọ́njiawu mọnkọtọn de yọnbasi gbọn huhlọn heyin ninamẹ Jiwheyẹwhe tọn gblamẹ. To nujijọ dopo whenu, Jesu dukosọ hẹ mẹhe tin to aluẹmẹ lẹ de he hẹn oṣiọ visunnu jọja de tọn tọ́n sọn todaho lọ mẹ nado yin dìdì. E yin ovi dopo akàn asuṣiọsi de tọn. Jesu dọna ẹn dọmọ: “A sọ viavi blo.” Enẹgodo e doalọ ṣiọpotin lọ go bo dọmọ: “Visunnu, yẹn dọ hlan we, Fọ́n.” E sọ fọ́n sinai bosọ dọho. (Luku 7:11-15) Azọ́njiawu ehe hẹn nujikudo mítọn lodo na taun tọn dọ todido fọnsọnku tọn yin jide tọn.
7. Etẹwẹ jọ to kọndopọmẹ hẹ viyọnnu Jailu tọn?
7 Sọ lẹnnupọn ga, do nujijọ de he gando Jailu ji, yèdọ nukọntọ sinagọgu he tin to Kapẹlnaumi mẹ tọn de. E biọ to Jesu si nado wá bo gọalọna viyọnnu yiwanna owhe-12-mẹvi etọn, he tin to azọ̀nzanji sẹpọ okú. To madẹnmẹ e yin linlin etọn na dọ viyọnnu lọ ko kú. To tudidohomẹna Jailu he tin to awubla mẹ lọ nado yí yise zan mẹ, Jesu hodo e yì owhé etọn gbè, to fie gbẹtọgun lẹ to avivi te. Yé konu to whenuena Jesu dọna yé dọmọ: “Viyọnnu lọ ma ko kú gba, ṣigba amlọn wẹ e dọ́.” Ewọ ko kú na nugbo tọn, ṣigba Jesu jlo na dohia dọ gbẹtọ lẹ sọgan yin finfọ́n wá ogbẹ̀ kẹdẹdile yé sọgan yin finfọ́n sọn amlọn yìkànmẹ de mẹ do. To alọ viyọnnu lọ tọn go hinhẹn mẹ, e dọmọ: “Viyọnnu, tite.” E sọ fọ́n to afọdopolọ ji, podọ “avò vò mẹjitọ etọn lẹ” to aglinjijẹ mẹ. (Malku 5:35-43; Luku 8:49-56) Matin ayihaawe, ‘avò na vò’ hagbẹ whẹndo tọn lẹ to whenuena mẹyiwanna yetọn he ko kú lẹ yin finfọ́n dogbẹ̀ do paladisi aigba ji tọn de mẹ.
8. Etẹwẹ Jesu wà to yọdo Lazalọsi tọn kọ̀n?
8 Lazalọsi ko kú na azán ẹnẹ to whenuena Jesu dọnsẹpọ yọdo etọn bo biọ dọ yè ni de zannu he tin to onù etọn sẹ̀. To whenuena e ko hodẹ̀ to gbangba na nupọntọ lẹ nido yọnẹn dọ huhlọn he Jiwheyẹwhe nọ namẹ go wẹ ewọ ganjẹ godo, Jesu dọ po ogbè lélé po dọmọ: “Lazalọsi, jẹgbonu wá.” Podọ e sọ jẹgbonu wá! Alọ po afọ etọn lẹ po gbẹsọ tin to biblá to avọ̀ he nọ blá oṣiọ mẹ, podọ nukunmẹ etọn yin ṣinṣinyọ́n po avọ̀ po. “Mì tún in, bo gbọ e ni yì,” wẹ Jesu dọ. To azọ́njiawu ehe mimọ mẹ, susu mẹhe tin to finẹ nado miọnhomẹna nọviyọnnu Lazalọsi tọn, Malia po Malta po lẹ, tindo yise to Jesu mẹ. (Johanu 11:1-45) Be kandai ehe ma hẹn todido gọ́ ahun towe mẹ dọ mẹyiwanna towe lẹ sọgan yin finfọ́n dogbẹ̀ to aihọn yọyọ Jiwheyẹwhe tọn mẹ ya?
9. Naegbọn mí sọgan deji dọ Jesu sọgan fọ́n oṣiọ lẹ dogbẹ̀ todin?
9 To whenuena Johanu Baptizitọ tin to ganpa mẹ, Jesu do owẹ̀n tulinamẹ tọn ehe hlan dọmọ: “Nukuntọ́nnọ lẹ to númọ, . . . podọ yè to oṣiọ lẹ fọ́n do ogbẹ̀.” (Matiu 11:4-6) To whenuena e yindọ Jesu fọ́n oṣiọ lẹ dogbẹ̀ to whenuena e tin to aigba ji, ewọ na jide tọn sọgan wàmọ taidi nudida gbigbọnọ huhlọnnọ de heyin huhlọn na gbọn Jiwheyẹwhe dali. Jesu wẹ “fọnsọnku po ogbẹ̀ po,” podọ lehe e yin homẹmiọnnamẹnu do sọ nado yọnẹn dọ to sọgodo he ko sẹpọ lọ mẹ, “mẹhe tin yọdo [oflin tọn, NW] mẹ lẹpo na sè ogbè etọn bo na tọnjẹgbonu.”—Johanu 5:28, 29; 11:25.
Fọnsọnku Devo lẹ Hẹn Todido Mítọn Lodo
10. Nawẹ hiẹ na basi zẹẹmẹ fọnsọnku tintan heyin linlin etọn na heyin bibasi gbọn apọsteli de dali tọn gbọn?
10 To whenuena Jesu do apọsteli etọn lẹ hlan taidi yẹwhehodọtọ Ahọluduta tọn lẹ, e dọna yé dọmọ: “Mì nọ fọ́n oṣiọ lẹ do ogbẹ̀.” (Matiu 10:5-8) Nugbo wẹ dọ, nado wà ehe yé dona ganjẹ huhlọn Jiwheyẹwhe tọn go. To Jọppa to owhe 36 W.M., yọnnu jijọ-di-Jiwheyẹwhe tọn Dọlka (Tabita) damlọn to okú mẹ. Nuyiwa dagbe etọn lẹ bẹ awugbó lẹ bibasi na asuṣiọsi nuhudonọ lẹ hẹn, yèdọ mẹhe ṣẹnṣẹn okú etọn hẹn avi-vivi susugege wá te. Devi lọ lẹ ko wleawuna ṣiọdidi etọn bosọ dowẹn hlan apọsteli Pita, vlavo na homẹmiọnnamẹ. (Owalọ lẹ 9:32-38) E yàn mẹlẹpo jẹgbonu sọn abò aga tọn lọ mẹ, bo hodẹ̀, bosọ dọmọ: “Tabita, tite.” Ewọ sọ hùn nukun etọn lẹ, fọ́n sinai, hẹn alọ Pita tọn go, podọ e sọ ze e fọ́n. Fọnsọnku tintan heyin linlin etọn na heyin bibasi gbọn apọsteli de dali ehe hẹn mẹsusu lẹzun yisenọ. (Owalọ lẹ 9:39-42) E sọ na mí whẹwhinwhẹ́n dogọ lẹ ga na todido to fọnsọnku mẹ.
11. Fọnsọnku tẹwẹ yin godo tọn to kandai Biblu tọn mẹ?
11 Fọnsọnku godo tọn heyin kinkàndai to Biblu mẹ wá aimẹ to Tloa. To whenuena Paulu nọte to finẹ to gbejizọnlin mẹdehlan tọn atọ̀ntọ etọn ji, e dlẹnkanna hodidọ etọn kakajẹ zánhomẹ. Na yinyin hinhẹn gbọjọ gbọn nuṣikọ dali podọ vlavo na yozò miyọngban susu po ninọmẹ finfinyọn he tin to fie yé pli do tọn lọ po wutu, sunnu jọja de he yinkọ etọn yin Eutiku damlọn bosọ flẹ sọn fleṣe petlezìn atọ̀ntọ tọn ji. Yè “sọ ze e do ze oṣiọ,” e mayin didaku poun gba. Paulu dlẹn ede do Eutiku ji, gbò e fán, bosọ dọna nupọntọ lẹ dọmọ: “Mì dotukla mìde blo; na gbigbọ etọn tin to ohò etọn mẹ.” Paulu to didọ dọ ogbẹ̀ dawe jọja lọ tọn ko yin hinhẹngọwa. ‘E mayin vude wẹ e miọnhomẹna mẹhe tin to finẹ lẹ gba.’ (Owalọ lẹ 20:7-12) To egbehe, devizọnwatọ Jiwheyẹwhe tọn lẹ nọ mọ homẹmiọnnamẹ susugege yí to oyọnẹn lọ mẹ dọ gbẹdohẹmẹtọ dai tọn yetọn lẹ to sinsẹ̀nzọn Jiwheyẹwhe tọn mẹ na tindo numimọ hẹndi todido fọnsọnku tọn.
Fọnsọnku—Todido He Ko Tin-to-Aimẹ na Ojlẹ Dindẹn De
12. Nujikudo tẹwẹ Paulu dohia to whenuena e tin to Togán Feliksi Lomu tọn nukọn?
12 To whenuena e tin to owhẹ̀ nukọn to Togán Feliksi Lomu tọn nukọn, Paulu dekunnu dọmọ: “[Yẹn] to onú he yè wlan to [Osẹ́n] mẹ lẹpo, podọ to yẹwhegán lẹ mẹ yise: yẹn sọ tindo todido hlan Jiwheyẹwhe dè . . . dọ fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:14, 15) Nawẹ adà Ohó Jiwheyẹwhe tọn lẹ, taidi “Osẹ́n” lọ, dlẹnalọdo finfọ́n oṣiọ lẹ tọn gbọn?
13. Naegbọn e sọgan yin didọ dọ Jiwheyẹwhe basi alọdlẹndonu he mayin tlọlọ tọn hlan fọnsọnku to whenuena e dọ dọdai tintan lọ?
13 Jiwheyẹwhe lọsu na edetiti basi alọdlẹndonu he mayin tlọlọ tọn hlan fọnsọnku de to whenuena e dọ dọdai tintan to Edẹni mẹ. To whenuena e to whẹgbledomẹ “odàn hoho lọ,” yèdọ Satani Lẹgba tọn lá, Jiwheyẹwhe dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.” (Osọhia 12:9; Gẹnẹsisi 3:14, 15) Sisó afọgbẹn okún yọnnu lọ tọn zẹẹmẹdo hùhù Jesu Klisti tọn. Eyin Okún enẹ na só ota odàn lọ tọn to enẹgodo, Klisti dona yin finfọ́n sọn oṣiọ lẹ mẹ.
14. Nawẹ e yin dọ Jehovah “mayin Jiwheyẹwhe oṣiọ lẹ tọn gba, adavo mẹhe to ogbẹ̀ lẹ tọn gbọn”?
14 Jesu lá dọmọ: “Dọ yè fọ́n oṣiọ lẹ, yèdọ Mose dohia gbọn zùnkan lọ tọn dali, whenuena e ylọ Oklunọ dọ Jiwheyẹwhe Ablaham tọn, Jiwheyẹwhe Isaki tọn, podọ Jiwheyẹwhe Jakobu tọn. Dinvie e mayin Jiwheyẹwhe oṣiọ lẹ tọn gba, adavo mẹhe to ogbẹ̀ lẹ tọn: na gbẹtọ lẹpo wẹ tin to ogbẹ̀ hlan ẹn.” (Luku 20:27, 37, 38; Eksọdusi 3:6) Ablaham, Isaki, po Jakobu po ko kú, ṣigba lẹndai Jiwheyẹwhe tọn nado fọ́n yé sọnku yin jide tọn nado yin hinhẹndi sọmọ bọ yé taidi mẹhe ko tin togbẹ̀ nkọtọn lẹ hlan ẹn.
15. Naegbọn Ablaham tindo whẹwhinwhẹ́n nado yise to fọnsọnku mẹ?
15 Ablaham tindo whẹwhinwhẹ́n na todido tintindo to fọnsọnku mẹ, na to whenuena ewọ po asi etọn, Sala po, ko poyọnho taun, bọ yé ko sọ kú to nugopipe vijiji tọn mẹ, Jiwheyẹwhe gbọn azọ́njiawu dali hẹn huhlọn vijiji tọn yetọn lẹ gọdotẹnmẹ. Ehe tin taidi fọnsọnku de. (Gẹnẹsisi 18:9-11; 21:1-3; Heblu lẹ 11:11, 12) To whenuena visunnu yetọn, Isaki yin owhe 25 mẹvi, Jiwheyẹwhe dọna Ablaham nado yí ì do sanvọ́. Ṣigba, dile Ablaham ko jlo nado hù Isaki, angẹli Jehovah tọn hẹn alọ etọn dote. Ablaham ko “hia dọ, Jiwheyẹwhe tlẹ sọgan fọ́n [Isaki] dote sọn oṣiọ mẹ; sọn ehe mẹ e yí ì to apajlẹ mẹ.”—Heblu lẹ 11:17-19; Gẹnẹsisi 22:1-18.
16. Ablaham to amlọndọ to okú mẹ todin, bo to tenọpọn etẹ?
16 Ablaham tindo todido to fọnsọnku de mẹ to gandudu Mẹssia tọn, yèdọ Okún dopagbe lọ glọ. Sọn ninọmẹ dagbe gbẹninọ-jẹnukọnna gbẹtọvi tọn etọn mẹ, Visunnu Jiwheyẹwhe tọn doayi yise Ablaham tọn go. Taidi dawe lọ Jesu Klisti, e dọna Ju lẹ na enẹ tọn wutu dọmọ: “Ablaham otọ́ mìtọn jaya dọ ewọ nido mọ azán ṣie.” (Johanu 8:56-58; Howhinwhẹn lẹ 8:30, 31) Ablaham to amlọndọ to okú mẹ todin, bo to tenọpọn fọnsọnku de wá ogbẹ̀ do aigba ji to Ahọluduta Mẹssia tọn heyin Jiwheyẹwhe tọn glọ.—Heblu lẹ 11:8-10, 13.
Kunnudenu sọn Osẹ́n po Psalm lẹ po Mẹ
17. Nawẹ “onú he yè wlan to [Osẹ́n] mẹ lẹpo” dlẹnalọdo fọnsọnku Jesu Klisti tọn gbọn?
17 Todido he Paulu tindo to fọnsọnku mẹ tin to kọndopọmẹ hẹ “onú he yè wlan to [Osẹ́n] mẹ lẹpo.” Jiwheyẹwhe dọna Islaelivi lẹ dọmọ: “Mìwlẹ na hẹn okọ̀ sinsẹ́n-tintan lọ tọn lẹ sọn ojijẹ mìtọn mẹ wá yẹwhenọ lọ dè; ewọ [to 16 Nisan] bo na ze okọ̀ lọ hia to OKLUNỌ lọ nukọn, nado yin tẹalọyi na mì.” (Levitiku 23:9-14) Vlavo po osẹ́n ehe po to ayiha mẹ, Paulu wlan dọmọ: “Dinvie yè ze Klisti tite sọn oṣiọ lẹ mẹ, e sọ lẹzun sinsẹ́n tintan yé he damlọn [to okú mẹ, NW] lẹ tọn.” Taidi “sinsẹ́n tintan,” Jesu yin finfọnsọnku to 16 Nisan, owhe 33 W.M. To godo mẹ, to tintin tofi etọn whenu, fọnsọnku ‘sinsẹ́n he bọdego lẹ tọn’ de na tin—yèdọ hodotọ heyin dide gbọn gbigbọ dali etọn lẹ.—1 Kọlintinu lẹ 15:20-23; 2 Kọlintinu lẹ 1:21; 1 Johanu 2:20, 27.
18. Nawẹ Pita dohia dọ fọnsọnku Jesu tọn yin didọdai to Psalm lẹ mẹ gbọn?
18 Psalm lẹ lọsu sọ nọgodona fọnsọnku. To azán Pẹntikọsti tọn gbè to owhe 33 W.M., apọsteli Pita yihodọ sọn Psalm 16:8-11 mẹ, dọmọ: “Davidi dọho gbọn [Klisti] tọn dali, dọ, Yẹn mọ Oklunọ to whepoponu to nukọn ṣie, na e tin to adusilọ ṣie mẹ, na yè ma na do sẹtẹnna mi. Enẹwutu homẹ ṣie hùn, odẹ́ ṣie sọ jaya; humọ agbasa ṣie na gbọjẹ to tódido mẹ ga: na hiẹ ma na jo [alindọn] ṣie do kutomẹ, mọ hiẹ ma sọ to na dike mẹwiwe towe ni mọ ogble.” Pita yidogọ dọmọ: “[Davidi] ko mọ ehe dai, e dọ fọnsọnku Klisti tọn dọ, yè ma jo [alindọn] etọn do kutomẹ gba, mọ agbasa etọn ma sọ mọ ogble gba. Jesu he lọ wẹ Jiwheyẹwhe ze tite.”—Owalọ lẹ 2:25-32.
19, 20. Whetẹnu wẹ Pita yihodọ sọn Psalm 118:22 mẹ, podọ nawẹ ehe yin kinkọndopọ hẹ okú po fọnsọnku Jesu tọn po gbọn?
19 To azán delẹ godo, Pita ṣite to Tòhódọtọ Ju lẹ tọn nukọn bosọ yihodọ sọn Psalm lẹ mẹ whladopo dogọ. To whenuena yè kàn lehe e hẹnazọngbọna nubiọdùtọ sẹkunọ de do sè e, apọsteli lọ dọmọ: “Ehe ni yín yinyọnẹn hlan mì omẹ pó, podọ hlan omẹ Islaeli tọn lẹpo, dọ to oyín Jesu Klisti Nazalẹti tọn tọn mẹ, mẹhe mìwlẹ whè do [yatin, NW] go, bọ Jiwheyẹwhe ze tite sọn oṣiọ lẹ mẹ, yèdọ to oyín he mẹ wẹ dawe he ṣite to nukọn mìtọn to ofi to agbasalilo mẹ. Ewọ [Jesu ehe] wẹ ‘zannu lọ he yè gbọn alọ kọ́dotọ lẹ tọn mẹ gbẹdai, ehe sọ zun gángánsu họ̀lọnglọnẹn tọn.’ Humọ, whlẹngán ma sọ tin to mẹdevo dè; na oyín de ma tin to olọn glọ he yè namẹ to gbẹtọ mẹ he yè nado whlẹn mí gán.”—Owalọ lẹ 4:10-12.
20 Tofi Pita yihodọ sọn Psalm 118:22 mẹ, bo yí nuhe e dọ gando okú po fọnsọnku Jesu tọn po go zan. Na yinyin zodolanmẹna gbọn nukọntọ sinsẹ̀n tọn yetọn lẹ dali wutu, Ju lẹ gbẹ́ Jesu dai. (Johanu 19:14-18; Owalọ lẹ 3:14, 15) ‘Gbigbẹdai zannu lọ tọn gbọn họdotọ lẹ dali’ dekọtọn do okú Klisti tọn mẹ, ṣigba ‘lilẹzun gángánsu họlọnglọnẹn zannu lọ tọn’ nọtena yinyin finfọ́n do gigo gbigbọmẹ tọn mẹ to olọn etọn mẹ. Dile psalm-kàntọ lọ dọdai do, ‘ehe yin sọn Jehovah lọsu titi de.’ (Psalm 118:23) Hinhẹn “zannu lọ” lẹzun Gángánsu họlọnglọnẹn tọn bẹ zize ewọ daga taidi Ahọlu-Dide de hẹn.—Efesunu lẹ 1:19, 20.
Yin Hinhẹn Dote Gbọn Todido Fọnsọnku Tọn Dali
21, 22. Todido tẹwẹ Job dohia, dile e yin kinkàndai to Job 14:13-15 mẹ do, podọ nawẹ ehe sọgan miọnhomẹna mẹhe to aluẹmẹ to egbehe lẹ gbọn?
21 Dile etlẹ yindọ míwlẹ na mídetiti ma ko mọ mẹdepope yin finfọnsọnku pọ́n, mí ko doayi kandai Owe-wiwe tọn delẹ go he na jide mí gando fọnsọnku go. Enẹwutu, mí sọgan tindo yise to todido heyin didohia gbọn dawe dodonọ lọ Job dali mẹ. To whenuena e to yaji, e vẹvẹ dọmọ: “Ṣó dọ hiẹ [Jehovah] do whlá mi do yọdo mẹ, . . . dọ hiẹ do dè ojlẹ de na mi, bo nọ flin mi! Eyin omẹ de kú, be ewọ nasọ nọgbẹ̀ ba? . . . Hiẹ na ylọ yẹn nasọ siọ we: hiẹ do ko tindo ojlo de hlan azọ́n alọ towe lẹ tọn.” (Job 14:13-15) Jiwheyẹwhe na ‘tindo ojlo vẹkuvẹku na azọ́n alọ etọn tọn lẹ,’ yèdọ tindo ojlo sinsinyẹn nado fọ́n Job sọnku. Todido nankọtọn die enẹ na míwlẹ!
22 Hagbẹ whẹndo budisi Jiwheyẹwhe tọ́ de tọn sọgan jẹazọ̀n sinsinyẹn, dile e yin do na Job, bo tlẹ sọgan sọ jogbe na kẹntọ lọ okú. Mẹhe tin to aluẹmẹ lẹ sọgan viavi awubla tọn, yèdọ dile Jesu viavi do okú Lazalọsi tọn ji do. (Johanu 11:35) Ṣigba lehe e yin homẹmiọnnamẹnu do sọ nado yọnẹn dọ Jiwheyẹwhe na ylọ bọ mẹhe tin to oflin etọn mẹ lẹ na siọ! E na taidi dọ yé ko lẹkọ sọn gbejizọnlin de ji nkọtọn—bo ma tindo awugble kavi nuṣikọ gba, ṣigba tin to agbasalilo dagbe mẹ.
23. Nawẹ mẹdelẹ ko do jidide yetọn to todido fọnsọnku tọn mẹ hia gbọn?
23 Okú Klistiani mẹhomẹ nugbonọ de tọn whàn yisenọ hatọ lẹ nado wlan dọmọ: “Jaale kẹalọyi awuvẹmẹ sisosiso mítọn do hẹnbu onọ̀ towe tọn ji. Ojlẹ gli de poun wẹ e na yin kakajẹ whenuena mí na do kuavọna ẹn lẹkọ—to whanpẹ po huhlọn po mẹ!” Mẹjitọ he hẹn visunnu yetọn bu lẹ dọmọ: “Lehe míwlẹ to nukọnpọnhlan na azán lọ to whenuena Jason na fọnsọnku do sọ! E na pọ́n lẹdo ede bo na mọ Paladisi he e ko tindo ojlo na sọmọ lọ. . . . Ojlofọndotenamẹnu nankọtọn die na mí mẹhe yiwanna ẹn lẹ nado tin to finẹ ga.” Mọwẹ, podọ lehe mí na dopẹ́ sọ dọ todido fọnsọnku tọn yin jide tọn!
Etẹwẹ Yin Gblọndo Towe?
• Nawẹ yise to awuwledainanu Jiwheyẹwhe tọn mẹ na oṣiọ lẹ finfọ́n yin alemọyinu na mí gbọn?
• Nujijọ heyin kinkàndai to Owe-wiwe lẹ mẹ tẹlẹ wẹ na whẹwhinwhẹ́n mí nado tindo todido to fọnsọnku mẹ?
• Naegbọn e sọgan yin didọ dọ fọnsọnku yin todido he ko dẹn-to-aimẹ de?
• Todido mẹhẹndote tọn tẹwẹ mí sọgan tindo gando oṣiọ lẹ go?
[Kanbiọ Oplọn Tọn Lẹ]
[Yẹdide to weda 10]
Po huhlọn sọn Jehovah dè po, Elija hẹn visunnu jọja asuṣiọsi de tọn gọwá ogbẹ̀
[Yẹdide to weda 12]
To whenuena Jesu fọ́n viyọnnu Jailu tọn dogbẹ̀, avò vò mẹjitọ etọn lẹ na aglinjijẹ
[Yẹdide to weda 15]
To azán Pẹntikọsti 33 W.M. tọn gbè, apọsteli Pita yí adọgbigbo do dekunnu dọ Jesu ko yin finfọ́n dogbẹ̀ sọn oṣiọ lẹ mẹ